Kucita Kuyanda Kwa Leza Mazuba Aano
Kucita Kuyanda Kwa Leza Mazuba Aano
“[Kristo] wakabafwida boonse kuti abo bapona bataciliponene.”—2 BA-KORINTO 5:15.
1. Amwaambe nzyaakabona, anzyaakacita alimwi abuyumuyumu mbwaakajana misyinali umwi nkwaakali kubelekela.
MISYINALI wazina lya Aaron uluula kuti: “Imootoka wesu uutali wankondo nguwakali wakutaanguna kusika mumunzi umwi mu Afulika, kuzwa ciindi niyakamana nkondo yamucisi. * Kwakanyina nzila yakubonana ambungano imwi nsyoonto akaambo kankondo alimwi wakali mukuli wesu wakulanganya bakwesu aaba. Kunze aakubapa zyakulya, zyakusama alimwi amabbuku aamba zya Bbaibbele, twakabaletela vidiyo ya Jehovah’s Witnesses—The Organization Behind the Name. * Banji ibakajisi luyandisisyo bakaboola kuzikweebelela vidiyo eeyo kuŋanda mpati yabwizu mweebeledwa cipekupeku—njitwakatondezya ziindi zyobile. Iziiyo zya Bbaibbele zinji zyakatalisigwa akaambo kakweebelela vidiyo eeyi. Ikusoleka kwesu kwakagwasya kapati.”
2. (a) Nkaambo nzi Banakristo ncobaaba buumi bwabo mumulimo wa Leza? (b) Ino tulalanga-langa mibuzyo nzi?
2 Ino nkaambo nzi kapati Aaron amweenzinyina ncibakatalikila mulimo uukatazya boobu? Akaambo kakulumba cinunuzyo cacipaizyo ca Jesu Kristo, bakaaba buumi bwabo kuli Leza alimwi bayanda kucita kweelana akuyanda kwa Leza. Mbweena mbuli mbabo, boonse Banakristo balyaabide basala kuti “bataciliponene” pele bacite kufwumbwa ncobakonzya “nkaambo ka-Makani Mabotu.” (2 Ba-Korinto 5:15; 1 Ba-Korinto 9:23) Balizi kuti bukkale oobu bwaakumana, oonse mali abulemu buli munyika eeyi ziyakubula mulimo. Aboobo lino nobacili baumi alimwi nobacijisi nguzu bayanda kucita kuyanda kwa Leza. (Mukambausi 12:1) Ino mbuti mbotukonzya kucita boobu? Ino nkuli nkotukonzya kujana nguzu akuba acamba cakucita boobo? Alimwi ino milimo nzi njotukonzya kucita?
Kutobela Nzila Zikonzya Kutugwasya Kuya Ambele
3. Ino nzintu nzi ziyandika kapati mukucita kuyanda kwa Leza?
3 Ku Banakristo bakasimpe, ikucita kuyanda kwa Leza mulimo weelede kucitwa mubuumi bwabo boonse. Kulatalika kwiinda mukulilembya mu Cikolo Camulimo Weendelezyegwa a Leza, kubala Bbaibbele abuzuba, kutola lubazu mumulimo wabukambausi akubbapatizigwa. Mbotuyaabuya ambele tweelede kwayeeya majwi aamwaapostolo Paulo aakuti: “Sungwaala kuzintu ezi, ulitakate kulinzizyo amoyo wako woonse, kuti bantu boonse babone mboya bukomena mumilimo yako.” (1 Timoteo 4:15) Kucita boobo takuli kulimvwa pe, pele nkuyanda kucita kuyanda kwa Leza. Ikucita boobo, kutondezya kuti tulazumina kusololelwa a Leza mubuumi bwesu boonse alimwi walo ulacita oobo munzila mbotu kwiinda mbotukonzya kucita.—Intembauzyo 32:8.
4. Nkaambo nzi ncotuteelede kulibilika zintu zitagwasyi?
4 Ikumuka kubweza ntaamo naa kulibilika kapati, kulakonzya kutupa kuti tutayi ambele mukubelekela Leza. (Mukambausi 11:4) Pele katutana talika kuba alukkomano lwini-lwini akaambo kakubelekela Leza alimwi bantu bamwi, tweelede kutaanguna kulizunda penzi lyesu. Mucikozyanyo, Erik wakali kuyanda kwaakubelekela mumbungano yakali kubelesya mwaambo wakucisi cimbi. Pele wakalilibilikide kati: “Ndakali kuyeeya mbubakali kuya kunditambula kumbungano eeyi. Sena ndina kubayanda bakwesu? Sena bana kundiyanda?’ Wakati: “Nikwakainda ciindi ndakaziba kuti ndakali kuyandika kubabikkila maano bakwesu ikwiinda kulibikkila maano. Ndakacileka kulibilika, aboobo ndakatalika kubikkila maano kuzintu zindakali kukonzya kugwasya bamwi. Ndakapaila kutegwa ndigwasigwe, ndimane ndakazumanana amakanze aangu. Ciindi cino ndilikkomene kapati kucita mulimo ooyu.” (Ba-Roma 4:20) Masimpe, akaambo kakubelekela Leza alimwi abamwi cakutaliyanda, tulakkomana akukkutila kumulimo ngotucita.
5. Nkaambo nzi ncokuyandika kulibambila kabotu notuyanda kubelekela Leza? Amupandulule.
5 Alimwi kutegwa tuzwidilile mukucita kuyanda kwa Leza tuyandika kuba abubambe bubotu. Tatweelede kuba azikwelete zinji calo cikonzya kutupa kuba bazike ciindi cino akupa kuti tutaanguluki kubeleka mulimo wa Leza. Ibbaibbele litwaambila kuti: “Sizikoloto ngumuzike wasikukolotya.” (Tusimpi 22:7) Kusyoma muli Jehova akubikka zintu zyakumuuya mubusena bwakutaanguna kupa kuti katuzilanga munzila yeelede zintu. Mucikozyanyo, Guoming abacizi bakwe bobilo bakkala abanyina mubusena mwaadula maanda alimwi cilakatazya kujana mulimo uula maano. Kwiinda mukwaabelesya kabotu mali ngobajana akuula buyo zintu ziyandika kapati, cabapa kuti kabacikonzya kuzumanana nokuba kuti tabali boonse babeleka. Guoming waamba kuti: “Zimwi ziindi inga tulakkala kakunyina aulangila kuvwola. Nokuba boobo, tulazumanana amulimo wabupainiya akulanganya bamaama. Tulikkomenyi kuti bamaama tabatulesyi kubeleka mulimo wabupainiya akucita milimo imwi yakumbungano kutegwa tubayandaude zintu nzibayanda.”—2 Ba-Korinto 12:14; Ba-Hebrayo 13:5.
6. Ino ncikozyanyo nzi citondezya mbotukonzya kucita kuyanda kwa Leza mubuumi bwesu?
6 Ikuti naa kamujisi bubi mumulimo wakumubili akuti naa mujana mali manji naa zintu, eeci cilakonzya kupa kuti kube kucinca kupati kutegwa mubikke mulimo wa Leza mubusena bwakutaanguna. Ikucinca kuli boobu takukonzyi kucitwa mubuzuba bomwe alimwi kuti zintu kumatalikilo zyateenda kabotu, tamweelede kwaamba kuti mwaalilwa. Amubone Koichi wakali apenzi lyakubelesya ciindi cakwe coonse mukulikondelezya. Koichi wakaiya Bbaibbele naakacili mukubusi, pele kwamyaka minji wakali kuyandisya zisobano zyavidyo. Bumwi buzuba Koichi wakalyaambauzya kati: “Ino ncinzi ncedicita? Ndilaamyaka iinda ku 30 pele taku cilibonya ciyaka ncindacita mubuumi.’ Koichi wakatalika alimwi kwiiya Bbaibbele eelyo wakazumina kugwasigwa ambungano. Nokuba kuti tanaakafwambaana kucinca, tanaakatyompwa pe. Kwiinda mumupailo akugwasigwa abamwi, mukuya kwaciindi zintu zyakali kumukatazya wakazileka. (Luka 11:9) Kwaciindi cino Koichi ulikkomenyi alimwi sunu mukutausi.
Kutatikila Kubbazu Lyomwe
7. Nkaambo nzi ncotuteelede kutikila kubbazu lyomwe notucita mulimo wa Leza?
7 Kucita kuyanda kwa Leza kuyandika kubeleka camoyo oonse. Tatweelede kuwaya-waya. (Ba-Hebrayo 6:11, 12) Nokuba boobo, Jehova tayandi kuti katukatala kapati kumubili amumizeezo. Ikuzumina kuti tatukonzyi kuubeleka kabotu mulimo wa Leza kakunyina kugwasigwa anguwe, ooku nkumulemeka alimwi kutondezya kuti tatutikili kubbazu lyomwe. (1 Petro 4:11) Jehova utusyomezya kutupa nguzu zyakucita kuyanda kwakwe, pele tatweelede kucita zintu nzitutakonzi kucita alimwi nzyatalangili kuti inga twazicita. (2 Ba-Korinto 4:7) Kutegwa tuzumanane kubelekela Leza kakunyina kukatala tuyandika kulibambila kabotu.
8. Ino ncinzi cakacitika kuli umwi Munakristo naakasoleka kucita kabotu kumulimo wakumubili akuli Jehova, alimwi nkucinca kuli buti nkwaakacita?
8 Mucikozyanyo, Ji Hye uukkala ku East Asia, kwamyaka yobilo wakali kubeleka mulimo wakali kuyandika kuti kali kumilimo ciindi coonse, nokuba boobo wakali mupainiya. Wakati: “Ndakali kusoleka canguzu kucita kabotu mumbazu zyoonse zyobilo kuli Jehova akumilimo, pele eeci cakandipa kuti kandoona buyo maola aali osanwe. Kwiinde mazuba, ndakakatala aboobo tiindakacijisi luyandisisyo muzintu zyakumuuya.” Ikutegwa Ji Hye abelekele Jehova ‘amoyo wakwe woonse, amuuya, akuyeeya, anguzu zyakwe zyoonse’ wakeelede kujana mulimo uukotokwa aciindi ceelede. (Marko 12:30) “Nekuba kuti bamukwasyi bakali kundisinikizya kuti ndijane mulimo uukonzya kundipa mali manji, ndakasoleka kubikka kuyanda kwa Leza mubusena bwakutaanguna. Ndicivwola mali manji ngondikonzya kuuzya zintu mbuli zisani ziboneka kabotu. Alimwi ndimvwa kabotu koona mawoola manji. Ndilakkomana kujanika mumuunda alimwi ndayuma kumuuya lino, akaambo kakuti zyaceya zindikatazya.”—Mukambausi 4:6; Matayo 6:24, 28-30.
9. Ino kusoleka kwesu inga kwabagwasya buti bamwi mumuunda?
9 Tabali boonse bakonzya kubelekela Leza mumulimo waciindi coonse. Ikuti naa mulijisi penzi lyakucembaala, kuciswa-ciswa naa mapenzi aamwi buyo, mweelede kuziba kuti Jehova ulalukkomanina lusyomo lwenu amilimo njomumucitila camoyo woonse. (Luka 21:2, 3) Kunyina akati kesu weelede kuubya-ubya kusoleka nkwacita mukubelekela Leza nokuceya buti, kayi kulabagwasya bamwi. Mucikozyanyo, atwaambe kuti twakainda mumaanda aali mbwaabede pele tiitwakajana naba omwe wakatondezya luyandisisyo kumulumbe wesu. Pele nitwakazwa, bantu aabo balakonzya kuti bakali kutwaamba kwamawoola manji naa kwamazuba buya kubikkilizya abaabo batakatutambula. Tatulangili kuti boonse mbotukambaukila bayakwaazumina makani mabotu, pele bamwi bayakucita obo. (Matayo 13:19-23) Bamwi balakonzya kucinca mukuya kwaciindi, ndiza akaambo kabukkale bwacinca mucisi naa mubuumi bwabo. Kufwumbwa naa cili buti, ikucita mulimo wabuleya citondezya kuti tubeleka mulimo wa Leza. “Tuli basimilimonyina Leza.”—1 Ba-Korinto 3:9.
10. Ino ncinzi ncibakonzya kucita boonse mumbungano?
10 Ikuyungizya kuli ceeco, toonse inga twabagwasya bamumukwasyi wesu abakwesu abacizi bakumuuya. (Ba-Galatiya 6:10) Milimo yesu mibotu ilakonzya kubagwasya kapati bantu mubuumi bwabo boonse. (Mukambausi 11:1, 6) Ciindi baalu abakutausi nobacita milimo yabo cabunkutwe, kupa kuti kube muuya mubotu alimwi mbungano ilayuma, amulimo wa Bunakristo ulaya ampela. Twasyomezyegwa kuti: “[Tu]pangike myoyo [yesu] lyoonse kumilimo ya-Mwami” nkaambo milimo yesu “tiikonzyi kuba yabuyo pe.”—1 Ba-Korinto 15:58.
Ikucita Kuyanda kwa Leza ube Mulimo Wenu
11. Kunze lyakubelekela mumbungano motuswaanganina, ino ncoolwe nzi ncotukonzya kuba ancico?
11 Mbotuli Banakristo, tulakkomana kuti tuli baumi alimwi tulombozya kumutembaula Leza muzintu zyoonse zitucita. (1 Ba-Korinto 10:31) Ikuti katukambauka makani mabotu aa Bwami cakusyomeka akuyiisya bamwi kutobela zintu zyoonse Jesu nzyaakatulailila, tuya kubelesyegwa a Leza munzila zinji aboobo tuya kukkomana. (Matayo 24:14; 28:19, 20) Kunze lyakubelekela mumbungano momuswaangana, kulakonzya kuti kakuli coolwe cakubelekela kubusena kuyandika bakambausi, ooku inga kwaba mucilawo cimbi, nkubabelesya mwaambo uumbi naa kucisi cimbi. Baalu abakutausi ibeelela batanakwata balakonzya kwiitwa ku Cikolo Cakwiiya Mulimo, bamana balatumwa kumbungano kuyandika Banakristo basimide mucisi cakwabo naa kucisi cimbi. Banabukwetene bali mumulimo waciindi coonse balakonzya kwiitwa kucikolo cabamisyinali ca Gileadi alimwi akutumwa kuyoobelekela kucisi cimbi. Alimwi kulayandika abasikulyaaba bakonzya kubelekela ku Mutabi amukuyaka akubamba masena aaswaanganinwa alimwi amaofesi aamutabi.
12, 13. (a) Ino mbuti mbomukonzya kusala mulimo ngomuyanda kucita? (b) Amupandulule mulimo ngomwakaiya mboukonzya kubelesyegwa kumbi.
12 Ino mulimo nzi ngomukonzya kucita? Mbomuli babelesi ba Jehova balyaabide, lyoonse mweelede kulanga kuli Leza akumbungano yakwe kumusololela. “Muuya” wakwe mubotu uyakumugwasya kusala kabotu. (Nehemiya 9: 20) Iluzibo ndotukonzya kujana kwiinda mukucita mulimo umwi lulakonzya kuyoobelesyegwa mumulimo umwi mukuya kwaciindi.
13 Mucikozyanyo, Dennis amukaintu wakwe Jenny ciindi aciindi balabeleka mukuyaka Maanda aa Bwami. Nokwakainda guwo pati liitwa kuti Hurricane Katrina lyalo lyakanyonyoona cisi ca United States nkocili kumusanza, bakalyaaba kwaakubelekela kubusena ooku. Dennis uluula kuti: “Luzibo ndutwakajana mukuyaka Maanda aa Bwami twakalubelesya ikugwasya bakwesu, eeci catupa kuti katukkomenyi kapati. Ikukkomana nkobatondezya aabo mbotugwasya, kulakkazika moyo kapati. Itubunga tumwi twabasikugwasya tiitwazwidilila pe mukuyakulula. Bakamboni ba Jehova babambulula naa kuyakulula Maanda aainda ku 5,300 a Maanda a Bwami manji. Ibantu baubona mulimo wacitwa, batalika lino kuba aaluyandisisyo mumulumbe wa Bwami.”
14. Ino ncinzi ncimukonzya kucita ikuti kamuyanda kubeleka mulimo waciindi coonse?
14 Sena mulakonzya kucita kuyanda kwa Leza kwiinda mukusala kubeleka mulimo waciindi coonse? Ikuti mwacita oobo inga mwaba masimpe kuti muya kulongezyegwa. Ikuti kamutakonzyi kucita boobo ecino ciindi akaambo kabuyumu-yumu bumwi, ndiza kuyandika kucinca. Inga mwapaila mbuli bwakacita Nehemiya naakali kulangila kutalika mulimo wakali kuyandika kapati, naakati: “Akaka mwami wangu! . . . Kondipa coolwe, ndemulanda wako.” (Nehemiya 1:11) Aboobo amusyome yooyo “[uu]swiilila zikombyo” akucita kweelana acintu ncomupailila. (Intembauzyo 65:2) Ikutegwa Jehova amulongezye kumilimo njomucita, mweelede kutaanguna kucita zyeezyo ziyandika. Mwatalika mulimo waciindi coonse, mweelede kuzumanana kubeleka kweelana akusala kwenu. Mukuya kwaciindi, muna kuya buyungizya luzibo lwenu alimwi muna kukkomana lyoonse.
Ibuumi Bubotu Kapati
15. (a) Ino tugwasigwa buti notubandika akubala zibalo zyababelesi ba Leza babeleka kwaciindi cilamfwu? (b) Amwaambe kaambo komwe kakamukulwaizya muzibalo eezyo.
15 Ino cinzi ncimukonzya kulangila kuti mwasala kucita kuyanda kwa Leza? Inga mwabandika ababelesi ba Jehova, ikapati aabo babeleka ciindi cilamfwu mumulimo waciindi coonse. Eelo kaka balalongezyegwa mubuumi bwabo! (Tusimpi 10:22) Baya kumwaambila kuti, Jehova kunyina naalilwa kubagwasya kujana zintu nzibayanda, nemuba mubukkale bukatazya. (Ba-Filipi 4:11-13) Kuzwa mu 1955 kusika mu 1961, Ngazi Yamulindizi yakamwaya makani aapandulula zyabuumi bwabaabo basyomeka, aakajisi mutwe wakuti “Pursuing My Purpose in Life.” Kuzwa ciindi eeco, imyaanda yamakani aamba zyabuumi ali kumwaigwa. Cibalo acimwi citondezya kulyaaba alukkomano kwalo ikutuyeekezya zeezyo nzyotubala mu Bbaibbele kubbuku lya Incito. Ikubala zibalo zili boobo zikkomanisya kulakonzya kumupa kwaamba kuti, ‘Oobu mbobuumi mbundiyanda kuti kandipona andime.’
16. Ino cinzi cipa kuti Munakristo abe abuumi bwini-bwini alimwi kakkomenyi?
16 Aaron waambwa kumatalikilo uluula kuti: “Mu Afulika ndilaakuswaangana abana baile kwiingaila bayandaula mbobakonzya kupona buumi buli kabotu. Aboobo banji tababujani. Pele swebo twacikonzya, akaambo kakucita kuyanda kwa Leza kwiinda mukukambauka makani mabotu aa Bwami alimwi tulakkomana abuumi bwini-bwini. Twabona kuti kupa kuli coolwe kwiinda kupegwa”—Incito 20:35.
17. Nkaambo nzi ncotweelede kucita kuyanda kwa Leza lino?
17 Ino mbuti nywebo? Muyanda kuba abuumi buli buti? Ikuti kamutajisi makanze aakonzya kumugwasya kubelekela Leza lino, zimwi zintu zitayandiki zilakozya kumumanina ciindi. Nkaambo nzi ncimuyanda kunyonyoona buumi bwanu bubotu kulangaula lubono munyika ya Saatani? Ino-ino “mapenzi mapati” ayakucitika, aboobo lubono azyuuno zyamu nyika ziyakumana. Ciyandika kapati ncilongwe ncotujisi a Jehova. Tunakukkomenyi kaka akaambo kakuti twamubelekela Leza alimwi twacita oobo akuli bamwi, twacita kuyanda kwa Leza mubuumi bwesu boonse!—Matayo 24:21; Ciyubunuzyo 7:14, 15.
Bupanduluzi buyungizidwe
^ munc. 1 Mazina amwi acincwa.
^ munc. 1 Yakamwaigwa a Bakamboni ba Jehova.
Sena Inga Mwapandulula?
• Ino Jehova ulimvwa buti notumubelekela?
• Ino kucita zintu cakutatikila kubbazu lyomwe citugwasya buti kubelekela Leza alimwi abamwi?
• Ino milimo nzi njotukonzya kucita?
• Ino mbuti mbotukonzya kupona buumi bwini-bwini lino?
[Mibuzyo yaciiyo]
[Zifwanikiso izili apeeji 25]
Kutatikila kubbazu lyomwe kulayandika kutegwa tuzumanane kubelekela Jehova amoyo oonse
[Zifwanikiso izili apeeji 26]
Kuli nzila zinji nzyotukonzya kubelesya notubelekela Leza