Mbokabambidwe Kabunga Keendelezya

KABUNGA Keendelezya ka Bakamboni ba Jehova kabambidwe abaalumi Banakristo balyaabide balo bali mbabelesi ba Leza bananike. Balabeleka kwiiminina ciinga camuzike musyomesi uucenjede walo uujisi mukuli wakwaabila cakulya cakumuuya, kupa malailile alimwi akubona masimpe kuti mulimo wakukambauka Bwami ngomulimo ngobabeleka kapati ba Bakamboni ba Jehova nyika yoonse.—Mt. 24:14, 45-47.

Miswaangano yaba Kabunga Keendelezya ilacitwa ansondo, kanji-kanji muli Bwatatu. Miswaangano eeyi ilabagwasya bakwesu aaba kubelekela antoomwe mulukamantano. (Int. 133:1) Alimwi bamu Kabunga Keendelezya balabeleka amumakkomiti aindene-indene. Aimwi kkomiti ijisi mukuli wakulanganya milimo iigaminide alimwi amakani aajatikizya mulimo wa Bakamboni ba Jehova kweelena ambokulembedwe ansi aawa.

▪ KKOMITI YABEENDELEZI: Mukkomiti eeyi kujanika mweendelezi aumwi wamumakkomiti aaya aamwi aa Kabunga Keendelezya alimwi amulembi awalo uuli ngumwi wamu Kabunga Keendelezya. Kkomiti eeyi ibona masimpe kuti makkomiti oonse abeleka kabotu akubona kuti kunyina penzi lili lyoonse. Ilalanganya azyintu zipati zyacibukilambuta, kupenzyegwa, ntenda alimwi atwaambo tumwi tuyandika kulanganyizigwa cakufwambaana tujatikizya Bakamboni ba Jehova nyika yoonse.

▪ KKOMITI IILANGANYA BABELESI: Bakwesu bali mukkomiti eeyi bakapegwa mukuli wakulanganya bukkale bwakumubili bwamuntu aumwi wamukwasyi wa Bbeteli nyika yoonse, kubagwasya kuzumanana kuba acilongwe ciyumu a Jehova alimwi akubagwasya munzila zimwi buyo. Kkomiti eeyi ilasala alimwi akwiita baabo beelede kuba mumikwasyi ya Bbeteli alimwi ilalanganya amibuzyo iijatikizya mulimo wabo waku Bbeteli.

▪ KKOMITI IILANGANYA ZIMWAIGWA: Kkomiti eeyi yeendelezya mulimo wakusimba, kumwaya alimwi akutumina mabbuku aamba zyamu Bbaibbele munyika yoonse. Njiilanganya mincini yakusimbila alimwi azyintu nzyozijisi alimwi njozilanganya mbunga ziindene-indene zibelesyegwa a Bakamboni ba Jehova. Kkomiti eeyi ilabikka bubambe bwakwaabelesya kabotu mali aasangilwa mulimo wa Bwami uucitwa munyika yoonse.

▪ KKOMITI YAMULIMO: Aabo bali mukkomiti eeyi bajisi mukuli wakulanganya mulimo wakukambauka alimwi atwaambo tujatikizya mbungano, bapainiya, baalu alimwi abalangizi beendeenda. Yeendelezya mulimo wakubamba Mulimo Wesu wa Bwami alimwi ilaita ba Sicikolo ca Gileadi alimwi a Cikolo Cakwiiya Mulimo, mpoonya ilabatuma mumasena mobeelede kuyoobelekela.

▪ KKOMITI IILANGANYA ZIYIISYIGWA: Kkomiti eeyi ilanganya twaambo tubandikwa kumiswaangano yaalubazu ayabbazu, yacooko alimwi amiswaangano yambungano. Ilabamba mapulogilamu aakumuuya aabamukwasyi wa Bbeteli alimwi ilalanganya azikolo ziindene-indene, mbuli Cikolo ca Gileadi alimwi a Cikolo Camulimo Wabupainiya kubikkilizya akubamba mapulogilamu aamajwi alimwi aamavidiyo.

▪ KKOMITI IILANGANYA ZILEMBWA: Kkomiti eeyi njiijisi mukuli wakweendelezya kulemba makani aakumuuya mumabbuku alimwi akwaatumina kubakwesu abacizi alimwi akubanamaleya. Kkomiti eeyi ilaingula mibuzyo iijatikizya Bbaibbele alimwi akuzumizya kuti kulembwe tubbuku twacisobano alimwi amapepa aamakani. Alimwi ilalanganya mulimo wakusandulula uucitwa munyika yoonse.

Mwaapostolo Paulo wakakozyanisya mbungano yabananike kumubili wamuntu alimwi wakakankaizya zibeela zipati nzyobajisi boonse kubikkilizya ambobasyomana, mbobayandana alimwi ambobakamantene mukubeleka mulimo ngwaakabapa Leza. (Rom. 12:4, 5; 1 Kor. 12:12-31) Jesu Kristo uuli Ngosilutwe, ulaabila zyintu ziyandika kuzizyo zyamubili kutegwa kakuli kubelekela antoomwe, kumvwana alimwi amalailile aazwa mu Bbaibbele. (Ef. 4:15, 16; Kol. 2:19) Munzila eeyi, ba Kabunga Keendelezya balikamantene kuti beendelezye ciindi nobasololelwa a Jehova kwiinda mumuuya uusalala.