Kukambauka Makani Mabotu Mumalundu Aa Andes

TWAKALILEDE mukaanda kajisi tombe, antoomwe twakali 18. Katutuntuma muzibbeeke zyesu zyakoonamo (sleeping bags mu Cingisi), atala amasenke kwakali kulimvwisya mvula mpati yakali kuwa. Kubona mbokakabede kaanda kasyoonto aako, cakatugambya kuti naa twakali bakusaanguna kukkala mumo.

Nkaambo nzi bantu bali 18 ncobakeelede kuswaya busena oobu? Bwiinguzi bwiimvwi aluyando ndotujisi lwakutobela malailile aa Jesu aakukambauka makani mabotu “mane kusikila kumamanino aanyika.” (Inc. 1:8; Mt. 24:14) Twakaunka kuyookambauka kucilawo cili kulaale mumalundu aa Andes mucisi ca Bolivia.

Buyumu-yumu Bwakuyoosika

Buyumu-yumu bwakusaanguna bwakali bwakuyoosika nkotwakali kuunka. Twakamvwa kuti zyeendelo zyakuya kumunzi ooko, tiizyakali kujanika lyoonse. Ibbaasi nolyakasika twakabona kuti lyakaceya kweelana ambotwakali kuyeeya, tobamwi twakali kwiimvwi nkaambo zyuuno zyakaceya. Pele twakasika nkotwakali kuunka.

Luyando lwesu lwakali lwakuti tukakambaukile bantu kumalundu aa Andes mucisi ca Bolivia. Notwakaseluka mubbaasi, aabo bamukakamu kesu bakanyamuna zibbudu zyabo akutalika kutobelana omwe-omwe kweenda mutuzila twiinda mumalundu malamfwu.

 Nokuba kuti minzi yakaboneka kuti misyoonto, maanda akali kutanteene kapati, aboobo cakatutolela mawoola manji kuswaya munzi amunzi. Kakunyina makani kuti tweenda musinzo mulamfwu buti, kwakalibonya kuti kucili ŋanda aimbi kumbele. Ziindi zinji twakali kusweeka akaambo katuzila tupilingene twiinda mumyuunda.

“Nkaambo nzi Ncomwatakafwambaana Kuboola?”

Mukaintu umwi wakagambwa kapati kubona kulampa kwamusinzo ngotwakeenda cakuti wakatuzumizya kubelesya ŋanda yakwe yakujikila akutupa nkuni kutegwa tujike cakulya cesu camasyikati. Imwaalumi umwi naakaziba ncolyaamba Bbaibbele kujatikizya cicitika muntu wafwa, wakati: “Nkaambo nzi ncomwatakafwambaana kuboola?” Wakabotelwa cakuti nitwakalaya, wakatusindikila kutegwa kayaabubuzya mibuzyo munzila. Imwaalumi uumbi uutanabuzuba wamvwa kujatikizya Bakamboni ba Jehova wakaakkomanina kapati mabbuku eesu. Wakatulumba kapati kuti twakaboola, eelyo wakatupa makki aakuŋanda yakali mpati ooko nkotwakali kukonzya koona.

Masiku aamwi kwali kusiya mbi cakuti mukutaziba twakayala matente eesu abwina bwabasimunyewu. Basimunyewu bakanyema cakuti bakatuluma. Twakali kukatede cakuti tiitwakalonga pe, pele mukuba aacoolwe tiibakazumanana kutuluma.

Kumatalikilo twakamvwa kuti misana amabambo zyakali kucisa akaambo kakuti twakoona aansi, pele mukuya kwaciindi masiku twakazibila. Kubabwa akucisa nkotwakali kumvwa  kwakamana mafwumofwumo nitwakali kweebelela makumbi kaalengelede mucibanda alimwi acaanda cakali kuboneka kulaale atala lyamalundu. Kuumuna kwakanyonganizigwa buyo kwiinda mukuvwuuma kwamaanzi mukalonga alimwi akulila kwatuyuni.

Notwakamana kusamba mukalonga, twakalanga-langa cibalo camu Bbaibbele antoomwe, twakalya cakulya camafwumofwumo, akutalika kweenda kabotu-kabotu kutanta malundu kuya kuminzi imwi iili kule. Lweendo lwakali kukkomanisya. Twakaswaana mukaintu uucembeede wakalila naakaziba kuti izina lya Leza lyakuti Jehova, lililembedwe mu Bbaibbele. Wakabotelwa kapati. Lino ulakonzya kwaamba izina lya Leza mumipailo yakwe.

Mwaalumi uucembeede wakaamba kuti Leza wakamuyeeya, mpoonya wakatalika kwiimba lwiimbo lwaamba kuti twatumwa aabangelo. Mwaalumi uumbi wakali kujanika aŋanda lyoonse nkaambo kakuciswa, wakatwaambila kuti kunyina muntu wamumunzi wabo wakaboola kuzoomuswaya. Wakagambwa kuti twakaboola kumuswaya kuzwa kulaale kudolopo lya La Paz. Alimwi mwaalumi uumbi wakagambwa kubona kuti Bakamboni ba Jehova baswaya bantu mumaanda aabo, kakuli muzikombelo zimbi baile kubaita kwiinda mukulizya mulangu wakucikombelo.

Maanda oonse aali kubusena ooko taajisi magesi, akaambo kaceeco bantu balafwambaana kwiinka kukoona kufumbwa buyo kwasiya akubuka lyayeeya kupasula zuba. Aboobo, kutegwa tujane bantu amunzi, twakali kutalika kukambauka mafwumofwumo aciindi ca 06:00 hrs. Ikuti tiitwacita oobo bantu banji banooinkide kale kukubeleka mumyuunda. Aabo bakali kujanika kuti batalika kale kubeleka mumyuunda, bakali kwiimika ŋombe zyabo akuswiilila ku Jwi lya Leza ooku ŋombe kazilyookezya kukukwela jamba lyakulimya. Bunji bwabantu mbotwakali kujana aŋanda bakali kutuyalila zikutu zyambelele kutegwa tukkale, akwiita mukwasyi oonse kuzooswiilila. Balimi bamwi bakatupa masaka aamapopwe kutondezya kulumba kumabbuku aamba zyamu Bbaibbele ngotwakali kubaabila.

“Tiimwakandiluba Pe”

Masimpe, bantu kuti bayaambele muluzibo lwamu Bbaibbele tweelede kupilukila kuli mbabo kwaziindi zinji. Banji bakatulomba kuti tukapilukile kuyoobayiisya alimwi. Akaambo kaboobo, twapilukila nyendo zinji kubusena oobu bwamucisi ca Bolivia.

Mulweendo lumwi, umwi mukaintu mupati wakakkomana kubona kuti twapilukila, wakaamba kuti: “Mbuli kuti muli bana bangu buya. Tiimwakandiluba pe.” Imwaalumi umwi wakatulumba akaambo kamulimo wesu alimwi akututamba kuti lweendo luboola tukasikile kuŋanda yakwe. Ambweni bulumbu bupati mukusola-sola kwesu bwakali bwakumvwa kuti mukaintu umwi ngotwakabandika anguwe lweendo lwainda, wakalongela kudolopo alimwi lino ulakambauka makani mabotu.

Buzuba bwamamanino mulweendo lwesu lwakusaanguna, mungwimba wakubikka mucitofwu cakujikila wakamana alimwi azyakulya nzyotwakajisi zyakali afwaafwi kumana. Twakayandaula nkuni zyakukutuzya mulilo, twakajika zyakulya zyamamanino nzyotwakajisi, mpoonya twakatalika kupiluka katuyabweenda amaulu. Twakali kulamfwu kapati adolopo nkotwakali kukozya kutantila bbaasi. Eelyo, twakazoosika masiku.

Ikujoka Kumunzi

Lweendo lwesu lwakujoka kumunzi lwakajisi mapenzi nkaambo bbaasi lyakatufwida munzila. Nokwakainda ciindi, twakatanta mucimbaya-mbaya mwakali bantu banji. Eeci cakatupa coolwe cakukambauka kuli basilweendoma bakayanda kuziba lweendo lwesu. Nokuba kuti balaansoni, bantu aaba balasangalizya.

Notwakeenda mawoola aali fwuka katuli mucimbaya-mbaya, twakasika kumunzi—katutetede akutuntuma mpeyo. Nokuba boobo, lweendo lwakali lubotu. Munzila, twakacikonzya kupanga bubambe bwaciiyo ca Bbaibbele amukaintu uukkala kudolopo.

Cakali coolwe cipati kukambauka makani mabotu kubantu bali mumasena aali kulamfwu. Twakakambauka muminzi mipati yone amutunzi tusyoonto-syoonto tunji. Twakayeeya majwi aaya aakuti: “Ma! Abota atala lyamalundu maulu aayooyo uuleta makani mabotu, uulwiida bantu makani aaluumuno, uuleta makani mabotu loko, uulwiida bantu makani aalufutuko.”—Is. 52:7; Rom. 10:15.

[Cifwanikiso icili apeeji 17]

Balilibambilide kukambauka makani mabotu