Lufwutuko Kwiinda Mu Bwami Bwa Leza Luli Afwaafwi!
Lufwutuko Kwiinda Mu Bwami Bwa Leza Luli Afwaafwi!
“Abuze Bwami bwako, alucitwe luyando lwako, ansi ano mbubonya mbuli kujulu.”—MT. 6:10.
1. Ino mmakani nzi mapati Jesu ngaakali kuyiisya?
JESU Kristo naakaamba Mulumbe wakwe waa Cilundu, wakabikkilizya mupailo wacikozyanyo ooyo wakafwiinsya makani aakwe mapati ngaakali kuyiisya. Wakayiisya basikumutobela bakwe kupaila kuli Leza kuti: “Abuze bwami bwako, alucitwe luyando lwako, ansi ano mbubonya mbuli kujulu.” (Mt. 6:9-13) “Jesu wakanjilauka muminzi amutunzi, wakali kuya bukambauka akwaamba Makani Mabotu aa-Bwami bwa-Leza.” (Lk. 8:1) Kristo wakabakulwaizya basikumutobela kuti: “Amusaangune kuyandaula bwami bwa-Leza abululami bwakwe.” (Mt. 6:33) Nomubala cibalo eeci, amulange-lange nzila nzyomukonzya kubelesya twaambo ootu mumulimo wanu wakukambauka. Mucikozyanyo, amubone mbomukonzya kwiingula mibuzyo eeyi: Ino mbuti mulumbe wa Bwami mbouyandika? Ino bantu bayandika kufwutulwa kunzi? Alimwi ino mbuti Bwami bwa Leza mbobuyooleta lufwutuko?
2. Ino mbuti mulumbe wa Bwami mbouyandika?
2 Jesu wakasinsima kuti: “Aya makani mabotu aa-bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Mt. 24:14) Makani mabotu aajatikizya Bwami bwa Leza alayandika kapati. Kayi ooyu ngomulumbe wiinda kuyandika kapati munyika! Mumbungano zya Bakamboni ba Jehova ziinda ku 100,000 nyika yoonse, babelesi ba Leza batandila kutuulunzuma tuli ciloba balatola lubazu mumulimo wakukambauka uutakonzyi kweelanyizyigwa, ikwaambila bantu kuti Bwami bwakatalisigwa. Ikutalisyigwa kwa Bwami mmakani mabotu nkaambo caamba kuti Leza wabikka mfwulumende kujulu kutegwa yeendelezye nyika yoonse. Mubulelo bwa Bwami, luyando lwa Jehova luyoocitwa anyika mbuli mbokubede kujulu.
3, 4. Ino ncinzi ciyoocitika ciindi luyando lwa Leza lwaakucitwa anyika?
3 Ino ncinzi ciyoocitikila bantu ciindi luyando lwa Leza lwaakucitika anyika? Jehova “uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa.” (Ciy. 21:4) Kwiina muntu uyoociswa naa kufwa akaambo kacibi alimwi akutalondoka nkotwakakona. Bafwu aabo Leza mbayeeyede bayooba aacoolwe cakupona mane kukabe kutamani, nkaambo Bbaibbele lisyomezya kuti: “[Kuyooba] kubuka kwabafu, akwabaluleme akwabataluleme.” (Inc. 24:15) Nkondo iyoomana, kuciswa naa nzala, alimwi nyika iyoosandulwa kuba paradaiso. Nobaba banyama bayoosya mazuba aano bayookkala muluumuno abantu alimwi aakati kabo.—Int. 46:9; 72:16; Is. 11:6-9; 33:24; Lk. 23:43.
4 Akaambo kazilongezyo zitaliboteli eezyi zili mubulelo bwa Bwami, tacigambyi kuti businsimi bwamu Bbaibbele bulaamba kujatikizya buumi muciindi eeco mumajwi aawumbulizya aaya aakuti: “Babombemyoyo bayoovuba nyika, bayookondwa muluumuno lunji.” Pele ino mbuti kujatikizya baabo baleta manyongwe? Magwalo asinsima kuti: “Kaba kaindi kaniini sizibi takooyooba wo.” Pele aabo “balangila Jehova mbombabo bayookona nyika.”—Int. 37:9-11.
5. Ino ncinzi ciyoocitika kubukkale oobu buliko mazuba aano?
5 Ikutegwa zyoonse eezyi zicitike, bukkale oobu buliko kubikkilizya amfwulumende zizwangana, bukombi, alimwi abasimakwebo, zyeelede kuyoogwisyigwa. Eeci ncencico ncoiyoocita mfwulumende yakujulu. Musinsimi Daniele wakasololelwa amuuya kusinsima kuti: “Mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.” (Dan. 2:44) Mpoonya Bwami bwa Leza—mfwulumende yakujulu mpya—buyooyendelezya ciinga cabantu baanyika mpya. Kuyooba “ijulu ipya anyika impya. . . . Mulinzizyo momukala bululami.”—2 Pet. 3:13.
Lufwutuko Lulayandika Kapati Lino
6. Ino mbuti Bbaibbele mbolipandulula bubi bwamunyika eeyi mbyaabi?
6 Ciindi Saatani, Adamu alimwi a Eva nobakamuzangila Leza, kabayanda kulisalila cibotu acibi, musyobo wabantu wakanjila mumapenzi. Kakucili myaka yiinda ku 1,600 Zambangulwe lyanyika yoonse kalitanacitika, ‘bubi bwabantu baansi bwakali kuyoosya, amiyeeyo yoonse bantu njibakali kuyeeya mumyoyo yabo yakali mibi luzutu mazuba oonse.’ (Matl. 6:5) Kuzwa waawo, nokwakainda myaka iisika ku 1,300, Solomoni wakabona kuti bukkale mbubi kapati cakuti wakalemba kuti: “Ndakayeeya kuti bafu bafwa kale mbabotu kwiinda baumi bacipona. Pele uuli acoolwe kwiinda boonse ngooyo uutana kuzyalwa, uutabwene milimo mibi iicitika ansi ano.” (Muk. 4:2, 3) Myaka iitandila kuzyuulu zyotatwe kuzwa leelyo itusisya kumazuba eesu, bubi nobuzumanana kuvwula.
7. Ino nkaambo nzi lufwutuko kwiinda mu Bwami bwa Leza ncoluyandika kapati lino?
7 Nokuba kuti bubi nkobuli kuzwa kaindi, lufwutuko kwiinda mu Bwami bwa Leza lulayandika kapati lino kwiinda lyoonse. Kwamyaka iili 100 yainda, zyintu zyali zibyaabi kapati kwiinda ciindi cili coonse alimwi zicizumanana kuyaabubija. Mucikozyanyo, lipooti imwi yakamwaigwa aba Worldwatch Institute yakati: “Imweelwe wabantu bakali kufwa munkondo wakayungizyigwa ziindi zyotatwe mumwaanda wamyaka [wa 20] mukwiimpana abakali kufwa munkondo zyoonse kuzwa mumwaanda wamyaka wakusaanguna AD kusikila mu 1899.” Ibantu bainda kutuulunzuma tuli 100 bafwa munkondo kuzwa mu 1914. Ibbuku limwi lya encyclopedia lyaamba kuti bantu basika kutuulunzuma tuli 60 bakafwa lya Nkondo Yanyika Yabili. Akaambo kakuti zisi zimwi lino zijisi zilwanyo zyankondo, bantu balakonzya kunyonyoona bantu banji bali munyika. Alimwi nokuba kuti kuli kuyaambele musayaansi alimwi amumisamu, amwaka nzala icijaya bana babalilwa kutuulunzuma tuli tosanwe.—Amubone cibalo 9 mubbuku lya Ino Ncinzi Cini Bbaibbele Ncoliyiisya?
8. Ino zyuulu zyamyaka muntu njaayendelezya zyatondezya nzi cakutadooneka?
8 Kusoleka-soleka kwabantu kwakakilwa kumanizya bubyaabi buliko. Mbunga zyamunyika zyatwaambo twacisi, zyamakwebo alimwi azyabukombi kunyina nozyazuzikizya nzyobayandika bantu mbuli luumuno, alimwi abuumi bubotu. Muciindi cakumanizya mapenzi mapati aacitikila bantu lino, mbunga eezyi zyayungizya mapenzi aambi. Masimpe, zyuulu zyamyaka muntu njaayendelezya yatondezya kuti majwi aaya ngamasimpe: “Muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe.” (Jer. 10:23) Ncobeni, ‘muntu weendelezya muntunyina kukumubisizya.’ (Muk. 8:9) Kuyungizya waawo, “zilenge zyoonse zilatongela akumyongwa antoomwe.”—Rom. 8:22.
9. Ino mbukkale buli buti Banakristo bakasimpe mbobalangila kubona “kumazuba aakumamanino” aano?
9 Kujatikizya ciindi ncotupona, Bbaibbele lyakasinsima kuti: “Kumazuba aakumamanino kuyooba ziindi zikataazya.” Nobwakamana kupandulula bukkale bwakumazuba aakumamanino ciindi muntu nayendelezya, businsimi bwaamba kuti: “Bantu babi abasikulibeja balainda anka kubija” (Amubale 2 Timoteo 3:1-5, 13.) Eezyi nzezyintu Banakristo nzyobalangila nkaambo ‘nyika yoonse ili mumaanza aamubi,’ Saatani. (1 Joh. 5:19) Nokuba boobo, makani mabotu ngakuti Leza ino-ino uyoobafwutula aabo bamuyanda. Bayoofwutulwa kuzwa kunyika eeyi yalo iiyabwiindila buya kubija.
Kulikke Nkolukonzya Kujanwa Lufwutuko
10. Ino nkaambo nzi lufwutuko ncolukonzya kujanwa buyo kuli Jehova alikke?
10 Nomukambauka makani mabotu, amubapandulwide bamuswiilila kuti kuli Jehova kolikke nkolukonzya kujanwa lufwutuko. Walo alikke nguujisi nguzu alimwi aluyandisisyo lwakufwutula babelesi bakwe kuzwa kubukkale buli boonse bubyaabi. (Inc. 4:24, 31; Ciy. 4:11) Tulakonzya kusinizya kuti Jehova uyoobafwutula bantu bakwe alimwi akuzuzikizya makanze aakwe nkaambo wakakonkezya kuti: “Ncobeni ciyooba mbubonya mbundiyeeyede.” Ijwi lyakwe ‘talikooyoopiluka kulinguwe cabuyo pe.’—Amubale Isaya 14:24, 25; 55:10, 11.
11, 12. Ino ncisyomezyo nzi Jehova ncapa babelesi bakwe?
11 Jehova wasyomezya kuti uyoobafwutula babelesi bakwe ciindi nayoonyonyoona basizibi. Naakali kutuma musinsimi Jeremiya kuyoobandika cabusicamba kuli basizibi, Leza wakati: “Utayoowi.” Ino nkaambo nzi? “Nkaambo ndi ayebo, nzookuvuna.” (Jer. 1:8) Mbubwenya buyo, ciindi Jehova naatakalina kunyoonyoona minzi mibyaabi ya Sodoma a Gomora, wakatuma bangelo bobile kusindikila Loti amukwasyi wakwe kutegwa bazwe mubusena oobuya kakunyina penzi. “Mpoonya awo Jehova wakalosya sulufa amulilo aminzi ya-Sodoma a-Gomora.”—Matl. 19:15, 24, 25.
12 Noiba nyika yoonse buya, Jehova ulakonzya kubafwutula aabo bacita kuyanda kwakwe. Naakanyonyoona bantu bansiku babyaabi a Zambangulwe, “wakamubamba Nowa, mukambausi wabululami, abamwi bali musanu mubabili.” (2 Pet. 2:5) Jehova alimwi uyoobafwutula bantu baluleme ciindi nayoonyonyoona bantu babyaabi bapona kuciindi cino. Aboobo Ijwi Lyakwe lyaamba kuti: “Amuyandaule Jehova, nyoonse nobabombede baansi . . . Amuyandaule bululami, amuyandaule lubombo, elyo ambweni muyoosiswa mubuzuba bwabukali bwa-Jehova.” (Zef. 2:3) Akaambo kalunyonyooko oolu luyoocitwa nyika yoonse, ‘baluleme bayookkala munyika, pele basizibi bayoonyonyoonwa.’—Tus. 2:21, 22.
13. Mbuti babelesi ba Jehova bafwide mbobayoofwutulwa?
13 Nokuba boobo, babelesi ba Leza banji bakafwa kale nkaambo kakuciswa, kupenzyegwa, alimwi atwaambo tumwi. (Mt. 24:9) Aboobo, ino mbuti boonse aaba mbobayoofwutulwa? Mbubonya mbokwaambwa kale, ‘baluleme bayoobusyigwa kuzwa kubafwu.’ (Inc. 24:15) Elo cilaumbulizya kaka kuzyiba kuti kunyina cikonzya kumulesya Jehova kufwutula babelesi bakwe!
Mfwulumende Iiluleme
14. Ino nkaambo nzi ncotusinizyide kuti Bwami bwa Leza nimfwulumende iiluleme?
14 Nomuli mumulimo wanu wakukambauka, mulakonzya kupandulula kuti Bwami bwa Jehova bwakujulu nimfwulumende iiluleme. Aaya masimpe akaambo kakuti itondezya bube bwa Leza butaliboteli, mbuli bululami alimwi aluyando. (Dt. 32:4: 1 Joh. 4:8) Bwami oobu Leza wabupa Jesu Kristo, walo weelela kulela nyika. Alimwi Jehova wabikka makanze aakuti Banakristo bananike bali 144,000 babwezegwe kuzwa anyika akubusyigwa kubuumi bwakujulu kabali basikulelanyina a Kristo mukweendelezya nyika.—Ciy. 14:1-5.
15. Amwaambe kwiindana kuliko akati kabulelo bwa Bwami bwa Leza alimwi abulelo bwabantunsi?
15 Elo kaka kuyooba kwiindana kupati akati kabulelo bwa Jesu antoomwe aba 144,000 alimwi abwabantunsi batalondokede! Baleli bamubweende bwazyintu oobu kanji-kanji mbaasilunya alimwi basololela bantu babo kunkondo, calo capa kuti bantu banji kabajaigwa. Ncencico eeco Magwalo ncaatulaya kutasyoma muntu “uutagwasyi.” (Int. 146:3) Elo kaka Kristo uyoolela kweelana abube bwakwe bwaluyando! Jesu wakati: “Amuboole kulindime nyoonse nomukatede nomulemenwa, ndime enti kamulemunune. Amulikulike ijokwe lyangu, mwiiye kwangu, nkaambo ndilibombede, ndi mutete moyo, lino mulakatulukwa mumyoyo yanu, nkaambo ijokwe lyangu lilibulungusene, awalo mukuli wangu muuba.”—Mt. 11:28-30.
Mazuba Aakumamanino Alaafwaafwi Kumana!
16. Ino mazuba aano aakumamanino ayoomana buti?
16 Nyika eeyi ili kumazuba aakumamanino, naa ‘kumamanino aaciindi’ kuzwa mumwaka wa 1914. (Mt. 24:3) Kuceede buyo ciindi ciniini kuti “mapenzi mapati” aayo Jesu ngaakaamba acitike. (Amubale Matayo 24:21.) Mapenzi aatanacitikide ayoonyonyoona nyika ya Saatani yoonse. Pele ino mbuti mapenzi mapati aaya mbwaayootalika? Alimwi ino ayoomana buti?
17. Ncinzi Bbaibbele ncolitondezya kuti ncociyooba ngamatalikilo aamapenzi mapati?
17 Mapenzi mapati ayootalika cakutayeeyelwa. Masimpe, ‘buzuba bwa Jehova’ buyoosika cakutayeeyelwa “nobanoozoocili mukwaamba kuti, Kwatontola, kwaliiba.” (Amubale 1 Ba-Tesalonika 5:2, 3.) Mapenzi aakasinsimwa ayootalika ciindi musyobo wabantu nobayeeya kuti balaafwaafwi kumana mapenzi aabo amwi mapati. Kunyonyoonwa kuyoocitwa cakutayeeyelwa kwa “Babuloni Mupati,” bulelo bwanyika yoonse bwabukombi bwakubeja, kuyoogambya bantu bamunyika. Bami alimwi abantu bamwi bayookankamana ciindi Babuloni Mupati aakunyonyoonwa.—Ciy. 17:1-6, 18; 18:9, 10, 15, 16, 19.
18. Ino mbuti Jehova mbwabweza ntaamu kukulwana kwa Saatani nkwacita kubantu Bakwe?
18 Muciindi cikatazya, kuyooba “zitondezyo kuzuba akumweezi akunyenyeezi,” alimwi “kuyooboneka citondezyo ca-Mwana a-Muntu kujulu.” Mpoonya tweelede ‘kuyoolungumika mitwe yesu, nkaambo kunununwa kwesu kunooli afwaafwi.’ (Lk. 21:25-28; Mt. 24:29, 30) Saatani, naa Gogo, uyoolwana bantu ba Leza. Pele kujatikizya baabo balwana babelesi bakwe basyomeka, Jehova waamba kuti: “Woonse uumuguma ulaguma imboni yaliso lya[ngu].” (Zek. 2:8) Aboobo, kusoleka kwa Saatani kwakuti abanyonyoone takukazwidilili pe. Ino nkaambo nzi? Nkaambo kakuti Mwami Wakoonse-koonse Jehova uyoobweza ntaamu cakufwambaana kutegwa afwutule babelesi bakwe.—Ezk. 38:9, 18.
19. Nkaambo nzi ncotukonzya kusinizya kuti nkamu yabasikunyonyoona iyoobunyonyoona bulelo bwa Saatani?
19 Ciindi Leza aakubweza ntaamu kulwana bamasi, ‘bayooziba kuti ngu Jehova.’ (Ezk. 36:23) Uyootuma nkamu yabasikunyonyoona—zyuulu-zyuulu zyazilenge zyamuuya ziyoosololelwa a Kristo Jesu kunyonyoona bulelo bwa Saatani bunoocisyeede anyika. (Ciy. 19:11-19) Notuyeeya kuti ciindi cimwi mungelo omwe buyo mubusiku bomwe wakajaya “zyuulu zyabantu zili mwaanda amakumi aali musanu aatatu amusanu” izyabasinkondonyina Leza, tulakonzya kusinizya kuti basikalumamba bakujulu bayookanyonyoona cakutasowa ciindi kabeela kasyoonto kabulelo bwa Saatani kayoosyaala anyika ciindi mapenzi mapati naayootobelwa a Armagedoni. (2 Bam. 19:35; Ciy. 16:14, 16) Saatani amadaimona aakwe bayoofwusilwa mudindi litagoli kwamyaka iili cuulu. Kuzwa waawo, bayoonyonyoonwa.—Ciy. 20:1-3.
20. Ino ncinzi Jehova ncayoozuzikizya kwiinda mu Bwami bwakwe?
20 Aboobo nyika iyoosalazigwa kububyaabi, alimwi bantu baluleme bayoopona anyika eeyi kukabe kutamani. Jehova uyooba Mufwutuli Mupati. (Int. 145:20) Kwiinda mu Bwami bwakwe, uyoolulamika bweendelezi bwakwe, kusalazya zyina lyakwe lisalala, alimwi akuzuzikizya makanze aakwe mapati kujatikizya nyika. Aboobo amukkomane kapati kaka mumulimo wanu wakukambauka ciindi nomwaambilizya makani mabotu aaya alimwi akugwasya baabo “basalidwe buumi butamani” kuzyiba kuti lufwutuko kwiinda mu Bwami bwa Leza luli aafwaafwi!—Inc. 13:48.
[Caption on page 16]
Sena Muciyeeyede?
• Ino mbuti Jesu mbwaakakankaizya mbobuyandika Bwami?
• Nkaambo nzi lufwutuko ncoluyandika kapati lino kwiinda lyoonse?
• Ino nzyintu nzi nzyotulangila kucitika lyaciindi camapenzi mapati?
• Mbuti Jehova mbwatondezya kuti Mmufwutuli Mupati?
[Mibuzyo yaciiyo]
[Zifwanikiso izili apeeji 12]
Ijwi lya Leza lyakasinsima kujatikizya mulimo wanyika yoonse wakukambauka uutakonzyi kweelanyizyigwa uucitwa muciindi ncotupona
[Cifwanikiso icili apeeji 15]
Mbubwenya Jehova mbwaakafwutula Nowa amukwasyi wakwe, Ulakonzya kutufwutula aswebo
[Cifwanikiso icili apeeji 16]
Jehova “uyoosindula misozi yoonse . . . , takukooyooba limbi lufu.”—Ciy. 21:4