‘Amuzumanane Kubikkila Maanu Kumulimo Ngwaakamupa Mwami’
‘Amuzumanane Kubikkila Maanu Kumulimo Ngwaakamupa Mwami’
“Langa kabotu eyo milimo njotambwide kumaanza aa-Mwami, uizuzye.”—KOL. 4:17.
1, 2. Ino mukuli nzi Banakristo ngobajisi kujatikizya bantu?
TUJISI mukuli mupati kuli basimukoboma. Ikusala nkobacita lino kuyoopa kuti bakabe abuumi naa kufwa “kumapenzi ayo mapati.” (Ciy. 7:14) Mulembi wabbuku lya Tusimpi wakasololelwa amuuya uusalala wakati: “Vuna abo basi tolwe kulufu; futula abo baya budadalika kukujayigwa.” Elo kaka majwi aaya alakankamanisya! Ikuti twakakilwa kubacenjezya bantu kujatikizya kusala nkobeelede kucita, tulakonzya kuba amulandu wabulowa bwabo. Masimpe, cibalo nciconya cilazumanana kaciti: “Na waamba kuti, Teetwakaziba aya makani, sa oyo uulingula myoyo tayeeyi? Uubamba buumi bwako, sa tezi? Sa tabweedezezyi muntu bulumbu bweelede milimo yakwe?” Mubwini, babelesi ba Jehova tabakonzyi kwaamba kuti ‘kwiina ncobazi’ kujatikizya ntenda bantu njobayoocitikilwa.—Tus. 24:11, 12.
2 Jehova buumi ububona kuti bulayandika kapati. Ukulwaizya babelesi bakwe kusolekesya kweelana ambobakonzya mukugwasya bantu banji kuti bakafwutuke. Mubelesi wa Leza aumwi weelede kwaambila bantu kujatikizya mulumbe uusololela kubuumi uujanika mu Jwi lya Leza. Mulimo wesu ulikozyenye amulimo ngwacita mulindizi walo uucenjezya bantu ciindi nabona kuti ntenda ili afwaafwi kucitika. Tatuyandi kuba amulandu wabulowa bwabaabo bayoonyonyooka. (Ezk. 33:1-7) Aboobo, cilayandika kaka kuti tuzumanane ‘kukambauka makani’!—Amubale 2 Timoteo 4:1, 2, 5.
3. Ino ntwaambo nzi tutiibandikwe mucibalo cino alimwi azibalo zitobela zyobile?
3 Mucibalo eeci, muyooiya mbomukonzya kuzunda zisinkilizyo kumulimo wanu uusololela kubuumi alimwi ambomukonzya kugwasilizya bantu banji. Cibalo citobela ciyoomugwasya kuba bamayi bajisi luzibo lunji kujatikizya kasimpe. Ciiyo catatu ciyoobandika zintu zimwi zikulwaizya nzyobacitikilwa bakambausi ba Bwami munyika yoonse. Nokuba boobo, katutana kubandika twaambo ootu, inga cabota kulanga-langa twaambo tumwi tutondezya ikaambo mazuba ngotupona ncaakatazya kapati.
Ibanji Ncobatajisi Bulangizi
4, 5. Ino ncinzi cicitikila bantu, alimwi ino bantu banji balimvwa buti?
4 Zintu zicitika munyika zitondezya kuti tupona ‘kumamanino aaciindi’ alimwi akuti mamanino ali afwaafwi kapati. Bantu sunu bacitikilwa zintu Jesu alimwi abasikwiiya bakwe nzyobakaamba kuti ziyooba citondezyo ‘cakumazuba aakumamanino.’ “Mapenzi,” kubikkilizya ankondo, nzala, mizunzumo yanyika, alimwi amapenzi amwi buyo, zyabapenzya bantu boonse. Milandu, kuliyanda, alimwi amicito njatayandi Leza, zyavwula kapati. Nokuba kubantu basoleka kutobela njiisyo zyamu Bbaibbele, eezi ‘nziindi zikatazya.’—Mt. 24:3, 6-8, 12; 2 Tim. 3:1-5.
5 Nokuba boobo, bantu banji kapati tabazi cini-cini ncozyaamba zintu eezi zicitika munyika. Akaambo kaceeci, banji balalibilika kujatikizya nkobakonzya kujana lukwabililo lwabo beni alimwi alwamukwasyi wabo. Kufwidwa muntu ngobayanda naa ntenda zimwi zipa bantu banji kuba mumause. Ikuti kabatajisi luzibo lwini-lwini kujatikizya ikaambo ncozicitikila zintu eezi alimwi ankobakonzya kujana lugwasyo, bantu aaba tabajisi bulangizi pe.—Ef. 2:12.
6. Ino nkaambo nzi “Babuloni Mupati” ncaakakilwa kugwasya batobeli bakwe?
6 “Babuloni Mupati,” bulelo bwanyika yoonse bwabukombi bwakubeja bwakakilwa kupa luumbulizyo luyandika kubantu banji. Muciindi caboobo, kwiinda muli “waini wabumambi bwakwe,” wabanyonganya bantu kujatikizya mbobakonzya kuba acilongwe a Leza. Kuyungizya waawo, kwiinda mukuba amicito mbuli yasikuvwuula, bukombi bwakubeja bwacenga alimwi akweendelezya “bami baansi” kubelesya njiisyo zyakubeja alimwi amizimu kutegwa bantu banji kabatakaki kucita kufwumbwa ncobaambilwa kuzwa kumfwulumende zyabo. Bukombi bwakubeja bujisi nguzu alimwi bulayunga, pele aciindi nciconya bwakakakila limwi kasimpe.—Ciy. 17:1, 2, 5; 18:23.
7. Ino ncinzi cilangilwa kucitika kubantu banji, pele ino mbuti bamwi mbobakonzya kugwasyigwa?
7 Jesu wakayiisya kuti bantu banji beendela mumugwagwa mupati uusololela kulunyonyooko. (Mt. 7:13, 14) Bamwi bantu bali mumugwagwa mupati akaambo kakuti bakaka acaali kutobela ncoliyiisya Bbaibbele, pele bunji bwabamwi bali mumugwagwa ooyu akaambo kakuti basololi babo babukombi kunyina nobabayiisya cini-cini Jehova ncayanda kulimbabo. Ambweni bamwi balakonzya kucinca bukkale bwabo ikuti baambilwa twaambo tulimvwisya twamu Magwalo tubapa kuti bacite oobo. Pele aabo bali muli Babuloni mupati alimwi aabo bazumanana kukaka zyeelelo zyamu Bbaibbele tabakooyoofwutuka “kumapenzi ayo mapati.”—Ciy. 7:14.
Amuzumanane Kukambuka ‘Cakutaleka’
8, 9. Ino Banakristo bakusaanguna bakacita buti nobakali kukazigwa, alimwi nkaambo nzi?
8 Jesu wakaamba kuti basikwiiya bakwe bayookambauka makani mabotu aa Bwami akugwasya bamwi kuba basikwiiya. (Mt. 28:19,20) Aboobo, Banakristo bakasimpe lyoonse mulimo wakukambauka baubona kuba citondezyo cakusyomeka kuli Leza alimwi cintu ciyandika kapati kulusyomo lwabo. Akaambo kaceeci, batobeli ba Jesu bakusaanguna bakazumanana kukambauka nokuba kuti bakali kukazigwa. Bakasyoma Jehova kubapa lugwasyo, akupaila kuti abagwasye kuti “baambe makani [aakwe] akaanzambwene kanji.” Jehova wakabapa muuya uusalala, mpoonya bakaamba jwi lya Leza cabusicamba.—Inc. 4:18, 29, 31.
9 Ciindi basikukazya nobakatalika kubalwana, sena basikutobela ba Jesu bakacileka kukambauka makani mabotu? Peepe. Basololi bacikombelo caba Juda nobakacimwa akaambo kakukambauka kwabaapostolo, bakabaanga, bakabakonga, alimwi bakabauma. Pele baapostolo “tabakalekede kwiisya akukambauka muntempele amumaanda kuti Jesu ngo-Kristo.” Cakutadooneka bakaziba kuti bakeelede “kumvwa Leza kwiinda bantu.”—Inc. 5:28, 29, 40-42.
10. Ino mbuyumuyumu nzi Banakristo mbobajana mazuba aano, alimwi ncinzi cicitika akaambo kakulilemeka kwabo?
10 Bunji bwababelesi ba Leza mazuba aano tabajisi mapenzi aakuumwa naa kwaangwa akaambo kamulimo wabo wakukambauka. Nokuba boobo, Banakristo boonse bakasimpe balasunkwa akupenzegwa munzila ziindene-indene. Mucikozyano, manjezeezya aanu aayiisidwe Bbaibbele alakonzya kumukulwaizya kuti mube bantu basiyene abamwi. Beenzinyoko, basicikolonyoko, naa basimukobonyoko inga bayeeya kuti tamukkwene akaambo kakuti kusala kwanu kuyeeme munjiisyo zyamu Bbaibbele. Pele eezyo tazyeelede kumunyonganya. Nyika ili mumudima wakumuuya, pele Banakristo beelede kuba “mbuli mimuni yakumunika.” (Flp. 2:15) Ambweni bantu bamwi babombe myoyo balakonzya kubona alimwi akulombozya milimo yanu mibotu mpoonya Jehova ulalemekwa akaambo kaceeci.—Amubale Matayo 5:16.
11. (a) Ino bamwi bacita buti twanooli mumulimo wakukambauka? (b) Ino nkukazigwa kuli buti kwakamucitikila imwaapostolo Paulo, alimwi ino wakacita buti?
11 Busicamba bulayandika kutegwa tuzumanane kukambauka mulumbe wa Bwami. Bantu bamwi, nobaba banamukwasyi balakonzya kumusampaula nokuba kusola kumutyompya munzila imwi iili yoonse. (Mt. 10:36) Imwaapostolo Paulo wakaumwa ziindi zili mbozibede akaambo kakuti wakacita mulimo wakwe cakusyomeka. Amubone mbwaakacita kukukazyigwa ooku naakalemba kuti: “Nokuba kuti twakapenzegwa kale akucitilwa bubi, . . . twakaba akaanzambwene muli-Leza wesu kumwaambila Makani Mabotu aa-Leza akati kankondo zinjizinji.” (1 Tes. 2:2) Masimpe cakali ciyumu kuti Paulo azumanane kwaamba makani mabotu musule lyakumubukila, kumuzapawida zyakusama, kumuuma milusu alimwi akumunjizya muntolongo. (Inc. 16:19-24) Ncinzi cakapa kuti azumanane kuba sicamba? Wakazumanana akaambo kakuti wakayandisisya kuucita mulimo wakukambauka ngwaakapegwa a Leza.—1 Kor. 9:16.
12, 13. Mapenzi aali buti ngobajana bamwi, alimwi mbuti mbobasola kwaazunda?
12 Cilakozya kuyuma kuzumanana kuba basungu mucilawo bantu mobatajaniki-janiki naa mobatabikkili maanu kumulumbe wa Bwami. Ino ncinzi ncotukonzya kucita mubukkale buli boobu? Tweelede kuba basicamba kutegwa twaambaule abantu mubukambausi bwamukwiizya. Alimwi tweelede kucinca mulongo wesu naa kubikkila maanu kukambaukila mumasena motukonzya kujana bantu banji.—Amweezyanisye Johane 4:7-15; Incito 16:13; 17:17.
13 Mapenzi amwi banji ngobajana aakonzya kubakasya kucita mbobayanda mumulimo wakukambauka, ngakucembaala akuciswa-ciswa. Ikuti naa cili boobo kulindinywe, mutatyompwi. Jehova ulizi kulezya kwanu alimwi ulalumba nzyomukonzya kucita. (Amubale 2 Ba-Korinto 8:12.) Kufwumbwa mapenzi aamucitikila—kukazyigwa, kusulaikwa, naa kuciswa-ciswa—amucite zyoonse kusikila mpomugolela mukukambaukila bamwi makani mabotu.—Tus. 3:27; amweezyanisye Marko 12:41-44.
‘Amuzumanane Kubikkila Maanu Kumulimo Wanu’
14. Ncikozyanyo cili buti mwaapostolo Paulo ncaakatondezya ku Banakristonyina, alimwi wakapa lulayo nzi?
14 Imwaapostolo Paulo wakaubikkila maanu kapati mulimo wakwe, alimwi wakakulwaizya basyominyina kucita mbubonya. (Inc. 20:20, 21; 1 Kor. 11:1) Muntu omwe ngwaakakulwaizya kapati Paulo wakali Arkipo Imunakristo wamumwaanda wamyaka wakusaanguna. Mulugwalo lwakwe ndwaakalembela bana Kolose, Paulo wakalemba kuti: “Amwaambile Arkipo kuti, Langa kabotu eyo milimo njotambwide kumaanza aa-Mwami, uizuzye.” (Kol. 4:17) Tatuzi naa Arkipo wakali ni, alimwi akuti wakali mubukkale buli buti, pele ulangilwa kuti wakauzumina mulimo wakukambauka. Ikuti kamuli Banakristo balyaabide, andinywe mwakauzumina mulimo. Sena mulazumanana kuubikkila maanu mulimo kutegwa muuzuzikizye?
15. Ino kulyaaba kwa Bunakristo kubikkilizya nzi, alimwi kusololela kumibuzyo nzi?
15 Katutana bbapatizigwa, twakalyaaba kuli Jehova mumupailo camoyo woonse. Eeci cakatondezya kuti twakalikanzide kucita kuyanda kwakwe. Aboobo lino inga twalibuzya kuti: ‘Sena kucita kuyanda kwa Leza masimpe ncecintu ciyandika kapati mubuumi bwangu?’ Inga katujisi mikuli iindene-indene eeyo Jehova njalangila kuti twiilanganye—mbuli kupa ziyandika zyamukwasyi wesu. (1 Tim. 5:8) Pele ino mbubuti mbotucibelesya ciindi cesu anguzu? Ino ncinzi ncotubikka kumbele mubuumi?—Amubale 2 Ba-Korinto 5:14, 15.
16, 17. Ino nzyoolwe nzi bakubusi Banakristo naa aabo batajisi mikuli minji nzyobeelede kulanga-langa?
16 Sena muli mukubusi Munakristo uulyaabide wakamanizya cikolo naa uuli afwaafwi kumana lwiiyo luyandika? Kuboneka kuti ambweni tamuna kuba amikuli yamukwasyi. Aboobo, ncinzi ncomukanza kucita mubuumi bwanu? Nzyakusala zili buti ziyoomugwasya kuzuzikizya zisyomezyo zyanu zyakucita kuyanda kwa Jehova? Banji babambulula bukkale bwabo kutegwa bacite bupainiya, alimwi eeci cabapa kukkomana kapati akukkutila.—Int. 110:3; Muk. 12:1.
17 Ambweni mwakomena, lino mwakatalika kubeleka mulimo wakumubili pele tamujisi mikuli minji kunze lyakulanganya zintu nzyomuyandika. Cakutadooneka mulakkomana kutola lubazu mumilimo yambungano kweelana mbuli mulongo wanu mbuubede. Sena inga mwayungizya lukkomano lwanu? Sena mwakayeeya zyakuyungizya ciindi ncomutola mumulimo wanu? (Int. 34:8; Tus. 10:22) Muzilawo zimwi, mulimo mupati uciyandika kucitwa kutegwa boonse bakambaukilwe mulumbe wakasimpe uusololela kubuumi. Sena inga mwapanga kucinca mubuumi bwanu, ambweni kubelekela kubusena kubulide basikwaambilizya Bwami?—Amubale 1 Timoteo 6:6-8.
18. Ino nkucinca kuli buti banabukwetene bapya nkobakacita, alimwi ncinzi cakatobela?
18 Amulange cikozyanyo caba Kevin a Elena, bazulilwa ku United States. * Mbuli cilengwa kubanabukwetene bapya bakubusena ooko, bakayeeya kuti bakali kuyandika kuula ŋanda. Boonse bakali kubeleka ciindi coonse alimwi bakali kukonzya kuzumanana kupona buumi bubotu. Nokuba boobo, mulimo wabo alimwi amikuli yaaŋanda yakabapa ciindi cisyoonto cakukambauka. Bakaziba kuti bakali kwaaba ciindi coonse anguzu zyabo kulubono lwabo. Pele, nobakabona buumi buuba-uba bwalukkomano mbobakali kupona bapainiya banabukwetene, ba Kevin a Elena bakasala kucinca nzyobakali kubikka mubusena bwakusaanguna mubuumi bwabo. Nobakamana kulomba busolozi kuli Jehova mumupailo, bakasambala ŋanda yabo akulongela kukaanda kasyoonto. Elena wakacesya mweelwe wamawoola ngaakali kubeleka mumulimo wakumubili akutalika bupainiya. Kevin wakakulwaizigwa azyakuluula zyamukaintu wakwe, mpoonya wakaleka kubeleka akutalika bupainiya. Nikwakainda ciindi bakalongela kucisi caku South America kuyoobelekela kubusena kubulide basikwaambilizya Bwami. Kevin wakaamba kuti: “Twakalikkomene mulukwatano lwesu lyoonse, pele notwakazuzikizya mbaakani zyesu zyakumuuya, lukkomano lwesu lwakaya ambele.”—Amubale Matayo 6:19-22.
19, 20. Ino nkaambo nzi kukambauka makani mabotu ncuuli mulimo uuyandika kapati mazuba aano?
19 Kukambauka makani mabotu ngomulimo uuyandika kapati uucitwa munyika mazuba aano. (Ciy. 14:6, 7) Ulagwasilizya kusalazya izina lya Jehova. (Mt. 6:9) Mulumbe wamu Bbaibbele upa kuti zyuulu-zyuulu zyabantu bauzumina mwaka amwaka bacince maumi aabo, alimwi eeci cilakonzya kubasololela kulufwutuko. Mwaapostolo Paulo wakabuzya kuti: “Pele . . . bamvwe buti nikutakwe sikukambauka?” (Rom. 10:14, 15) Masimpe tacikonzeki. Inga cabota kuti mwasolekesya kucita nzyomukonzya mukuzuzikizya mulimo wanu.
20 Aimbi nzila mbomukonzya kubagwasya bantu kuziba mboziyandika kapati ziindi zikataazya eezi alimwi azikonzya kucitika akaambo kazintu nzyobasala, nkwiinda mukuyaambele mukuyiisya kwanu. Mbomukonzya kucita boobu kuyoobandikwa mucibalo citobela.
Bupanduluzi buyungizidwe
^ munc. 18 Mazina acincwa.
Ino Inga Mwaingula Buti?
• Ino mukuli nzi Banakristo ngobajisi kujatikizya bantu?
• Ino mbuti mbotweelede kuzunda zisinkilizyo kumulimo wesu wakukambauka?
• Mbuti mbotukonzya kuzuzikizya mulimo ngotwakazumina?
[Mibuzyo yaciiyo]
[Cifwanikiso icili apeeji 5]
Busicamba bulayandika kutegwa tuzumanane kukambauka notukazigwa
[Cifwanikiso icili apeeji 7]
Ncinzi ncomukonzya kucita ikuti kamukambaukila muzilawo bantu mobatajaniki-janiki mumaanda?