Cisyomezyo Ciyandika Kapati

N DIJISI cisyomezyo ciyandika kapati. Andipandulule cakandipa kuti ndemutumbu mwana-mwana muna Spain ndibambe cisyomezyo eeco.

Luumuno alimwi akweendelana tiizyakaliko muŋanda yabazyali bangu. Mukwasyi wesu wakali mumause ciindi musyoonto wangu musankwa naakafwa muntenda kajisi myaka yakuzyalwa yone. Kuyungizya waawo, tumpenda ntobakajisi bataata twakapa kuti cibakatazye baama kuba alukkomano mulukwatano. Nokuba boobo, penzi eeli tiilyakapa kuti baama baleke kuyiisya zyeelelo zyakulilemeka kulindime alimwi amupati wangu musankwa.

Mukuya kwaciindi mwanaakwesu musankwa wakakwata alimwi ambebo ndakazookwatwa. Kuzwa buyo waawo, baama bakajanwa kuti bajisi bulwazi bwakkansa, bwalo bwakapa kuti mane bafwe. Kabatanafwa, bakatupa cintu ciyandisi.

Umwi mulongwe wabo mukaintu wakali kubandikide ambabo kujatikizya bulangizi bwabubuke buli mu Magwalo, alimwi baama bakazumina kuba aciiyo ca Bbaibbele. Mazuba masyoonto kabali aafwaafwi kufwa, mulumbe uupa bulangizi uuli mu Bbaibbele wakabapa kubona kuti buumi bwabo bujisi mpindu alimwi wakabagwasya kuba alukkomano.

Notwakabona kuti mulumbe wamu Bbaibbele wabakulwaizya kapati baama, mebo alimwi amwanaakwesu twakatalika kwiiya Jwi lya Leza. Mebo ndakabbapatizigwa kuba umwi wa Bakamboni ba Jehova kakusyeede mwezi omwe kuti mwanaangu wabili atumbukwe, imwana musimbi mubotu ooyo ngotwakaulika kuti Lucía.

Buzuba mbondakabbapatizigwa bwakali buzuba buyandika kapati kulindime. Ikaambo kakapa boobu kakali kakuti ndakaba muntu wa Jehova kwiinda mukulyaaba kuti ndimubelekele mane kukabe kutamani. Kaambo kabili kakali kakuti ndakatalika kuyiisya zintu zijatikizya lusyomo lwangu kumwanaangu musankwa alimwi amusimbi.

Nokuba boobo, kaambo kabili aaka kakandipa kukkomana kakanyonganizigwa nokwakainda mazuba masyoonto. Ciindi Lucía naakajisi myaka yakuzyalwa yone, mwida lyakwe mwakatalika kumyonga kapati. Notwakamana kumupimya muzibbadela kwaziindi zinji, dokotela uupima kubelesya mincini wakapandulula kuti kwakali cikoto kumuni cakali mbuli fwuleenke kukomena. Dokotela wakapandulula kuti Lucía wakajisi cikoto cakkansa cakali kukomena cakufwambaana. Aboobo ndakatalika kulwanya bulwazi bwakkansa mbwaakajisi Lucía kwamyaka iili ciloba, yalo yakali kubikkilizya kukkala kwamazuba manji mumalo kucibbadela.

Muuya Wakulyaaba

Mumyaka yamapenzi eeyi, Lucía wakali kundikulwaizya kanji-kanji kwiinda mukundikumbatila alimwi akundimyonta. Mbwaakaliyumya kubulwazi bwakwe kakunyina akupenzya kwakabakulwaizya kapati babelesi bamucibbadela. Wakalilisungwide lyoonse kubelekela antoomwe abamanesi, kubagwasya kutola zyakulya alimwi azintu zimwi kubana bakali kulwazigwa mumaanda aakoona aakali afwaafwi amwaakali koona. Lucía mane bamanesi bakamupa cijansi cisama basilisi alimwi akakkaadi kakusama azisani zyakwe kumuzibya kuti “mugwasyi wabanesi.”

Umwi mukaintu mubelesi wamucibbadela ulaibaluka kati: “Lucía wakapa kuti ndimufwide luzyalo. Wakali mwana musungu, musongo, alimwi wakali kuyandisya kulemba-lemba zifwanikiso. Wakali kwaangulukide kwaamba nzyayeeya alimwi uujisi maanu aabupati akucita zintu mbuli kuti muntu mupati.”

Lucía wakayumizigwa akuumbulizigwa a Jwi lya Leza. (Heb. 4:12) Wakasyoma kuti munyika mpya “takukooyooba limbi lufu, nikuba kuomoka nikuba kulila nikuba kuciswa.” (Ciy. 21:4) Wakali kubabikkila maanu bantu, wakalilibambilide lyoonse kubandika mulumbe wamu Bbaibbele. Bulangizi buyumu bwabubuke mbwaakajisi Lucía bwakamugwasya kuzumanana kukkazika moyo alimwi akumweta-mweta nokuba kuti taakajisi bulangizi bwakuti ulakonzya kupona kubulwazi mbwaakali kuciswa. (Is. 25:8) Wakazumanana abube oobu mane kusikila buzuba naakafwa abulwazi bwakkansa.

 Oobu mbobuzuba mbundakabamba cisyomezyo ciyandika kapati. Lucía wakakakilwa kujalula meso aakwe. Bawisyi bakamujatilila kujanza, eelyo ambebo ndakamujatilila kujanza lyabili. Ndakavwiya-vwiya kanditi: “Utapengi, nsikookusiya pe. Koyeeka asyoonto-syoonto. Ciindi waakubusyigwa kuzwa kubafwu unoojisi buumi bubotu. Taakwe noya kumvwa kucisa pe, alimwi ndiyooba aanduwe.”

Lino ndeelede kusyomeka kucisyomezyo eeco. Ndilizi kuti cinooli cintu cikatazya kulindila kusikila ciindi ncayoobusyigwa. Pele alimwi ndilizi kuti ikuti ndasyoma cakumaninina muli Jehova alimwi akuzumanana kusyomeka kulinguwe, ndiyoobako ciindi ncayoobusyigwa kuzwa kubafwu.

Cikono Ncaakatusiila Lucía

Cikozyanyo cabusicamba ncaakajisi Lucía kubikkilizya alugwasyo lupati ndoyakatucitila mbungano, zyakabajatikizya kapati balumi bangu balo batakali umwi wa Bakamboni ba Jehova. Buzuba mbwaakafwa Lucía, bakandaambila kuti bakeelede kutulanga-langa twaambo. Nsondo zisyoonto zyakaccilila, bakalomba mwaalu umwi wamumbungano kuti babe aciiyo ca Bbaibbele. Mazuba masyoonto kuzwa waawo, balumi bangu bakatalika kujanika kumiswaangano yoonse. Kwiinda mukugwasyigwa a Jehova, bakaleka kufweba, icintu ncobatakali kukonzya kucita kuzwa kumatalikilo.

Kuusa alimwi abuumba mbondijisi akaambo kakufwidwa mwanaangu Lucía taakwe nokwamaninina pe, pele ndilamulumba kapati Jehova akaambo kacikono ncaakatusiila Lucía. Mebo alimwi abalumi bangu tulaumbulizyanya akaambo kabulangizi bubotu bwabubuke, nokuba kutelaika ciindi notuya kumubona Lucía alimwi—kaangulukide kubusyu alimwi akumweta-mweta.

Alimwi bulwazi bwakacitikila mwanaangu musimbi bwakamujatikizya kapati muntu umwi uukkala mucilawo motubede. Bumwi buzuba kakuwa mvwula mu Mujibelo mafwumofwumo, mukaintu umwi uujisi mwana musankwa ngobakali kwiiya cikolo comwe a Lucía wakaboola kuŋanda yesu. Wakafwidwa mwana musankwa uumbi wakajisi myaka yakuzyalwa iili 11 kuzwa kubulwazi mbubwenya bwakkansa. Naakamvwa cakacitikila Lucía, mukaintu ooyu wakabuzya-buzya nkotukkala mane wakasika kuzootuswaya. Wakali kuyanda kuziba mbondakali kuliyumya kukufwidwa Lucía alimwi wakapa muzeezo wakuti tubambe kakamu kapa lugwasyo kutegwa katuumbulizya bamatumbu bacitikilwa mapenzi aali mbuli yaaya.

Ndakapandulula kuti lwangu kundigama ndakajana luumbulizyo lwini-lwini kuzwa mucisyomezyo cimwi camu Bbaibbele, eeco cibotu ikwiinda cisyomezyo cili coonse bantu ncobakonzya kupa. Wakaba abulangizi nondakamubalila majwi aa Jesu aalembedwe kuli Johane 5:28, 29. Wakazumina kuba aciiyo ca Bbaibbele alimwi muciindi cisyoonto kuzwa waawo wakaba “[a]luumuno lwa-Leza lwiinda miyeeyo yoonse yabantu.” (Flp. 4:7) Kanji-kanji ciindi notwiiya Bbaibbele antoomwe, tulaumuna kwakaindi kasyoonto alimwi akuyeeya kuti tuli munyika mpya katutambula bayandwa besu kuzwa kubafwu.

Masimpe, buumi bufwaafwi bwa Lucía bwatusiila cikono citakamani. Lusyomo lwakwe lwatugwasya kuti tukamantane mumukwasyi wesu mukubelekela Leza, alimwi lwandipa kuti ndiyume kapati mukusala kwangu kwakuzumanana kutazungaana mulusyomo. Kakunyina akuzumbauzya, toonse notwakafwidwa bayandwa besu balangilwa kuyoobusyigwa tujisi cisyomezyo ciyandika kapati.

[Cifwanikiso icili apeeji 20]

Cifwanikiso caparadaiso cakalembwa a Lucía