Muleli Muvwubi Waalilwa Kusala Camaano

MULELI mumvwubi uucili mwana wakali amizeezo mibotu, wakali kuutobela mulawo alimwi wakali mukombi. Naakasika kuli Jesu wakafwugama amane wakabuzya kuti: “Mufundisi, ncintunzi cibotu ncinti cite kuti mbe abuumi butamani?”

Mukwiingula, Jesu wakatondezya kuti ikuba abuumi, kwakali kuyandika kutobela milawo ya Leza. Naakamubuzya Jesu kuti aambe cini ncaakali kwaamba wakati: “Utajayi, Utaciti bumambi, Utabbi, Utalengeleli umwi cakubeja, Lemya uso abanyoko, nkabela, Yanda mweenzinyoko mbuli mboliyanda omwini.” Eeyi yakali Milawo iiyandika kapati njaakapegwa Musa. Naakamana muntu ooyu wakati: “Eyi yoonse ndaijatisya. Ino ncinzi ncincibula?”—Matayo 19:16-20.

Jesu wakamulanga caluyando kumane wakati: “Alo mpocili comwe ncotajisi. Nceeci. Koya ukauzye zyoonse nzyojisi, ukape bacete, noti jane lubono kujulu, alimwi uboole, ucilile ndime.”—Marko 10:17-21.

Aciindi eeci muleli uucili mwana wakali kuyandika kusala. Ino ncinzi ncaakali kukonzya kucita? Sena wakali libambide kwaaba lubono lwakwe akutobela Jesu, naa naakazumanana abuvwubi bwakwe? Sena naakayandaula buvwubi anyika naa kujulu? Kuboneka kuti cakamukatazya kusala. Wakalijisi luyandisisyo muzintu zyakumuuya mbwaanga wakali kuutobela Mulawo alimwi wakabuzya nzyaakali kuyandika kucita kutegwa akkomanisye Leza. Ino ncinzi ncaakasala kucita? “Wakainka abuusu, nkaambo wakali alubono lunji.”—Marko 10:22.

Ikusala kwamuleli ooyu uucili mwana tiikwakali kwamaano. Naakaba siciiya wa Jesu uusyomeka, naakacijana  ncaakali kulangaula, calo eeco cili mbuumi butamani. Tiitwaambilwa cakacitika kumwana musankwa ooyu pe. Pele tulizi kuti nikwakainda myaka iili 40, impi zyabana Roma zyakanyooyoona Jerusalemu a Juda. Bama Juda banji bakasweekela lubono alimwi bakafwa.

Kwiindana amuleli uucili mwana, imwaapostolo Petro abasikwiiya bamwi bakasala camaano. Bakasiya “zintu zyoonse” akumutobela Jesu. Eeci cakabagwasya kapati. Jesu wakabaambila kuti bayakutambula zintu zinji kwiinda nzibakasiya. Alimwi bakali kukonzya kuba abuumi butamani. Bakanyina kaambo kakali kukonzya kubatyompya akaambo kakusala kwabo.—Matayo 19:27-29.