Amwiiye Misyinali Wiinda Boonse
Amwiiye Misyinali Wiinda Boonse
“Amwiiye ndime, mbubonya mbuli ambebo mbundaiya Kristo.”—1 KOR. 11:1.
1. Nkaambo nzi ncotweelede kumwiiya Jesu Kristo?
IMWAAPOSTOLO Paulo wakaiya Misyinali wiinda boonse, Jesu Kristo. Awalo Paulo wakakulwaizya Banakristonyina kuti: “Amwiiye ndime, mbubonya mbuli ambebo mbundaiya Kristo.” (1 Kor. 11:1) Jesu naakazwa akupa basikwiiya bakwe citondezyo cakulibombya kwiinda mukusanzya matende aabo, wakabaambila kuti: “Ndamupa citondezyo, kuti anywebo mucite mbuli mbwendamucitila.” (Joh. 13:12-15) Tobanakristo bamazuba aano, tujisi mukuli wakwiiya Jesu Kristo mumajwi ngotubelesya anzyotucita alimwi amubube mbotutondezya.—1 Pet. 2:21.
2. Nokuba kuti tamusalidwe aba Kabunga Keendelezya kuba misyinali, ino mweelede kuba amuuya uuli buti?
2 Mucibalo cainda, twakaiya kuti misyinali mmuntu uutumwa kali mukambausi—imuntu uutola makani mabotu kuli bamwi. Kujatikizya ceeci, Paulo wakabuzya mibuzyo iipa kukkala ansi kuyeeya. (Amubale Ba-Roma 10:11-15.) Amubone kuti mwaapostolo wakabuzya kuti: “Bamvwe buti nikutakwe sikukambauka?” Mpoonya wakazubulula majwi aabusinsimi bwa Isaya aakuti: “Abota loko maulu aabaabo bakambauka Ivangele lyamakani mabotu.” (Is. 52:7) Nokuba kuti tiimwakasalwa akutumwa kucisi cakule kamuli misyinali, mulakonzya kuba amuuya wakuyandisya kukambauka, ikwiiya Jesu wakali sikwaambilizya makani mabotu musungu. Mwakali, basikumwaya baambilizya Bwami bali 6,957,852 ‘bakacita mulimo wabakambausi’ mumasi aali 236.—2 Tim. 4:5.
“Tulisiide Zintu Zyoonse Kuzootobela Nduwe”
3, 4. Nzinzi Jesu nzyaakasiya kujulu, alimwi ino ncinzi ncotweelede kucita kutegwa tube batobeli bakwe?
3 Ikutegwa amanizye mulimo ngwaakapedwe anyika, Jesu “wakalilonzya, wakalisalila ciimo cabuzike,” wakasiya buumi bwakwe bwakujulu abulemu. (Flp. 2:7) Kufwumbwa ncotucita mukwiiya Kristo tacikonzyi kweezyanisigwa kuzintu nzyaakacita Jesu naakali kuboola anyika. Pele tulakonzya kuzumanana kuyuma katuli batobeli bakwe, ikutali kunyomenena zintu nzyotwakajisi munyika ya Saatani.—1 Joh. 5:19.
4 Aciindi cimwi, mwaapostolo Petro wakaambila Jesu kuti: “Langa! Iswe tulisiide zintu zyoonse kuzootobela nduwe.” (Mt. 19:27) Petro, Andreya, Jakobo alimwi a Johane bakasiya tunyandi twabo cakufwambaana nobakatambwa kuti batobele Jesu. Bakaleka mulimo wabo wakuzuba nswi akutalika kucita buyo mulimo wakukambauka. Ikweelana a Makani Mabotu ngaakalemba Luka, Petro wakaamba kuti: “Bona, swebo twakaleka zyesu, twakucilila.” (Lk. 18:28) Ibunji bwesu tiitwakaleka “zyesu” zyoonse kutegwa tutobele Jesu. Pele ‘twakaliimya’ kutegwa tube batobeli ba Kristo ababelesi ba Jehova babeleka camoyo woonse. (Mt. 16:24) Ibukkale buli boobo bwatupa zilongezyo zinji. (Amubale Matayo 19:29.) Ikuba basungu kukambauka mukwiiya Kristo kutupa kukkomana, ikapati ikuti twakajisi lubazu mukugwasya umwi kuba acilongwe a Leza a Mwanaakwe ngwayandisya.
5. Amwaambe cakuluula citondezya ncobanga bacita bamuzwa kule bakkala muzisi zimbi nobaiya kasimpe kamu Bbaibbele.
5 Valmir, imwaalumi uuzwa ku Brazil pele uukkala kucisi ca Suriname wakali kubeleka mulimo wakusya ngolida. Wakali mudakwi iwakali kupona buumi bubyaabi. Cimwi ciindi naakali mudolopo, Bakamboni ba Jehova bakatalika kwiiya Bbaibbele anguwe. Wakali kwiiya abuzuba, wakacinca kapati, alimwi nokwakainda ciindi cisyoonto wakabbapatizigwa. Naakabona kuti mulimo wakwe wakali kumukasya kupona kweelana anzyaakaiya mu Bbaibbele, wakasambala makwebo aakwe aakali kumupa mali manji akupilukila kucisi ca Brazil kuyoogwasya mukwasyi wakwe kwiiya kasimpe. Nobaiya kasimpe kamu Bbaibbele, bamuzwa kule banji bakkala muzisi zimbi balalisungula kuleka milimo yabo muzisi zisumpukide akupilukila kuzisi zyokwabo kabajisi makanze aakuyoogwasya basazinyina abamwi kuba acilongwe a Jehova. Basikumwaya ba Bwami bali boobu batondezya muuya wini-wini wabukambausi.
6. Ncinzi ncotunga twacita ikuti katutakonzyi kulongela kubusena kubulide basikwaambilizya Bwami?
6 Bakamboni bali mbobabede balongela kumasena ikubulide bakambausi ba Bwami. Bamwi mane balongela kumasi aambi kuyookambauka. Ambweni swebo tatukonzyi kulonga mbuli bamwi, pele tulakonzya kumwiiya Jesu kwiinda mukulitakata mumulimo lyoonse.
Jehova Ulapa Lwiiyo Luyandika
7. Nzikolo nzi ziliko zyakuyiisya baabo bayanda kuzwidilila kabali basikwaambilizya Bwami?
7 Mbubwenya Jesu mbwaakayiisigwa a Bausyi, tulakonzya kugwasigwa kulwiiyo ndwapa Jehova lino. Jesu mwini wakati: ‘Kulilembedwe mubasinsimi kuti, Boonse bayooiisigwa a Leza.’ (Joh. 6:45; Is. 54:13) Sunu, kuli zikolo zibambilidwe kutugwasya katuli basikwaambilizya Bwami. Cakutadooneka, toonse twagwasigwa munzila imwi a Cikolo Camulimo Weendelezegwa a Leza mumbungano zyesu. Bapainiya bajisi coolwe cakujanika ku Cikolo Camulimo Wabupainiya. Bapainiya bali kubeleka kwaciindi cilamfwu bajisi coolwe cakujanika kucikolo ciindi cabili. Baalu abakutausi balajanika ku Cikolo Camulimo wa Bwami kutegwa basensemunwe kujatikizya kuyiisya kwabo ambobagwasya basyominyina. Baalu abakutausi banji ibatakwete bakatambula lwiiyo mu Cikolo Cakwiiya Mulimo icibayiisya kugwasya bamwi mumulimo wakukambauka. Alimwi bakwesu abacizi banji ibakapegwa mulimo wabumisyinali muzisi zimbi bakayiisigwa mulimo ooyo kucikolo ca Watchtower Bible School of Gilead.
8. Mbuti bakwesu bamwi mbobalubikkila maanu lwiiyo ndwapa Jehova?
8 Kuli kucinca nkobacita Bakamboni ba Jehova banji kutegwa bajanike kuzikolo eezi. Kutegwa akajanike ku Cikolo Cakwiiya Mulimo ku Canada, Yugu wakaleka mulimo wakumubili ngwaakajisi akaambo kakuti basikumulemba mulimo bakakaka kumupa ciindi cakulyookezya kumilimo kutegwa akajanike. Yugu wakati: “Kunyina nondiyeeya kuti ndakalubizya kucileka. Mubwini, ikuti nindakapegwa ciindi cakulyookezya caalubazu, nobakali kulangila kuti ndakeelede kuzumanana kubeleka mukkampani eeyo ikutondezya kuti ndilasyomeka. Pele lino ndilakonzya kuzumina mulimo uuli woonse kuzwa kuli Jehova.” Ikutegwa babelesye lwiiyo ndobakatambula kuli Leza, ibanji cakulisungula baleka zintu nzyobakali kubikkila maanu kapati musyule.—Lk. 5:28.
9. Amupe cikozyanyo citondezya zijanwa nkaambo kanjiisyo zyamu Magwalo akusolekesya.
9 Njiisyo zyamu Magwalo akusolekesya zilakonzya kubagwasya kapati bantu kuyaambele. (2 Tim. 3:16, 17) Amulange-lange cakacitikila Saulo kucisi ca Guatemala. Wakazyalwa katakkwene aniini, alimwi mwiiyi wakwe umwi wakaambila banyina kuti kabatamusinikizyi kwiiya kubala, nkaambo eeco inga caile kumutyompya. Saulo wakaleka cikolo katanaciziba kubala. Pele, Kamboni umwi wakayiisya Saulo kubala kwiinda mukubelesya broshuwa lyakuti Sungwaala Kukubala Akukulemba. Mukuya kwaciindi, Saulo wakayaambele kusikila wakacikonzya kubandika makani mu Cikolo Camulimo Weendelezegwa a Leza. Banyina Saulo kumbele bakaswaangana awakali mwiiyi wakwe mumulimo wakuŋanda aŋanda. Nobakaziba kuti Saulo wakaciziba kubala, bayi aabo bakaambila banyina kuti bakamutolelezye nsondo yakali kutobela. Insondo eeyo yakatobela, bayi bakabuzya Saulo kuti, “Ncinzi ncotindiyiisye?” Saulo wakatalika kubala muncali mubbuku lyakuti Ino Ncinzi Cini Bbaibbele Ncoliyiisya? Bayi bakati: “Candigambya kuti lino uyiisya ndime.” Cakabaalila kulijata, bakakumbata Saulo, yabeenda misozi kumeso akaambo kakukondwa.
Kuyiisya Ikunjila Mumoyo
10. Ndibbuku nzi ligwasya liliko ndyotweelede kubelesya kuyiisya kasimpe kamu Bbaibbele?
10 Kuyiisya kwa Jesu kwakayeeme azintu nzyaakamuyiisya Jehova alimwi amalailile aali mu Jwi lya Leza lilembedwe. (Lk. 4:16-21; Joh. 8:28) Tulamwiiya Jesu kwiinda mukutobela lulayo lwakwe anjiisyo ziyeeme aa Magwalo. Aboobo toonse tulabandika akuyeeya munzila yomwe alimwi eeci citupa kukamantana. (1 Kor. 1:10) Tulalumba kapati kaka kuti “muzike musyomesi uucenjede” ulamwaya mabbuku aapandulula Bbaibbele ikutugwasya kuba bantu bakamantene lyoonse munjiisyo amukuzuzikizya mulimo wesu katuli bakambausi! (Mt. 24:45; 28:19, 20) Akati kamabbuku aaya kuli bbuku lya Bbaibbele Ncoliyiisya lijanika lino mumyaambo iili 179.
11. Mbuti mucizi umwi kucisi ca Ethiopia mbwaakazunda kukazigwa kwiinda mukubelesya bbuku lya Bbaibbele Ncoliyiisya?
11 Ikwiiya Magwalo kwiinda mukubelesya bbuku lya Bbaibbele Ncoliyiisya kulakonzya kwiicinca niiba myoyo yabasikutukazya. Cimwi ciindi, Lula, imucizi mupainiya kucisi ca Ethiopia naakali kweendelezya ciiyo ca Bbaibbele umwi wamukwasyi wasikwiiya wakanjila akwaamba majwi mabi kuti beelede kucileka kwiiya. Amoyo uukkede, Lula wakamupandulwida kwiinda mukubelesya cikozyanyo cijatikizya mali aakubeja mucibalo 15 cabbuku lya Bbaibbele Ncoliyiisya. Mwanakazi ooyo wakaleka kunyema alimwi wakabazumizya kuzumanana kwiiya. Wakajanika aciiyo cakatobela alimwi akulomba kuti abe aciiyo ca Bbaibbele cimugeme, mane akuti wakali kunoocibbadalila ciiyo eeco! Ndilyonya wakatalika kwiiya ziindi zyotatwe ansondo akuyaambele kapati mukasimpe.
12. Amupe cikozyanyo kutondezya bakubusi mbobanga bayiisya kasimpe kamu Bbaibbele cakuzwidilila.
12 Bakubusi balakonzya kugwasya bamwi kwiinda mukubelesya bbuku lya Bbaibbele Ncoliyiisya. Keanu wamyaka yakuzyalwa iili 11 naakali kubala bbuku eeli kunsumbu ya Hawaii, umwi ngobaiya limwi kucikolo wakamubuzya kuti, “Nkaambo nzi ncotasekeleli mazuba aakulyookezya?” Keanu wakaingula kwiinda mukubala zili mucibalo camakani aayungizidwe cakuti “Sena Tuleelede Kusekelela Mazuba Aakulyookezya?” Mpoonya wakavwununa bbuku kupeeji lilembedwe zili mukati akulomba musankwa wakamubuzya kuti asale cibalo cakamukonda kwiinda. Ciiyo ca Bbaibbele cakatalisigwa. Mwaka wamulimo wainda, Bakamboni ba Jehova bakeendelezya ziiyo zya Bbaibbele zili 6,561,426, alimwi ibunji bwabo bakali kubelesya bbuku lya Bbaibbele Ncoliyiisya. Sena mulalibelesya bbuku eeli kuziiyo zya Bbaibbele?
13. Mbuti kwiiya Bbaibbele mbokukonzya kubanjila kapati bantu?
13 Kwiiya Magwalo katubelesya bbuku lya Bbaibbele Ncoliyiisya kulakonzya kubakulwaizya kapati aabo bayanda kucita kuyanda kwa Leza. Banabukwetene bapainiya baalubazu kucisi ca Norway bakatalisya ciiyo ca Bbaibbele kumukwasyi uuzwa mucisi cino ca Zambia. Banabukwetene aabo bana Zambia bakajisi bana basimbi botatwe alimwi tiibakacili kuyanda kuba amwana uumbi. Aboobo bakaintu nobakamita, bakayeeya kuti baligusye da. Kakucili mazuba masyoonto kuti babandike adokotela, bakaiya cibalo camutwe wakuti “Ikubulanga Mbwabulanga Leza Buumi.” Icifwanikiso camwana uutanazyalwa cili mucibalo eeco cakabanjila kapati banabukwetene aabo cakuti bakasala kuti bataligusyi da. Bakazumanana kuyaambele kumuuya, mwana wakazyalwa wakali musankwa, aboobo bakamuulika zina lyamukwesu wakali kweendelezya ciiyo.
14. Amupe cikozyanyo ikutobela nzyotuyiisya mbokukonzya kujanya zibotu.
14 Icibeela ciyandika kapati cambwaakali kuyiisya Jesu ncakuti wakali kuzitobela nzyaakali kuyiisya. Bantu banji balakulombozya kulilemeka kwa Bakamboni ba Jehova, ibaiya Jesu mumakani aaya. Mulombwana umwi simakwebo kucisi ca New Zealand wakapwailwa mootokala akubbidwa kabbeeke kayumwidwa zintu ziyandika. Wakaambila mupulisa, pele mupulisa wakati: “Kunyina nolangilwa kuzijana zintu zyabbigwa ccita kuti zyajanwa aumwi wa Bakamboni ba Jehova.” Kamboni mukaintu iwakali kuya busiila bantu miteende wakakajana kabbeeke. Mukamwini naakamvwa kuti kuli mukaintu umwi wakakajana, wakaunka kuŋanda yamucizi. Wakamukkala moyo naakajana kuti ipepa lyakajisi makani aayandika kapati lyakaliko. Imucizi wakamwaambila kuti, “Cileelela kuti ndipilusye kabbeeke aaka azili mumo, ikapati nkaambo ndili umwi wa Bakamboni ba Jehova.” Simakwebo wakagambwa, nkaambo wakayeeya cakamwaambilide mupulisa mafwumofwumo ibuzuba oobo mbubwenya. Cilasalala kuti Banakristo bakasimpe batobela njiisyo zili mu Bbaibbele mubuumi bwabo alimwi baiya Jesu.—Heb. 13:18.
Amwiiye Mbwaakali Kubalanga Bantu Jesu
15, 16. Mbuti mbotunga twabakwelelezya bantu kumulumbe ngotukambauka?
15 Mbwaakali kubalanga bantu Jesu kwakabakwelelezya kumulumbe wakwe. Mucikozyanyo, luyando lwakwe akulicesya zyakabakwelelezya bantengwana kulinguwe. Wakabafwida luzyalo bakamusikila alimwi wakabaumbulizya amajwi mabotu, akuponya baciswa banji. (Amubale Marko 2:1-5.) Tatukonzyi kucita maleele, pele tulakonzya kutondezya luyando, kulicesya aluzyalo—ibube bugwasya kukwelelezya bantu kukasimpe.
16 Luzyalo lwakagwasya mupainiya waalubazu wazina lyakuti Tariua naakasika aŋanda yamudaala umwi wazina lya Beere, uukkala munsumbu imwi akati kansumbu zili kule zya Kiribati mulwaanje lwa South Pacific. Nokuba kuti mwaalumi ooyo wakatondezya kuti tanaakali kuyanda kuswiilila, Tariua wakabona kuti wakalilebukide asyoonto, aboobo wakamufwida luzyalo. Mucizi ooyu wakabuzya kuti: “Sena mulicizi ncasyomezya Leza kubantu baciswa abacembeede?” Mpoonya wakabala lugwalo kuzwa mubusinsimi bwa Isaya. (Amubale Isaya 35:5, 6.) Mwaalumi ooyo wakakkomana akwaamba kuti, “Ndali kulibala Bbaibbele kwamyaka minji alimwi ndali kuswaigwa amisyinali wakucikombelo cangu kwamyaka minji, pele tandinabuzuba ndabala makani aaya mu Bbaibbele.” Ciiyo ca Bbaibbele cakatalisigwa kuli Beere, alimwi wakayaambele kumuuya. Inzya nokuba kuti wakalilemene, lino ulibbapatizidwe, nguulanganya kakamu kabakwesu kali kule alimwi ulakonzya kweendauka munsumbu yoonse kakambauka makani mabotu.
Amuzumanane Kumwiiya Kristo
17, 18. (a) Mbuti mbomunga mwaba mukambausi uuzwidilila? (b) Ncinzi ncobayoojana aabo baubikkila maanu kapati mulimo wabo wakukambauka?
17 Mbubwenya zyakuluula zyamumuunda zikkomanisya mbozitondezya ziindi zinji, tulakonzya kuba bakambausi bazwidilila ikuti mubuumi bwesu katutondezya bube mbwaakatondezya Jesu. Aboobo cileelela kapati kaka kuti tumwiiye Kristo katuli bakambausi basungu!
18 Bamwi nobakaba basikwiiya ba Jesu mumwaanda wamyaka wakusaanguna, Petro wakabuzya kuti: “Ino tuyoopegwanzi?” Jesu wakaingula kuti: “Umwi aumwi uusiide maanda nanka babunyina nanka bacizi nanka wisi nanka banyina nanka bana nanka myuunda nkaambo kazina lyangu uzootambula kwiinda mwaanda nkabela uzookona buumi butamani.” (Mt. 19:27-29) Majwi aaya ayoozuzikizigwa ncobeni kulindiswe ikuti twazumanana kumwiiya Misyinali wiinda boonse, Jesu Kristo.
Ino Inga Mwaingula Buti?
• Mbuti Jehova mbwatuyiisya kuba bakambausi?
• Nkaambo nzi bbuku lya Bbaibbele Ncoliyiisya ncoligwasya mumulimo wesu?
• Mbuti mbotukonzya kumwiiya Jesu kujatikizya mbotubabona bantu?
[Mibuzyo yaciiyo]
[Cifwanikiso icili apeeji 17]
Jesu naakatamba Petro, Andreya, Jakobo a Johane kuti bamutobele, bakacita oobo ndilyonya
[Cifwanikiso icili apeeji 19]
Imabbuku mbuli lya “Bbaibbele Ncoliyiisya” atugwasya kukamantana mukuyiisya kwesu