Sena Mulilibambide Buzuba Bwa Jehova?
Sena Mulilibambide Buzuba Bwa Jehova?
“Buzuba bupati bwa-Jehova buli kufwaafwi, ncobeni buli kufwaafwi, bulafwambaana loko kusika.”—ZEFANIYA 1:14.
1-3. (a) Ncinzi Bbaibbele ncolyaamba kujatikizya buzuba bwa Jehova? (b) Ino “buzuba bwa-Jehova” mbotulangila ninzi?
BUZUBA bupati bwa Jehova tabuli buzuba bwini bwamawoola aali 24 pe. Buzuba oobu nciindi cili mbocibede calubeta lwa Leza kuli basizibi. Aabo batakombi Leza baleelede kuyoowa buzuba oobo bwamudima, bwabukali, bwalunyemo, bwamapenzi alimwi bwalunyonyooko. (Isaya 13:9; Amosi 5:18-20; Zefaniya 1:15) Businsimi bwa Joeli bwaamba kuti: “Maawe! Buzuba bulaca! Buzuba bwa-Jehova buli afwaafwi. Buleza mbuli lunyonyooko kuzwa kujanza lya-Singuzuzyoonse.” (Joeli 1:15) Nokuba boobo, mubuzuba oobo bupati, Leza uyooba Mufwutuli wabaabo “baluleme mumyoyo.”—Intembauzyo 7:10.
2 Imajwi aakuti “buzuba bwa-Jehova” aamba ziindi zisiyene-siyene zyalubeta lwa Leza. Mucikozyanyo, “buzuba bwa-Jehova” bwakabasikila bantu bamu Jerusalemu ciindi Jehova naakababeteka kwiinda mubana Babuloni mu 607 B.C.E. (Zefaniya 1:4-7) Kuzwa waawo, Leza wakababeteka bama Juda ibakakaka Mwanaakwe mu 70 C.E. naakabelesya bana Roma kubanyonyoona. (Daniele 9:24-27; Johane 19:15) Alimwi Bbaibbele lyaamba zya “buzuba bwa-Jehova” ciindi ‘nayoolwana masi oonse.’ (Zekariya 14:1-3) Kwiinda mukusololelwa aa Leza, imwaapostolo Paulo wakaamba kuti buzuba oobo buliswaangene akubako kwa Kristo ikwakatalika ciindi Jesu naakabikkwa acuuno ca Bwami kujulu mu 1914. (2 Ba-Tesalonika 2:1, 2, NW) Mbwaanga cilisalede kuti buzuba bwa Jehova buli afwaafwi, ilugwalo lwamwaka wa 2007 lwa Bakamboni ba Jehova masimpe lwali lugwalo lweelela. Oolu ndugwalo lwa Zefaniya 1:14 ilwaamba kuti: “Buzuba bupati bwa-Jehova buli kufwaafwi.”
3 Mbwaanga buzuba bupati bwa Leza buli afwaafwi, ecino nceciindi nomweelede kulibambila. Ino mbuti mbomukonzya kulibambila buzuba oobo? Sena kuli cimbi ncomweelede kucita kutegwa mulibambile buzuba bwa Jehova?
Amulibambile
4. Ino mmusunko nzi ngwaakalibambila Jesu?
4 Mubusinsimi bwakwe bwamamanino aabweende bwazintu, Jesu Kristo wakaambila basikwiiya bakwe kuti: “Amulibambile.” (Matayo 24:44, NW) Ciindi Jesu naakaamba majwi aaya, walo mwini wakalilibambide kwiinda mumusunko mupati uujatikizya lufwu lwakwe kali cipaizyo cacinunuzyo. (Matayo 20:28) Ino ncinzi ncotukonzya kwiiya kuli Jesu kujatikizya mbwaakalibambide?
5, 6. (a) Ino mbuti luyando ndotujisi kuli Leza akuli basimukoboma mbolupa kuti tulibambile buzuba bwa Jehova? (b) Ikujatikizya kuyanda basimukoboma, ncikozyanyo nzi ncaakasiya Jesu?
5 Jesu wakali kumuyanda kapati Jehova alimwi azyeelelo zyakwe ziluleme. Ikujatikizya Jesu, lugwalo lwa Ba-Hebrayo 1:9 lwaamba kuti: “Yebo uyandisya kululama, pele butongo tobuyandi, ulibusulide, aboobo Leza, Leza wako, wakunanika mafuta aali ecoolwe iciinda cabeenzinyoko.” Akaambo kakuti Jesu wakali kumuyanda Usyi wakujulu, wakazumanana kusyomeka kulinguwe. Ikuti katujisi luyando luli boobu kuli Leza alimwi akupona kweelena azyeelelo zyakwe, walo uyootubamba. (Intembauzyo 31:23) Ikuba aluyando alimwi akumvwida kuli boobu kuyoopa kuti tulibambile buzuba bupati bwa Jehova.
6 Jesu wakali kubayanda kapati bantu. Kayi, “wakabafwida luzyalo, nkaambo kakuti bakalikatede akumwaika mbuli imbelele zitakwe mweembezi.” (Matayo 9:36) Aboobo, Jesu wakali kubakambaukila makani mabotu bantu mbubonya luyando mbolutukulwaizya kwaambilizya mulumbe wa Bwami kuli basimukoboma. Iluyando ndotujisi kuli Leza alimwi akuli basimukoboma ndolupa kuti tuzumanane kuba basungu mumulimo wa Bunakristo alimwi akulibambila buzuba bupati bwa Jehova.—Matayo 22:37-39.
7. Notulindila buzuba bwa Jehova, ncinzi cikonzya kupa kuti tukkomane?
7 Jesu wakali kukkomana kucita kuyanda kwa Jehova. (Intembauzyo 40:8) Ikuba amoyo uuli mbuli yooyu kulakonzya kupa kuti tukkomane kucita mulimo wa Leza. Mbubwenya mbuli Jesu, tulakonzya kuba baabi alimwi eeci cilakonzya kupa kuti tukkomane ncobeni. (Incito 20:35) Masimpe, “lukondo lwa-Jehova ndolu[tu]pa inguzu.” Ilukkomano lulakonzya kupa kuti tulibambile buzuba bupati bwa Leza.—Nehemiya 8:10.
8. Nkaambo nzi ncotweelede kupaila kuli Jehova?
8 Ikupaila camoyo woonse kuli Leza kwakapa kuti Jesu akonzye kulibambila masunko aakamusikila kujatikizya mbwasyomeka. Wakali kupaila ciindi Johane naakamubbapatizya. Jesu wakapaila masiku oonse katanasala baapostolo bakwe. (Luka 6:12-16) Alimwi sena kuli mubali wa Bbaibbele uutakonzyi kukulwaizigwa amupailo ngwaakapaila Jesu camoyo woonse imasiku mubuzuba bwamamanino kali anyika? (Marko 14:32-42; Johane 17:1-26) Sena andinywe mulapaila lyoonse mbubwenya mbwaakali kucita Jesu? Amumusikile Jehova lyoonse, amusitikile kupaila, amulombe busolozi bwamuuya uusalala akubutobela. Kuciindi cino cikatazya, ikuba acilongwe ciyumu a Taateesu wakujulu kulayandika kapati mbwaanga buzuba bupati bwa Leza buya busika cakufwambaana. Aboobo, amuzumanane kuyumya cilongwe canu a Jehova kwiinda mumupailo.—Jakobo 4:8.
9. Nkaambo nzi ncokuyandika kapati ikuba aluyandisisyo lwakusalazya zina lya Jehova?
9 Acimbi cakapa kuti Jesu akonzye kulibambila masukusyo aakamusikila nkuba aluyandisisyo lwakusalazya zina lya Jehova lisetekene. Mubwini, wakayiisya basikumutobela kuti nobapaila kuli Leza beelede kwaamba kuti: “Alisalazigwe zina lyako.” (Matayo 6:9, NW) Ikuba aluyandisyo lwakuti zina lya Jehova lisalazigwe kulakonzya kupa kuti tutaciti micito iili yoonse ikonzya kuleta masampu kuzina lya Leza. Ikucita boobo, kuyoopa kuti tulibambile buzuba bupati bwa Jehova.
Sena Mweelede Kucinca Mumbazu Zimwi?
10. Nkaambo nzi ncotweelede kulilingula mubuumi?
10 Ikuti naa buzuba bwa Jehova bwasika junza, sena ncobeni munoolibambide? Umwi aumwi akati kesu weelede kulilingula akubona naa kuyandika kubweza ntaamu zimwi naa kucinca bukkale bumwi. Akaambo kakuti buumi mbotujisi mbufwaafwi alimwi mazuba ngunamasandu, umwi aumwi wesu weelede kupakamana kumuuya abuzuba. (Mukambausi 9:11, 12; Jakobo 4:13-15) Aboobo, atulange-lange twaambo tumwi ntotweelede kubikkila maanu mubuumi bwesu.
11. Nimbaakani nzi njomujisi yakubala Bbaibbele?
11 Kaambo kamwi kayandika kapati kaswaangene alulayo lwa “muzike musyomesi” lujatikizya kubala Bbaibbele abuzuba. (Matayo 24:45) Mulakonzya kulibikkila mbaakani yakubala akuzinzibala kuyeeya Magwalo kuzwa ku Matalikilo kusikila ku Ciyubunuzyo amwaka. Kwiinda mukubala zyaandaano zyone abuzuba, mulakonzya kubala zyaandaano zyoonse zyamu Bbaibbele izili 1,189 mumwaka omwe. Imwami umwi aumwi mu Israyeli wakeelede kubala Mulawo wa Jehova “mazuba oonse aabuumi bwakwe.” Kuboneka kuti oobo mbombubo mbwaakacita awalo Joshua. (Deuteronomo 17:14-20; Joshua 1:7, 8) Masimpe, baalu ibeembela mbungano beelede kubala Jwi lya Leza abuzuba, nkaambo ikucita boobo kupa kuti bakonzye “kwiisya njiisyo mbotu.”—Taitasi 2:1, Ci.
12. Mbwaanga buzuba bwa Jehova buli afwaafwi, ncinzi ncomweelede kucita?
12 Mbwaanga buzuba bwa Jehova buli afwaafwi, mweelede kunoojanika kumiswaangano ya Bunakristo lyoonse alimwi akutola lubazu. (Ba-Hebrayo 10:24, 25) Ikucita boobo kuyoopa kuti muyungizye luzibo lwanu mbomuli basikwaambilizya Bwami ibajisi makanze aakujana alimwi akugwasya baabo beelela buumi butamani. (Incito 13:48) Ambweni mulakonzya kutola lubazu cabusungu mumilimo imwi mumbungano mbuli kugwasya bacembeede alimwi akukulwaizya bakubusi. Ikucita boobo kulakonzya kumukkomanisya kapati!
Mbomukkala Abamwi
13. Mibuzyo nzi njotukonzya kulibuzya kujatikizya kulisamika buntu bupya?
13 Mbokunga buzuba bwa Jehova buli afwaafwi, sena mweelede kusolekesya “kulisamika buntu bupya bulengulwidwe mucinkozya ca-Leza cabululami acabusalali bwinibwini”? (Ba-Efeso 4:20-24) Nomuya buba abube bwa Leza, ibamwi balalangilwa kubona kuti nzila ‘njimweendela nja muuya wa Leza’ alimwi mutondezya micelo yamuuya. (Ba-Galatiya 5:16, 22-25) Sena kuli zintu nzyomucita alimwi amukwasyi wanu zitondezya kuti mulisamide buntu bupya? (Ba-Kolose 3:9, 10) Mucikozyanyo, sena mulizizilwe akaambo kakucitila basyominyoko alimwi abantu bamwi milimo mibotu? (Ba-Galatiya 6:10) Ikwiiya Bbaibbele lyoonse kulakonzya kumugwasya kuti mube abube bwa Leza ibukonzya kumupa kuti mulibambile buzuba bwa Jehova.
14. Nkaambo nzi ncotweelede kupailila muuya uusalala notusoleka kulilesya?
14 Ino mbuti mbomukonzya kucita ikuti kamujisi moyo muniini aboobo mwabona kuti muyandika kulilesya kapati? Kulilesya mbube bumwi buli akati kamicelo yamuuya uusalala wa Leza mbomukonzya kuba ambubo. Aboobo, amupailile muuya uusalala kweelana amajwi aa Jesu aakuti: “Amukumbile muzoopegwa, amuyandaule muzoojana, amukonkomone muzoojulilwa. . . . Nywebo, nobabi, mbomuzi kupa bana banu zintu zibotu, Usowanu uuli kujulu sena takooindilila kubapa Muuya Uusalala abakumbila kulinguwe?”—Luka 11:9-13.
15. Ncinzi ncomweelede kucita ikuti naa kamutamvwani amusyominyoko?
15 Ino mbuti kuti naa kamutamvwani amusyominyoko? Ikuti kacili boobo, amusoleke kumvwana alimwi kutegwa kube luumuno alimwi alukamantano lwa mbungano. (Intembauzyo 133:1-3) Amutobele lulayo lwa Jesu lulembedwe kuli Matayo 5:23, 24 naa Matayo 18:15-17. Ikuti naa mwali kubbizya zuba kamunyemede, amufwambaane kubamba twaambo. Bunji bwaziindi iciyandika nkulisungula kulekelela. Paulo wakalemba kuti: “Amuusilane buuya, mukabe batete moyo, akuba aluzyalo lwakulekelelana milandu, mbubonya mbuli Leza mbwaakalekelela ndinywe muli-Kristo.”—Ba-Efeso 4:25, 26, 32.
16. Mumbazu nzi mokuyandika kuba aluzyalo mulukwatano?
16 Mulukwatano, banabukwetene beelede kuba aluzyalo, batete moyo alimwi zimwi ziindi beelede kulekelelana. Ikuti kamuyanda kuti mube aluyando alimwi aluzyalo kuli baabo mbomukwetene limwi, amusoleke kucita boobo kwiinda mukugwasigwa a Leza alimwi a Jwi lyakwe. Sena mweelede kutobela malailile aali kulugwalo lwa 1 Ba-Korinto 7:1-5 kutegwa kutabi uukatazigwa mumizeezo alimwi akutasyomeka? Masimpe, caboola kulukwatano, mulumi amukaintu beelede kuba “batete moyo” mukaambo aaka.
17. Ikuti umwi wacita cibi cipati, ncinzi ncayelede kucita?
17 Ino mbuti kuti mwakacita cibi cipati? Amufwambaane kululamika zintu. Amubasikile baalu Banakristo akulomba lugwasyo. Imipailo alimwi alulayo lwabo luyoopa kuti mupone kumuuya. (Jakobo 5:13-16) Amweempwe akupaila kuli Jehova. Mwatacita boobo munookatazigwa mumizeezo alimwi manjezeezya aanu anoomukatazya. Oobo mbombubo mbwaakali kulimvwa Davida, pele wakakatalukwa kapati naakalyaambilila cibi cakwe kuli Jehova. Davida wakalemba kuti: “Uli acoolwe muntu uulekelelwa milandu yakwe, uuvumbilwa zibi zyakwe. Uli acoolwe muntu oyo Jehova ngwatabiki kaambo, uutajisi lweeno mumuuya wakwe.” (Intembauzyo 32:1-5) Jehova ulabalekelela aabo babisya pele ibeempwa ncobeni.—Intembauzyo 103:8-14; Tusimpi 28:13.
Amuzumanane Kulyaandaanya Anyika
18. Ino mbuti mbomweelede kwiibona nyika?
18 Cakutadooneka mulangila nyika mpya iitaliboteli njaakatusyomezya Tateesu wakujulu. Aboobo, ino mbuti mbomwiibona nyika iijisi bantu bataluleme ibazandukide kuli Leza? Saatani, “mwami wenyika ino,” kunyina naakajisi nguzu zyakuzunda Jesu Kristo. (Johane 12:31; 14:30) Masimpe, tamuyandi kuzundwa a Diabolosi alimwi anyika yakwe, aboobo camoyo woonse amutobele majwi ngaakaamba mwaapostolo Johane kuti: “Mutayandi nyika, neziba zintu zyamunyika.” Ncamaanu kucita boobo, nkaambo “nyika ilamana, azisusi zyayo, pele oyo uucita makanze aa-Taata ulakalilila kukabe kutamani.”—1 Johane 2:15-17.
19. Ino bakubusi Banakristo bakulwaizigwa kuba ambaakani zili buti?
19 Sena mulabagwasya bana banu “kuliyobola cakutaba akabala nikaba komwe kaansi”? (Jakobo 1:27) Saatani uyanda kuca bana banu mbubonya sikuzuba nswi mbwazuba nswi akanyandi. Kuli tukamu alimwi ambunga zimwi zyakabambilwa kupa kuti bakubusi balikumbatizye kunyika ya Saatani. Pele, babelesi ba Jehova bali kale mumbunga iyoofwutuka mamanino abweende bwazintu oobu. Aboobo, bakubusi Banakristo beelede kukulwaizigwa ‘kupangika myoyo yabo kumilimo ya Mwami.’ (1 Ba-Korinto 15:58) Bazyali bayoowa Leza beelede kugwasya bana babo kulibikkila mbaakani zikonzya kubakkomanisya mubuumi akulemeka Leza alimwi akupa kuti balibambile buzuba bwa Jehova.
Amubikkile Maano Kubuumi Butamani
20. Nkaambo nzi ncotweelede kubikkila maano kubuumi butamani?
20 Mulakonzya kulindila buzuba bwa Jehova cakukkazika moyo kwiinda mukubikkila maano kubuumi butamani. (Juda 20, 21) Mulangila buumi butamani mu Paradaiso, aboobo mujisi bulangizi bwakuba anguzu zyabukubusi alimwi aciindi cinji cakulibikkila mbaakani zigwasya alimwi akwiiya zinji kujatikizya Jehova. Mubwini mulakonzya kuzumanana kwiiya zya Leza mane kukabe kutamani nkaambo mazuba aano bantu bazi “moombe biyo wanguzu zyakwe.” (Jobu 26:14) Bwabotaace bulangizi oobu!
21, 22. Ino makani nzi ngomulangila kuyoobandika abaabo bayoobusigwa?
21 Mu Paradaiso, aabo bayoobusigwa bayootuzibya makani amwi ngotutazi aakacitika kaindi. Enoki unooliko kutupanduluda icakapa kuti abe sicamba mukwaambilizya mulumbe wa Jehova kubantu batayoowi Leza. (Juda 14, 15) Cakutadooneka, Nowa uyootwaambila mbocakabede ikuyaka bwato. Abrahamu a Sara bayootwaambila mbobakalimvwa nobakaambilwa kusiya munzi mubotu wa Uri akukkala mumatente. Amuyeeye Esita kaamba mbwaakabweza ntaamu yakukwabilila bantu bakwe akupa kuti makanze aa Hamani atazwidilili. (Esita 7:1-6) Amweezeezye kuti mulimumvwide Jona kaamba zyakamucitikila mumazuba otatwe naakali mwida lya muswi naa Johane Mubbapatizi kaamba mbwaakalimvwa naakabbapatizya Jesu. (Luka 3:21, 22; 7:28) Masimpe, tuya kwiiya makani manji aakondelezya.
22 Mu Bulelo bwa Kristo Bwamyaka Iili Cuulu, ambweni muyooba acoolwe cakugwasya baabo bayakubusigwa ikuba ‘aluzibo lwa Leza.’ (Tusimpi 2:1-6) Mazuba aano, cilakkomanisya kapati ikubona bantu baiya akuziba Jehova Leza alimwi ibabelesya luzibo oolo! Pele, amuyeeye buyo mbomuyookkomana ciindi Jehova nayoolongezya kusoleka kwanu mukuyiisya bantu bansiku babombe myoyo!
23. Makanze nzi ngotweelede kuba angawo?
23 Impindu nzyotujana lino mbotuli bantu ba Jehova nzinji kapati, tazibaliki. (Intembauzyo 40:5) Icipati ncotulumba kapati nzyaabilo zyakumuuya nzyatupa Leza mbuli Bbaibbele, mabbuku, miswaangano, muuya uusalala, kugwasigwa abangelo, azimwi zyataambwa waawa. (Isaya 48:17, 18) Kufwumbwa naa tuli mubukkale buli buti, atucite mulimo uusetekene camoyo woonse mbotulindila buzuba bupati bwa Jehova.
Ino Inga Mwaingula Buti?
• Ino “buzuba bwa-Jehova” ninzi?
• Mbuti mbomukonzya kulibambila buzuba bwa Jehova?
• Mbwaanga buzuba bupati bwa Leza bwaswena, nkucinca kuli buti nkotunga twayandika kucita?
• Ncinzi ncomulangila kuyoocita bwaakwiinda buzuba bwa Jehova?
[Mibuzyo yaciiyo]
[Cifwanikiso icili apeeji 14]
Jesu wakalilibambide kumasukusyo aakamusikila
[Cifwanikiso icili apeeji 17]
Elyo kaka cinookkomanisya ikugwasya baabo bayoobusigwa ikuba aluzibo lwa Jehova!