Basikumanizya Cikolo Ca Gileadi Bakulwaizigwa “Kutalika Kusya”
Kumanizya Cikolo Ca Gileadi Canamba 123
Basikumanizya Cikolo Ca Gileadi Bakulwaizigwa “Kutalika Kusya”
MU Mujibelo, mu September 8, 2007, ibantu bali 6,352 bazwa mumasi aali 41 bakabungana kupulogilamu yakumanizya cikolo ca The Watchtower Bible School of Gilead canamba 123. Aciindi ca 10:00hrs, sicuuno wapulogilamu, mukwesu Anthony Morris wamu Kabunga Keendelezya wakatambula boonse bakajanika akubakulwaizya kutobela pulogilamu. Naakamana kwaamba majwi aantalisyo, wakaita mwaambi wakusaanguna, mukwesu Gary Breaux wamu Kkomiti ya Mutabi yacisi ca United States.
Mukwesu Breaux wakasyomezya basicikolo kuti kunyina makani aciwa cabo, aabo ibacita kuyanda kwa Jehova mbabotu kuli Leza. (Jer. 13:11, NW) Wakakulwaizya basikumanizya cikolo aabo kuti bazumanane abubotu buli boobo. Mpoonya mukwesu Gerrit Lösch wamu Kabunga Keendelezya wakakankaizya kuti cileelela kulangila bulumbu notubelekela Jehova. (Heb. 11:6) Nokuba boobo, makanze eesu ayelede kuyaama aluyando lwini-lwini.
Imulangizi wa Cibeela ca Zikolo Zyeendelezegwa a Leza (Theocratic Schools Department), imukwesu William Samuelson nguwakatobela akukulwaizya basikumanizya cikolo kuzumanana cakusyomeka mumulimo wabulemu wakwaambilizya Mwami weendelezya alimwi akutondezya bulemu bwabo kwiinda mukulilemeka. * Mukwesu Sam Robertson, mulangizi wabili wa Cibeela ca Zikolo Zyeendelezegwa a Leza wakakulwaizya basikumanizya cikolo kuti lyoonse kababikkila maanu kubube bubotu bwabamwi. Ikuti bacita oobo, basikumanizya cikolo aabo bayoocikonzya ‘kubayanda babunyina boonse.’—1 Pet. 2:17.
Naakamana makani aayo aakulwaizya, imwiiyi wacikolo ca Gileadi mukwesu Mark Noumair wakabuzya-buzya basikumanizya cikolo ibakaluula zyakabacitikila mumulimo wamumuunda ciindi calwiiyo lwabo mucikolo ca Gileadi. Baswiilizi boonse bakabona caantangalala kuti bakwesu abacizi aabo balauyanda kapati mulimo akuti balombozya kugwasya bamwi. Mpoonya mukwesu Kent Fischer wa Ofesi lya Beteli lyaku Patterson wakabuzya-buzya bamu Kkomiti ya Mutabi bazwa mumasi otatwe aajisi bamisyinali. Nzyobakaamba bakwesu aaba zyakabakulwaizya baswiilizi, ibakali kubikkilizya abazyali babasikumanizya cikolo banji, kuti bamisyinali bapya balabikkilwa maanu kapati mumasi mobabelekela. Mpoonya mukwesu Izak Marais wa Cibeela ca Milimo Yabusanduluzi (Translation Services Department) wakabuzya-buzya bamisyinali bali kubeleka kwaciindi cilamfwu, aboobo nzyobakaamba zyakagwasya basikumanizya cikolo kuzibonena limwi zintu zikkomanisya zili mumulimo wabumisyinali.
Imakani mapati aapulogilamu aakabandikwa amukwesu Geoffrey Jackson wamu Kabunga Keendelezya akajisi mutwe wakuti “Ncinzi Ncomuyoocita Azintu Zyoonse Nzyomwakamvwa?” Mukwesu Jackson, iwakabeleka kali misyinali kwamyaka iitandila ku 25 kucooko ca South Pacific, wakabandika makani aamamanino mu Mulumbe waa Cilundu. Mumakani aayo, Jesu wakaamba bantu bobile, umwi uucenjede aumbi mufwubafwuba ibakayaka maanda. Imwaambi wakatondezya kuti maanda aayo oonse alakonzya akali mubusena bomwe. Nokuba boobo, imuntu mufwubafwuba wakayakila atala-tala, aamuseenga, pele muntu uucenjede wakasya mwiimbi kusikila mane wajana mwala mpaakayakila ntalisyo. Nokwakasika guwo liyoosya, iŋanda yakayakilwa amwala tiiyakanyonyooka pe, pele yakayakilwa amuseenga yakawa.—Mt. 7:24-27; Lk. 6:48.
Jesu wakapandulula kuti imuntu mufwubafwuba weelene abaabo ibakali kumuswiilila buyo Jesu pele tiibakazitobela nzyaakali kubaambila. Imuntu uucenjede wakali mbuli baabo ibakali kuswiilila alimwi akutobela nzyaakali kwaamba Jesu. Mukwesu Jackson wakaambila basikumanizya cikolo kuti: “Ikutobela nzyomwakaiya muciiyo ca Bbaibbele mumulimo wabumisyinali kuyoomupa kuba mbuli muntu uucenjede.” Aboobo mukumanizya, wakakulwaizya basikumanizya cikolo “kutalika kusya” mumasi mobakali kuyoobelekela.
Kumamanino, basikumanizya cikolo bakapegwa mapepa aabo aalwiiyo akwaambilwa nkobakatumwa, alimwi Mukwesu Morris wakabandika makani aakulaya aamamanino. Wakakulwaizya basikumanizya cikolo kutobela Jesu akubona kuti lyoonse basyoma munguzu nzyapa Jehova. Mpoonya pulogilamu yakumanizya cikolo yakajalwa.
Bupanduluzi buyungizidwe
^ munc. 5 Icibeela ca Zikolo Zyeendelezegwa a Leza iceendelezegwa a Kkomiti Yakuyiisya, cilanganya Cikolo ca Gileadi, cikolo cabaabo bali mu Kkomiti ya Mutabi alimwi acikolo cabalangizi beendeenda.
Kabbokesi kali apeeji 31]
MYEELWE IIJATIKIZYA BASICIKOLO
Mweelwe wazisi nkobakazwa: 10
Mweelwe wazisi nkobakatumwa: 24
Mweelwe wabasicikolo boonse: 56
Mweelwe waakati-kati wamyaka yakuzyalwa: 33.5
Mweelwe waakati-kati kabali mukasimpe: 17.9
Mweelwe waakati-kati kabali mumulimo waciindi coonse: 13.8
[Cifwanikiso icili apeeji 32]
Basikumanizya Cikolo ca Watchtower Bible School of Gilead Canamba 123
Mumulongo uuli ansi aawa, mindando ilembedwe manamba kuzwa kumbele kuya musyule, alimwi mazina alembedwe kuzwa kulumwensyi kuya kululyo mumundando aumwi.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T.(7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.