Bakasala Buumi Buletela Mpindu Sena Anywebo Inga Mwasala Mbuli Mbabo?

MARC, imukwesu umwi kucisi ca Canada wakali kubeleka kukkampani iipanga mincini yaatala kapati iibelesegwa amakkampani aambi aakutauka zyamujulu. Wakali kubeleka buyo cisela cabuzuba alimwi wakali mupainiya waciindi coonse. Mpoonya mupati kumulimo wakapa Marc cuuno caatala—cuuno ncaakali kunoovwola mali manji. Ino ncinzi ncaakacita Marc?

Amy, imucizi waku Philippines wakali mupainiya waciindi coonse naakali afwaafwi kumanizya lwiiyo lwakusekondali. Kuzwa waawo, wakapegwa mulimo uubelekwa buzuba boonse iwakali kumumanina ciindi pele wakali kuvwolwa mali manji. Ino Amy wakasala kucita nzi?

Ba Marc a Amy bakaindana mukusala kwabo, alimwi izyakacitika akaambo kakusala kwabo zitondezya mbocili camaanu ikutobela lulayo lwakapegwa Banakristo baku Korinto yansiku. Imwaapostolo Paulo wakalemba kuti: “Abo . . . babelesya zintu zyaansi batapangiki moyo kukubelesya nzizyo.”—1 Kor. 7:29-31.

Amwiibelesye Nyika, Pele Mutaibelesyi Cakumaninina

Katutanaziba cakacitikila ba Marc a Amy, mubufwaafwi atulange-lange bupanduluzi bwajwi lyakuti ‘nyika’ (naa koʹsmos mu Cigiliki) ndyaakabelesya Paulo mulugwalo ndwaakalembela bana Korinto. Mucibalo camu Bbaibbele eeco, ibbala lyakuti koʹsmos lyaamba bweende bwazintu munyika eeyi—iciinga cabantu coonse—alimwi libikkilizya zintu zyaansi zijatikizya bukkale bwamuntu bwaciindi coonse mbuli kujana ŋanda yakukkala, cakulya alimwi azyakusama. * Ikutegwa abuzuba tujane zintu ziyandika zili boobo, ibunji bwesu tweelede kulembwa mulimo.  Ee, tweelede kubelesya nyika kutegwa tuzuzikizye mukuli wesu wamu Magwalo wakujanina mikwasyi yesu cakulya aakukkala. (1 Tim. 5:8) Pele alimwi tulizi kuti “nyika ilamana.” (1 Joh. 2:17) Aboobo, nyika twiibelesya buyo kujana nzyotuyandika, ikutali ‘cakumaninina.’—1 Kor. 7:31.

Akaambo kakukulwaizigwa alulayo lwamu Bbaibbele oolo lwakutaibelesya cakumaninina nyika, ibakwesu abacizi banji balanga-langa bukkale bwabo, bacesya ciindi ncobabeleka milimo yakumubili, alimwi baubya-ubya bukkale bwabo. Ibakacita boobo bakajana kuti buumi bwabo bwakaba ampindu nkaambo bakajisi ciindi cinji cakuba amikwasyi yabo alimwi acakubelekela Jehova. Kunze lyaboobo, ikuubya-ubya bukkale bwabo kwakabapa kusyoma Jehova cakumaninina, ikutali nyika. Sena anywebo inga mwacita oobo—ikuubya-ubya bukkale bwanu ikutegwa mube aciindi cinji cakucita zintu zijatikizya Bwami bwa Leza?—Mt. 6:19-24, 33.

“Cilongwe Cesu a Jehova Cayuma Kwiinda Lyoonse”

Marc, iwaambwa kumatalikilo wakalutobela lulayo lwamu Bbaibbele lwakutabelesya nyika cakumaninina. Wakakaka kusumpulwa akupegwa cuuno caatala kumilimo. Kwiinde buyo mazuba masyoonto, mupati wamulimo wakaayungizya mali ngaakali kuvwola Marc kusola kumoongelezya kuzumina mulimo mupya. Marc waamba kuti: “Wakali musunko, pele alimwi ndakakaka.” Kapandulula ncaakakakila wakati: “Mebo amukaintu wangu Paula twakali kuyanda kwaaba buumi bwesu kukubelekela Jehova kusikila mpotugolela. Aboobo, twakasala kuti tuubye-ubye bukkale bwesu. Twakapaila kuli Jehova kuti atupe busongo butugwasya kuzuzikizya mbaakani yesu alimwi twakabikka abuzuba bugaminide bwakutalika kumanina ciindi cinji mumulimo wa Jehova kusikila mpotugolela.”

Paula waamba kuti: “Ndakali kubeleka mazuba otatwe ansondo nkeli mulembi kucibbadela alimwi mali ngondakali kuvwola akali mabotu. Alimwi ndakali mupainiya waciindi coonse. Nokuba boobo, mbubwenya mbuli Marc, ndakali kuyanda kubelekela Jehova kubusena buli boonse bwakabulide basikwaambilizya Bwami. Pele nindakatola lugwalo lwakuleka mulimo, imupati amulimo wakandaambila kuti ndakali kweelela kubeleka mulimo wabulembi waatala wakazwide akujanika ciindi eeco. Wakali mulimo wabulembi uuvwolwa mali manji ikwiinda balembi boonse bamucibbadela, pele ndakakakatila kukusala kwangu kwakuti ndileke mulimo. Nindakamwaambila mupati wamulimo kaambo ncindatakalembela mulimo wacuuno caatala ooyo, wakandilumbaizya kujatikizya lusyomo lwangu.”

Ndilyonya, ba Marc a Paula bakasalwa kuba bapainiya baalubazu mumbungano nsyoonto imwi kubusena buli kule amadolopo mapati ku Canada. Ino ncinzi cakacitika akaambo kakulonga kwabo? Marc waamba kuti: “Nondakaleka mulimo uuvwolwa mali manji ngondakali kubeleka kwaciindi citandila kucisela camyaka yangu yakuzyalwa, ndakalibilika kujatikizya bukkale bwangu bwakumbele, pele Jehova wakatulongezya mumulimo wesu. Tujisi lukkomano lupati lujanwa mukugwasya bamwi kuba babelesi ba Leza. Alimwi mulimo waciindi coonse watugwasya mulukwatano lwesu. Imibandi yesu njazintu ziyandika ncobeni—izintu zijatikizya mulimo wakumuuya. Cilongwe cesu a Jehova cayuma kwiinda lyoonse.” (Inc. 20:35) Paula uyungizya kuti: “Noleka mulimo ngowajisi alimwi akusiya bubotu boonse bwamuŋanda yako  njozibide, weelede kusyoma muli Jehova cakumaninina. Twakacita oobo, eelyo Jehova wakatulongezya. Ibakwesu abacizi bamumbungano yesu mpya batupa kulimvwa kuti tulayandwa akuyandika. Lino nguzu nzyondakali kubelesya mumulimo wakumubili musyule ndizibelesya kugwasya bantu kumuuya. Ndilikkomene citaambiki mumulimo ooyu.”

‘Uujisi Zyoonse Pele Uutakkomene’

Amy, iwaambwa musyule walo wakasala bumbi. Wakacizumina cuuno caatala civwolwa mali manji ncaakapegwa. Amy waamba kuti: “Imwaka wakusaanguna, ndakazumanana nkeli musungu mumulimo wakukambauka pele ndakabona kuti buce-buce ndakatalika kubikkila maanu kukusumpuka amulimo muciindi cakubikkila maanu kuzintu zya Bwami. Ndakasyomezegwa kusumpulwa alimwi ndakatalika kulitakata kukubeleka kutegwa ndisumpulwe acuuno. Milimo yakumubili mboyakali kuyaabuvwula, ciindi ncondakali kubeleka mumulimo wamumuunda cakali kuyaabuceya. Mukuya kwaciindi, ndakacilekelalyo kukambauka.”

Kayeeya ciindi eeco, Amy waamba kuti: “Caboola kuzintu zijanwa amali, kunyina ncindakabulide. Ndakaayenda masaka akukkomana azintu zyoonse zyakali kupegwa muntu uuli acuuno caatala. Pele tiindakakkomene pe. Nokuba kuti ndakajisi mali manji, mapenzi akandivwulila. Cakandizimina cakalubide. Mpoonya kumbele ndakaziba kuti kwiinda mukulitakata kubeleka milimo yamunyika eeyi, ndakali afwaafwi ‘kuleya kulusyomo.’ Aboobo, mbubwenya Jwi lya Leza mbolyaamba, ndakapenga munzila ‘zinji-zinji.’”—1 Tim. 6:10.

Ino ncinzi ncaakacita Amy? Waamba kuti: “Ndakalomba baalu kuti bandigwasye kubukuluka kumuuya alimwi ndakatalika kujanika kumiswaangano. Cimwi ciindi notwakali kwiimba lwiimbo, ndakatalika kulila. Ndakayeeya mbondakakkomene kwamyaka yosanwe njindakatola lubazu mumulimo wakukambauka kandili mupainiya, nokuba kuti ndakali mucete kumubili ciindi eeco. Ndakalizi kuti ndakeelede kucileka kusowa ciindi mukusola kujana mali akuti ndakeelede kubikka zintu zya Bwami mubusena bwakusaanguna. Ndakazumina kupegwa cuuno caansi kumulimo, icakapa kuti mali ngondakali kuvwola acesegwe acisela, eelyo ndakatalika alimwi kutola lubazu mumulimo wakukambauka.” Kakkomene, Amy waamba kuti: “Ndakajisi coolwe cakubeleka kandili mupainiya kwamyaka iili mbwiibede. Lino ndijisi lukkomano ndundatakajana nindakali kubelesya ciindi cangu coonse kubelekela nyika.”

Sena inga mwacinca akuubya-ubya bukkale bwanu? Ikuti mwabelesya ciindi ncomujana ikutola makani aa Bwami kumbele, anywebo muyooba abuumi buletela mpindu.—Tus. 10:22.

Bupanduluzi buyungizidwe

Majwi aakwelelezya sikubala aali apeeji 19]

Sena inga mwacinca akuubya-ubya bukkale bwanu?

Kabbokesi/[Cifwanikiso icili apeeji 19]

“Ndilaukkomanina Kale!”

David, imwaalu Munakristo kucisi ca United States wakali kulombozya kusangana mukaintu wakwe abana mumulimo waciindi coonse. Wakacikonzya kujana mulimo uubelekwa buyo cisela cabuzuba kukkampani nkwaakali kubeleka, akutalika bupainiya bwaciindi coonse. Sena kucinca ooko kwakamupa kuba ampindu mubuumi? Kwiinde myezi iili mbwiibede, David wakalembela mweenzinyina ategwa: “Kunyina cintu cimbi cipa kukkutila kwiinda kulitakata kubelekela Jehova antoomwe amukwasyi. Mubwini ndakali kuyeeya kuti ciyootola ciindi cilamfwu kuti nduuzibile mulimo wabupainiya, pele ndilaukkomanina kale! Ulakatalusya kapati.”

[Cifwanikiso icili apeeji 18]

Marc a Paula kabali mumulimo