Icipa Bantu Kutalicesya

BANTU banji bayeeya kuti kulicesya takugwasyi munyika sunu. Aabo balisumpula alimwi bayanda kuzunda beenzinyina lyoonse akucita zintu munzila njobayanda balo, mbambabo balibonya kuzwidilila kapati mubuumi alimwi akusololela bamwi. Bantu banji banyonokela buumi mbobapona bavwubi alimwi abaabo bajisi mpuwo ikutali bwa babombe myoyo. Ibantu bazwidilila mubuumi kanji-kanji bayandisya kulitukumuna kuti bakazwidilila akaambo kakubeleka canguzu. Muciindi cakulicesya, balalidunda akaambo kakuzwidilila kwabo.

Sikuvwuntauzya umwi waku Canada wakaamba kuti “muuya wakuliyanda” uyabuvwula mucisi cokwabo. Bamwi bayeeya kuti tupona munyika mwalo kulikkomanisya mokuyandika kapati kwiinda kuba muntu uulomenyi alimwi babona kuti mazuba aano bantu bayabwiindila kuliyanda. Munyika iili boobu ikulicesya tabakuyeeyi pe.

Masimpe banji balakonzya kuzumina kuti ikulicesya mbube bubotu kubantu bamwi, nkaambo bantu balicesya tabakatazyi kukkala limwi. Pele, munyika eeyi ijisi muuya wakuzundana, bamwi bayoowa kuti, ikuti bacita zintu cakulicesya, bayoobonwa kuti balikompeme.

Ijwi lya Leza, Ibbaibbele, lyakasinsima kuti kumazuba eesu bantu banooli “basimantumbwaambwa, basikakomokomo.” (2 Timoteo 3:1, 2) Sena tamuzumini kuti businsimi oobu buli mukuzuzikizyigwa? Sena muyeeya kuti ikulicesya kulagwasya? Antela sena muyeeya kuti muntu uulicesya inga wabonwa kuti tajisi nguzu cakunga ulakonzya kubonwa kubbila kasusu?

Bwini mbwakuti Ibbaibbele lipa twaambo tubotu ncokuyandika kulicesya. Lilagwasya kububona bube oobu munzila yeelede alimwi lilatondezya kuti ikulicesya kwini-kwini ncitondezyo cakuba anguzu ikutali kukompama.

[Cifwanikiso icili apeeji 3]

Ino tweelede kulimvwa buti kujatikizya zintu nzyotuzuzikizya mubuumi?