Nobakubusi, Amuyeeye Mulengi Wanu Lino

“Koyeeya Mulengi wako mumazuba aabulombe bwako.” —MUK. 12:1.

1. Ino mbuti Jehova mbwalutondezya lusyomo ndwajisi mubakombi bakwe bakubusi?

JEHOVA ubona bakubusi Banakristo kuti balayandika kapati alimwi balakatalusya mbuli malosi aalume. Masimpe, wakasinsima kuti “mubuzuba bwalumamba” lwa Mwanaakwe, balombe alimwi abasimbi ‘bayoolyaaba camoyo woonse’ mumulimo wa Kristo. (Int. 110:3) Businsimi oobo bulazuzikizyigwa mazuba aano ciindi bantu banji nobatamulemeki Leza, nobaliyanda, nobayandisya mali alimwi ibatamvwi. Nokuba boobo, Jehova wakalizi kuti bakubusi bamukomba bayooba bantu baindene abamwi. Elo kaka ulamusyoma nobakwesu abacizi bakubusi!

2. Ino kuyeeya Jehova kubikkilizya nzi?

² Amuyeeye buyo lukkomano ndwayelede kuba andulo Leza nabona bakubusi kabamuyeeya mbwali Mulengi wabo. (Muk. 12:1) Kuyeeya Jehova kubikkilizya zintu zinji kutali kwiile kumwiibaluka. Caamba kubweza ntaamu—kucita zintu zimukkomanisya, kweendelezyegwa lyoonse amilawo alimwi anjiisyo zyakwe mubuumi bwesu boonse. Alimwi caamba kusyoma muli Jehova, kuziba kuti ulatubikkila maanu kapati. (Int. 37:3; Is. 48:17, 18) Sena oobo mbomulimvwa kujatikizya Mulengi wanu?

“Syoma Jehova Amoyo Wako Woonse”

3, 4. Ino mbuti Jesu mbwaakatondezya lusyomo muli Jehova, alimwi ino nkaambo nzi ncociyandika kusyoma Jehova mazuba aano?

³ Icikozyanyo cibotu kapati camuntu wakasyoma muli Leza ncica Jesu Kristo. Wakapona kweelana amajwi aali ku Tusimpi 3:5, 6 aakuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.” Naakamana buyo kubbapatizigwa Jesu, Saatani wakasika kulinguwe kuti amusunke kutambula bwami alimwi abulemu bwanyika. (Lk. 4:3-13) Jesu kunyina naakeenwa pe. Wakalizi kuti “buvubi abulemu abuumi” zilaboola akaambo “[ka]kulibombya akuyoowa Jehova.”—Tus. 22:4.

⁴ Bulyatu alimwi akuliyanda mbobube budumide mubantu sunu. Mubukkale buli boobu, tweelede kutobela cikozyanyo ca Jesu. Alimwi kamuyeeya kuti Saatani ulikanzide kapati kugwisya bantu ba Jehova munzila iipatide iitola kubuumi. Uyanda kuti bantu boonse kabeendela munzila mpati iitola kulunyonyooko. Akaka atamweeni! Muciindi caboobo, amukanze kuyeeya Mulengi wanu. Amumusyome cakumaninina, akujatisya “buumi bwinibwini,” oobo buboola cakufwambaana.—1 Tim. 6:19.

Nobakubusi, Amusongwaale!

5. Ino mulimvwa buti kujatikizya mboiyooba nyika eeyi kumazuba aakumbele?

⁵ Ibakubusi bayeeya Mulengi wabo mbasongo kapati kwiinda beenzinyina. (Amubale Intembauzyo 119:99, 100.) Akaambo kakuti babona zintu kweelana ambwazilanga Jehova, balizi kuti nyika eeyi ilamana ino-ino. Nokuba kuti mwapona buyo kwaciindi cisyoonto, nywebo nobakubusi cakutadooneka mwabona kuti bantu bayabwiindila kuyoowa alimwi akulibilika kujatikizya zyakumbele. Ikuti mucili basicikolo, ambweni mwakamvwa zyakusofwaazya nyika, kunyonyoona muuya akaambo kakupya kwanyika, kugonka masamu, alimwi amapenzi aali mbuli yaaya. Bantu balalibilika kujatikizya zintu eezi, pele Bakamboni ba Jehova balikke mbobazi kabotu kuti kucinca ooku ncibeela cacitondezyo  camamanino aanyika ya Saatani.—Ciy. 11:18.

6. Ino mbuti bakubusi bamwi mbobacengwa?

⁶ Mukubula coolwe, babelesi ba Leza bamwi bakubusi bajoka munsi akukakilwa kubona kuti ciindi cisyeede canyika eeyi ncisyoonto. (2 Pet. 3:3, 4) Ibamwi boongelezegwa kucita cibi cipati kwiinda mukuyanzana abalongwe batali kabotu alimwi amuzintu ziletela muzeezo wakoonana. (Tus. 13:20) Elo inga cabija kaka kutacikkomaninwa a Leza lino mbotuyaabuya kumamanino! Muciindi caboobo, amwiiye ciiyo cakacitikila bana Israyeli mu 1473 B.C.E. nobakali munkambi mu Zibanda zyaku Moabu, kabali aafwaafwi kunjila mu Nyika Yakasyomezyegwa. Ino ncinzi cakacitika ooko?

Bakaalilwa Nobakali Aafwaafwi Kusika

7, 8. (a) Ninzila nzi njaakabelesya Saatani mu Zibanda zyaku Moabu? (b) Ino ninzila nzi Saatani njabelesya mazuba aano?

⁷ Kumatalikilo, Saatani wakayandisya kukasya bana Israyeli kuti batanjili munyika njobakasyomezyegwa. Naakaalilwa kubasinganya kwiinda mumusinsimi Balamu, Saatani wakabelesya nzila iimbi yabucenjezu kapati; wakasoleka kupa kuti bateeleli kulongezyegwa a Jehova. Bamakaintu bana Moabu beebeka kapati bakabelesyegwa kutegwa baboongelezye, aawa Diabolosi wakazwidilila. Bantu bakatalika kuvwuula abana basimbi bana Moabu alimwi akukomba Baala waku Peori! Nokuba kuti cikono cabo ciyandisi ca Nyika Yakasyomezyegwa cakali aafwaafwi, bana Israyeli babalilwa ku 24,000 bakafwa. Elo kaka yakali ntenda mbyaabi eeyo!—My. 25:1-3, 9.

⁸ Sunu, tulaafwaafwi kunjila munyika yakasyomezyegwa imbotu kapati —bukkale bupya. Mbuli mbwacita lyoonse, Saatani alimwi ubelesya bwaamu kweena bantu ba Leza. Zyeelelo zyakulilemeka munyika ziyaabuya aansi cakuti bwaamu bubonwa kuba cintu ciluzi alimwi akoonana kwabantu beelene zizo kubonwa kuti ncakulisalila camuntu mwini. Mucizi Munakristo umwi wakati: “Nkuuŋanda buyo alimwi aku Ŋanda ya Bwami bana bangu nkobayiya kuti koonana kwabantu beelene zizo alimwi akwabantu batakwetene nkubi mumeso aa Leza.”

9. Ino ncinzi ciinga cacitika kuciindi ‘cakukubuka,’ alimwi mbuti bakubusi mbobakozya kuliyumya kuli ceeci?

⁹ Bakubusi bayeeya Mulengi wabo balizi kuti koonana ncipego cisetekene cijatikizya buumi alimwi akutumbuka bana. Aboobo, balizi kuti koonana kweelede kucitwa munzila njaakalailila Leza—mububambe bwalukwatano. (Heb. 13:4) Pele, kuciindi ‘cakukubuka’—ciindi mizeezo yakoonana niipenzya kapati alimwi niisinkila kuyeeya kuli kabotu—cilakonzya kuba cintu ciyumu kapati kuzumanana kulilemeka. (1 Kor. 7:36) Ncinzi ncomunga mwacita ikuti mwaba amizeezo mibyaabi? Amupaile camoyo woonse  kuli Jehova kutegwa amugwasye kubikkila maanu kuzintu zili kabotu. Jehova lyoonse ulaswiilila kuli baabo bamusikila camoyo woonse mumupailo. (Amubale Luka 11:9-13.) Mibandi iiyumya-yumya lusyomo ayalo ilakonzya kugwasya kululamika mizeezo.

Amusale Mbaakani Zyanu Cabupampu!

10. Ino mizeezo nzi iitali kabotu njotweelede kutantamuka, alimwi mmibuzyo iili buti njotweelede kulibuzya?

¹⁰ Kaambo kamwi kapa bakubusi banji munyika kucita zintu zitondwa alimwi akupona buumi bwakulikkomanisya, nkakuti tabajisi busolozi bwa Leza naa bulangizi bwini-bwini bwakumbele. (Tus. 29:18) Bali mbuli bana Israyeli bakaleka kutobela busolozi bwa Leza kuciindi ca Isaya bakali kuponena buyo “kusekelela akukondwa, . . . kulya nyama akunywa bukoko.” (Is. 22:13) Muciindi cakunyomenena bantu bali boobu, inga cabota kulanga kumbele kubulangizi bubotu oobo Jehova mbwabikkilide bantu bakwe basyomeka. Ikuti kamuli mubelesi wa Jehova mukubusi, sena mulailangila caluyandisisyo nyika mpya? Sena mulasolekesya “kukala cakulibatamika . . . akulindila eco coolwe nco[m]ulangila” ncamubikkilide Leza? (Tit. 2:12, 13) Bwiinguzi bwanu buyoomugwasya kumbaakani nzyomulisalila.

11. Ino nkaambo nzi bakubusi Banakristo ibacili kucikolo ncobeelede kubeleka canguzu?

¹¹ Bantu bamunyika bayanda bakubusi kumanina ciindi anguzu zyabo kumilimo yakumubili. Masimpe kuti aabo bacili kucikolo beelede kubeleka canguzu kujana lwiiyo lwamatalikilo. Kamuyeeya kuti, makanze aanu taali buyo aakwiile kujana mulimo mubotu pele akuti kamubelesyegwa mumbungano akuba mukambausi wa Bwami. Kutegwa mucite boobo, mweelede kuba bantu bakonzya kubona twaambo, kubandika cakulikwaya alimwi akubalemeka aabo mbomulya limwi musalo. Nokuba boobo, bakubusi ibayiya Bbaibbele akusola kubelesya njiisyo zili mumo balaba alwiiyo lubotu kapati alimwi akubamba ntalisyo yabuumi bubotu alimwi butamani.—Amubale Intembauzyo 1:1-3. *

12. Ino ncikozyanyo cili buti mikwasyi ya Bunakristo ncoyeelede kutobela?

¹² Mu Israyeli, bazyali bakali kubikkila maanu kapati kulwiiyo lwabana babo. Oolo lwiiyo lwakali kubikkilizya mbazu zyoonse zyamubuumi, ikapati zintu zyakumuuya. (Dt. 6:6, 7) Aboobo, bakubusi bana Israyeli ibakaswiilila bazyali babo alimwi abantu ba Leza bambi bapati, bakaba aaluzibo, busongo, lumvwisyo alimwi abupampu.—ibube butajaniki-janiki mubantu batayiide kujatikizya Leza amalailile aakwe. (Tus. 1:2-4; 2:1-5, 11-15) Bamazyali Banakristo bamazuba aano abalo beelede kubikkila maanu kulwiiyo lwabana babo.

Ino Mbaani Mbomweelede Kuswiilila?

13. Ino ndulayo luli buti ndobapegwa bakubusi, alimwi nkaambo nzi ncobeelede kucenjela?

¹³ Bakubusi batambula malailile kuzwa kubantu bamisyobo yoonse—kubikkilizya abamayi bakucikolo, aabo kanji-kanji bayeeya buyo kujatikizya kuzwidilila kwamunyika eeyi. Nomusala lulayo ndomunga mwabelesya, amupailile busolozi bwa Leza kutegwa musale kweelana azyaambwa mu Jwi lya Leza alimwi amumabbuku aapegwa abaciinga camuzike musyomesi uucenjede. Kwiinda muciiyo canu ca Bbaibbele, mulizi kuti bakubusi alimwi abatajisi luzibo mbakanzide kapati kulwana Saatani. Mucikozyanyo, mumuunda wa Edeni, Eva watakajisi luzibo lunji wakaswiilila Saatani, imweenzu watakalina mutondezya luyando abuniini. Elo zintu  nozyakaba kabotu kaka naakaswiilila Jehova, ooyo wakamutondezyede kale luyando munzila zinji!—Matl. 3:1-6.

14. Ino nkaambo nzi ncotweelede kuswiilila kuli Jehova alimwi akubazyali Banakristo?

¹⁴ Mulengi wanu ulamuyanda andinywe alimwi ulacita oobo munzila iisalede kapati. Uyanda kuti mukkomane ciindi coonse mane kukabe akutamani, kutali buyo lino pe. Aboobo, calubomba mbuli muzyali uulanganya kabotu, ulamwaambila alimwi akuli boonse bamukomba kuti: “Njeeyi inzila, amweende mulinjiyo.” (Is. 30:21) Ikuti kamujisi bazyali bamuyanda ncobeni Jehova, nkokuti mujisi lugwasyo luyungizyidwe. Cabulemu amuswiilile kululayo ndobamupa ciindi nomubamba mbaakani zyanu. (Tus. 1:8, 9) Kayi bayanda kuti mujane buumi, cintu ciyandisi kapati kwiinda lubono naa mpuwo yamunyika eeyi.—Mt. 16:26

15, 16. (a) Ino ndusyomo luli buti ndotukonzya kuba andulo muli Jehova? (b) Ino nciiyo nzi ciyandika ncotwiiya kuli cakacitikila Baruki?

¹⁵ Aabo bayeeya Mulengi wabo bapona buumi buuba-uba, kabasyomede kuti Jehova ‘taakwe’ natikabalekelezye nokuba kuyoobaleka “buyo pe.” (Amubale Ba-Hebrayo 13:5.) Akaambo kakuti bukkale oobu bubotu buliindene kapati ambobayeeya bantu munyika, tweelede kucenjela kutegwa tutayungwi amuuya wanyika ooyu. (Ef. 2:2) Kujatikizya kaambo aaka, amulange-lange cikozyanyo ca Baruki, imulembi wa Jeremiya iwakapona kumazuba aakatazya aakumamanino aa Jerusalemu alo aakasololela kukunyonyooka kwamunzi ooyu mu 607 B.C.E.

¹⁶ Ambweni Baruki wakali kuyanda buumi bubotu bwabuvwubi. Jehova wakacibona eeci alimwi wakamucenjezya calubomba Baruki kuti atanooliyandawida “zintu zipati.” Baruki wakalibonya kuba muntu uulicesya alimwi uuli aabusongo nkaambo wakaswiilila Jehova eelyo wakafwutuka kulunyonyooko lwa Jerusalemu. (Jer. 45:2-5) Mukwiimpana, beenzinyina Baruki ibakaliyobweda “zintu zipati” zyakumubili, akubikka Jehova musyule, bakazisweekelwa zintu zyoonse eezyo ciindi ba Kasidi (bana Babuloni) nobakazunda Jerusalemu. Alimwi banji bakajaigwa. (2 Mak. 36:15-18) Cakacitikila Baruki citugwasya kubona kuti cilongwe cibotu a Leza nceciyandika kapati kwiinda lubono alimwi ampuwo munyika eeyi.

Zikozyanyo Zibotu Zyeelede Kuyiigwa

17. Ino nkaambo nzi Jesu, Paulo alimwi a Timoteo ncobali zikozyanyo zibotu kubabelesi ba Jehova mazuba aano?

¹⁷ Ijwi lya Leza lilatugwasya kuzumanana munzila yabuumi kwiinda mukutupa zitondezyo zibotu zyakutobela. Mucikozyanyo, Jesu wakali syaazibwene mukucita zintu kwiinda bantu boonse, pele wakabikkila maanu kucintu cakali kuyoogwasya bantu kwaciindi coonse—“Makani Mabotu aa-Bwami.” (Lk. 4:43) Kutegwa abelekele Jehova kusikila mpagolela, mwaapostolo Paulo wakaleka mulimo waatala kapati akutalika kubelesya ciindi anguzu zyakwe zyoonse mukukambauka makani mabotu. Timoteo ‘mwanaakwe mwinimwini wamulusyomo,’ wakaiya cikozyanyo cibotu ca Paulo. (1 Tim.  1:2) Sena Jesu, Paulo alimwi a Timoteo bakatyompwa akaambo kakusala nkobakacita mubuumi bwabo? Peepe! Masimpe ngakuti Paulo wakabona kuti zintu zili munyika “masifwisifwi buyo” wazyeelanya acoolwe cakubelekela Leza.—Flp. 3:8-11.

18. Ino nkucinca kuli buti kupati umwi mukwesu mukubusi nkwaakacita, alimwi ino nkaambo nzi ncatatyompwi akaambo kakusala kwakwe?

¹⁸ Bakubusi Banakristo banji mazuba aano baiya lusyomo lwa Jesu, Paulo alimwi a Timoteo. Mucikozyanyo, mukwesu umwi mukubusi iwakali kubeleka mulimo uuvwolwa mali manji wakalemba kuti: “Akaambo kakuti ndipona kweelana anjiisyo zyamu Bbaibbele, ndakasumpulwa amulimo. Nokuba kuti ndakajana mali manji, ndakalimvwa kuti ndakali kucita zintu zitakkutyi moyo. Nondakabaambila bapati bakkampani kuti ndiyanda kutalika mulimo wakukambauka waciindi coonse, mpoonya-mpoonya bakandiyungizizya mali kabayeeya kuti nsikooleka mulimo. Pele ndakalikanzide kuleka. Bantu banji taakwe nobakamvwisya kaambo ncindakalekela mulimo mubotu wakumubili akutalika mulimo wakukambauka waciindi coonse. Bwiinguzi bwangu mbwakuti ndiyanda kupona ncobeni kweelana akulyaaba kwangu kuli Leza. Akaambo kakuti lino buumi bwangu buyeeme amulimo wa Leza, ndijisi lukkomano alimwi akukkutila kapati kwiinda mali naa mpuwo ncozikonzya kundipa.”

19. Ino nkusala kuli buti kubotu nkobakulwaizyigwa kucita bakubusi?

¹⁹ Zyuulu-zyuulu zyabakubusi nyika yoonse basala mbubonya. Aboobo, nobakubusi, ciindi nomuyanda kusala kujatikizya buumi bwanu bwakumbele, amubikkile maanu kapati kubuzuba bwa Jehova. (2 Pet. 3:11, 12) Mutanyonokeli baabo bazwidilila munyika eeyi. Muciindi caboobo, amubaswiilile aabo bamuyanda ncobeni. Kuliyobweda “lubono kujulu” ncecintu cikonzya kumukwabilila kapati alimwi muyoojana mpindu zitamani. (Mt. 6:19, 20; amubale 1 Johane 2:15-17.) Inzya, amuyeeye Mulengi wanu. Mwacita boobo, Jehova uyoomulongezya.

Bupanduluzi buyungizidwe

Sena Muciyeeyede?

• Ino mbuti mbotutondezya lusyomo muli Leza?

• Ino lwiiyo lubotu kapati ninzi

• Ino nziiyo nzi nzyotukonzya kwiiya kuli Baruki?

• Ino mbaani bakali zikozyanyo zibotu zyakutobela, alimwi nkaambo nzi?

[Mibuzyo yaciiyo]

[Zifwanikiso izili apeeji 13]

Jehova upa lwiiyo lubotu kapati

[Zifwanikiso izili apeeji 15]

Baruki wakaswiilila Jehova eelyo wakafwutuka kulunyonyooko lwa Jerusalemu. Ino nciiyo nzi ncomukonzya kwiiya kulinguwe?