Sena Mwakabisyila Muuya Uusalala?
Sena Mwakabisyila Muuya Uusalala?
“Nkukwaamba kuti abo batabisyi zibi zyalufu.”—1 JOHANE 5:16.
1, 2. Ino tuziba buti kuti cilakonzyeka kubisyila muuya uusalala wa Leza?
“NDAKAKOPANA nindakaziba kuti ndakalubizila muuya uusalala.” Mbwaakalemba mukaintu waku Germany mubelesi wa Leza. Sena Munakristo ulakonzya kulubizila muuya wa Leza uusalala naa nguzu zya Leza?
2 Masimpe cilakonzyeka kulubizila muuya uusalala wa Jehova. Jesu Kristo wakati: “Nkaambo kaako ndamwaambila kuti, Leza ulakonzya kumulekelela muntu cibi coonse, niciba cakumusampula. Pele kuti naa muntu wasampaula Muuya Uusalala takooyoolekelelwa pe.” (Mateyo 12:31, Ci) Tucenjezegwa kuti: “Kuti twabisya acaali munsi lyakumana kutambula kuziba kwinikwini, takucipailwa limbi cipaizyo cazibi, pele kwasyaala buyo kulangila kubetekwa kuyoosya, abukali bwamulilo wakutensya basinkondonyina Leza.” (Ba-Hebrayo 10:26, 27) Alimwi mwaapostolo Johane wakalemba kuti: “Nkukwaamba kuti abo batabisyi zibi zyalufu.” (1 Johane 5:16) Pele sena cicaalila yooyo wabisya ikuziba kuti naa wabisya ‘cibi calufu’?
Kweempwa Kupa Kulekelelwa
3. Ncinzi cikonzya kucitika ikuti naa catucima kapati akaambo kakulubizya nkutwakacita?
3 Jehova nguukonzya kubabeteka aabo babisya. Masimpe toonse buyo tweelede kulyaambilila makani esu kuli Leza, nkaambo lyoonse ucita ziluleme. (Matalikilo 18:25; Ba-Roma 14:12) Jehova nguuziba naa twacita cibi citakonzyi kulekelelwa, alimwi ulakonzya kuugusya muuya wakwe kuli ndiswe. (Intembauzyo 51:11) Ikuti naa catucima kapati akaambo kakulubizya nkotwacita, eeci inga catondezya kuti tweempwa. Ino kweempwa caamba nzi?
4. (a) Ino caamba nzi kweempwa? (b) Ino majwi aasintembauzyo aali ku Intenbauzyo 103:10-14 atukulwaizya buti?
4 Kweempwa caamba kucinca bukkale bwesu naa kuzilekela limwi zibi nzitwakali kucita. Alimwi caamba kutyompwa naa kuusa kucintu cakacitwa. Ikuti naa twabisya kapati, twamana twabweza ntaamo iiyandika iitondezya kuti tweepwa, tulakonzya kuyumizigwa amajwi aasintembauzyo aakuti: “Tana kutucitila mbuli zibi zyesu, nikuba kutuboozezya mbuli insendami zyesu. Nkaambo ijulu mbulili idamfu kwiinda nyika, mbubonya obo mbulukomede luzyalo lwakwe kulibaabo bamuyoowa. Mbuli kujwe mbokuli kule kuzwa kumbo, mbuboobu mbwaalampya insotoko zyesu kuzwa kulindiswe. Mbuli muntu mbwafwida bana bakwe luzyalo, alakwe Jehova ulabafwida luzyalo abo bamuyoowa. Nkaambo ulizi mbububede buntu bwesu, ulaibulukwa kuti tuli bulongo buyo.”—Intembauzyo 103:10-14.
5, 6. Amwaambe twaambo tupati-pati tuli ku 1 Johane 3:19-22 akupandulula majwi aamwapostolo ncaamba.
5 Alimwi amajwi aamwapostolo Johane alakulwaizya akuti: “Mbuboobu mbutuzi kuti tuli basilusinizyo, alimwi tuzootontozya myoyo yesu kunembo lyakwe, kufumbwa kumakani ngiitupa mulandu myoyo yesu. Nkaambo Leza mupati kwiinda myoyo yesu, alimwi ulizi zintu zyoonse. Nobayandwa, kuti myoyo yesu tiitupi mulandu, elyo tulijisi kaanzambwene kunembo lya-Leza. Coonse ncitukumbila kulinguwe tulacitambula, nkaambo tulabamba milazyo yakwe akucita ezyo zintu zibotezya kumeso aakwe.”—1 Johane 3:19-22.
6 “Mbutuzi kuti tuli basilusinizyo” tulabayanda bakwesu alimwi tatuyandi kuti katubisya. (Intembauzyo 119:11) Ikuti naa twakopana akaambo kakaambo kamwi, tweelede kuyeeya kuti “Leza mupati kwiinda myoyo yesu.” Jehova ulatufwida lubomba nkaambo ulizi “mbomuyandana abasyominyoko,” inkondo njotulwana kumana cibi akusoleka nkotucita kucita kuyanda kwakwe. (1 Pita 1:22, Ci) Imyoyo yesu “tiitupi mulandu” kuti katusyoma muli Jehova, katubayanda bakwesu akuti katutabisyi caali. Aboobo “[tunoo]jisi kaanzambwene kunembo lya-Leza” notupaila awalo uyakwiingula mupalo wesu akaambo kakutobela malailile aakwe.
Bakabisyila Muuya
7. Ino ncinzi cipa kuti muntu alekelelwe naa pe?
7 Ino nzibi nzi zitalekelelwi? Kwiingula mubuzyo ooyu, atulange zikozyanyo zyamu Bbaibbele. Eeci cilakonzya kutukulwaizya ikuti tweempwa kuzibi nzyotwacita nokuba kuti zyicitukatazya. Takali nkakaambo ikuziba cibi ncaakacita muntu ooyu, pele nkuziba ncaakali kuyeeya mumoyo alimwi ambwaakayandide kucita cibi eeco, ncecikonzya kupa kuti alekelelwe naa pe.
8. Ino mbuti basololi bana Juda bamumwaanda yamyaka wakusaanguna mbubakalubizila muuya uusalala?
8 Basololi bazikombelo bana Juda bamumwaanda yamyaka wakutaanguna ibakakazya Jesu Kristo bakali kubisyila muuya uusalala. Bakaubona muuya wa Leza kaubeleka muli Jesu ciindi naakali kucita maleele aatembaula Jehova. Pele aba basinkondonyina Kristo bayeeya kuti inguzu eezi zizwa kuli Saatani Diabolosi. Kweelana a Jesu, aabo bakali kusampaula muuya uusalala wa Leza, bakali kucita cibi citakonzyi kulekelelwa “kuciindi ecino nikuba kuciindi ciza.”—Matayo 12:22-32.
9. Ino kusampaula ninzi, alimwi ino Jesus wakaamba nzi kumakani aaya?
9 Kusampaula nkwaamba cakubeja, kuyandisya zintu zibi, naa kubelesya mwaambo uutali kabotu. Mbwaanga muuya uusalala wakazwa kuli Leza, ikwaamba zintu zitaluzi kumuuya ncimwi buyo akufwubaazya Jehova. Ikuzumanana kubelesya mwaambo uuli boobo inga tolekelelwi pe. Jesu waamba baabo ibakazya mbuubeleka muuya uusalala wa Leza, ncicakamupa kuti aambe majwi aali boobu. Akaambo kakuti Bafarisi bakaubona muuya wa Jehova kaubeleka muli Jesu, bamane bakaamba kuti nguzu zyakazwa kuli Diabolosi, ooku kwakali kusampaula muuya. Aboobo Jesu wakati: “Oyo uusanka Muuya Uusalala taakwe anati kalekelelwe pe, uli amulandu wacibi citamani.”—Marko 3:20-29.
10. Nkaambo nzi Jesu ncaakati Judasi “wakeelede kunyonyooka”?
10 Amubone alimwi kaambo ka Juda Islariote. Tanaakali kusyomeka, wakali kubba munkomwi yamali njaakapedwe kuyobola. (Johane 12:5, 6) Nokwakainda ciindi Judasi wakaunka kubasololi bana Juda kubaambila mbwakonzya kwaaba Jesu amali aansiliva aali makumi otatwe. Inzya Judasi nakaamana kumwaaba wakaba asoni pele tanaakeepwa pe kucibi ncaakacita caali. Alimwi Judasi tayeleli kubusyigwa pe. Nkakaambo kaako Jesu cakamwaambila kuti “wakeelede kunyonyooka.”—Joni 17:12, Ci; Matayo 26:14-16.
Tiibakabisyila Muuya
11-13. Ino Mwami Davida wakalubizya nzi a Bateseba alimwi nkuyumayumizigwa kuli buti nkotukonzya kujana kweelana ambwaakaalanganya makani Leza?
11 Zimwi ziindi Banakristo nibalyaambila zibi zyabo akutambula lugwasyo lwakumuuya kuzwa kubaalu mumbungano kutegwa bazumanane kumvwana a Jehova, aaba bantu inga bacityopedwe akaambo kakutyola mulawo wa Leza. (Jakobo 5:14) Ikuti katupengede munzila iili boobu, inga twagwasigwa a Magwalo aamba baabo bakalekelelwa zibi zyabo.
12 Mwami Davida wakabisya kapati a Bateseba muka Uriya. Davida naakali aciluli wakabona mukaintu mubotu kasamba munsi aaŋanda, aboobo wakamuleta muŋanda yabwami akoona anguwe. Nikwakainda ciindi bakamuzibya kuti mukaintu wamita, Davida wakacita bubambe bwakuti Uriya awone amukaintu wakwe kutegwa mukondo uzibaane. Niyatakabeleka nzila eeyi, imwami wakacita bubambe bumbi bwakuti Uriya ajaigwe munkondo. Naakamana kucita boobu Davida wakamukwata Bateseba, bakazyala mwana pele tanaakakkala.—2 Samuele 11:1-27.
13 Jehova wakaalanganya makani aajatikizya Davida a Bateseba. Leza wamulekelela Davida akaambo kakulilekelela alimwi Leza wakacita oobo akaambo kacisyomezyo ca Bwami ncibakamvwana. (2 Samuele 7:11-16; 12:7-14) Kuboneka kuti awalo Bateseba wakeempwa aboobo wakaba acoolwe cakuba banyina Mwami Solomoni alimwi abakaapanyina Jesu Kristo. (Matayo 1:1, 6, 16) Ikuti naa twabisya inga cagwasya kuyeeya kuti Jehova ulaziba kuti twalilekelela.
14. Ino mbuti kulekelela kwa Leza mbokutondezyegwa kumakani aa Mwami Manase?
14 Ikulekelela kwa Jehova kwakatondezyegwa aku Mwami Manase waku Juda. Wakacita zibi mumeso aa Jehova. Manase wakayaka zipaililo zya Bbaala alimwi wakali kukomba “makamu oonse aakujulu” alimwi buya wakayaka zipaililo zyabaleza bakubeja mumabbuwa obilo aatempele. Wakainzya bana bakwe mumulilo, kwakali bulozi akusonda, alimwi wakabapa kuleya ba Juda abantu bamu Jerusalemu, aboobo “bakacita bubi kwiinda bamasi Jehova mbaakatandide kubusyu bwaba-Israyeli.” Ikucenjezya kwakacitwa amusinsimi wa Leza tiibakakuccilila. Mukuya kwaciindi, mwami wa Asuri wakamutola Manase mubuzike. Kali mubuzike, Manase wakeempwa alimwi cakulibombya wakali kupaila kuli Leza, eelyo wakamulekelela alimwi wakamujola acuuno cabwami mu Jerusalemu, kwalo nkwaakasumpula bukombi bwakasimpe.—2 Makani 33:2-17.
15. Ncinzi cakacitika mubuumi bwa mwaapostolo Petro citondezya kuti Jehova ‘ulalekela’?
15 Kwiinde myaanda yamyaka, mwaapostolo Petro wakalubizya citaambiki kwiinda mukukaka Jesu. (Marko 14:30, 66-72) Pele Jehova ‘wakamulekelela’ Petro. (Isaya 55:7) Nkaambo nzi? Nkaambo kakuti Petro wakeempwa. (Luka 22:62) Alimwi kulekelela kwa Leza kwakalibonya nikwakainda mazuba aali 50 mubuzuba bwa Pentekoste, Petro wakaba aciindi cakwaamba makani cabusungu kujatikizya Jesu. (Incito 2:14-36) Sena kuli kaambo kanga katupa kuyeeya kuti Leza takonzyi kubalekelela aabo Banakristo beempwa? Sintembauzyo wakaimba kuti: “O Jehova, nowakabika moyo wako kuzibi zyesu, ngwani wakali kunoopona, O Mwami? Pele kulinduwe kuli lulekelelo.”—Intembauzyo 130:3, 4.
Kutaindilizya Kuyoowa Akaambo Kakubisyila Muuya Uusalala
16. Muubukkale buli buti Leza mwalekelela?
16 Zikozyanyo nzyotwalanga-langa nzyeelede kutugwasya kutaindilizya kuyoowa akaambo kakubisyila muuya uusalala. Zyatutondezya kuti Jehova ulabalekelela beempwa. Ikaambo kayandika kapati nkupaila kuli Leza. Ikuti twabisya tulakonzya kulomba kulekelelwa kwiinda mucinunuzyo cacituuzyo ca Jesu, luzyalo lwa Jehova, cibi ncotwakajana kuli Adamu, akusyomeka kwesu mumulimo. Akaambo kakuti tuliluzyi luzyalo lwa Jehova, tulakonzya kulomba kulekelelwa katuzyi kuti uya kutulekelela.—Ba-Efeso 1:7.
17. Ncinzi ceelede kucitwa ikuti twabisya alimwi akuti katuyanda lugwasyo lwakumuuya?
17 Ino ncinzi ncotukonzya kucita ikuti naa twaalilwa kupaila akaambo kakubisya? Kumakani aaya, sikwiiya Jakobo wakalemba kuti: “[Muntu] oyu aite baalu bambungano, kuti bamukombele, bamunanike mafuta muzina lya-Mwami. Kukomba kwalusyomo kulamuponya mulwazi oyo, Mwami ulamubusya, nkabela kufumbwa zibi nzyaakacita zilajatilwa.”—Jakobo 5:14, 15.
18. Nkaambo nzi cibi camuntu nekuba kuti wakagusyigwa mumbungano ncocitakonzyi kwaamba kuti takonzyi kulekelelwa?
18 Nokuba kuti sizibi teempwi alimwi akuti wagusyigwa mumbungano, tacaambi kuti cibi cakwe tacikonzyi kulekelelwa. Ikwaamba munanike wakagusyigwa akaambo kakucita cibi mu Korinto, Paulo wakalemba kuti: “Citapatizyo cabanamaleya banu cilazulila muntu oyo, aboobo kuciindi ecino muleelede kulekelela muntu oyo caluzyalo akumuumbulizya, kuti ataindi kulemenwa abuusu bunji.” (2 Ba-Korinto 2:6-8; 1 Ba-Korinto 5:1-5) Pele kutegwa abe acilongwe alimwi a Jehova, ooyo sikubisya weelede kuzumina lulayo luzwa mu Bbaibbele lwakumuuya kwiinda mukugwasyigwa abaalu Banakristo alimwi weelede kutondezya kuti weempwa. Beelede kutondezya “micelo iielede kweempa.”—Luka 3:8.
19. Ncinzi cikonzya kutugwasya kuba “bayumu mukusyoma”?
19 Ncinzi cikonzya kutupa kuti tulimvwe kuti twabisyila muuya uusalala? Kwiindilizya kuyeeya naa kubula nguzu, zilakonzya kuba zitondezyo. Ikuti kwaba boobu, kupaila akulyookezya kwaciindi cilamfwu kulayandika. Iciyandika kapati nkutalekela Saatani kututyompya kutegwa tuleke kumubelekela Leza. Mbwaanga Jehova takkomani ikuti sizibi wafwa, masimpe taku nakondwa kubona babelesi bakwe nobafwa. Aboobo ikuti katuyoowa kuti twakabisyila muuya, tweelede kuzumanana kulya cilyo cakumuuya kwiinda mu Jwi lya Leza kubikkilizya azibalo eezyi zyuumbulizya zili ku Intembauzyo. Tweelede kuti katujanika kumiswaangano yambungano akutola lubazu mumulimo wakukambauka Bwami. Kwiinda mukucita boobu tuya kuba “bayumu mukusyoma” akuleka kulibilika akaambo kakuba acibi cilibonya kuti tacikonzyi kujatilwa.—Tito 2:2.
20. Ntwaambo nzi tukonzya kumugwasya muntu kuziba kuti tanaakabisyila muuya uusalala?
20 Uuli woonse uuyeeya kuti wakabisyila muuya uusalala, weelede kulibuzya kuti: ‘Sena ndakasampaula muuya uusalala? Mbwaanga ndeempwa kucibi cangu, sena ndacinca kuyeeya? Sena ndilijisi lusyomo muli Leza kuti ulakonzya kundilekelela? Sena ndili siluleyo uutayandi mumuni wamuuya?’ Ambweni bantu aaba baya kubona kuti tiibakausampaula muuya uusalala wa Leza nikuba kuba basiluleyo. Beempwa alimwi balijisi lusyomo lwakuti Jehova ulalekelela. Ikuti kakuli boobo, tiibakabisyizya muuya uusalala wa Jehova.
21. Mibuzyo nzi iiya kulangwa-langwa cibalo ciccilila?
21 Cilakatalusya kuzyiba kuti tiitwabisyila muuya uusalala. Nokuba boobo, kuli mibuzyo iikonzyenyi ayeeyi iilaalangwe-langwe mucibalo ciccilila. Mucikozyanyo, tulakonzya kulibuzya kuti: ‘Sena masimpe ndeendelezyegwa amuuya uusalala wa Leza? Sena mucelo wamuuya nkuuli muli ndime?’
Ino Inga Mwaingula Buti?
• Nkaambo nzi ncotukonzya kwaamba kuti cilakonzyeka kubisyila muuya uusalala?
• Ino kweempwa caamba nzi?
• Mbabaani bakabisyila muuya uusalala Jesu naakali anyika?
• Mbuti kulibikila akaambo kakucita cibi citalangilwi kujatilwa mbokukonzya kumana?
[Mibuzyo yaciiyo]
[Cifwanikiso icili apeeji 8]
Nokuba kuti wakamukaka Jesu, Petro tanaakacita cibi citakonzyi kulekelelwa