Amweende Munzila Zya Jehova
Amweende Munzila Zya Jehova
“Ngusicoolwe uuyoowa Jehova, uuenda munzila zyakwe.”—INT. 128:1.
1, 2. Nkaambo nzi ncotukonzya kusyoma kuti kukkomana kwini-kwini kulakonzeka?
MUNTU woonse ulaluyanda lukkomano. Pele cakutadooneka mulazumina kuti kulombozya lukkomano alimwi mane akusoleka kulujana tacaambi kuti tulikkomene pe.
2 Nokuba boobo, tulakonzya kukkomana ncobeni. Ku Intembauzyo 128:1 tubala kuti: “Ngusicoolwe uuyoowa Jehova, uuenda munzila zyakwe.” Tulakonzya kukkomana ikuti tukomba Leza akweenda munzila zyakwe kwiinda mukucita nzyayanda. Ino eeci ceelede kutupa kuba bantu bali buti?
Amusyomeke
3. Ino kusyomeka kuswaangene buti akulyaaba kwesu kuli Leza?
3 Ibamuyoowa Jehova balasyomeka, mbubwenya mbuli nguwe. Jehova wakazizuzikizya zisyomezyo zyoonse nzyaakaambila bana Israyeli bansiku. (1 Bam. 8:56) Kulyaaba kwesu kuli Leza ncisyomezyo ciyandika kwiinda zyoonse, alimwi kupaila lyoonse kuyootugwasya kucizuzikizya. Tulakonzya kupaila bwakapaila sintembauzyo Davida wakati: “Yebo, O Leza, ulimvwide nzendakakonkezya. . . . Njootembaula izina lyako lyoonse, akucita nzendakakonkezya mazuba oonse.” (Int. 61:5, 8; Muk. 5:4-6) Kutegwa tube balongwe ba Leza, tweelede kusyomeka.—Int. 15:1, 4.
4. Ino Jefita amwanaakwe musimbi bakacibona buti cikonke ncaakakonka kuli Jehova?
4 Kuciindi cababetesi bamu Israyeli, Jefita wakakonka kuti wakali kuyoomutuula “mbuli cituuzyo” kufwumbwa wakali kuyoosaanguna kumucinga nazwa kunkondo ikuti Jehova naakamupa kuzunda ba Amoni. Iwakamucinga wakali mwanaakwe musimbi simuzyalwa alikke. Kabasyomede Jehova, Jefita amwanaakwe musimbi watakakwetwe bakacizuzikizya cikonke. Nokuba kuti kukwatwa alimwi akuzyala bana zyakali kulombozegwa kapati mu Israyeli, kwiinda mukulisalila mwini mwana wa Jefita musimbi tanaakakwatwa alimwi wakaba acoolwe cakubeleka mulimo uusetekene kutempele lya Jehova.—Bab. 11:28-40.
5. Mmuumakani nzi mwaakasyomeka Hana?
5 Mwanakazi mululami Hana wakali kusyomeka. Wakali kukkala amulumi wakwe mu Levi, Elikana, amukaintu wakwe umbi Penina mucooko camalundu ca Efraimu. Penina wakazyala bana bali mbobabede alimwi wakasampaula Hana wakanyina bana ikapati mukwasyi nowakali kuunka kutempele. Mulweendo lumwi, Hana wakakonka ulaamba ikuti wazyala mwana mulombe, wakali kuyoomupa kuli Jehova. Ndilyonya wakamita akutumbuka mwana mulombe wakaulikwa kuti Samuele. Samuele naakalesegwa, Hana wakamupa kuli Jehova Leza ku Silo “mazuba oonse aabuumi bwakwe.” (1 Sam. 1:11) Aboobo wakazuzikizya cikonke cakwe nokuba kuti tanaakazi kuti kumbele wakali kuyooba abana bambi.—1 Sam. 2:20, 21.
6. Ino kusyomeka kwa Tukiko kwakalibonya buti?
6 Munakristo wamumwaanda wamyaka wakusaanguna Tukiko wakali muntu uusyomeka, “similimo musyomesi.” (Kol. 4:7) Tukiko wakeenda amwaapostolo Paulo kuzwa kucisi caba Giliki, mu Makedoniya, mu Asia Minor alimwi ambweni akusika ku Jerusalemu. (Inc. 20:2-4) Ulalangilwa kuti ngo “mukwesu” wakagwasya Tito kulanganya zipego zyakapegwa basyominyina babulide ku Judaya. (2 Kor. 8:18, 19; 12:18) Paulo naakaangwa ciindi cakusaanguna ku Roma, wakapa mulimo wakutola magwalo kubasyominyina baku Efeso a Kolose kuli sikwiiminina uusyomeka Tukiko. (Ef. 6:21, 22; Kol. 4:8, 9) Naakaangwa ciindi cabili ku Roma, Paulo wakatuma Tukiko ku Efeso. (2 Tim. 4:12) Ikuti katusyomeka, aswebo tulakonzya kupegwa mikuli mumulimo wa Jehova.
7, 8. Nkaambo nzi ncotunga twaamba kuti Davida a Jonatani bakali balongwe beni-beni?
7 Leza uyanda kuti katuli balongwe basyomeka. (Tus. 17:17) Jonatani, imwana wa Mwami Saulo musankwa wakaba mulongwe wa Davida. Jonatani naakamvwa kuti Davida wakajaya Goliati, “moyo wa-Jonatani wakaswaana amoyo wa-Davida, nkabela Jonatani wakamuyandisya mbuli mbwaliyanda mwini.” (1 Sam. 18:1, 3) Jonatani mane wakacenjezya Davida ciindi Saulo naakali kuyanda kumujaya. Davida naakatija, Jonatani wakaswaangana anguwe akutangana cizuminano anguwe. Kwaamba makani aajatikizya Davida kuli Saulo kwakatimujazye Jonatani, pele balongwe aaba bobile bakaswaangana alimwi akubukulusya cilongwe cabo. (1 Sam. 20:24-41) Nobakaswaangana lwamamanino, Jonatani wakayumya-yumya Davida “muli-Leza.”—1 Sam. 23:16-18.
8 Jonatani wakafwa munkondo yakulwana ba Filisti. (1 Sam. 31:6) Mulwiimbo lwadilwe, Davida wakaimba kuti: “Moyo wangu waatikila mucamba cangu nkaambo kanduwe, Jonatani mukwesu. Wakali kubotezya loko moyo wangu, aluyando lwako ndookandiyanda lwakali kugambya. Lwakali kwiinda luyando lwabanakazi.” (2 Sam. 1:26) Davida a Jonatani bakali balongwe beni-beni.
Amube “Amoyo Mutete” Lyoonse
9. Ino kuyandika kwakulicesya kutondezegwa buti mubbuku lya Babetesi caandaano 9?
9 Kutegwa tube balongwe ba Leza, tweelede kuba “amoyo mutete.” (1 Pet. 3:8; Int. 138:6) Mbokuyandika kulicesya kulaambwa mubbuku lya Babetesi caandaano 9. Mwana wa Gideoni Jotamu wakaamba kuti: “Cimwi ciindi misamu yoonse yakaya kuyoolinanikila mwami.” Muolifa, mukuyu alimwi amusaansa yakaambwa. Misamu eeyi yakali kwiiminina bantu beelela ibatakayanda kweendelezya bana Israyelinyina. Pele mukoka—uubelesegwa buyo kauli nkuni—wakali kwiiminina bweendelezi bwa Abimeleki uulisumpula alimwi mujayi wakali kuyanda kudyaaminina bamwi. Nokuba kuti ‘wakaba mwami wa Israyeli kwamyaka yotatwe,’ wakafwa lufwu lwatakali kuyeeyelwa. (Bab. 9:8-15, 22, 50-54) Elo cilainda kubota kaka ikuba “amoyo mutete”!
10. Ncinzi ncomwaiya kukukakilwa ‘kupa bulemu kuli Leza’ nkwaakacita Heroda?
10 Mumwaanda wamyaka wakusaanguna C.E., kwakaba kuzwangana akati ka Mwami Heroda Agripa waku Judaya uulisumpula abantu bakkala ku Turo a Sidoni, ibakali kuyanda luumuno anguwe. Heroda naakali kukambaukila buleya cimwi ciindi, bantu bakoongolola ategwa: “Ndijwi lyaleza, talili lyamuntu.” Heroda taakakukaka kulumbaizigwa ooko, aboobo mungelo wa Jehova wakamuuma eelyo wakafwa lufwu lubyaabi akaambo kakuti “takamulemekede Leza.” (Inc. 12:20-23) Mbuti kuti katucizi kapati kwaambaula makani naa kuyiisya kasimpe kamu Bbaibbele? Atutembaule Leza kuzintu nzyatuzumizya kucita.—1 Kor. 4:6, 7; Jak. 4:6.
Amube Basicamba Alimwi Bakozu
11, 12. Mbuti cakacitikila Enoki mbocitondezya kuti Jehova ulabapa busicamba anguzu babelesi bakwe?
11 Ikuti cakulicesya tweenda munzila zya Jehova, uyootupa busicamba anguzu. (Dt. 31:6-8, 23) Enoki, mwaalumi wamusanu ababili mumulongo wanzubo kuzwa kuli Adamu, wakali kweenda a Leza cabusicamba kwiinda mukutobela bukkale bubotu mukwiimpana abantu babyaabi bazyalani lyakuciindi naakali kupona. (Matl. 5:21-24) Jehova wakayumya Enoki kutegwa abandike mulumbe uuyandika kapati kubantu aabo akaambo kamajwi amicito yabo mibyaabi. (Amubale Juda 14, 15.) Sena mujisi busicamba buyandika kutegwa mwaambilizye mbeta zya Leza?
12 Jehova wakanyonyoona bantu babyaabi mu Zambangulwe lyanyika yoonse kuciindi ca Nowa. Nokuba boobo, businsimi bwa Enoki bulatukulwaizya, nkaambo bantu babyaabi bamazuba aano lino-lino bayoonyonyoonwa ankamu zya Leza zisalala. (Ciy. 16:14-16; 19:11-16) Jehova ulayiingula mipailo yesu kwiinda mukutupa busicamba kutegwa twaambilizye mulumbe wakwe, kunyina makani naa waamba mbeta zyakwe naa zilongezyo zyamubweendelezi bwa Bwami bwakwe.
13. Nkaambo nzi ncotukonzya kusyoma kuti Leza ulakonzya kutupa busicamba anguzu nzyotuyandika kutegwa tuliyumye mumapenzi aatukatazya?
13 Tuyandika busicamba anguzu nzyapa Leza kutegwa tuliyumye mumapenzi aatukatazya. Esau naakakwata banakazi ba Hiti bobile, banakazi aaba “bakakatazya myoyo ya-Izaka a-Rebeka” bazyali bakwe. Rebeka mane wakatongooka ategwa: “Bandikatazya bana basimbi ba-Heti. Na [mwaneesu] Jakobo wakwata umwi wabana basimbi ba-Heti bali mbuli aba, umwi wabana basimbi bakookuno, buumi bwangu buyooba amilimonzi kulindime?” (Matl. 26:34, 35; 27:46) Izaka wakabweza ntaamu akutuma Jakobo kumbi kuyoojana mukaintu akati kabakombi ba Jehova. Nokuba kuti ba Izaka a Rebeka kunyina nobakali kunga bacinca ncaakacitide Esau, Leza wakabapa busongo, busicamba, anguzu zyakuti bazumanane kusyomeka kulinguwe. Ikuti twapailila kuti atugwasye, Jehova uyootucitila mbubwenya aswebo.—Int. 118:5.
14. Mbuti kasimbi kamwi kana Israyeli mbokakatondezya busicamba?
14 Nokwakainda myaanda yamyaka, ikasimbi kana Israyeli kamwi ikakatolwa buzike abasikusaala kakaba kabelesi muŋanda ya Naamani, silutwe wabasikalumamba waku Aramu, imwaalumi wakali kuciswa cinsenda. Naakamvwa maleele ngaakacita Leza kwiinda mumusinsimi Elisha, imusimbi ooyo cabusicamba wakaambila mukaintu wa Naamani kuti: ‘Ikuti simalelaangu wainka ku Israyeli, musinsimi wa Jehova ulakonzya kumuponya cinsenda cakwe.’ Naamani wakaunka ku Israyeli, alimwi wakaponesegwa munzila yamaleele. (2 Bam. 5:1-3) Taciliboteli kaka cikozyanyo eeco camusimbi ooyo kubakubusi ibasyoma Jehova kubapa busicamba bwakupa bumboni kuli bamayi, basicikolonyina alimwi abambi!
15. Mmulimo nzi wabusicamba ngwaakacita mubanzi wamuŋanda ya Ahabu wazina lya Obadiya?
15 Busicamba mbwatupa Leza bulatugwasya kuliyumya notupenzegwa. Amuyeeye mubanzi wamuŋanda ya Mwami Ahabu wazina lya Obadiya iwakali kupona kuciindi camusinsimi Eliya. Mwami Mukaintu Jezebeli naakalailila kuti basinsimi ba Leza bajaigwe, Obadiya wakasisa bali 100 akati kabo “mumwi makumi osanwe amumwi makumi osanwe mumpangala.” (1 Bam. 18:13; 19:18) Sena andinywe inga mwabagwasya Banakristonyoko bapenzegwa, mbubwenya Obadiya mbwaakagwasya basinsimi ba Jehova?
16, 17. Ino ba Aristarko a Gayo bakakweendelezya buti kupenzegwa?
16 Ikuti katupenzegwa, tulakonzya kusyoma kuti Jehova unooli andiswe. (Rom. 8:35-39) Kubbuwa lyakusobanina ku Efeso, aabo mbobakali kubeleka limwi a Paulo ba Aristarko a Gayo bakafwumpwa abantu bakali kubalilwa kuzyuulu zili mbozibede. Imufwuzi Demetriyo nguwakatalisya lupyopyongano oolu. Walo abafwuzinyina bakapangide malende aansiliva aaleza mwanakazi Diana, alimwi makwebo aabo nkobakali kujana mali manji akali kulangilwa kuwa akaambo kakuti mulimo wakukambauka wa Paulo wakapa kuti bantu bamumunzi ooyo banji baleke kukomba mituni. Inkamu eeyo yakakwelela Aristarko a Gayo mubbuwa lyakusobanina kaboompolola kuti: “Diana waba-Efeso mupati.” Kulangilwa kuti ba Aristarko a Gayo bakali kuyeeya kuti balafwa, pele mulembi wamagwalo wamumunzi wakaumuzya nkamu eeyo.—Inc. 19:23-41.
17 Ikuti nomwakacitikilwa cintu cili boobo, sena nomwakayeeya kujana bukkale butakatazyi? Kunyina citondezya kuti ba Aristarko a Gayo bakatyompwa. Mbwaanga kwabo kwakali ku Tesalonika, Aristarko wakalizi kuti kwaambilizya makani mabotu kulakonzya kuletela kupenzegwa. Cimwi ciindi musyule, kwakaba lupyopyongano Paulo naakakambauka kubusena oobo. (Inc. 17:5; 20:4) Akaambo kakuti Aristarko a Gayo bakali kweenda munzila zya Jehova, bakajisi nguzu abusicamba buzwa kuli Leza bwakuliyumya mukupenzegwa.
Ikubabikkila Maanu Bamwi
18. Mbuti ba Priskila a Akula mbobakali ‘kwiingasila kugwasya’ bamwi?
18 Kunyina makani naa tulapenzegwa lino naa pe, tweelede kubabikkila maanu Banakristoma. Priskila a Akula bakali ‘kwiingasila kugwasya beenzinyina.’ (Amubale Ba-Filipi 2:4.) Banabukwetene aabo bali kabotu beelede kuti bakamupa aakoona Paulo ku Efeso, ooko mufwuzi wansiliva Demetriyo nkwaakatalisya lupyopyongano lwaambwa musyule. Ibukkale oobo kweelede kuti mbobwakakulwaizya Akula a Priskila ‘kulibikka muntenda’ nkaambo ka Paulo. (Rom. 16:3, 4; 2 Kor. 1:8) Sunu, kubabikkila maanu bakwesu bapenzegwa kutupa ‘kucenjela mbuli nzoka.’ (Mt. 10:16-18) Mulimo wesu tulaucita cakucenjela alimwi tulakaka kwaaba bakwesu kuli basikubapenzya kwiinda mukutabaambila mazina aabakwesu naa makani aambi.
19. Nzintu nzi zibotu nzyaakacitila bamwi Dorika?
19 Kubabikkila maanu bamwi kuli munzila zinji. Banakristo bamwi banyina zintu nzyobayandika, aboobo tulakonzya kubapa zintu eezyo. (Ef. 4:28; Jak. 2:14-17) Mumbungano yamumwaanda wamyaka wakusaanguna ku Jopa, kwakali mwanakazi mwaabi wazina lya Dorika. (Amubale Incito 9:36-42.) Dorika ‘wakalizwide milimo mibotu azipego zyaluzyalo,’ izilangilwa kuti zyakali kubikkilizya kubasumina zisani bamukabafwu bapengede. Naakafwa mu 36 C.E. bamukabafwu bakausa kapati. Leza wakabelesya mwaapostolo Petro kubusya Dorika, alimwi kulangilwa kuti buumi bwakwe boonse bwakatobela bwakali bwakukambauka makani mabotu akucitila bamwi zintu zibotu. Tulikkomene kapati kaka kuti tulijisi banakazi Banakristo baabi bali boobo akati kesu sunu!
20, 21. (a) Ino kukulwaizya kuswaangene buti akubabikkila maanu bamwi? (b) Ncinzi ncomunga mwacita kutegwa kamukulwaizya?
20 Tulatondezya kuti tulababikkila maanu bamwi kwiinda mukubakulwaizya. (Rom. 1:11, 12) Sila, similimonyina Paulo wakali kukulwaizya. Naakamanizigwa makani aajatikizya kupalulwa kuma 49 C.E., kabunga keendelezya mu Jerusalemu kakatuma basikwiiminina kutola lugwalo ku Banakristo bakali mumasena aambi. Sila, Juda, Barnaba alimwi a Paulo bakalutola ku Antiokeya. Ooko Sila a Juda “bakalaya babunyina majwi manjimanji, babayumya.”—Inc. 15:32.
21 Kumbele, Paulo a Sila bakaangwa muntolongo ku Filipi, pele bakaangununwa akaambo kakuzuzuma kwanyika. Kulangilwa kuti cakababotela kapati ikupa bumboni akubona mulindizi wantolongo ambaakali kukkala limwi nkobasanduka akusyoma! Kabatanapola mumunzi ooyo, Sila a Paulo bakabakulwaizya bakwesu. (Inc. 16:12, 40) Mbubwenya mbuli Paulo a Sila, amusoleke kubakulwaizya bamwi kwiinda muzintu nzyomwaamba nomwiingula, nomubandika makani alimwi akuba basungu mumulimo wamumuunda. Alimwi ‘anooli mujisi majwi aakukulwaizya,’ mutawayiwayi pe, ‘amwaambe.’—Inc. 13:15.
Amuzumanane Kweenda Munzila zya Jehova
22, 23. Mbuti mbotunga twagwasigwa ncobeni azibalo zili mu Bbaibbele?
22 Elo tweelede kulumba kapati kaka kujatikizya zibalo zyakacitika ncobeni izilembedwe mu Jwi lya Jehova, “Leza silukulwaizyo loonse”! (2 Kor. 1:3, Byington) Ikutegwa tugwasigwe azyakuluula eezi, tweelede kutobela ziiyo zyamu Bbaibbele zili mumo mubuumi bwesu alimwi akuzumina kweendelezegwa amuuya wa Leza uusalala.—Gal. 5:22-25.
23 Kuzinzibala kuyeeya zibalo zyamu Bbaibbele eezi kuyootugwasya kuba abube bumukkomanisya Leza. Kuyooyumya cilongwe cesu a Jehova, uutupa “busongo aluzibo akukondwa.” (Muk. 2:26) Mukucita boobo, tuyookkomanisya moyo wa Leza siluyando. (Tus. 27:11) Atukanze kucita boobo kwiinda mukuzumanana kweenda munzila zya Jehova.
Ino Inga Mwaingula Buti?
• Mbuti mbomunga mwatondezya kuti mulasyomeka?
• Nkaambo nzi ncotweelede kuba “amoyo mutete”?
• Mbuti zibalo zyamu Bbaibbele mbozikonzya kutugwasya kuba basicamba?
• Muunzila nzi motunga twababikkila maanu bamwi?
[Mibuzyo yaciiyo]
[Cifwanikiso icili apeeji 8]
Jefita uusyomeka amwanaakwe musimbi bakacizuzikizya cikonke, nokuba kuti kucita boobo kwakali kukatazya kapati
[Cifwanikiso icili apeeji 10]
Nobakubusi, ncinzi ncomwaiya kumusimbi muna Israyeli?
[Cifwanikiso icili apeeji 11]
Mbuti Dorika mbwaakagwasya Banakristonyina bakapengede?