Kuvwunwa Kutukole Twaasyikuteya
Kuvwunwa Kutukole Twaasyikuteya
“[Jehova] ulakuvuna mukakole kasikuteya.”—INTEMBAUZYO 91:3.
1. Ino ngwani “sikuteya,” alimwi nkaambo nzi ncayoosya?
BOONSE Banakristo beni-beni balalwana asinkondo, uujisi nguzu kwiinda zyabantu, imusongo alimwi mucenjezu. Ku Intembauzyo 91:3 ulategwa ngu “sikuteya.” Ino ngwani sinkondo ooyu? Kuzwa mu June 1, 1883 Ngazi Yamulindizi eeyi yakaamba kuti ngu Saatani Diabolosi. Ooyu muntu uujisi nguzu kapati alimwi mucenjezu, ulibajisi mbuli bwamoomu bantu ba Jehova kuboongelezya kutegwa abacegezye mbuli sikuteya tuyuni mbwasola nzila eeyi ayeeyi.
2. Nkaambo nzi Saatani ncakozyanyisyigwa asikuteya?
2 Lyansiku, tuyuni twakali kujatwa akaambo kandililo mbotu, mubala mubotu, cakali cisyu alimwi twakali kutuuzyigwa. Pele tuyuni mbotwakalengwa buya tulicenjede, tatuvwuli kuliiba, aboobo tulakatazya kucegezya ikapati kwale. Aboobo, sikuteya kuciindi cakali kulembwa Bbaibbele, katanateya cakutaanguna wakali kukkala ansi kuziba mbotubede tuyuni ntwayanda kuteya. Kwamana boobo wakali kujana nzila mbwakonzya kutucegezya. Ikukozyanyisya Saatani kuli sikuteya, Ibbaibbele lilatugwasya kumvwisya nzila zyakwe. Muntu amuntu Diabolosi ulamukkalila ansi kumubona maano aakwe. Ulazyiba mbotubede, eelyo ulateya tukole tukatazya kubona kutegwa atucegezye. (2 Timoteo 2:26) Ikuti watucegezya nkokuti cilongwe cesu a Leza cilamana alimwi cilakonzya kutupa kunyonyoonwa. Aboobo kutegwa tulikwabilile, tweelede kuziba nzila zya “sikuteya.”
3, 4. Ndilili nzila zya Saatani nozikozyanya azya syuumbwa alukonkola?
3 Kakozyanyisya acintu cipona, sintembauzyo wakakozyanyisya maano aa Saatani mbuli aasyuumbwa uucili mwana naa aayo aanzoka iitegwa lukonkola. (Intembauzyo 91:13) Mbuli syuumbwa, ziindi zimwi Saatani ugama buya kulwana kwiinda mukupenzya naa kwiinda mukubelesya mfwulumende kulwana bantu ba Jehova. (Intembauzyo 94:20) Kulwana kuli boobo kuli mbuli kwa syuumbwa kulakonzya kupa kuti bamwi bamusiye Jehova. Pele kanji-kanji kulwanwa kuli boobu kupa kuti bakamantane bantu ba Leza. Ino mbuti Saatani mbwalwana mbuli lukonkola?
4 Diabolosi ulabelesya bucenjezu bwakwe kuunina bantu akubalwana mbuli nzoka iijisi busungu kaili mubusena busisikide. Munzila eeyi wakonzya kwiinyonganya mizeezo yabantu bamwi ba Leza, kubacenga kucita luyando lwakwe muciindi cakucita lwa Jehova, calo cabanjizya mumapenzi mapati. Cikkomanisya ncakuti, tulizizyi nzila zya Saatani. (2 Ba-Korinto 2:11) Ino atulange-lange nzila zyone ziinda kubija zili mbuli zyeezyo nzyabelesya “sikuteya.”
Kuyoowa Muntu
5. Nkaambo nzi kakole ka “kuyoowa muntu” ncokabeleka kapati?
5 ‘Sikuteya” ulizyi muntu nzyayandisya alimwi azyeezyo nzyobamwaambila bamwi. Banakristo takuli kuti mbantu bakalengwa bumbi buya cakunga tabakonzyi kuyeeya mbuli buyeeya bantu bali mucilawo mobabede. Akaambo kaceeci, Diabolosi uyanda kubalya caangwa kayi balakopana akaambo kakuyeeya bantu mbobabalanga. Mucikozyanyo, ulabateya bamwi bantu ba Leza kwiinda mukubelesya kakole [“ka]kuyoowa muntu.” (Tusimpi 29:25) Ikuti naa akaambo kakuyoowa muntu, ibabelesi ba Leza baccilila bantu kucita ceeco Jehova ncakasya naa kuti baleka kucita ncolibalailila Ijwi lya Leza, nkokuti bacegwa mukakole “kasikuteya.”—Ezekieli 33:8; Jakobo 4:17.
6. Ncikozyanyo nzi citondezya mbuli mwana muniini mbwakonzya kucegwa kuli “sikuteya”?
6 Mucikozyanyo, mwana ulakonzya kunyengelelwa abasicikolonyina kutalika kufweba. Kufweba kulakonzya kuti ncintu ncaatali kulota naanyamuka kuya kucikolo buzuba oobo. Muciindi buyo cisyoonto watalika kucita cintu cinyonganya mubili alimwi citamukkomanisyi Leza. (2 Ba-Korinto 7:1) Ino mbuti mbwaajanika mupenzi eeli? Ambweni nkwiinda mukuba abalongwe batali kabotu alimwi wali kuyoowa kuti naa wakaka inga bamuzanduka. Nobana, mutaleki kuti “sikuteya” amuvwungilizye akumucegezya. Kutegwa kamutacegwi, amubone kuti tamuzumini nimuba mutwaambo tulibonya kuceya. Amumvwide kucenjezya kwa Bbaibbele kwakutaba abalongwe babi.—1 Ba-Korinto 15:33.
7. Mbuti Saatani mbwakonzya kupa kuti bamwi bazyali baye ansi kumuuya?
7 Ibazyali Banakristo babikkila maano kumikuli yabo yamu Magwalo balabeleka canguzu kujanina mikwasyi yabo zyakumubili. (1 Timoteo 5:8) Nokuba boobo, makanze aa Saatani ngakuyanda kuti Banakristo kababikkila buyo maano kuzintu zyakumubili. Ambweni tabajaniki-janiki kumiswaangano akaambo kakuti bamvwida bakabalemba mulimo ikubeleka kwiindilila amakotokelo. Balakonzya kuti balayoowa kulomba ciindi kutegwa bakajanike kumazuba oonse aamuswaangano wacooko kuti bakamukombe Jehova abanyina. Kutegwa kutabi kucegwa mukakole aaka tuyandika “[ku]syoma Jehova.” (Tusimpi 3:5, 6) Kuyungizya waawo, mbotuzi kuti toonse tuli baŋanda ya Jehova alimwi akuti ulilisungude kutulanganya, kuya kutugwasya kutaya ansi kumuuya. Nobazyali, sena mulasyoma kuti Jehova uya kumulanganya munzila iimwi nywebo abamukwasyi wanu nomucita luyando lwakwe? Naa sena Diabolosi uya kumucegezya akutalika kucita luyando lwakwe akaambo kakuyoowa muntu? Mwalombwa kuti mwiikkalile ansi mibuzyo eeyi kwiilanga-langa.
Kakole Kakuyandisya Lubono
8. Muunzila nzi Saatani mbwacegezya bantu kwiinda mukubelesya lubono?
8 Mukakole kakwe, Saatani ulabelesya alubono kucegezya. Basimakwebo balanjizya bantu munzila ngubauba yakujana lubono lunji akubasyomezya kuti balakonzya kuvwuba mukulaba kwaliso kwiinda mukubelesya buyo mali maniini, calo eeci icikonzya kubanyamuna moyo bantu ba Leza. Aabona bantu balakonzya kwaambilwa kuti: “Kamubeleka canguzu. Mwabona kuti mwatalika kulisika kufwule, inga mwacileka kulijaya kubeleka. Mulakonzya buya akucita abupainiya.” Majwi aamusyobo ooyu taali mabotu kwambila bakwesu abacizi bamumbungano ya Banakristo, nkaambo akulwaizya muuya wakuyanda mali. Amukalangisye kaambo aaka kakuyanda kuba amali manji. Sena tacikonzyenyi akuyeeya kwamuntu “mufubafuba” wamucikozyanyo ca Jesu?—Luka 12:16-21.
9. Mbuti bamwi Banakristo mbobakonzya kucegwa kwiinda mukuyandisya lubono?
9 Saatani ulalela nyika eeyi munzila iipa kuti limwi bantu batalika kulombozya zintu. Kulombozya kuli boobo kulakonzya kubujatikizya buumi bwa Munakristo cakunga jwi lya Leza lyaleka “akuzyala” bubotu. (Marko 4:19) Ibbaibbele litukulwaizya kuzulila azyakulya azyakulivwumba. (1 Timoteo 6:8) Pele banji balacegwa mukakole “kasikuteya” akaambo kakuti tabalubelesyi lulayo oolu. Sena ndiza nkulisumpula ikubapa kupona munzila iitali njenjiyo? Ino swebo kutugama tuyeeya buti? Sena kuyanda kuba alubono lunji kutupa kuti kukomba kwakasimpe kuleke kuyandika kapati? (Hagai 1:2-8) Icuusisya ncakuti ciindi naakatazya mali, bamwi balacileka kubikka ampela zintu zyakumuuya kutegwa bazumanane kupona buumi busumpukide mbobakali kupona kaindi. Muuya ooyu wakuyanda lubono ulamukonda “sikuteya.”
Kakole Kakulikondelezya Kutali Kabotu
10. Nkulilingula kuli buti aumwi Munakristo nkweelede kucita?
10 Aimwi nzila njabelesya “sikuteya” njakunyonganya kuyeeya kwabantu cakunga baleka kwaandaanya cibotu acibi. Kuyeeya kukonzyenyi akooko ikwakali mu Sodomu a Gomora kwabweza busena mazuba aano mumasena aasobaninwa. Nomuba mumakani aamucipekupeku alimwi amutubbuku, izitondezyegwa kapati ninkondo azintu zibusya muzeezo wakoonana. Izinji zibonwa kuti zisobano muli sikapepele zyaboofwaazya bantu cakunga tabacicikonzyi “kusala cibotu ecibi.” (Ba-Hebrayo 5:14) Pele amuyeeye ijwi lya Jehova kwiinda mumusinsimi Isaya lyakuti: “Maawe kulibaabo baamba kuti bubotu mbubi, bubi mbubotu.” (Isaya 5:20) Sena milimo mibi ya “sikuteya” yakunyonganya kuyeeya kwanu kumakani aakulikondelezya kutali kabotu? Kulilingula kulayandika.—2 Ba-Korinto 13:5.
11. Nkucenjezya kuli buti kwakapegwa kumakani aacisobano ca soap opera mumagazini eeyi?
11 Kwamyaka iibalilwa ku 25 yainda, Ngazi Yamulindizi yakabacenjezya bakombi ba Leza kumakani aazintu zyeebelelwa mucipekupeku. * Akaambo kacisobano cibi cakadumide ciitwa kuti soap opera, kwakaambwa kuti: “Kutalilemeka kulacitwa akaambo kaluyando. Mucikozyanyo, mwana musimbi uutakwetwe iwakamita wakaambila mweenzyinyina kuti: ‘Eelo ndilamuyanda cakufwa Victor. Kaciba naa ncinzi eeco. . . . Kuba amwana a Victor, ncecintu ncendiyanda kapati.’ Akaambo kanyimbo zililila ansi-ansi alimwi zyeenzya mubili, cilakatazya kubona nzila zyakwe kuti tazili kabotu. Andinywe nimweebelela mulamuyanda Victor. Ulamweetezya mwana musimbi. ‘Mulazumina’ kumilimo yakwe mibi. Sikweebelela umwi wakaamba boobu, walo mukuya kwaciindi iwakabona bubi buliko, wakati: ‘Cilausisya kubona muntu mbwanga waile kuyalampya makani aali boobu. Tulizi kuti kutalilemeka nkubi. . . . Pele ino ndabona kuti ndakali kutola lubazu.”
12. Ino nkaambo nzi kucenjezya kwakusala zyakweebelela ncokucigwasya asunu?
12 Kuzwa ciindi zibalo eezyi nozyakalembwa, zisobano zyamusyobo uuli boobu izinyonganya moyo zyavwula mazuba aano. Mumasena manji mapulogilamu aali boobu alamwaigwa masiku amasikati. Basankwa, bamakaintu alimwi abana banji ciindi aciindi balalangilila akuswiilila zintu zili boobu. Andiswe mbweena tatweelede kulyeena kwiinda mukutayeeya kabotu. Tacikonzyi kuba camaano ikuyeeya kuti zisobano zibi tazili zibi kapati twalanga zintu zicitika munyika. Pele sena inga caba camaano Munakristo kusala bantu bali boobu kuba balongwe bakwe uutako naya kubaita kuti bakamuswaye?
13, 14. Ino mbuti bamwi mbobakatondezya kulumba akaambo kakuti bakagwasyigwa kukucenjezya kwakulangilila cipekupeku?
13 Ibanji bakagwasyigwa nibakamvwida kucenjezya kwa “muzike musyomesi uucenjede.” (Matayo 24:45-45) Bamwi nibakabala lulayo lutali lwakweezyeezya lwamu Bbaibbele kwiinda mukubala ngazi, bakabalembela basikumwaya ngazi kubaambila zibalo mbozyakabanjila. * Umwi wakaamba boobu: “Kwamyaka iili 13 ndali muntu watali kucipa ciindi cisobano ca soap opera. Ndakali kuyeeya kuti cakali buyo kabotu kumuuya icipati buyo kuti kandijanika kumiswaangano ya Banakristo akuti kandilobokezya mumulimo wamumuunda. Pele ndakaba amuuya mubi wanyika wacisobano ca soap opera wakuti ikuti mulumi wako kakupenzya, naa wabona kuti toyandwi, nkwiile kubbukilwa nciindi cakwe. Nindakabona kuti eeci cili buyo kabotu ndakabbukilwa aboobo kwakaba kulubizya kuli Jehova akumulumi wangu.” Ooyu mukaintu wakagusyigwa mumbungano. Mukuya kwaciindi wakaziba kuti wakalubizya, wakeempwa eelyo wakajokezyegwa mumbungano. Zibalo izyakali kucenjezya bubi bwakweebelela cisobano ca soap opera zyakamupa kuti acileke kulangilila zintu nzyasulide Jehova.—Amosi 5:14, 15.
14 Aumwi mubali iwakali kweebelela cisobano eeci wakati: “Ndakailosya misozi nindakabala zibalo nkaambo ndakabona kuti moyo wangu tiiwakamaniide kuli Jehova. Ndakamwaambila Leza wangu kuti tandikasoli kabili kuba muzike kucisobano eeci.” Naakali kulumba mbozili zibotu zibalo eezyo, umwi mukaintu Munakristo iwakamaniide mutwe mucisobano eeci, wakalemba kuti: “Ndakakatazyigwa . . . ikuti naa cilongwe cangu a Jehova cakaciliko. Mbuti mbondakali kukonzya kuba mulongwe wabasikusobana alimwi akuba mulongwe wa Jehova?” Ikuti zisobano zyamucipekupeku zyakainyonganya myoyo yabantu myaka iili 25 yainda, ino mbuti mazuba aano? (2 Timoteo 3:13) Tweelede kuzicenjelela nzila zya Saatani kumakani aakulikondelezya kutali kabotu, kufwumbwa naa ncisobano ca soap opera, mavidiyo aankondo naa ninyimbo zyakutalilemeka zyamumavidiyo.
Kakole Kakutamvwana
15. Mbuti bamwi mbwaabacegezya Diabolosi?
15 Saatani ubelesya kutamvwana kuba kakole kalo kapa kwaandaana akati kabantu ba Jehova. Tulakonzya kucegwa munzila eeyi kufwumbwa naa tujisi mulimo uuli buti mumbunga yakwe. Bamwi balacegwa a Diabolosi akaambo kakuti balekela kutamvwana kunyonganya luumuno alukamantano lutaliboteli lwakumuuya Jehova ndwaatupa.—Intembauzyo 133:1-3.
16. Ino mbuti Saatani cabucenjezu mbwaasoleka kumana lukamantano akati kesu?
16 Lya Nkondo Yanyika Yakusaanguna, Saatani wakasola kuti ailobye mbunga ya Jehova yaanyika kwiinda mukubalwana, pele wakaalilwa. (Ciyubunuzyo 11:7-13) Kuzwa ciindi eeco, ulibujisi kutunyonganya kutegwa tutanikukamantani. Ikuti twalekela kutamvwana kutwaandaanya, inga kwaba kumujaluda mulyango “sikuteya.” Inga twapa kuti muuya uusalala utabeleki kabotu kulindiswe amumbungano. Ikuti eeco cacitika, Saatani inga wakkomana nkaambo ulizi kuti, ikuti kwaba manyongwe mumbungano, mulimo wakukambauka inga waya ansi.—Ba-Efeso 4:27, 30-32.
17. Ino mbuti aabo batamvwana mbobeelede kutubamba twaambo?
17 Ncinzi ncomukonzya kucita ikuti kwaba kutamvwana a Munakristonyoko? Inzya inga kakuli kaambo. Pele nokuba kuti kulakonzya kuba twaambo tunji tuletela mapenzi, ikuti kwaba kutamvwana tacigwasyi kwiile kuumuna buyo. (Matayo 5:23, 24; 18:15-17) Lulayo lwamu Jwi lya Leza lwakasololelwa amuuya uusalala lulagwasya. Ikuti lwabelesyegwa, njiisyo zyamu Bbaibbele zipa kuti kutamvwana kumane. Lyoonse zilagwasya.
18. Nkaambo nzi kwiiya Jehova ncokunga kwagwasya kumana penzi lyakutamvwana?
18 Jehova “ulafwamba kujatila” alimwi ‘ulalekelela.’ (Intembauzyo 86:5; 130:4) Tuna kubonwa kuti tuli bana bayandwa ba Jehova ikuti katumwiiya. (Ba-Efeso 5:1) Toonse tuli basizibi alimwi tulila lulekelelo kuli Jehova. Aboobo tweelede kucenjela ikuti katutajatili beenzuma. Tulakonzya kuba mbuli muzike wamucikozyanyo ca Jesu iwatakalekelela muzikenyina cikwelete ciniini twalanga muzinga wamali ngwaakamulekelela simalelo wakwe. Simalelo nibakamuzibya makani aaya, muzike watakalekelela muzikenyina wakamwaangizya. Jesu wakamanizya cikozyanyo cakwe kwiinda mukwaamba kuti: “Mbubonya obo alakwe Taata uuli kujulu mbwazoomucitila nywebo kuti tamulekeleli nyoonse bakwanu camumyoyo yanu.” (Matayo 18:21-35) Ikukkala ansi kuyeeya akubona ziindi kuvwula Jehova nzyaatujatila, kuya kutugwasya notubamba twaambo amukwesu nokwaba kutamvwana.—Intembauzyo 19:14.
Kuba “Muciyubilo ca-Mupatikampatila”
19, 20. Mbuti mbotweelede kucibona “ciyubilo” ca Jehova alimwi a “cenzule” muziindi zino zyamapenzi?
19 Tupona muziindi zyamapenzi. Saatani naakatumana kale toonse do, nokwatali kutegwa Jehova tatukwabilili. Aboobo kutegwa “sikuteya” atatucegezyi, tweelede kukkala mubusena bwalukwabililo bwacikozyanyo, nkokuti “muciyubilo ca-Mupatikampatila” alimwi “[akukkala] mucenzule ca-Singuzuzyoonse.”—Intembauzyo 91:1.
20 Atubone kuti ziyeekezyo zya Jehova alimwi anzila zyakwe ndukwabililo ikutali kuti nkuyumya mulawo. Toonse tuli bujisi kulwanwa asinkondo uujisi nguzu kwiinda zyesu alimwi mucenjezu. Kakunyina lugwasyo lwa Jehova, taku uutakonzyi kucegwa. (Intembauzyo 124:7, 8) Aboobo katunga katupaila kuti Jehova atumvwune kutukole twa “sikuteya.”—Matayo 6:13.
Bupanduluzi buyungizidwe
^ munc. 11 Ngazi Yamulindizi yamu December 1, 1982, peeji 3-7.
^ munc. 13 Ngazi Yamulindizi yamu December 1, 1983, peeji 23.
Sena Muliyeeyede?
• Nkaambo nzi ncokali kakole kabi “kuyoowa muntu”?
• Mbuti Diabolosi mbwabelesya lubono kututeya?
• Mbuti Saatani mbwaacegezya bamwi kwiinda mukubelesya kakole kakulikondelezya kutali kabotu?
• Nkakole nzi Diabolosi nkabelesya kutegwa kubule luumuno akati kesu?
[Mibuzyo yaciiyo]
[Cifwanikiso icili apeeji 29]
Bamwi bacegwa akaambo ka “kuyoowa muntu”
[Cifwanikiso icili apeeji 30]
Sena mulazikkomanina eezyo Jehova nzyasulide?
[Cifwanikiso icili apeeji 31]
Ncinzi ncomukonzya kucita ikuti
kwaba kutamvwana a Munakristonyoko?