Kuba Beelela Kusololelwa Kutusensa Twamaanzi Aabuumi

“Mwanambelele . . . uyoobeembela akubasololela kutusensa twamaanzi aabuumi.”—CIY. 7:17.

1. Mbuti Ijwi lya Leza mbolibaamba Banakristo bananike, alimwi mmukuli nzi ngwaakabapa Jesu?

IJWI LYA LEZA lyaamba Banakristo bananike balanganya zintu zya Kristo anyika kuti “muzike musyomesi uucenjede.” Kristo naakalingula “muzike” mu 1918, wakabajana bananike aabo cakusyomeka kabaabila ‘zilyo zyakumuuya kuciindi ceelede’. Aboobo, Jesu, Simalelo, wakakkomana kuzoobakazika ‘kuti babe bapati bazintu zyoonse nzyajisi.’ (Amubale Matayo 24:45-47.) Munzila eeyi, kabatana tambula lukono lwakujulu, ibananike balababelekela bakombi bambi ba Jehova anyika.

2. Amuzipandulule zintu zya Jesu.

² Simalelo ulijisi nguzu kuzintu zyakwe, alimwi ulakonzya kuzibelesya mbuli mbwayanda. Zintu zya Jesu Kristo, Imwami uubikkidwe wa Jehova, zibikkilizya zintu zyoonse zya Bwami zili anyika. Eezi zibikkilizya “inkamu impati” njaakabona mwaapostolo Johane  mucilengaano. Johane ulabapandulula bankamu mpati kuti: “Ndakabona inkamu impati yabantu batabaliki kumuntu naba omwe, bazwa kuzisi zyoonse akumisyobo yoonse akumikowa yoonse akumyaambo yoonse, baliimvwi kunembo lyacuuno cabwami akunembo lya-Mwanambelele, balisamide zikobela zituba, alimwi mumaanza aabo balijisi malala.”—Ciy. 7:9.

3, 4. Ino mbuti bankamu mpati mbobapedwe coolwe cipati?

³ Ibankamu mpati bali akati kabaabo Jesu mbaakaamba kuti “mbelele [zyakwe] zimwi.” (Joh. 10:16) Bulangizi bwabo mbwakupona kukabe kutamani muparadaiso anyika. Balasyoma kuti Jesu “uyoobeembela akubasololela kutusensa twamaanzi aabuumi” alimwi akuti “Leza uyoosansamuna misozi yoonse kumeso aabo.” Akaambo kabulangizi oobu, “bakasanzya zikobela zyabo akuzitubya mubulowa bwa-Mwanambelele.” (Ciy. 7:14, 17) Balatondezya lusyomo mucipaizyo ca Jesu, aboobo Leza ubabona kusama ‘zikobela zituba.’ Mbubwenya mbuli Abrahamu, baitwa kuti mbalulami kabali balongwe ba Leza.

⁴ Mbokunga bankamu mpati yambelele zimwi iili mukuyungizigwa balabonwa a Leza kuba baluleme, bajisi bulangizi bwakufwutuka lunyonyooko lwabukkale oobu lyamapenzi aayo mapati. (Jak. 2:23-26) Balakonzya kuba acilongwe a Jehova, alimwi kabali nkamu, balijisi bulangizi bubotu bwakufwutuka lya Armagedoni. (Jak. 4:8; Ciy. 7:15) Tababeleki mbuli kakamu kaliiminina, pele cakuliyandila balabeleka mubusolozi bwa Mwami wakujulu ababunyina ibananike bali anyika.

5. Mbuti bankamu mpati mbobagwasyilizya banyina Kristo ibananike?

⁵ Banakristo bananike balakazigwa alimwi bayoozumanana kukazigwa citaambiki kuzwa kunyika ya Saatani. Nokuba boobo, balasyoma mulugwasyo lwabeenzinyina ibankamu mpati. Nokuba kuti mweelwe wa Banakristo bananike uyaabuceya, ibankamu mpati balayungizigwa azyuulu-zyuulu amwaka. Bananike lwabo beni tabakonzi kuzilanganya imbungano zyoonse zya Banakristo zisika ku 100,000 munyika yoonse mboizulwa. Aboobo, nzila yomwe bananike mbobagwasyigwa abambelele zimwi njakuti baalumi beelela bankamu  mpati balabeleka kabali baalu bambungano. Balagwasyilizya kulanganya tuulunzuma twa Banakristo ibali mumaanza aa “muzike musyomesi uucenjede.”

6. Ino mbuti lugwasyo beenzinyina ibambelele zimwi ndobacita ku Banakristo bananike mbolwakasinsimwa?

⁶ Ilugwasyo lucitwa cakuliyandila beenzinyina ibambelele zimwi ndobacita ku Banakristo bananike lwakasinsimwa amusinsimi Isaya. Wakalemba kuti: “Mbuboobu mbwaamba Jehova: ‘Basimilimo batabbadelwi baku Egepita abasambazi baku Etiopiya abana Seba, bantu balamfwu, boonse bayooboola kulindinywe, bayooba banu. Bayoomutobela.’” (Is. 45:14, NW) Munzila yacikozyanyo, mazuba aano Banakristo bajisi bulangizi bwakupona anyika balatobela kusyule lyabananike baciinga camuzike a Kabunga kabo Keendelezya. “Basimilimo batabbadelwi,” bambelele zimwi balilisungude kubeleka cabunkutwe akubelesya mbono zyabo mukutola ambele mulimo wakukambauka uucitwa munyika yoonse Kristo ngwaakapa kubatobeli bakwe bananike bali anyika.—Inc. 1:8; Ciy. 12:17.

7. Ino ncinzi ncobayiisyigwa bankamu mpati?

⁷ Nobagwasilizya banyina bananike, ibankamu mpati balayiisyigwa kuba ntalisyo yaciinga cabantu cipya ciyoopona yaakwiinda Armagedoni. Intalisyo eeyo yeelede kuba njumu, alimwi bantu bali mumo beelede kulisungula kucita zyoonse nzyobaambilwa a Simalelo. Munakristo aumwi wapegwa coolwe cakutondezya kuti ulakonzya kubelesyegwa a Mwami, Kristo Jesu. Kwiinda mukuba alusyomo alimwi akusyomeka lino, utondezya kuti uyooswiilila amunyika mpya ciindi Mwami naya kupa malailile.

Bankamu Mpati Batondezya Lusyomo

8, 9. Muunzila nzi bankamu mpati mobatondezya lusyomo?

⁸ Ibambelele zimwi beenzinyina bambungano ya Banakristo bananike balatondezya lusyomo munzila zili mbozibede. Kusaanguna, balabagwasya bananike kwiinda mukukambauka makani mabotu aa Bwami bwa Leza. (Mt. 24:14; 28:19, 20) Cabili, balalibombya kubusolozi bupegwa a Kabunga Keendelezya.—Heb. 13:17; amubale Zekariya 8:23.

⁹ Catatu, bankamu mpati balabagwasya banyina bananike kwiinda mukutobela njiisyo zya Jehova ziluleme mubuumi bwabo. Balasoleka kuba a “luyandano, lukondo, luumuno, busicamba, buuya, bubotu, lusyomo, lubombo, kulyeendelela.” (Gal. 5:22, 23) Mazuba aano, kutondezya bube buli boobo muciindi cakucita “milimo yanyama,” inga kakutadumide. Nokuba boobo, ibankamu mpati balikanzide kutantamuka “bwaamu, busofwaazi, zisusi zibi, kukomba mituni, bulozi, inkondo, bulwani, lukazyanyo, inyemo, insulano, mipampo mipampo, impilingano, ibbivwe, inkolwi, injalalando, azimwi zili boobo.”—Gal. 5:19-21.

10. Ino bankamu mpati bakanzide kucita nzi?

¹⁰ Akaambo kakuti tatulondokede, cilakonzya kuba cintu ciyumu kutondezya micelo yamuuya, kutantamuka milimo yanyama, alimwi akukaka muuya wanyika ya Saatani. Nokuba boobo, tulikanzide kutazumizya kutyompokelwa akaambo kakukompama kwesu, kwaalilwa kwakaindi buyo kasyoonto mukwiiya Jesu, naa kulezya kuti kunyonganye lusyomo lwesu naa kumana luyando lwesu kuli Jehova. Tulizi kuti Jehova uyakucita kweelana akusyomezya kwakwe—kufwutula inkamu mpati lyamapenzi mapati.

11. Ninzila nzi nzyabelesya Saatani mukusola kutyompya lusyomo lwa Banakristo?

¹¹ Nokuba boobo, tweelede kucenjela ciindi coonse nkaambo tulizi kuti sinkondoma wini-wini ngu Diabolosi, alimwi taleki kufwambaana. (Amubale 1 Petro 5:8.) Wasoleka kubelesya basiluleyo alimwi abantu bambi kutupa kuyeeya kuti nzyotwiiya nzyakubeja. Pele eeyi nzila ziindi zinji taizwidilili pe. Mbubwenya buyo, nokuba kuti kupenzyegwa zimwi ziindi kulautola ansi mulimo wakukambauka, ziindi zinji kwapa kuti lusyomo lwabaabo bapenzyegwa  luyumizigwe. Aboobo, Saatani wazumanana kubelesya nzila nzyabona kuti zilabeleka mukutola aansi lusyomo lwesu. Kutyompwa ninzila imwi njabelesya. Banakristo bamumwaanda wamyaka wakusaanguna bakacenjezyegwa kujatikizya ntenda eeyi nobakaambilwa kuti: “Kamwiilizya nguwe [Kristo] uwakazyandamana mukukazyanya kuli bobuya kwabantu abamubisizya.” Nkaambo nzi? “Kuti mutabombibombi nokuba kulengaala mumyoyo yanu.”—Heb. 12:3.

12. Ino mbuti lulayo lwamu Bbaibbele mbolubayumya aabo batyompedwe?

¹² Sena kuli nomwakalimvwa kuti muyanda kuleka kubelekela Jehova? Sena zimwi ziindi mulimvwa kuti mwaalilwa? Ikuti naa mboobo, mutamuzumizi Saatani kubelesya kuyeeya kuli boobo kumulesya kubelekela Jehova. Kuba aciiyo ca Bbaibbele cisitikide, kupaila camoyo woonse, kujanika kumiswaangano lyoonse, alimwi akuyanzana a Banakristonyoko ziyooyumya lusyomo lwanu alimwi akumugwasya kuti ‘mutalengaani mumyoyo yanu.’ Jehova wasyomezya kuti uyoobukulusya nguzu zyabaabo bamubelekela, alimwi tulakonzya kuzisyoma zisyomezyo zyakwe. (Amubale Isaya 40:30, 31.) Amubikkile maanu kumulimo wa Bwami. Amweelebe zintu zisowela ciindi, alimwi mubikkile maanu kukugwasya bamwi. Mpoonya muyooyumizigwa kutegwa muliyumye nokuba kuti mulityompedwe.—Gal. 6:1, 2.

Kufwutulwa Kuzwa Kumapenzi Mapati Akunjila Munyika Mpya

13. Ino mulimo nzi ngobalangilwa kuyoocita aabo bayoofwutuka Armagedoni?

¹³ Yaakwiinda Armagedoni, makamu aabantu bataluleme ibayoobusigwa bayooyandika kuyiisyigwa nzila zya Jehova. (Inc. 24:15) Bayooyandika kwiiya kujatikizya cipaizyo cacinunuzyo ca Jesu; kunze lyaboobo, beelede kuyiisyigwa kutondezya lusyomo mucipaizyo eeci kutegwa bagwasyigwe ancico. Bayooyandika kuleka njiisyo zyabukombi bwakubeja nzyobakali kusyoma alimwi akusiya bukkale bwabo bwakaindi. Beelede kwiiya kulisamika buntu bupya ibuzibya Banakristo bene-beni. (Ef. 4:22-24; Kol. 3:9, 10) Ibambelele zimwi bayoofwutuka Armagedoni banooli amulimo mupati. Elo cinookkomanisya kaka kutola lubazu mumulimo wa Jehova uuli boobu, kakunyina kunyonganizigwa anyika mbyaabi yamazuba aano!

14, 15. Amupandulule mubandi unooliko akati kabaabo bayoofwutuka mapenzi mapati alimwi abaabo baluleme bayoobusigwa.

¹⁴ Babelesi ba Jehova basyomeka ibakafwa  Jesu katanatalika mulimo wakwe waanyika abalo bayooiya zinji aciindi eeco. Bayoomuziba Mesiya wakasyomezyegwa, ngobakali kulangila pele kunyina nobakamubona. Kabatanafwa, bakatondezya luyando lwakuyiisyigwa a Jehova. Amuciyeeyele buyo mbociyookkomanisya kuba acoolwe cakubagwasya—mucikozyanyo, kupandulwida Daniele mbubwakazuzikizigwa businsimi mbwaakalemba pele mbwaatakamvwisya!—Dan. 12:8, 9.

¹⁵ Nokuba kuti aabo bayoobusigwa banooli azinji zyakwiiya kulindiswe, andiswe tuyooyanda kuziba zinji kuzwa kuli mbabo. Bayootwaambila kabotu-kabotu zintu zyaambwa mu Bbaibbele pele zyatakapandululwa cakumaninina. Amuyeeye mbociya kubota kuziba zyakamucitikila Jesu kuzwa kumwanaakwabo Johane mubapatizi. Ikwiiya cacigaminina kuzwa kubantu basyomeka bakacibona aameso ciya kutupa kulumba kapati ku Majwi aa Leza ikwiinda cino ciindi. Babelesi basyomeka ba Jehova bakafwa—kubikkilizya abankamu mpati bafwa kuciindi cino camamanino—bayoobusigwa kuti bakajane “buumi bwiinda buciza.” Bakatalika kubelekela Jehova munyika yakali kweendelezegwa a Saatani. Elo cinookkomanisya kaka kuzumanana kubeleka munyika mpya iijisi bukkale bubotu!—Heb. 11:35; 1 Joh. 5:19.

16. Kweelana abusinsimi, ino mbuti Buzuba Bwalubeta mbobuyooba?

¹⁶ Aciindi cimwi mu Buzuba Bwalubeta, mabbuku ayoojalulwa. Antoomwe a Bbaibbele, mpaayeeme lubeta lwabantu banoopona ikuti naa baleelela kuba abuumi butamani. (Amubale Ciyubunuzyo 20:12, 13.) Kumamanino aa Buzuba Bwalubeta, aumwi uyooba acoolwe cakutondezya kulubazu nkwabede kumakani aajatikizya bulelo bwa Leza bwakoonse-koonse. Sena bayoolibombya kububambe bwa Bwami akumulekela Mwana wambelele kubasololela “kutusensa twamaanzi aabuumi”? Naa sena bayookaka kulibombya ku Bwami bwa Leza? (Ciy. 7:17; Is. 65:20) Aciindi eeco, bantu boonse anyika banoopedwe kale coolwe cakulisalila kakunyina kunyonganizigwa acibi ncotwakakona naa bukkale bubyaabi. Kunyina baya kuzumbauzya kweelela kwalubeta lwa Jehova lwamamanino. Balike basizibi mbabayoonyonyoonwa kukabe kutamani.—Ciy. 20:14, 15.

17, 18. Ino mbulangizi buli buti bukkomanisya Banakristo bananike abambelele zimwi mbobajisi kujatikizya Buzuba Bwalubeta?

¹⁷ Akaambo kakuti beelela kutambula Bwami, Banakristo bananike mazuba aano balalangila cakuyandisisya kuyoolela mu Buzuba Bwalubeta. Elo cakomena kaka coolwe ncobayooba ancico! Ibulangizi oobu mbobubakulwaiza kutobela lulayo Petro ndwaakapa babunyina bamumwaanda wamyaka wakusaanguna naakati: “Amusungwaale kusimpizya lusinizyo lwakwiitwa kwanu alwakusalwa kwanu, nkaambo na mwacita aya makani, tamukooyoolebwa limbi, aboobo muyoofonkwedwa bunjilo bwakunjila mu-Bwami butamani bwa-Mwami Mufutuli wesu Jesu Kristo.”—2 Pet. 1:10, 11.

¹⁸ Bambelele zimwi balakondwa antoomwe ababunyina ibananike. Balikanzide kubagwasya. Mbobali balongwe ba Leza, bakulwaizigwa kusolekesya kucita kweelana ambobakonzya mumulimo wa Leza. Mu Buzuba Bwalubeta, bayookkomana kutobela bubambe bwa Leza camoyo woonse ciindi Jesu naayoobasololela kutusensa twamaanzi aabuumi. Mpoonya—kumamanino—bayooelela kuba babelesi ba Jehova baanyika mane kukabe kutamani!—Rom. 8:20, 21; Ciy. 21:1-7.

Sena Mulayeeya?

• Ino zintu zya Jesu zibikkilizya nzi?

• Ino mbuti bambelele zimwi mbobagwasyilizya banyina bananike?

• Ino bankamu mpati bajisi milimo nzi iilibedelede alimwi abulangizi?

• Ino mbuti mbomububona Buzuba Bwalubeta?

[Mibuzyo yaciiyo]

[Cifwanikiso icili apeeji 25]

Ibambelele zimwi basanzya zikobela zyabo akuzitubya mubulowa bwa Mwana wambelele

[Picture page 27]

Ino ncinzi ncomulangila kuyooiya kuzwa kubantu basyomeka ibayoobusigwa?