Sena Mulacibelesya Coolwe Ncomujisi Ikwaamba Nzyomusyoma?

“SENA kasimpe keni-keni nkokali?” Ooyu wakali mutwe wamulaso mumuzundano wacisi coonse mucisi ca Poland. Malailile aamulaso ooyu akali aakuti: “Tatuyandiki kasimpe keni-keni. Takayandiki kumuntu uuli woonse. Alimwi buya kasimpe keni-keni takako.” Agata, mwanaa cikolo uujisi myaka yakuzyalwa iili 15 alimwi ngumwi wa Bakamboni ba Jehova, wakayeeya kuti abelesye coolwe eeci ikwaambila bamwi zyalusyomo lwakwe lwabukombi.

Ikutegwa alibambile kabotu mulaso ooyu, Agata wakasaanguna kulomba busolozi kuli Jehova mumupailo, mpoonya wakatalika kuvwuntauzya kujatikizya makani aaya. Wakajana makani mu Ngazi Yamulindizi yamu July 1, 1995, aakozyenye ayaayo aakali kuyandika kulembwa. Wakazubulula mubuzyo Ponto Pilato ngwaakabuzya Jesu wakuti: “Ino bwini ninzi?” (Johane 18:38) Wakalemba kuti imubuzyo ooyu wakali kutondezya kutabikkila maano mbuli kuti ubuzya kuti: ‘Bwini? Ino ncinzi eeco? Taakwe cintu cili boobo!’ Agata wakalemba kuti: “Imubuzyo wa Pilato undiyeezya malailile aamulaso.”

Mpoonya wakabandika kujatikizya muzeezo wakuti makani aabwini kumuntu umwi alakonzya kuba aakubeja kuluumwi alimwi akuti boonse balakonzya kuba “masimpe.” Wakabuzya mibuzyo mbuli ooyu wakuti: “Ino nguni akati kesu uukonzya kutanta ndeke ikuti katuyeeya kuti milawo yeendelezya zintu zyeendela mujulu taili yamasimpe?” Amane wakatondeka Bbaibbele kumwi kaamba kuti: “Ilusyomo mu Jwi lya Leza luyeeme atwaambo twamasimpe.” Wakaamba kuti aabo bayandaula kasimpe keni-keni cakusinizya alimwi cakukkazika moyo, bayookajana.

Agata wakapegwa pepa yadipuloma yaalubazu alimwi aciindi cakwaamba makani aakwe kumbele lya basicikolonyina. Basicikolonyina bali mbobabede bakazumina kuba aciiyo ca Bbaibbele. Agata ulikkomene kuti wakacibelesya kabotu coolwe ncaakajisi ikwaamba zyalusyomo lwakwe kubantu banji. Masimpe, ikubelesya coolwe cili coonse kwaamba zyalusyomo lwanu kulakonzya kuzyala micelo. Ino ndiilili nomukonzya kwaamba nzyomusyoma?