Sena Mulayeeya?

Sena mwakakukkomanina kubala mamagazini aa Ngazi Yamulindizi aalino-lino? Amubone naa inga mwasoleka kwiingula mibuzyo eeyi iitobela:

• Ndilili basikupandulula bweende bwanyenyeezi nobakamuswaya Jesu?

Ibbaibbele limwi lyaamba kuti: “Basikupandulula bweende bwanyenyeezi tiibakamuswaya Jesu kucilido caŋombe abanyama bamwi masiku aayo naakazyalwa mbuli mbobakacita beembezi. Bakazoosika nokwakainda myezi iili mbwiibede.” Eeco ciindi Jesu wakacili “mwana” alimwi wakali kukkala muŋanda. (Mt. 2:7-11) Ikuti naa Jesu wakapegwa ngolida alimwi azipego zibotu zimwi masiku aayo naakazyalwa, sena Mariya naakapa buyo nkwilimba zyobile kutempele kakwiindide mazuba aali 40?—January–March, peeji 31.

• Ino ncinzi banji ncobakonzya kucita kutegwa basumpule buumi bwabo?

Muntu umwi ulakonzya kubuzya kuti, ‘Sena ndilakonzya kucinca bukkale bwangu akutalika kupona buumi buuba-uba?’ Amy wakacita oobo. Wakajisi lubono lunji pele taakwe naakakkomene pe. Wakaziba kuti kulitakata kubeleka milimo yamunyika eeyi kwatikamupe kuleya kulusyomo. Aboobo, wakasala kubikka zintu zya Bwami mubusena bwakusaanguna mpoonya wakacikonzya kucita mulimo wabupainiya kwaciindi cisyoonto. Amy waamba kuti: “Lino ndilikkomene kwiinda mbondakabede nindakali kubelesya ciindi cangu coonse kuzuzikizya mbaakani zyakunyika.”—1/15, peeji 19.

• Ino ncinzi cikonzya kugwasya bamatumbu bamwi kuba alukkomano?

Bamatumbu banji balilembedwe mulimo. Bamwi balacita oobo kutegwa baule zintu nzyouyandika mukwasyi, alimwi ibamwi balacita oobo kutegwa kabajana mali manji naa kuula zintu zidula zyakulikondelezya. Kakuli ibamwi balabeleka nkaambo balauyanda mulimo ngobacita. Kweelana abukkale bwa Bunakristo, bamatumbu bajisi mulimo mupati aŋanda—kwaambisya ciindi mwana nacili mumvwanda. Bamwi basala kubeleka mulimo wakumubili kwacisela cabuzuba naa kucileka kubeleka kutegwa balanganye nzyouyandika mukwasyi alimwi eeci cipa bamatumbu aaba kukkomana kapati.—April–June, mapeeji 26-29.

• Ino ‘ndizyalani’ lili Jesu ndyaakali kwaamba mumajwi ngaakaamba aalembedwe kuli Matayo 24:34?

Jesu kanji-kanji wakali kubelesya bbala lyakuti “izyalani” munzila mbyaabi naakali kubandika abantu babyaabi naa kwaamba mbabo. Pele tanaakacita boobo aciindi eeci naakali kubandika abasikwiiya bakwe, aabo ibakali aafwaafwi kunanikwa amuuya uusalala. Mbembabo ibakali kuyooziba kabotu zitondezyo zyaambidwe kuli Matayo 24:32, 33. Aboobo, tulakonzya kusinizya kuti Jesu wakali kwaamba basikumutobela bananike bamumwaanda wamyaka wakusaanguna alimwi abaabo bakumazuba aano.—2/15, mapeeji 23-24.

• Ino mbuti Mulawo mbowakali simalelo kweelana ambokwaambidwe ku Ba-Galatiya 3:24?

Kanji-kanji, simalelo wakumazuba aansiku wakali muzike uusyomwa kapati iwakali kulanganya mwana munzila iili kabotu alimwi wakali kuzitobela zyoonse nzibakali kuyanda bausyi mwana. Mbubwenya buyo, Mulawo wakabakwabilila bama Juda kuzintu zibi zyakali kukonzya kubayunga, mbuli kukwatana abantu batakombi. Pele kweelana ambocakabede kuli simalelo wamwana, Mulawo wakali waciindi cisyoonto, wakali kubeleka kusikila Kristo naakasika.—April–June, mapeeji 18-21.

• Kweelana a Jakobo 3:17, mbube buli buti mbotweelede kutondezya?

Kutegwa katusalala, tweelede kuzitantamuka zintu zibi cakufwambaana. (Matl. 39:7-9) Alimwi tweelede kuba basiluumuno, kutantamuka muuya walunya naa micito iikonzya kunyonganya luumuno. Aboobo aumwi wesu weelede kulibuzya kuti: ‘Sena ndizizilwe kuba sikubamba luumuno naa sikumwaya luumuno? Sena kanji-kanji ndilazwangana abantu bambi? Sena ndilafwambaana kunyema, naa sena kanji-kanji ndilabanyemya bambi? Naa sena ndilafwambaana kulekelela bamwi alimwi akutakakatila kuti bantu bambi kabazumina nzyondiyanda?’—3/15, mapeeji 24-25.