Taakwe Cilwanyo Cibambilwa Kumulwana Ciyoozwidilila

“Taakwe cilwisyo . . . cibumbwa kukulwisya nduwe cikonzya kujana coolwe.” —ISAYA 54:17.

1, 2. Ino zintu zyakacitikila Bakamboni ba Jehova ku Albania zitondezya buti kuti majwi aali kuli Isaya 54:17 ngamasimpe?

KWAMYAKA iili mboibede, mucisi camalundu caku Europe nkoili kumusanza lwaajwe, kwakali nkamu ya Banakristo basicamba. Imfwulumende yabantu batasyomi muli Leza ya Kkomyunizimu yakasoleka canguzu kunyonyoona nkamu eeyi. Nokuba boobo, kupenzegwa, zilabba zyakupenzezya alimwi akumwaya twaambo twakubeja, taakwe nozyakabalobya pe. Ino mbaani mbotwaamba? Mbaakamboni ba Jehova baku Albania. Nokuba kuti cakali kukatazya kapati kuswaangana akukambauka, ikuliyumya nkobakacita kwamyaka minji kwapa kuti Bunakristo bulemekwe alimwi akutembaula zina lya Jehova. Imwakali nokwakali kwaabwa mayake mapya aamutabi, Kamboni umwi uusyomeka wakati: “Nokuba kuti Saatani tapuumuni kutulwana, taakwe nazwidilila pe, pele Jehova nguuzunda!”

² Eezi zyoonse zipa bumboni bwakuti cisyomezyo ca Leza kubantu bakwe icilembedwe kuli Isaya 54:17 ncamasimpe: “Taakwe cilwisyo niciba comwe cibumbwa kukulwisya nduwe cikonzya kujana coolwe, andimi zyoonse zibuka kukubeteka uyoozipa mulandu.” Kweelana azintu zyali kucitika musyule, cilisalede kuti nyika ya Saatani kunyina noiya kupa kuti babelesi ba Jehova Leza balyaabide baleke kumukomba.

Saatani Taakwe Nazwidilila

3, 4. (a) Ncinzi cibikkilizidwe muzilwanyo zya Saatani? (b) Ino mbuti zilwanyo zya Diabolosi mbozyatazwidilila?

³ Zilwanyo zyali kubelesegwa mukulwana bakombi bakasimpe zibikkilizya kukasya mulimo, kuumwa ankamu zyabantu, kwaangwa alimwi ‘akubikkilwa milawo yakupenzya.’ (Intembauzyo 94:20) Ibwini mbwakuti mumasi aamwi, noliba lino Bakamboni ba Jehova nobayiya makani aaya, Banakristo aaba bakasimpe ‘balasunkwa’ kujatikizya mbobasyomeka kuli Leza.—Ciyubunuzyo 2:10.

 ⁴ Mucikozyanyo, lipooti yakazwa kuofesi yamutabi imwi ya Bakamboni ba Jehova yakaamba kuti mumwaka omwe buyo bakatambula malipooti aali 32 aakuti babelesi ba Leza bakaumwa ciindi nobakali mumulimo wakukambauka. Kunze lyaboobo, kwakatambulwa malipooti aali 59 aakuti bamapulisa bakaanga Bakamboni—bana abapati, basankwa abamakaintu—ibakali kukambauka kubuleya. Ibamwi bakali kwaambilwa kudinta aamunwe, bakali kufwotolwa akubikkwa muntolongo mbuli kuti nzigwebenga. Ibamwi bali kukongwa kuumwa. Mucisi cimbi, kuli malipooti aayiinda ku 1,100 akatambulwa aamba kuti kusikila sunu Bakamboni ba Jehova bali kwaangwa, kubbadelesegwa naa kuumwa. Akati kamilandu eeyi, kuli milandu yiinda ku 200 yakacitika mubuzuba mbobakaswaangana kwiibaluka lufwu lwa Jesu! Nokuba boobo, muuya wa Jehova wapa kuti bantu bakwe bazwidilile nokuba kuti bali kupenzegwa kapati mumasi aaya alimwi aambi buyo. (Zekariya 4:6) Ibukali bwabasinkondo aaba kunyina nobuya kupa kuti bantu ba Jehova baleke kumutembaula. Masimpe, tujisi lusyomo lwakuti taakwe cilwanyo cikonzya kusinkila makanze aa Leza.

Ndimi Zyakubeja Zyazulwa

5. Ino nindimi nzi zyakubeja zyakali kulwana babelesi ba Jehova mumwaanda wamyaka wakusaanguna?

⁵ Isaya wakasinsima kuti bantu ba Leza bakali kuyoopa mulandu naa kuzula bantu boonse bakali kuyoobalwana. Mumwaanda wamyaka wakusaanguna, bunji bwaziindi Banakristo bakali kutamikizyigwa kuti mbasizibi. Kaambo aaka kalisalede twalanga majwi aali kulugwalo lwa Incito 16:20, 21 aakuti: “Aba bantu, . . . banyonyonganisya munzi wesu, balaamba ziyanza nzotuteelede kuzitambula akuzicita, swebo toba-Roma.” Ibuzuba bumwi, basizikombelo ibakali kukazya bakasoleka kutyungilila beendelezi bamumunzi kuti balwane basikutobela Kristo kabaamba kuti: “Abo abasandamuna nyika basika akookuno, [alimwi] basotoka milao ya-Kaisara.” (Incito 17:6, 7) Imwaapostolo Paulo wakatamizigwa kuti wakali “siŋunzuunzu” alimwi akuti wakali musololi wakakamu kabazangi ibakali kuleta lupyopyongano “munyika yoonse.”—Incito 24:2-5.

6, 7. Ninzila nzi yomwe njobabelesya Banakristo bakasimpe mukupa mulandu naa kuzula ndimi zibalwana?

⁶ Aboobo, tacigambyi pe kuti mazuba aano Banakristo bakasimpe balatamikizyigwa akubisyilwa zina. Ino muunzila nzi motupa mulandu naa kuzula ndimi eezi zitulwana?—Isaya 54:17.

⁷ Bunji bwaziindi, makani aayo aakubeja alazibwa kuti ngakubeja kwiinda mukulilemeka kwa Bakamboni ba Jehova. (1 Petro 2:12) Ciindi Banakristo nobatondezya kuti mbasicisi batobela milawo alimwi akuti mbantu balilemeka alimwi ibabikkila maanu kapati kubukkale bwabamwi, ikutamikizigwa nkobatamikizigwa kulabonwa kuti nkwakubeja. Ikulilemeka kwesu nkokutondezya kuti tunyina mulandu. Ibantu batulangilila nobabona mbotuliyumya mumilimo mibotu, bunji bwaziindi balakulwaizigwa kulemeka Taateesu wakujulu akuzumina kuti masimpe babelesi bakwe bajisi bukkale bubotu kapati.—Isaya 60:14; Matayo 5:14-16.

8. (a) Mubukkale bumwi, ino ncinzi cinga cayandika kucita kutegwa tuliiminine caboola kuzintu zyamu Magwalo nzyotutobela? (b) Kwiinda mukutobela Kristo, ino mbuti ndimi zikazya mbotuzipa mulandu?

⁸ Kunze lyabukkale bwesu bwa Bunakristo, zimwi ziindi inga kwayandika kuti tuliiminine cabusicamba caboola kuzintu zyamu Magwalo nzyotutobela. Imwi nzila mbotucita boobo nkwiinda mukutola twaambo kumfwulumende akunkuta kutegwa tukwabililwe. (Esita 8:3; Incito 22:25-29; 25:10-12) Ciindi Jesu naakali anyika, zimwi ziindi wakali kubakazya caantangala basikumukazya kwiinda mukukazya twaambo twakubeja. (Matayo 12:34-37; 15:1-11) Kwiinda mukutobela Jesu, tulilibambide kubapanduluda bantu cakusalazya kujatikizya nzyotusyoma. (1 Petro 3:15) Ikufwubaazigwa ambotwiiya limwi, mbotubeleka limwi naa basazima batasyomi takweelede kutulesya kwaamba  kasimpe kali mu Jwi lya Leza.—2 Petro 3:3, 4.

Jerusalemu—“Ibbwe Idemu”

9. Ino “ibbwe idemu” lyaambwa kuli Zekariya 12:3 liiminina Jerusalemu uuli, alimwi ino mbaani bawiiminina anyika?

⁹ Businsimi bwa Zekariya butondezya kaambo ibamasi ncobalwana Banakristo bakasimpe. Amubone ncolwaamba lugwalo lwa Zekariya 12:3: “Mubuzuba obo njoocita kuti Jerusalemu ube ibbwe idemu kubantu boonse.” Ino businsimi oobu bwaamba Jerusalemu uuli? Ibusinsimi bwa Zekariya bwaamba “Jerusalemu wakujulu,” nkokuti Bwami bwakujulu mbobakaitilwa Banakristo bananike. (Ba-Hebrayo 12:22) Imweelwe musyoonto wabamucaala aaba bayakukona Bwami bwa Mesiya bacili anyika. Antoomwe abeenzinyina iba “mbelele zimwi,” bakulwaizya bantu kulibombya ku Bwami bwa Leza nociciliko ciindi. (Johane 10:16; Ciyubunuzyo 11:15) Ino bamasi baabona buti makani aaya? Alimwi, ino mbuti Jehova mbwagwasya bakombi bakasimpe mazuba aano? Atujane bwiinguzi mbotuya bulingula bupanduluzi bwa Zekariya caandaano 12. Kwiinda mukucita boobo, tulakonzya kusyoma kuti ‘taakwe cilwanyo ciyoozwidilila’ mukulwana bananike ba Leza alimwi abeenzinyina balyaabide.

10. (a) Nkaambo nzi bantu ba Leza ncobalwanwa? (b) Ncinzi cicitika kuli baabo basola kuzyula alimwi akunyamuna “ibbwe idemu”?

¹⁰ Lugwalo lwa Zekariya 12:3 lutondezya kuti bamasi “balasyondwa.” Ino mbuti mbobacita oobo? Leza wapa malailile aakuti makani mabotu aa Bwami aleelede kukambaukwa. Bakamboni ba Jehova kunyina nobaubya-ubya mukuli ngobajisi wakukambauka. Pele, ikwaambilizya mulumbe wakuti Bwami bwa Leza mbobulangizi bwa banamaleya bulikke kuli mbuli “ibbwe idemu” kuli bamasi. Ibamasi basola kulizyula akulinyamuna kwiinda mukunyonganya bakambausi ba Bwami. Nobacita boobo, bamasi aaba “balasyondwa” naa kulicisa beni. Noiba mpuwo yabo ilamana mbwaanga taakwe nobazwidilila pe. Kunyina nobakonzya kulesya bakombi bakasimpe, ibaukkomanina mukuli ngobajisi wakwaambilizya “Makani Mabotu aateeli” aa Bwami bwa Leza kaatanasika mamanino abweende bwazintu oobu. (Ciyubunuzyo 14:6) Naakabona babelesi ba Jehova mbobakali kupenzyegwa, mulindizi wantolongo mucisi cimwi camu Africa munzila imwi wakati: ‘Taakwe ncomutiijane mukupenzya bantu aaba. Tabakooleka pe. Mubwini banooya buvwula buyo.’

11. Ino mbuti Leza mbwaazuzikizya majwi aalembedwe kuli Zekariya 12:4?

¹¹ Amubale Zekariya 12:4. Jehova usyomezya kuti munzila yacikozyanyo uyoopa kuti aabo balwana batumwa ba Bwami bwakwe boofwaale ‘akucinkuka.’ Masimpe, oobo mbombubo mbwaacita. Mucikozyanyo, mucisi cimwi mobwakali kukasyigwa bukombi bwakasimpe, basikukazya taakwe nobakakonzya kubalesya bantu ba Leza kuti bajane cakulya cakumuuya. Mane buya muteende umwi wakaamba kuti Bakamboni ba Jehova bakali kubelesya mabbaluni kweeta mabbuku aamba zya Bbaibbele mucisi eeco! Ncobeni, majwi ngaakaamba  Leza kubabelesi bakwe basyomeka akazuzikizigwa aakuti: “Njoobabbanwida meso, ciindi eco ncinjoofwaazya imbizi zyoonse zyabamasi.” Kabanyemede kapati, aabo balwana Bwami balikopene, taakwe ancobabwene. Nokuba boobo, tujisi lusyomo lwakuti Jehova uyoobafwutula akubalanganya bantu bakwe boonse.—2 Bami 6:15-19.

12. (a) Ino mbuti Jesu mbwaakayasya mulilo anyika? (b) Ino mbuti bamucaala bananike mbobaumpa zintu munzila yakumuuya, alimwi ino ncinzi cacitika akaambo kakucita boobo?

¹² Amubale Zekariya 12:5, 6. “Mikowa yaba-Juda” naa “bapati bacisi ca Juda” kweelana a The Bible in Tonga lyamu 1996 baiminina balangizi bananike ibali akati kabantu ba Leza. Jehova upa kuti aba basungwaale mukulanganya zintu zya Bwami anyika. Ibuzuba bumwi, Jesu wakaambila basikwiiya bakwe kuti: “Ndakasika kuwaala mulilo ansi.” (Luka 12:49) Masimpe, wakayasya mulilo. Kwiinda mukukambauka cabusungu, Jesu wakapa kuti mulumbe wa Bwami bwa Leza ube mulumbe uuyandika kapati kubantu. Eeci cakatalisya mazwanga mucisi coonse caba Juda. (Matayo 4:17, 25; 10:5-7, 17-20) Mbubwenya, “mbuli lukaye lwamulilo akati kankuni, ambuli musunge akati kamisunta yamaila,” basikutobela Kristo mazuba aano balazyuumpa zintu munzila yakumuuya. Cakutainda mumbali, ibbuku lyamu 1917 lyakuti The Finished Mystery * lyakayubununa kuupaupa ameso kwa Bunakristo Bwanyika. Eeco cakapa kuti basololi bazikombelo  banyeme kapati. Calino-lino, Makani aa Bwami Na. 37 aakuti, “Mamanino aa Bukombi Bwakubeja ali Afwaafwi!” akapa kuti ibanji basale kuba kulubazu lwa Bwami bwa Leza naa pe.

“Zilao zya-Juda” Zyafwutulwa

13. Ino majwi aakuti “zilao zya-Juda” aamba nzi, alimwi nkaambo nzi Jehova ncabafwutula bantu aaba?

¹³ Amubale Zekariya 12:7, 8. Mu Israyeli yansiku, matente naa zilawo zyakali kujanika kapati munyika, zimwi ziindi zyakali kubelesegwa abeembezi alimwi abalimi. Ibantu bali boobu mbobakali kukonzya kusaanguna kulwanwa aboobo bakeelede kukwabililwa kuli basinkondo ibakali kulwana munzi wa Jerusalemu. Imajwi aakuti “zilao zya-Juda” atondezya kuti bamucaala bananike mazuba aano bali kunze aamunzi munzila yacikozyanyo, nkokuti tabali mumunzi uukwabilidwe. Nobali kooko baiminina zintu zya Bwami bwa Mesiya cabusicamba. Jehova wamakamu “uyootaanguna kufutula zilao zya-Juda” nkaambo aaba mbambabo mbalwana cacigaminina Saatani.

14. Ino mbuti Jehova mbwakwabilila baabo bali mu “zilao zya-Juda” akupa kuti batalebwi?

¹⁴ Masimpe, izyali kucitika musyule zitondezya kuti Jehova ulabakwabilila bananike ibaiminina Bwami mu “zilao” kunze lyamunzi. * Ulabakwabilila kutegwa batalebwi mbuli mwana “muniini” mukuti ulabayumya akubapa kuba basicamba mbuli Davida, imwami singuzu.

15. Nkaambo nzi Jehova ‘ncayanda kunyonyoona bantu bamasi oonse,’ alimwi ino ndiilili nayoocita boobo?

¹⁵ Amubale Zekariya 12:9. Nkaambo nzi Jehova ‘ncayanda kunyonyoona bantu bamasi oonse’? Nkaambo kakuti balazumanana kukazya Bwami bwa Mesiya. Akaambo kakupenzya bantu ba Leza, bamasi beelede kusubulwa. Lino-lino baiminizi ba Saatani ibali anyika bayoolwana bakombi ba Leza camamanino, calo ciyoosololela ku Harmagedoni yaambwa mu Bbaibbele. (Ciyubunuzyo 16:13-16) Ciindi eeco, Mubetesi Mupati uyoobweza ntaamu yakukwabilila babelesi bakwe alimwi akusalazya zina lyakwe akati kabamasi.—Ezekieli 38:14-18, 22, 23.

16, 17. (a) Ino “caabilo cabalanda ba-Jehova” ninzi? (b) Ciindi notuliyumya mukulwanwa a Saatani, ncinzi ncotutondezya?

¹⁶ Saatani tajisi cilwanyo cikonzya kucesya lusyomo naa busungu mbobajisi bantu ba Leza nyika yoonse mboizulwa. Iluumuno ndotujisi akaambo kakuziba kuti Jehova ulakozya kutufwutula, “[nce]caabilo cabalanda ba-Jehova.” (Isaya 54:17) Taakwe ukonzya kutudyaaminina akutulesya kuba aluumuno alimwi abuvwubi bwesu bwakumuuya. (Intembauzyo 118:6) Saatani takooleka kutulwana akutupenzya. Nokuba boobo, kwiinda mukusyomeka akuliyumya notusampaulwa tutondezya kuti muuya wa Leza uli alindiswe. (1 Petro 4:14) Makani mabotu aa Bwami bwa Jehova bwakatalisigwa alakambaukwa nyika yoonse. Mbuli mivwi iiyaka, “zifusyo” zinji zyali kuwaalwa munzila yacikozyanyo ikukazya bantu ba Leza. Nokuba boobo, kwiinda munguzu zya Jehova babelesi bakwe bazikwaba zifusyo eezyo alimwi taakwe nozyazwidilila pe. (Zekariya 9:15) Bamucaala bananike alimwi abeenzinyina basyomeka kunyina nobaya kuzundwa!

¹⁷ Tulangila ciindi notuya kuvwunwa cakumaninina kukulwanwa a Diabolosi. Elyo kaka cilakulwaizya kuziba kuti ‘taakwe cilwanyo niciba comwe cibumbwa kutulwisya ciyoozwidilila, alimwi ndimi zyoonse zibuka kutubeteka tuyoozipa mulandu’!

Bupanduluzi buyungizidwe

Ino Inga Mwaingula Buti?

• Ncinzi citondezya kuti zilwanyo zya Saatani taakwe nozyazwidilila?

• Ino mbuti Jerusalemu wakujulu mbouli “ibbwe idemu”?

• Ino mbuti Jehova mbwafwutula “zilao zya-Juda”?

• Amagedoni mboiya buswena, ncinzi ncomulangila?

[Mibuzyo yaciiyo]

[Zifwanikiso izili apeeji 23]

Bantu ba Jehova ku Albania bakazumanana kusyomeka nokuba kuti bakali kulwanwa a Saatani

[Cifwanikiso icili apeeji 25]

Jesu wakatukazya twaambo twakubeja

[Zifwanikiso izili apeeji 26]

Taakwe cilwanyo cipangilwa kulwana basikwaambilizya makani mabotu ciyoozwidilila