Jehova Ulakondwa Nomumumvwida

“Songwaala, mwanaangu, ukondezye moyo wangu.”—TUSIMPI 27:11.

1. Muuya nzi uuliko sunu munyika?

MUUYA wakuyanda kulyeendelezya alimwi awakutayanda kumvwida nkuuli munyika sunu. Mwaapostolo Paulo wakapandulula mulugwalo lwakwe ku Banakristo bana Efeso ncocili boobo naakati: “[Zimwi ziindi] mwakali kweendela mulinzizyo insiku, cakutobela ziimbo zyaansi ano azyamweendelezi uujisi bwami bwakumuuwo, nguwenya muuya uubeleka sunu mumyoyo yabana bakasampusampu.” (Ba-Efeso 2:1, 2) Inzya, Saatani Diabolosi ‘mwami waluwo,’ wainyonganya nyika yoonse amuuya wakutamvwida. Wakali kucita oobo mumwaanda wamyaka wakutaanguna, alimwi ucicita oobo kuzwa ciindi naakatandwa kujulu kaiyanda kutalika Nkondo ya Nyika Yakusaanguna alimwi asunu ucijisi bubi.—Ciyubunuzyo 12:9.

2, 3. Ntwaambo nzi ntotujisi tutupa kuti katumuswiilila Jehova?

² Nokuba boobo, Tobanakristo tulizyi kuti tweelede kumumvwida Jehova Leza camoyo oonse nkaambo kakuti Mulengi wesu, Nguutuponya, Mwami wesu siluyando alimwi ngo Mufwutuli wesu. (Intembauzyo 148:5, 6; Incito 4:24; Ba-Kolose 1:13; Ciyubunuzyo 4:11) Bana Israyeli bakumazuba aa Musa bakalizyi kuti Jehova wakali ngo Sikubapa Buumi alimwi ngo Muvwuni wabo. Aboobo Musa wakabaambila kuti: “Amucenjele kuti mucite zintu zyoonse Jehova Leza wanu nzyamulailila.” (Deutoronomo 5:32) Masimpe Jehova wakaleelede kumvwidwa. Pele mukaindi buyo kasyoonto bakaleka kumumvwida Leza wabo.

³ Ino kuyandika buti kumvwida kwesu ku Mulengi wajulu anyika? Lumwi lweendo Leza  wakaambila Samuele musinsimi ikwaambila Mwami Saulo kuti: “Kuswiilila nkubotu kwiinda kupaila.” (1 Samuele 15:22, 23) Nkaambo nzi eeci ncocili boobu?

Kumvwida Mbokuli ‘Kubotu Kwiinda Cipaizyo’

4. Muunzila nzi mbotukonzya kumupa Jehova cintu cimwi?

⁴ Akaambo kakuti Jehova Mulengi, zyoonse zintu nzyotujisi zyakumubili nzizyakwe. Mbwaanga cili boobo, sena kuli cintu ncotukonzya kumupa? Inzya nkocili, tulakonzya kumupa cintu ciinda kubota. Ncintu nzi eeco? Tulakonzya kujana bwiinguzi kwiinda mukuccilila lulayo lwakuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.” (Tusimpi 27:11) Tulakonzya kumupa cintu Leza, ikwiinda mukumuswiilila. Nokuba kuti tuliindenyi bukkale ambotwakakomena, kwiinda mukumumvwida Leza, aumwi ulakonzya kugwasya mukukazya majwi aa Saatani Diabolosi ngaakati bantu tabakonzyi kuzumanana kusyomeka kuli Leza kuti basikilwa mapenzi. Elo ncoolwe nobantu!

5. Mbuti kutaswiilila mbokumukopa Mulengi? Amwaambe cikozyanyo.

⁵ Jehova ulabikkila maano kuzintu nzyotusala. Ikuti tiitwaswiilila, cilamusulula. Mubuti? Cilamucisa kumoyo kubona muntu nkwabweza nzila iitali kabotu. (Intembauzyo 78:40, 41) Mucikozyanyo, ikuti muntu uuciswa bulwazi bwasyuka tanaaccilila mulongo wazyakulya nzyeelede kulya kutegwa abe abuumi bubotu, watalika kwiile kulya kufwumbwa cazya kumoyo, ino mbuti musilisi wakwe mbwakonzya kulimvwa? Tulakonzya kuba masimpe kuti Jehova cilamucisa kumoyo bantu nobatamuswiilili, nkaambo walo ulizyi zikonzya kuccilila mubuumi ikuti nzyaamba zyataccililwa.

6. Ncinzi ciya kutugwasya kutegwa katumumvwida Leza?

⁶ Ncinzi cikonzya kumugwasya aumwi kutegwa katumvwida? Cilayandika aumwi kulomba Leza kuba ‘amoyo uumvwa’ mbuli bwakacita Mwami Solomoni. Wakalomba kuba amoyo uuli boobo kutegwa kakonzya “kwaandaanya bubotu abubi” akukonzya kubeteka bana Israyelinyina. (1 Bami 3:9) Tweelede kuba ‘amoyo uumvwa’ kutegwa tukonzye kwaandaanya bubotu abubi munyika iijisi muuya wakutamvwida. Leza wakatupa Jwi lyakwe, mabbuku aagwasya kwiiya Bbaibbele, miswaangano ya Bunakristo, abaalu bamumbungano balanganya kutegwa tukonzye kuba ‘amoyo uumvwida.’ Sena tulazibelesya eezyi nzyaatupa?

7. Nkaambo nzi Jehova kumvwida ncakukankaizya kuti kulayandika kapati kwiinda zituuzyo?

⁷ Kweelana amakani aaya, amuyeeye kuti Jehova kaindi wakaambila bantu bakwe bansiku kuti, kumvwida kwakali kuyandika kapati ikwiinda cituuzyo camunyama. (Tusimpi 21:3, 27; Hosea 6:6; Matayo 12:7) Nkaambo nzi ncocakali boobo, kakuli ngu Jehova wakalailide bantu bakwe kutuula zituuzyo zili boobo? Aabona inga mwabuzya kuti, ino makanze nzi ngajisi muntu ooyo uutuula cituuzyo? Sena ulacita oobo kayanda kukkomanisya Leza? Naa wiile kuccilila buyo tunsiya-nsiya? Ikuti mukombi kali masimpe kuti uyanda kukkomanisya Leza, uya kubona kwaamba kuti waiccilila milawo yoonse ya Leza. Leza tapengede zituuzyo zyanyama, pele kumvwida kwesu ncecintu ciyandika kapati ncotukonzya kumupa.

Cikozyanyo Cakucenjezya

8. Nkaambo nzi Leza ncaakamukakila Saulo kuba mwami?

⁸ Makani aamu Bbaibbele aamba zya Mwami Saulo alatondezya mbociyandika kuswiilila. Saulo wakatalika kulela kali muleli uulibombya, ‘wakali muniini mumeso aakwe.’ Pele mukuya kwaciindi, kulisumpula akutayeeya munzila iili kabotu bwakaba mbobuumi. (1 Samuele 10:21, 22; 15:17) Buzuba bumwi Saulo wakali kulangilwa kulwana nkondo aba Filisiti. Samuele wakamwaambila mwami Saulo kuti amulindile kutegwa azikutuule zituuzyo kuli Jehova alimwi akumupa malailile aamwi. Nokuba boobo, Samuele tanaakasika aciindi ncaakali kulangilwa, eelyo bantu bakatalika kumwaikizyanya. Abone boobo Saulo “wakatuula zituuzyo.” Eeci cakamusulula Jehova. Naakasika Samuele, mwami wakalitamizya cakamupa kutaccilila kati nkaambo Samuele wamuka kusika  ‘walisinikizya’ kutuula cituuzyo kutegwa Jehova amuyande. Ku Mwami Saulo ikutuula cituuzyo eeco cakali kuyandika kapati kwiinda kuccilila malailile ngaakapegwa aakuti amulindile Samuele kutegwa azikutuule cituuzyo eeco. Samuele wakamwaambila kuti: “Wacita cabufubafuba. Teewatobela mulao wa-Jehova Leza wako ngwaakakulailila.” Akaambo kakutamumvwida Jehova, Saulo wakaleka kuba mwami.—1 Samuele 10:8; 13:5-13.

9. Mbuti Saulo mbwaatakamumvwida Leza?

⁹ Sena mwami wakaiya ciiyo kuli ceeco cakamucitikila? Peepe. Kwiinde ciindi Jehova wakamulailila Saulo kuti anyonyoone munzi wa Amaleki walo iwakalwanide Israyeli kakutako akaambo. Saulo tanaakeelede kwiile kuzilanga buyo zivwubwa zyabo. Wakamumvwida Jehova “[naa]kauma ba-Amaleki kuzwa ku-Havila kusikila ku-Suri.” Pele Samuele naakaboola kuti amubone, cakukondwa mwami akaambo kakuti wakazunda wakati: “Uli acoolwe kuli-Jehova. Ndacita mbuli mbwaakalailila Jehova.” Pele kwiindana amalailile aasalade ngobakapegwa, Saulo abantu bakwe tiibakamujaya Mwami Agagi alimwi “ambelele imbotu aŋombe imbotu ambelele zineneede . . . azintu zyoonse zibotu.” Mwami Saulo wakalitamizya kukutaswiilila kwakwe kwiinda mukwaamba kuti: “Bantu bakaleka imbelele imbotu aŋombe imbotu zyakupaizya kuli-Jehova Leza wako.”—1 Samuele 15:1-15.

10. Nciiyo nzi Saulo ncaatakaiya?

¹⁰ Aciindi aawa Samuele wakaambila Saulo kuti: “Sa Jehova ulabotelwa zipaizyo azituuzyo mbuli kuswiilila majwi aa-Jehova? Bona! Kuswiilila nkubotu kwiinda kupaila, kuzumina nkubotu kwiinda mafuta aabagutu bambelele.” (1 Samuele 15:22) Mbwaanga Jehova wakalisainide kuti zivwubwa eezyo nzyakeelede kujaigwa, tiizyakali kukonzya kutambulwa kuba zituuzyo.

Amusyomeke Muzintu Zyoonse

11, 12. (a) Ino Jehova ukubona buti kukomba kwesu nkotucita kuli nguwe? (b) Ino mbuti muntu mbwakonzya kulyeena kwiinda mukuyeeya kuti ucita kuyanda kwa Leza kakuli mubwini ucita zitaluzi?

¹¹ Jehova ulakkomana nabona babelesi bakwe basyomeka nobazumanana kusyomeka nokuba kuti kuli kupenzyegwa, nobakambauka Bwami nokuba kuti balisulidwe abantu banji, alimwi tabaleki kujanika kumiswaangano ya Bunakristo nekuba kuti balijisi penzi lyamali. Kusyomeka kwesu munzila eeyi iiyandika kapati yakumuuya kupa kuti akkomane kapati. Kukomba kwesu nkotucita kuli Jehova kulamukonda ikuti kwacitwa akaambo kakumuyanda. Bantu balya maila tabakuboni kubeleka nkotucita canguzu, pele Leza ulakubona kutuula kwesu nkotucita camoyo omwe alimwi takulubi.—Matayo 6:4.

¹² Nokuba boobo, ikutegwa katumukkomanisya kapati Leza wesu, tweelede kuti katusyomeka mubuumi. Tatweelede kulyeena kwiinda mukuyeeya kuti tulakonzya kuleya munzila zya Leza, katuyeeya kuti taaku mbocibede kufwumbwa buyo kuti katumukomba nkunji. Mucikozyanyo, muntu ulakonzya kulyeena kwiinda mukuyeeya kuti, ikuti kakomba cakwiinzya buyo mulawo, takonzyi kusubulwa ikuti wacita bwaamu naa kucita milimo iimwi yamamvwunze. Ooko inga kwaba kutayeeya kabotu.—Ba-Galatiya 6:7, 8.

13. Ino mbuti mbotukonzya kusunkwa kumakani aakusyomeka kwesu kuli Jehova notuli tolikke?

¹³ Aboobo tulakonzya kulibuzya kuti: ‘Sena ndilamumvwida Jehova mumilimo njondicita abuzuba noiba yeeyo miniini iitabonwi abantu?’ Jesu wakati: “Uusyomekede kuciniini ulisyomekede akucipati, uutaluleme kuciniini taluleme akucipati.” (Luka 16:10) Sena ‘tuleenda camoyo uululeme’ nomuba ‘muŋanda eesu’ oomo bantu mobatatuboni? (Intembauzyo 101:2) Inzya, notuli muŋanda yesu tulakonzya kunjila mumusunko. Mumasi manji makkompyuta mwaali manji, kweebela zifwanikiso zisesemya ncuuba-uba. Kwamyaka misyoonto yainda, tiicakali kukonzyeka kumuntu kubona zifwanikiso eezyi ccita buya waya mumasena mobatondezya. Sena inga tacigwasyi kuccilila majwi aa Jesu aakuti: “Umwi aumwi uulangilila mwanakazi cakumusukama ulimucitide kale bumambi mumoyo wakwe”? Sena masimpe tatukazilangi zifwanikiso zisesemya? (Matayo 5:28; Jobu 31:1, 9, 10; Intembauzyo 119:37;  Tusimpi 6:24, 25; Ba-Efeso 5:3-5) Ino mbuti mapulogilamu aacipekupeku aajisi zisobano zyankondo? Sena twazuminana a Leza wesu walo ‘uusulide bayanda lupyopyongano’? (Intembauzyo 11:5) Ino mbuti kwiindilizya kunywa bukoko cakusisikizya? Ibbaibbele lilikusulide kukolwa, pele alimwi lilabacenjezya Banakristo kutaba acilengwa ‘cakwiindilizya kunywa bukoko.’—Tito 2:3; Luka 21:34, 35; 1 Timoteo 3:3.

14. Ino muunzila nzi motukonzya kutondezya kuti tulamuswiilila Leza caboola kumakani aamali?

¹⁴ Aamwi makani ngotweelede kucenjelela, mmakani aamali. Mucikozyanyo, sena inga twayanda kuba bamuvwubaccacca kwiinda mukubelesya nzila zyabumpelenge? Sena tubelesya nzila zitali kabotu kutegwa tutateli mitelo? Ambweni, sena tulaluccilila lulayo lwakuti “amupe bantu boonse mbubeelede. Oyo uueledwe mutelo, amumupe mutelo”?—Ba-Roma 13:7.

Kumvwida Kuba Akaambo Kaluyando

15. Nkaambo nzi ncomumvwida milawo ya Jehova?

¹⁵ Kumvwida mulawo wa Leza kuletela zilongezyo. Mucikozyanyo, kutafweba, kulilemeka, alimwi akulemeka kusetekana kwabulowa, kulakonzya kutugwasya kutaba amalwazi aaboola amilimo eeyi. Kuyungizya waawo, kwiinda mukupona kweelana akasimpe kamu Bbaibbele, munzila imwi tulakonzya kugwasyigwa kwiinda mukutasowaila lubono. (Isaya 48:17) Kufwumbwa kugwasyigwa kwakumubili kuli koonse kulakonzya kubonwa kuti ndulongezyo lwalo lutondezya mboili mibotu milawo ya Leza. Pele kaambo kapati katupa kumumvwida Jehova, nkakuti tulamuyanda. Tatumubelekeli Leza akaambo kakuyanda lubono. (Jobu 1:9-11; 2:4, 5) Leza wakatupa lwaanguluko lwakusala kufwumbwa ngotuyanda kumvwida. Tusala kuswiilila Jehova nkaambo tuyanda kuti tumukkomanisye alimwi akaambo kakuti tuyanda kucita cili kabotu.—Ba-Roma 6:16, 17; 1 Johane 5:3.

16, 17. (a) Mbuti Jesu mbwaakatondezya kumvwida Leza akaambo kaluyando ndwaakajisi kuli nguwe? (b) Mbuti mbotukonzya kumwiiya Jesu?

 ¹⁶ Jesu wakasiya cikozyanyo cibotu cakumvwida Jehova akaambo kaluyando ndwaakajisi kuli nguwe. (Johane 8:28, 29) Jesu naakali anyika, “wakaiya kumvwa mumapenzi aakwe.” (Ba-Hebrayo 5:8, 9) Mubuti? Jesu “wakalibombya akuzumina nikuba kufwa, nkukuti kufwa kwakubambulwa [acisamu cakupenzyezya.]” (Ba-Filipo 2:7, 8) Nokuba kuti kujulu Jesu wakali kumvwida, ikumvwida kwakwe kwakalangwa-langwa alimwi anyika. Tulakonzya kuba masimpe kuti Jesu uleelela kubeleka kali Mupaizi Mupati kubanyina bakumuuya kubikkilizya abaya kukkala anyika ibacita kuyanda kwa Leza.—Ba-Hebrayo 4:15; 1 Johane 2:1, 2.

¹⁷ Ino mbuti swebo? Tulakonzya kumwiiya Jesu kwiinda mukukubikka ampela kucita kuyanda kwa Leza. (1 Petro 2:21) Aumwi ulakonzya kukkomana ikuti luyando lwesu kuli Leza lwatupa kucita ncayanda Jehova, nomuba muziindi nokwaba musunko. (Ba-Roma 7:18-20) Eeci cilabikkilizya akumvwida busolozi buzwa kuli baabo basololela mubukombi bwakasimpe, nekuba kuti tabalondokede. (Ba-Hebrayo 13:17) Kuswiilila malailile aa Leza notuli mubusena busisikide kulayandika kapati kumeso aa Jehova.

18, 19. Ino mbubotu nzi mbotujana notumumvwida Leza camoyo woonse?

¹⁸ Mazuba aano ikumvwida Jehova kulakonzya kubikkilizya akuliyumya kukupenzyegwa kutegwa tuzumanane kusyomeka. (Incito 5:29) Akwalo kuswiilila malailile aa Jehova aakukambauka akuyiisya bantu kuyandika kuliyumya kusikila kumamanino. (Matayo 24:13, 14; 28:19, 20) Tweelede kuliyumya kutegwa tuzumanane kubungana abakwesu nokuba kuti munyika kuli zimana maano. Leza wesu siluyando ulizyi kabotu mbotusoleka kumumvwida mumbazu eezyi. Nokuba boobo, ikutegwa tumumvwide kapati, tweelede kukulwana kutalondoka kwesu akuleka zibi kakuli kumwi tuyandisya kucita zintu zili kabotu.—Ba-Roma 12:9.

¹⁹ Ikuti katumukomba Jehova akaambo kaluyando ndotujisi kuli nguwe alimwi camoyo oonse, uya kutupa bulumbu nkaambo “ulapa bulumbu kuli baabo bamuyandaula.” (Bahibulu 11:6, Ci) Zituuzyo zili kabotu zilayandika alimwi zilatambulwa, pele kumvwida kwamoyo woonse akaambo kaluyando ndotujisi kuli Jehova ncecintu ciinda kumukonda.—Tusimpi 3:1, 2.

Mbuti Mbomukonzya Kwiingula?

• Nkaambo nzi ncotukonzya kwaamba kuti tulijisi cintu cimwi cakupa Jehova?

• Nkulubuzya kuli buti Saulo nkwaakalulizya?

• Mbuti mbomukonzya kutondezya mumilimo yanu kuti kumvwida nkubotu ikwiinda cituuzyo?

• Ncinzi cimupa kuti kamumumvwida Jehova?

[Mibuzyo yaciiyo]

[Zifwanikiso izili apeeji 22]

Sena mulaccilila malailile aa Leza nomuli molikke muŋanda?