Amubikkile Maanu ‘Kukuyiisya’ Kwanu
Amubikkile Maanu ‘Kukuyiisya’ Kwanu
“Ukambauke Makani . . . Sungwaala kulaya akutapatila akukombelezya. Kokazikisya loko moyo mukwiisya kwako.”—2 TIM. 4:2.
1. Ino Jesu wakabalailila kucita nzi basikwiiya bakwe, alimwi wakasiya cikozyanyo cili buti?
NOKUBA kuti Jesu wakacita milimo iigambya yakuponya bantu mumulimo wakwe waanyika, wakazibwa kapati kuti wakali mwiiyi, kutali sikuponya naa sikucita maleele. (Mk. 12:19; 13:1) Kwaambilizya makani mabotu aa Bwami bwa Leza ngowakali mulimo mupati kuli Jesu, alimwi eezyo mbozibede akuli basikumutobela mazuba aano. Banakristo bajisi mulimo wakuzumanana kugwasya bantu kuba basikwiiya kwiinda mukubayiisya kuti bajatisye makani oonse ngaakalailila Jesu.—Mt. 28:19, 20.
2. Ino ncinzi ncotuyandika kucita kutegwa tuzuzikizye mulimo wesu wakukambauka?
2 Kutegwa tuzuzikizye mukuli ooyu wakugwasya bantu kuba basikwiiya, lyoonse tweelede kusola-sola kuyaambele mukuyiisya kwesu. Mwaapostolo Paulo wakakankaizya mboluyandika luzibo oolu lwakuyiisya naakalembela Timoteo imukambausinyina. Wakati: “Alimwi kolibonena omwini akufundisya kwako. Koujisi azintu ezi, utaleki pe, nkaambo wanoocita bobuya, inga ulalifutula omwini, abalo bakumvwa ulabafutula.” (1 Tim. 4:16) Ikuyiisya nkwaakali kwaamba Paulo takuli buyo kwiile kupa luzibo. Bamayi Banakristo bacibwene balasika amyoyo yabantu akubakulwaizya kucinca bukkale bwabo kweelana anzyobaiya. Ooku nkuba aluzibo. Aboobo ino mbuti mbotukonzya ‘kuba aluzibo lwakuyiisya’ notwaambila bamwi makani mabotu aa Bwami bwa Leza?—2 Tim. 4:2.
Amube ‘Aluzibo Lwakuyiisya’
3, 4. (a) Ino mbuti mbotukonzya kuba bantu ‘bacizi kuyiisya’? (b) Ino mbuti Cikolo Camulimo Weendelezyegwa a Leza mbocitugwasya kuba bamayi bajisi luzibo?
3 Ikuciziba kucita cintu cimwi kabotu caamba ‘kuba aluzibo lwambocicitwa ilujanwa kwiinda mukwiiya, kucita naa kulangilila.’ Tweelede kubikkila maanu kumbazu zyoonse eezi zyotatwe kutegwa tube bamayi bamakani mabotu bacibwene. Tulakonzya kumvwisya kaambo nkotuyoobandika kwiinda mukupaila lyoonse notulibambila. (Amubale Intembauzyo 119:27, 34) Kulangilila bamayi bacibwene nobayiisya kulatugwasya kwiiya alimwi akutobela mbobayiisya. Alimwi kusolekesya lyoonse kuzicita nzyotwiiya kuyootugwasya kuyaambele muluzibo lwesu lwakuyiisya.—Lk. 6:40; 1 Tim. 4:13-15.
4 Jehova Mmwiiyi wesu Mupati. Kwiinda mumbunga yakwe ilibonya, ulabayiisya babelesi bakwe anyika mbobeelede kuucita mulimo wabo wakukambauka. (Is. 30:20, 21) Akaambo kaceeci, mumbungano zyoonse ansondo kulacitwa Cikolo Camulimo Weendelezyegwa a Leza, eeco cakabambilwa kugwasya boonse batola lubazu kuba bakambausi bacibwene ba Bwami bwa Leza. Ibbuku libelesyegwa mucikolo eeci ndi Bbaibbele. Ijwi lya Jehova lyakasololelwa amuuya lilatwaambila nzyotweelede kuyiisya. Kunze lyaboobo, lilatondezya nzila zibotu zyakuyiisya alimwi zyeelela. Cikolo Camulimo Weendelezyegwa a Leza lyoonse cilatuyeezya kuti tulakonzya kuba bamayi bajisi luzibo lunji ikuti nzyotuyiisya kazizwa mu Jwi lya Leza, katubelesya kabotu mibuzyo, katuyiisya munzila nguba-uba, alimwi katubabikkila maanu bamwi. Atutulange-lange ootu twaambo komwe-komwe. Mpoonya tulabandika mbotukonzya kumusika amoyo sikwiiya.
Amubelesye Jwi lya Leza Mukuyiisya Kwanu
5. Ino kuyiisya kwesu kweelede kuyaama aali, alimwi nkaambo nzi?
5 Jesu, imwiiyi mupati kwiinda bamayi bantunsi wakali kubelesya Magwalo mukuyiisya kwakwe. (Mt. 21:13; Joh. 6:45; 8:17) Wakali kwaamba, kutali muzina lyakwe, pele muzina lya Ooyo wakamutuma. (Joh. 7:16-18) Eeco ncecikozyanyo ncotweelede kutobela. Aboobo, nzyotwaamba mumulimo wakuŋanda aŋanda naa kuciiyo ca Bbaibbele zyeelede kuyaama mu Jwi lya Leza. (2 Tim. 3:16, 17) Busongo bwesu tabukonzyi kweelanizigwa anguzu zya Magwalo aakasololelwa amuuya. Ibbaibbele lilijisi nguzu. Kufumbwa kaambo nkotusola kugwasya sikwiiya kuti akamvwisye, nzila mbotu njakumwaambila kuti alibalile mwini ncaamba Magwalo kujatikizya kaambo aako.—Amubale Ba-Hebrayo 4:12.
6. Ino mbuti mwiiyi mbwakonzya kuba masimpe kuti sikwiiya wakamvwisya kaambo kali mukubandikwa?
6 Ooko takuli kwaamba kuti mwiiyi Munakristo teelede kulibambila ciiyo ca Bbaibbele. Muciindi caboobo, kuyandika kulibambila loko akusala magwalo mwiiyi naa sikwiiya ngayoobala kuzwa mu Bbaibbele ciindi caciiyo. Kanji-kanji, kulayandika kwaabala magwalo aayo aatondezya nzyotusyoma. Alimwi cilayandika kugwasya sikwiiya kumvwisya lugwalo alumwi ndwabala.—1 Kor. 14:8, 9.
Amubelesye Mibuzyo Iigwasya
7. Ino nkaambo nzi kubuzya mibuzyo ncoili nzila mbotu yakuyiisya?
7 Kubelesya mibuzyo cabupampu kupa kuyeeya alimwi kulamugwasya mwiiyi kumusika amoyo sikwiiya. Aboobo, muciindi cakupandulula magwalo kuli sikwiiya, amumuleke kuti amupandulude. Zimwi ziindi kuyandika mubuzyo naa mibuzyo iiyungizidwe kutegwa sikwiiya akamvwisye kaambo. Ikuti kamubelesya mibuzyo mukuyiisya, mulamugwasya sikwiiya, kutali buyo kumvwisya kaambo ncokali boobo, pele alimwi akusyoma kuti nkamasimpe.—Mt. 17:24-26; Lk. 10:36, 37.
8. Ino mbuti mbotukonzya kuziba zili mumoyo wasikwiiya?
8 Nzila yakwiiya iibelesyegwa mumabbuku eesu njakubuzya akwiingula. Cakutadooneka, bantu banji mbotwiiya limwi Bbaibbele balakonzya kufwambaana kwiingula mibuzyo iisimbidwe, kababelesya makani kuzwa mumincali iijisi mibuzyo eeyo. Nokuba boobo, imwiiyi mupampu takookkutila buyo abwiinguzi buluzi. Mucikozyanyo, sikwiiya ulakonzya kupandulula kabotu ncolyaamba Bbaibbele kujatikizya bwaamu. (1 Kor. 6:18) Pele cabupampu kubelesya mibuzyo iigwasya kuziba mbwayeeya muntu, kulakonzya kutondezya nzyayeeya sikwiiya kujatikizya nzyaiya. Aboobo mwiiyi ulakonzya kubuzya kuti: “Ino nkaambo nzi Bbaibbele ncolikasya koonana kwabantu batakwetene limwi? Ino muyeeya buti kujatikizya mulawo ooyu Leza ngwaakapa? Sena muyeeya kuti kuli mpindu iijanika ikuti katupona kweelana azyeelelo zya Leza zyakulilemeka?” Bwiinguzi kumibuzyo iili boobu bulakonzya kutondezya mbwayeeya sikwiiya.—Amubale Matayo 16:13-17.
Amucuubye-ubye
9. Ino ncinzi ncotweelede kuyeeya notwaambila bamwi mulumbe wamu Magwalo?
9 Kasimpe kajanika mu Jwi lya Leza takakatazyi kumvwa. Pele, kulakonzya kuba kuti bantu mbotwiiya limwi Bbaibbele bakanyonganyizyigwa anjiisyo zyabukombi bwakubeja. Mulimo wesu mbotuli bamayi ngwakugwasya bantu kulimvwisya Bbaibbele. Bamayi bacizi kuyiisya baamba makani munzila nguba-uba alimwi iiluzi. Ikuti twaatobela malailile aaya, muciindi cakuti kasimpe kayume cilapa kuti cuube-ube kukamvwisya. Tutavwuzyi makani aatayandiki kapati. Takuyandiki kwaamba twaambo toonse tuli mulugwalo ndotwabala. Tweelede kubikkila buyo maanu kumbazu iiyandika kumvwisya kaambo kali mukulangwa-langwa. Sikwiiya uyoomvwisya makani mapati aakasimpe kamu Magwalo ciindi nayaambele mukwiiya.—Heb. 5:13, 14.
10. Ntwaambo tuli buti tugwasya kubona bunji bwamakani ngotweelede kwiiya lyaciiyo ca Bbaibbele?
10 Ino ntunji buti twaambo tweelede kuyiigwa muciiyo comwe? Aawa kuyandika bupampu. Mbobakonzya alimwi abukkale bwabo boonse bobile, sikwiiya amwiiyi ziliindene, pele lyoonse tweelede kuyeeya kuti makanze eesu mbotuli bamayi ngakugwasya sikwiiya kuba alusyomo luyumu. Aboobo tulamupa ciindi cibotu cakubala, kumvwisya, alimwi akukazumina kasimpe kayiisyigwa mu Jwi lya Leza. Tatubandiki twaambo tunji kwiinda ntwakonzya kumvwisya. Nokuba boobo, ciiyo ciyaambele. Sikwiiya amvwisya buyo kaambo, tulaunka kukaambo katobela.—Kol. 2:6, 7.
11. Ino nciiyo nzi ncotukonzya kwiiya kumwaapostolo Paulo cijatikizya kuyiisya?
11 Mwaapostolo Paulo wakaubya-ubya mulumbe wamakani mabotu naakali kwaambila bantu bapya. Nokuba kuti wakaliyiide kapati, kunyina naakali kubelesya majwi aakatazya kumvwa. (Amubale 1 Ba-Korinto 2:1, 2.) Kuuba-uba kwakasimpe kamu Magwalo kulabakwelelezya alimwi akupa kuti bantu babombe myoyo bakkutile. Muntu teelede kwiiya kapati kutegwa amvwisye kasimpe.—Mt. 11:25; Inc. 4:13; 1 Kor. 1:26, 27.
Amubagwasye Basikwiiya Kuzibelesya Nzyobaiya
12, 13. Ino ncinzi cikonzya kumukulwaizya sikwiiya kuti azibelesye nzyaiya? Amupandulule.
12 Kutegwa tuzwidilile, kuyiisya kwesu kweelede kumunjila mumoyo sikwiiya. Sikwiiya weelede kumvwisya makani mbwaamujatikizya, mbwaamupa mpindu, alimwi ambwakonzya kucinca mubuumi bwakwe ikuti watobela lulayo lwamu Magwalo.—Is. 48:17, 18.
13 Mucikozyanyo, tulakonzya katubandika lugwalo lwa Ba-Hebrayo 10:24, 25, lukulwaizya Banakristo kuswaangana abasyominyina kutegwa bayumizigwe mu Magwalo alimwi akuyanzana kwaluyando. Ikuti sikwiiya katanatalika kusika kumiswaangano yambungano, mubufwaafwi inga twapandulula mboyeendelezyegwa alimwi aziyooyiigwa amuswaangano umwi. Tulakonzya kwaamba kuti miswaangano yambungano ncibeela cabukombi alimwi akumutondezya kuti ilatugwasya. Mpoonya inga twamutamba kuti akajanike. Kuswiilila kwakwe lulayo lwamu Magwalo kweelede kuba kaambo kaluyando lwakwe lwakumvwida Jehova, kutali kaambo kakuti uyanda kukkomanisya ngobaiya limwi.—Gal. 6:4, 5.
14, 15. (a) Ino ncinzi sikwiiya Bbaibbele ncakonzya kwiiya kujatikizya Jehova? (b) Ino mbuti kuziba bube bwa Jehova mbokukonzya kumugwasya sikwiiya Bbaibbele?
14 Mpindu mpati basikwiiya njobajana mukwiiya Bbaibbele alimwi akuzibelesya njiisyo zyalyo njakuti balamuyanda akumuziba bwini mbwabede Jehova. (Is. 42:8) Tali buyo Taateesu siluyando, Mulengi, alimwi a Mukamwini bubumbo, pele ulayubununa bube bwakwe anguzu kubantu boonse bamuyanda akumubelekela. (Amubale Kulonga 34:6, 7.) Musa naakali afwaafwi kuti asololele musyobo wabana Israyeli kuzwa mubuzike ku Egepita, Jehova wakalizibya kwiinda mukwaamba kuti: “Ndiyooba kufwumbwa mbweyooba.” (Kul. 3:13-15, NW) Eeci caamba kuti Jehova ulakonzya kuba kufwumbwa ceeco ciyandika kutegwa azuzikizye makanze aakwe kujatikizya bantu bakwe basalidwe. Aboobo bana Israyeli bakamuziba Jehova kuti Ngonguwe wakabafwutula, wakali sikalumamba, wakabapa zintu ziyandika, wakazuzikizya zisyomezyo, alimwi wakabagwasya munzila zimbi.—Kul. 15:2, 3; 16:2-5; Jos. 23:14.
15 Basikwiiya besu tabakonzi kugwasigwa a Jehova munzila yamaleele mbuli mbwaakacita kuli Musa. Nokuba boobo, ciindi nobayaambele mulusyomo akulumba nzyobaiya alimwi akuzibelesya, cakutadooneka bayoobona mbociyandika kusyoma muli Jehova kutegwa abape busicamba, busongo, alimwi abusolozi. Ikuti bacita oobo, abalo bayoomuziba Jehova kuti ngu Sikupa lulayo musongo alimwi uusyomeka, Mukwabilizi, alimwi Nguupa zyoonse nzyobayandika.—Int. 55:22; 63:7; Tus. 3:5, 6.
Amubabikkile Maanu
16. Ino nkaambo nzi kulezya ncokatali kaambo kapati mukuba mwiiyi uuyiisya kabotu?
16 Ikuti kamulimvwa kuti tamujisi luzibo lwakuyiisya kabotu kweelana ambomuyanda, mutatyompwi. Jehova a Jesu beendelezya bubambe bwakuyiisya buli mukucitwa munyika sunu. (Inc. 1:7, 8; Ciy. 14:6) Balakonzya kulongezya kusolekesya kwesu kutegwa nzyotwaamba kazigwasya bantu babombe myoyo. (Joh. 6:44) Luyando mwiiyi ndwajisi kubantu lulakonzya kuvumbilila kulezya kuli koonse nkwakonzya kuba ankuko. Imwaapostolo Paulo wakatondezya kuti wakamvwisya mbokuyandika kubayanda aabo bali mukuyiisigwa.—Amubale 1 Ba-Tesalonika 2:7, 8.
17. Ino mbuti mbotukonzya kubikkila maanu kuli sikwiiya Bbaibbele aumwi?
17 Mbubwenya buyo, tulakozya kumubikkila maanu sikwiiya Bbaibbele aumwi kwiinda mukuba aciindi cili mbocibede cakumuziba kabotu. Twanooiya anguwe njiisyo zyamu Magwalo, inga twabuziba bukkale bwakwe. Inga twabona kuti wakatalika kale kutobela njiisyo zimwi nzyaiya mu Bbaibbele. Mumbazu zimwi inga kaciyandika kucinca bukkale bwakwe. Kwiinda mukugwasya sikwiiya mbwakonzya kubelesya twaambo tubandikwa lyaciiyo ca Bbaibbele, inga twamugwasya kuti akabe siciiya wini-wini wa Kristo.
18. Ino nkaambo nzi ncokuyandika kupaila antoomwe asikwiiya alimwi akumupailila?
18 Iciyandika kapati nkupaila antoomwe asikwiiya alimwi akumupailila. Weelede kuziba kuti luyando lwesu ndwakumugwasya kuti amuzibe kabotu Mulengi wakwe, aswene afwaafwi kuli Nguwe, akugwasigwa abusolozi Bwakwe. (Amubale Intembauzyo 25:4, 5.) Notupaila kuti Jehova aleleke kusola-sola kwasikwiiya kutobela nzyaiya, sikwiiya uyoobona mbokuyandika kuba “sikucita makani.” (Jak. 1:22) Alimwi sikwiiya anooswiilila mupailo wesu uuzwa mumoyo, awalo wiiya mbokupailwa. Cilabotelezya kaka kugwasya basikwiiya Bbaibbele kuba abulongwe bwabo beni a Jehova!
19. Ino ncinzi ciyoolangwa-langwa mucibalo citobela?
19 Cilakulwaizya kuziba kuti Bakamboni bainda kutuulunzuma tuli cisambomwe acisela nyika yoonse bajisi bubi ikusoleka kuba bantu ‘bacizi kuyiisya’ kabayanda kugwasya bantu babombe myoyo kutobela zintu zyoonse Jesu nzyaakalailila. Ino nimpindu nzi zyajanwa kwiinda mumulimo wesu wakukambauka? Bwiinguzi kumubuzyo ooyo buyoolangwa-langwa mucibalo citobela.
Sena Muciyeeyede?
• Nkaambo nzi Banakristo ncobeelede kuba bantu ‘bacizi kuyiisya’?
• Kutegwa tuzwidilile mukuyiisya kwesu, ino ninzila nzi nzyotweelede kubelesya?
• Ino ncinzi cikonzya kuvumbilila kulezya kuli koonse nkotukonzya kuba ankuko mukuyiisya?
[Mibuzyo yaciiyo]
[Cifwanikiso icili apeeji 9]
Sena mwakalilembya mu Cikolo Camulimo Weendelezyegwa a Leza?
[Cifwanikiso icili apeeji 10]
Ino nkaambo nzi ncokuyandika kumwaambila sikwiiya wanu kubala mu Bbaibbele?
[Cifwanikiso icili apeeji 12]
Amupaile antoomwe asikwiiya alimwi akumupailila