Amuyandaule Busolozi Bwa Leza Muzintu Zyoonse
Amuyandaule Busolozi Bwa Leza Muzintu Zyoonse
“Oyu Leza ngu-Leza wesu lyoonse alyoonse: nguuyootweenzya mane kusikila kulufu.”—INT. 48:14.
1, 2. Ino nkaambo nzi ncotweelede kusyoma busolozi bwa Jehova muciindi cakusyoma busongo bwesu tobeni, alimwi ino mibuzyo nzi iibuka?
CIINDI twayeeya zintu zyabuyo naa zintu zibi, ncuuba-uba kuyeeya kuti zili buyo kabotu. (Tus. 12:11) Ikuti masimpe tuyanda kucita cintu cimwi citeelede kucita Munakristo, kanji-kanji moyo wesu uyootoongelezya munzila zinji kuti tucicite. (Jer. 17:5, 9) Aboobo, sintembauzyo wakatondezya busongo naakapaila kuti: “Tuma mumuni wako alusinizyo lwako, zindeenzye.” (Int. 43:3) Wakasyoma muli Jehova, kutali mubusongo bwakwe mwini ibugola, Jehova wakali ngomusolozi wakwe wiinda. Mbuli sintembauzyo, cilatugwasya kusyoma Leza kuti atusololele.
2 Ino nkaambo nzi ncotuyandika kusyoma busolozi bwa Jehova bulikke? Ino ndilili notweelede kubuyandaula? Ino mbube buli buti mbotuyandika kuba ambubo kutegwa tugwasyigwe kubusolozi oobu, alimwi ino mbuti Jehova mbwatusololela sunu? Eeyi mibuzyo iiyandika kapati ilabandikwa mucibalo eeci.
Ino Nkaambo nzi Ncotweelede Kusyoma Busolozi bwa Jehova?
3-5. Ino nkaambo nzi ncotweelede kuba aalusyomo luyumu mubusolozi bwa Jehova?
3 Jehova ngu Taateesu wakujulu. (1 Kor. 8:6) Ulimuzi kabotu aumwi wesu alimwi ulakonzya kuziba zili mumyoyo yesu. (1 Sam. 16:7; Tus. 21:2) Mwami Davida wakaambila Leza kuti: “Ulizi kukala kwangu akubuka kwangu, ulibwene miyeeyo yangu noli kule. Nkaambo taakwe ijwi lyalulimi lwangu ndotezi loko, O Jehova.” (Int. 139:2, 4) Akaambo kakuti Jehova ulituzi kabotu, tatweelede kudooneka kuti ulizizi zintu zibotu nzyotuyandika kapati. Kunze lyaboobo, Jehova ulijisi busongo buteeli. Ulabona zintu zyoonse kwiinda muntunsi uuli woonse, alimwi ulizi zintu mbozikonzya kuba kuzwa kumatalikilo. (Is. 46:9-11; Rom. 11:33) Ngu “Leza musongo alike.”—Rom. 16:27.
4 Kuyungizya waawo, Jehova ulatuyanda alimwi ulatubikkila maanu kapati. (Joh. 3:16; 1 Joh. 4:8) Mbwali Leza siluyando, mwaabi kulindiswe. Sikwiiya Jakobo wakalemba kuti: “Zipego zibotu zyoonse azyoolwe zyoonse zilondokede zilazwa kujulu, zilaseluka kuzwa kuli-Wisi wamimuni.” (Jak. 1:17) Aabo basyoma muli Leza balagwasyigwa kapati abwaabi bwakwe.
5 Camamanino, Jehova ngusinguzuzyoonse. Kujatikizya kaambo aaka, sintembauzyo wakaamba kuti: “Oyo uukede muciyubilo ca-Mupatikampatila ulakala mucenzule ca-Singuzuzyoonse. Ndaamba aa-Jehova kuti, Macijilo aangu, ndilinga lyangu, ngu-Leza wangu ngonsyoma.” (Int. 91:1, 2) Notutobela busolozi bwa Jehova, tutobela busolozi bubotu kapati, nkaambo walo takakilwi. Nociba ciindi notukazyigwa, Jehova ulatugwasya. Taakwe nayootulekelezya pe. (Int. 71:4, 5; Amubale Tusimpi 3:19-26.) Masimpe, Jehova ulizi zintu zibotu nzyotuyandika, uyanda kuti tujane zintu zibotu, alimwi ulijisi nguzu zyakutupa zintu zibotu nzyotuyandika. Elo kaka inga kwaba kufwubaala ikuti katutatobeli busolozi bwakwe! Aboobo, ino ndilili notuyandika busolozi oobo?
Ino Ndilili Notuyandika Busolozi?
6, 7. Ino ndilili notuyandika busolozi bwa Jehova?
6 Mubwini, tuyandika busolozi bwa Leza mubuumi bwesu boonse, kuzwa kubwana kusika kubucembele. Sintembauzyo wakaamba kuti: “Oyu Leza ngu-Leza wesu lyoonse alyoonse: nguuyootweenzya mane kusikila kulufu.” (Int. 48:14) Mbuli sintembauzyo, Banakristo basongo tabaleki kusyoma muli Leza kutegwa abasololele.
7 Masimpe, kuli ziindi notulimvwa kuti tuyandika lugwasyo cakufwambaana. Zimwi ziindi tujanika “mumapenzi,” ambweni akaambo kakupenzyegwa, kuciswa, naa kumaninwa mulimo nkotwatali kulangila. (Int. 69:16, 17) Muziindi zili boobu, cilakatalusya kulanga kuli Jehova, katusyomede kuti uyootugwasya kuti tuliyumye alimwi akutusololela kutegwa tusale camaanu. (Amubale Intembauzyo 102:17.) Nokuba boobo, alimwi tuyandika kugwasyigwa anguwe muziindi zimwi. Mucikozyanyo, notukambauka makani mabotu aa Bwami kuli basimukoboma, tuyandika busolozi bwa Jehova kutegwa tuzwidilile mubukambausi bwesu. Alimwi ciindi cili coonse notuyanda kusala—kube kujatikizya zyakulikondelezya, kusama alimwi akulibamba, balongwe, mulimo, lwiiyo, naa cintu cili coonse—tulacita camaanu lilikke ikuti twatobela malailile aa Jehova. Ncobeni, tuyandika busolozi mubukkale buli boonse mubuumi bwesu.
Bubi Bwakukaka Busolozi Bwa Leza
8. Ino kulya mucelo wakakasyidwe nkwaakacita Eva kwakatondezya nzi?
8 Pele, kamuyeeya kuti tweelede kulisungula kutobela busolozi bwa Jehova. Leza takatusungilizi kucita boobo ikuti swebo katutayandi. Muntunsi wakusaanguna kusala kutatobela busolozi bwa Jehova wakali Eva, alimwi cikozyanyo cakwe citondezya ntenda iikonzya kuba akaambo kakusala kutali kabotu ooku. Alimwi amuyeeye kusala kwakwe ncokwakaamba. Eva wakalya mucelo wakakasyigwa akaambo kakuti wakali kuyanda ‘kuba mbuli Leza, kuziba bubotu abubi mbobubede.’ (Matl. 3:5) Mukucita oobo, wakalibikka mubusena bwa Leza, kulisalila cibotu acibi muciindi cakutobela busolozi bwa Jehova. Aboobo, wakabukaka bweendelezi bwa Jehova. Wakali kuyanda kulyeendelezya mwini. Mulumi wakwe, Adamu, wakatobela nzila njiyonya yabuzangi.—Rom. 5:12.
9. Ikuti twabukaka busolozi bwa Jehova, ino ncinzi mubwini ncotucita, alimwi nkaambo nzi kucita oobu ncokutali kwamaanu?
9 Sunu, ikuti katutatobeli busolozi bwa Jehova, andiswe tulabukaka bweendelezi bwakwe mbubwenya mbwaakacita Eva. Mucikozyanyo, amuyeeye muntu uujisi cilengwa cakweebelela zintu ziletela muzeezo wakoonana. Ikuti kali mumbungano ya Bunakristo, nkokuti ulizi malailile aa Jehova kujatikizya kaambo aaka. Zintu zisofweede tazyeelede nikuba kwaambwa, alimwi ncobeni tazyeelede kweebelwa cakukkomana. (Ef. 5:3) Kwiinda mukukaka busolozi bwa Jehova, muntu uuli boobu tabuyandi bweendelezi bwa Jehova, ulabukaka busilutwe Bwakwe. (1 Kor. 11:3) Ooku nkubula maanu, nkaambo kweelana ambwaakaamba Jeremiya, “muntu ulaya bweenda, pele tabwene kweenzya intaamu zyakwe.”—Jer. 10:23.
10. Ino nkaambo nzi ncotweelede kubelesya nguzu zyakulisalila munzila iili kabotu?
10 Bamwi balakonzya kwaakazya majwi aa Jeremiya, kabayeeya kuti akaambo kakuti Jehova wakatupa nguzu zyakulisalila, teelede kututongooka ikuti twazibelesya. Nokuba boobo, tutalubi kuti nguzu zyakulisalila mmukuli alimwi ncipego. Tujisi mulandu muzintu nzyotusala kwaamba alimwi akucita. (Rom. 14:10) Jesu wakaamba kuti: “Mulomo ulagwisya aata mumoyo.” Alimwi wakaamba kuti: “Mumoyo wamuntu mulazwa miyeeyo mibi, bujayi, bumambi, bwaamu, kubba, bulengelezi, amatusi.” (Mt. 12:34; 15:19) Aboobo, zintu nzyotwaamba alimwi anzyotucita zitondezya mboubede moyo wesu. Zitondezya bwini mbotubede. Nkakaambo kaako Munakristo musongo uyandaula busolozi bwa Jehova muzintu zyoonse. Munzila eeyo, Jehova ulamujana kuba muntu ‘uululeme moyo’ alimwi ‘uyoomucitila kabotu.’—Int. 125:4.
11. Ino ncinzi ncotwiiya kumakani aabana Israyeli?
11 Amuyeeye makani aajatikizya buumi bwabana Israyeli. Nobakasala camaanu, kuswiilila malailile aakwe, Jehova wakabakwabilila. (Jos. 24:15, 21, 31) Nokuba boobo, kanji-kanji kunyina nobakazibelesya kabotu nguzu zyabo zyakulisalila. Kumazuba ngaakali kupona Jeremiya, Jehova wakaamba kujatikizya mbabo kuti: “Tabakwe nibakaswiilila nikuba kucenjeka matwi aabo pe, bakacili kuya bweenda mumiyeeyo yabo beni amuzinguni zyamyoyo yabo mibi. Bakapiluka munsi, teebakaya kunembo pe.” (Jer. 7:24-26) Elo cilausisya kaka! Tutabi notubukaka kaka busolozi bwa Jehova akweenda mumiyeeyo yesu, mpoonya ‘akupiluka munsi’ akaambo kabusicinguni naa kuyanda kulikkomanisya!
Ino Ncinzi Ciyandika Kutegwa Tutobele Malailile aa Leza?
12, 13. (a) Ino mbube nzi butupa kuti tuyande kutobela busolozi bwa Jehova? (b) Ino nkaambo nzi lusyomo ncoluyandika kapati?
12 Luyando lwesu kuli Jehova lutupa kuti tuyande kutobela busolozi bwakwe. (1 Joh. 5:3) Nokuba boobo, Paulo wakaamba boobu kujatikizya cintu cimwi naakati: “Nkulusyomo nkutweenda, takweensi kukubona pe.” (2 Kor. 5:6, 7) Ino nkaambo nzi lusyomo ncoluyandika? Jehova ulatweenzya “munzila zyabululami,” pele nzila eezyo tazisololeli kubuvwubi naa cuuno caatala munyika eeyi pe. (Int. 23:3) Nkakaambo kaako, meso eesu aalusyomo ayelede kulangilila kuzilongezyo zyakumuuya ziboola kwiinda mukubelekela Jehova. (Amubale 2 Ba-Korinto 4:17, 18.) Alimwi lusyomo lutugwasya kukkutila azintu nzyotujisi.—1 Tim. 6:8.
13 Jesu wakaamba kuti bukombi bwamasimpe buyandika kulyaaba, alimwi alusyomo. (Lk. 9:23, 24) Bakombi bakasimpe bamwi balyaaba kapati, nomuba mubucete, kudyaamininwa, kusalaulana, nomuba mumasunko mapati. (2 Kor. 11:23-27; Ciy. 3:8-10) Ndusyomo luyumu lulikke ndolwakapa kuti bacite oobo kabakkomene. (Jak. 1:2, 3) Ilusyomo luyumu lutupa kuba masimpe kuti kutobela busolozi bwa Jehova nkubotu lyoonse. Kulatugwasya ciindi coonse. Tuli masimpe ncobeni kuti bulumbu bwabaabo baliyumya cakusyomeka mbupati kwiinda kupenga kwakaindi kasyoonto.—Heb. 11:6.
14. Nkaambo nzi Hagare ncaakeelede kulicesya?
14 Alimwi amuyeeye kulicesya mbokuyandika mukutobela busolozi bwa Jehova. Cikozyanyo ca Hagare mubelesi wa Sara cilakatondezya kaambo aaka. Sara naakabona kuti talangilwi kuba amwana, wakakwasya Hagare kuli Abrahamu, mpoonya Hagare wakamita kuli Abrahamu. Naakabona kuti wamita, Hagare wakalisumpula kuli simalelo wakwe watakali kulangilwa kuba amwana. Akaambo kaceeco Sara “wakamufwabya,” mpoonya Hagare wakaccija. Mungelo wa Jehova wakamujana Hagare akumwaambila kuti: “Piluka kulinamalelo aako, ukalibombye mumaanza aakwe.” (Matl. 16:2, 6, 8, 9) Ambweni Hagare naakayanda busolozi bumbi. Kutegwa acite kweelana ambwaakalaililwa amungelo, wakeelede kuleka kulisumpula. Aboobo, Hagare cakulicesya wakacita kweelana ambwaakamwaambila mungelo, eeci cakapa kuti mwaanakwe Ismayeli azyalilwe mumunzi wawisi kakwabilidwe.
15. Amupandulule bukkale bumwi bwalo kutobela busolozi bwa Jehova mazuba aano mokunga kwayandika kuti tulicesye.
15 Ikutegwa tutobele busolozi bwa Jehova, andiswe tweelede kulicesya. Bamwi balakonzya kuzumina kuti kulikondelezya kumwi takumukkomanisyi Jehova. Munakristo ulakonzya kuti wakabisizya mweenzinyina lino uyandika kulilekelela. Naa wakalubizya lino uyandika kuzumina kulubizya ooko. Ino mbuti kuti muntu wacita cibi cipati? Weelede kulicesya akulyaambilila cibi kubaalu. Muntu inga wagusyigwa amumbungano. Kutegwa apilusyigwe mumbungano alimwi, weelede kweempwa cakulibombya akusanduka. Mubukkale buli boobu abumwi bukozyenye, imajwi aali ku Tusimpi 29:23 alaumbulizya aakuti: “Kulisumpula kwamuntu kulamufwinsya, pele mubombumoyo ulajana bulemu.”
Ino Mbuti Jehova Mbwatusololela?
16, 17. Ino mbuti mbotukonzya kugwasyigwa a Bbaibbele mwalo mujanwa busolozi bwini-bwini bwa Leza?
16 Ibusolozi bwa Leza bwini-bwini ndi Bbaibbele, Ijwi lyakasololelwa aamuuya wa Leza. (Amubale 2 Timoteo 3:16, 17.) Kutegwa Ijwi lya Leza litugwasye kapati, tweelede kuba acilengwa cakubala Bbaibbele abuzuba muciindi cakulindila kuti mane tube aamapenzi ndeliya tuyandaule majwi aagwasya aamu Magwalo. (Int. 1:1-3) Twacita boobo, tuyooziba zili mu Jwi lya Leza lyakasololelwa aamuuya. Mizeezo ya Leza iyooba njemizeezo yesu, alimwi tuyooba bantu balibambide kuzunda mapenzi aakonzya kutucitikila cakutayeeyela.
17 Mukuyungizya, cilayandika kapati kuzinzibala kuyeeya zintu nzyotubala mu Magwalo akuzibikka mumupailo. Notuzinzibala kuyeeya tupango twamu Bbaibbele, tulayeeya mbotunga twatubelesya mubukkale bugaminide. (1 Tim. 4:15) Twaba aamapenzi mapati, tulapaila kuli Jehova, kulomba lugwasyo kutegwa tujane busolozi mbotuyandika. Muuya wa Jehova uyootugwasya kuyeeya njiisyo zyamu Magwalo zigwasya eezyo nzyotwakabalide mu Bbaibbele naa mumabbuku aapandulula zyamu Bbaibbele.—Amubale Intembauzyo 25:4, 5.
18. Ino muunzila nzi Jehova mwabelesya bunyina bwa Bunakristo mukutusololela?
18 Akumbi nkotujana busolozi bwa Jehova nkuubunyina bwa Bunakristo. Cibeela cipati mubunyina oobo “muzike musyomesi uucenjede” a Kabunga Keendelezya kamwiiminina, walo uupa zyakulya zyakumuuya ciindi coonse kwiinda mumabbuku alimwi amumapulogilamu aamiswaangano yambungano alimwi amiswaangano mipati. (Mt. 24:45-47; amweezyanisye a Incito 15:6, 22-31.) Kuyungizya waawo, mubunyina bwa Bunakristo muli baabo basimide kumuuya, kwaambisya baalu, aabo beelela kupa lugwasyo lugaminide alimwi alulayo lwamu Magwalo. (Is. 32:1) Bakubusi mumikwasyi ya Bunakristo balijisi lugwasyo lumbi luyungizyidwe. Bazyali babo Banakristo mbambabo mbabikkide Leza kutegwa babape busolozi bwakwe, aboobo, beelede kubuyandaula busolozi oobo kubazyali babo.—Ef. 6:1-3.
19. Ino nzilongezyo nzi nzyotujana akaambo kakuzumanana kutobela busolozi bwa Jehova?
19 Masimpe, Jehova ulatusololela munzila zinji, andiswe tweelede kubutobela busolozi oobu. Naakali kwaamba kujatikizya ciindi bana Israyeli nobakali kusyomeka, Mwami Davida wakaamba kuti: “Bamatateesu bakali kukusyoma, kabasyoma, lino wakali kubavuna. Kabakukwiilila, lino bakali kwaangununwa, kabasyoma, elyo kabatausigwi insoni.” (Int. 22:3-5) Ikuti twasyoma busolozi bwa Jehova, andiswe ‘tatukausigwi insoni.’ Tatukatyompwi kujatikizya bulangizi bwesu. Ikuti ‘twaleka nzila zyesu mumaanza aa Jehova’ muciindi cakulisyoma tobeni, tuyoolongezyegwa kapati. (Int. 37:5) Alimwi ikuti twazumanana kuliyumya mulusyomo oolo, tuyooba azilongezyo zitamani. Mwami Davida wakalemba kuti: “Jehova ulayandisya bululami, tasii basalali bakwe. Baluleme bayoobambwa lyoonse . . . Balulami bayookona nyika, bayookala alinjiyo lyoonse.”—Int. 37:28, 29.
Sena Inga Mwapandulula?
• Ino nkaambo nzi ncotweelede kusyoma busolozi bwa Jehova?
• Ino ncinzi cinga cacitika ikuti twabukaka busolozi bwa Jehova?
• Ino muubukkale buli buti Munakristo mwayandika kulicesya?
• Ino mbuti Jehova mbwatusololela mazuba aano?
[Mibuzyo yaciiyo]
[Zifwanikiso izili apeeji 8]
Sena mulamusyoma Jehova mubukkale bwabuumi bwanu boonse?
[Zifwanikiso izili apeeji 9]
Eva wakabukaka bweendelezi bwa Jehova
[Cifwanikiso icili apeeji 10]
Kutegwa Hagare atobele malailile aamungelo, ino mbube buli buti mbwaakali kuyandika?