Nomucili Bana, Amusale Kubelekela Jehova
Nomucili Bana, Amusale Kubelekela Jehova
“Kojatisya makani ngowakaiya azintu nzozuminisya.”—2 TIM. 3:14.
1. Ino Jehova uubona buti mulimo ngobacita Bakamboni bakwe bakubusi?
MULIMO uusetekene ngobacita bakubusi ulayandika kapati kuli Jehova cakuti wakasololela amuuya kuti kusinsimwe kujatikizya mbabo. Sintembauzyo wakaimba kuti: “Bantu bako [bayoolyaaba] camoyo woonse azilundu zisalala mubuzuba bwalumamba lwako. Balombe bako bali mbuli malosi aalume luboneka cifumofumo.” (Int. 110:3) Masimpe, bakubusi balisungwide kumubelekela, Jehova ubabona kuti balayandika kapati.
2. Ino bakubusi bayungwa buti abantu kujatikizya makani aabuumi bwabo bwakumbele?
2 Nobakubusi nomuli mumbungano ya Bunakristo, sena mwakalyaaba kuli Jehova? Bakubusi banji inga cabayumina kusala kuyoobelekela Leza wakasimpe naa pe. Nkumekume mumakwebo, bamayi alimwi zimwi ziindi bamumukwasyi alimwi abalongwe, bakulwaizya bakubusi kulibikkila mbaakani zyakujana lubono. Bantu bamwi balabafwubaazya bakubusi balibikkila mbaakani zyakumuuya. Pele masimpe ngakuti kubelekela Leza wakasimpe nenzila mbotu kapati njomukonzya kusala mubuumi. (Int. 27:4) Kujatikizya makani aaya, amulange-lange mibuzyo yotatwe eeyi: Nkaambo nzi ncomweelede kumubelekela Leza? Ino mbuti mbomukonzya kuzwidilila mukuba muntu uulyaabide kuli Jehova kufwumbwa naa ncinzi bantu ncobakonzya kwaamba naa kucita? Ino mmulimo nzi uusetekene ngomukonzya kubeleka?
Kubelekela Jehova Ncecintu Cibotu Muntu Ncayelede Kucita
3. Ino zyintu nzyaakalenga Jehova zyeelede kutupa kucita nzi?
3 Ino nkaambo nzi ncomweelede kubelekela Leza wakasimpe alimwi uupona? Bbuku lya Ciyubunuzyo 4:11 lilakaamba kaambo kapati noliti: “Nduwe uuelede, O [Jehova, Leza wesu], kutambula bulemu alulemeko anguzu, nkaambo nduwe wakalenga zintu zyoonse, nkaambo kabukanze bwako nkizibeda, ankizyakalengelwa.” Jehova ngo Mulengi wazyintu zyoonse zipona. Elo kaka nyika ileebeka! Masamu, maluba-luba, banyama, lwaanje, malundu, alimwi amavwuumina aamaanzi—zyoonse buyo Jehova nguwakazilenga. Intembauzyo 104:24 yaamba kuti: “Nyika ilizwide zilenge [zya Leza].” Elo tweelede kulumba kaka kuti Jehova wakatupa mubili alimwi amizeezo zyalo zitupa kwiikkomanina nyika alimwi azyintu zibotu zili mpawo! Kulumba nkotucita camoyo woonse kuzyintu zibotu zyakalengwa kweelede kutukulwaizya kumubelekela.
4, 5. Ino milimo nzi njaakacita Leza yakapa Joshua kuba acilongwe a Jehova?
4 Akamwi kaambo ncotweelede kumubelekela Jehova kajanwa mumajwi ngaakaamba musololi wa Israyeli Joshua. Kali aafwaafwi kufwa, Joshua wakaambila bantu ba Leza kuti: “Mulizi camyoyo yanu yoonse acamiyeeyo yanu yoonse kuti taakwe cintu niciba comwe icakawida ansi akati kazintu zibotu zyoonse Jehova Leza wanu nzyakaamba aandinywe. Zyoonse buyo zyakacitika.” Ino nkaambo nzi Joshua ncaakali kukonzya kwaamba boobu?—Jos. 23:14.
5 Mbwaakali mwana wakakomenena mucisi ca Egepita, kulangilwa kuti Joshua wakazyiba kujatikizya cisyomezyo Jehova ncaakasyomezya bana Israyeli cakubapa nyika iibageme. (Matl. 12:7; 50:24, 25; Kul. 3:8) Mpoonya Joshua wakalibonena ameso Jehova naakatalika kuzuzikizya cisyomezyo eeco kwiinda mukuletela munzi wa Egepita Zipenzyo Zili Kkumi alimwi akupa kuti Farao iwakali sinkazi azumizye bana ba Israyeli kwiinka. Joshua wakali umwi wabaabo bakafwutulwa kwiinda mukuzubuka Lwizi Lusalala alimwi mpoonya wakabona lwizi oolo kalumumena Farao alimwi abasikalumamba bakwe. Mulweendo lwabo lulamfwu ndobakainda “munkanda impati iiyoosya” ya Sinai, Joshua wakalibonena ameso Jehova mbwaakali kupa zyintu zyoonse nzyobakali kuyandika bana Israyeli. Kunyina naba omwe akati kabo wakafwa akaambo kanyota naa nzala. (Dt. 8:3-5, 14-16; Jos. 24:5-7) Nocakasika ciindi cakuti bana Israyeli bazunde misyobo yabana Kanana yakajisi nguzu kutegwa bakone Nyika Yakasyomezyegwa, Joshua wakalibonena ameso Leza ooyo walo alimwi abana Israyeli bamwi ngobakali kukomba mbwaakabagwasya mumulimo ooyu.—Jos. 10:14, 42.
6. Ino ncinzi ciyoomugwasya kuyandisya kubelekela Leza?
6 Joshua wakalizyi kuti Jehova wakazizuzikizya zisyomezyo Zyakwe. Aboobo, Joshua wakaamba kuti: “Mebo abasiŋanda bangu tulabelekela Jehova.” (Jos. 24:15) Ino mbuti kujatikizya ndinywe? Nomuyeeya zisyomezyo eezyo Leza wakasimpe nzyaazuzikizya kale alimwi azyeezyo nzyayoozuzikizya, sena mulayanda kumubelekela mbubwenya mbwaakacita Joshua?
7. Nkaambo nzi kubbapatizigwa mumaanzi ncoili ntaamu iiyandika kubwezegwa?
7 Kutelaika milimo yakulenga Jehova njaakacita alimwi akuyeeya zisyomezyo zyakwe zibotu alimwi zisyomeka kweelede kumupa kuti mutalyaabi buyo kuli Jehova, pele akumupa kuti mutondezye kulyaaba kwanu kwiinda mukubbapatizigwa mumaanzi. Kubbapatizigwa nintaamu iiyandika njobeelede kubweza aabo bayanda kumubelekela Leza. Eeci cakacitwa caantangalala a Jesu, Cikozyanyo ncotutobela. Katanatalika mulimo wakwe kali Mesiya, wakalitola kuli Johane Mubbapatizi kuti abbapatizigwe. Ino nkaambo nzi Jesu ncaakabwezela ntaamu eeyo? Jesu wakazooti: “Ndaseluka kuzwa kujulu, takuli kucita ncenjanda ndemwini, pele nkucita luyando lwayooyo uwakandituma.” (Joh. 6:38) Kutegwa atondezye kuti wakali kulyaaba mwini kuti acite kuyanda kwa Bausyi, Jesu wakabbapatizigwa.—Mt. 3:13-17.
8. Ino nkaambo nzi Timoteo ncaakasala kukomba Leza, alimwi ncinzi ncomunga mwayandika kucita?
8 Alimwi amulange-lange cikozyanyo ca Timoteo, Munakristo mukubusi ooyo Jehova ngwaakazoopa mulimo mupati alimwi amikuli minji yaalubazu. Ino nkaambo nzi Timoteo ncaakasala kukomba Leza wakasimpe? Bbaibbele litwaambila kuti ‘wakaiya makani alimwi wakazisyoma zyintu nzyaakaiya.’ (2 Tim. 3:14) Ikuti naa mwakaiya Jwi lya Leza alimwi mwakasyoma kuti nzyoliyiisya nzyamasimpe, muli mubukkale bukozyenye abwa Timoteo. Lino mweelede kusala. Inga cabota kuti mwabandika abazyali banu kujatikizya nzyomuyanda kucita. Ibaalu bambungano abalo balakonzya kumugwasya kumvwisya zyeelelo zyamu Magwalo zyalubbapatizyo.—Amubale Incito 8:12.
9. Ino bantu bamwi inga balimvwa buti ciindi nomubweza ntaamu yakubbapatizigwa?
9 Kubbapatizigwa ngamatalikilo kumuntu uuyanda kubelekela Leza wakasimpe. Kwiinda mukubweza ntaamu eeyi, tutalika kuzuzaana musinzo mulamfwu mwalo mujanwa bulumbu bwabuumi butamani alimwi alukkomano lujanwa lino kwiinda mukucita kuyanda kwa Leza. (Heb. 12:2, 3) Alimwi muyoobapa kukkomana bamumukwasyi wanu aabo bakatalika kale kuzuzaana alimwi muyoobakkomanisya balongwe banu bali mumbungano ya Bunakristo. Cipati kwiinda zyoonse, muyoomukkomanisya Jehova. (Amubale Tusimpi 23:15.) Masimpe, banji tabakonzyi kukamvwisya kaambo ncomwasalila kukomba Jehova, alimwi inga bayeeya kuti tiimwasala kabotu pe. Mane buya balakonzya kukazya nzyomusyoma. Pele mulakonzya kwaazunda masunko aaya.
Bamwi Nobayeeya Kuti Tiimwasala Kabotu naa Nobakazya nzyomusyoma
10, 11. (a) Ino mmibuzyo nzi bantu njobanga bamubuzya kujatikizya kusala kwanu kwakuti mubelekele Leza? (b) Ino ncinzi ncomukonzya kwiiya kuli Jesu ikujatikizya mbwaakayiingula mibuzyo iijatikizya bukombi bwakasimpe?
10 Kusala kwanu kuti mubelekele Jehova kulakonzya kubatyompya basicikolonyoko, basimukobonyoko alimwi abasazinyoko. Balakonzya kumubuzya kaambo ncomwasalila kubweza ntaamu eeyi alimwi akumubuzya kujatikizya nzyomusyoma. Ino mweelede kwiingula buti? Masimpe, mweelede kulingula mbomuyeeya alimwi ambomulimvwa kutegwa mucikonzye kupandulula twaambo tujatikizya kusala kwanu. Alimwi nomwiingula mibuzyo iijatikizya nzyomusyoma, cikozyanyo ca Jesu ncecikozyanyo cibotu ncomukonzya kutobela.
11 Ciindi basololi babukombi bwaba Juda nobakabuzya Jesu mibuzyo minji kujatikizya bubuke, wakabagamika kulugwalo ndobatakali kubikkila maanu. (Kul. 3:6; Mt. 22:23, 31-33) Ciindi mulembi umwi naakamubuzya kuti nguuli mulawo wakali mupati, Jesu wakamuzubulwida tupango twamu Bbaibbele tweelede. Mwaalumi ooyo wakamulumba Jesu akaambo kabwiinguzi. (Lev. 19:18; Dt. 6:5; Mk. 12:28-34) Kubelesya Magwalo nkwaakacita Jesu alimwi ambwaakali kubandika kwakapa kuti kube “kwaanzaana akati kankamu nkaambo kakwe,” alimwi basikukazya nzyaakali kwaamba tiibakakonzya kumulwana. (Joh. 7:32-46) Ciindi nomwiingula mibuzyo iijatikizya lusyomo lwanu, amubelesye Bbaibbele alimwi amwiingule “amoyo mutete akuyoowa Leza.” (1 Pet. 3:15) Ikuti kamutabuzyi bwiinguzi bwamubuzyo, amwaambe kuti tamubuzyi bwiinguzi, eelyo amulombe kuti mukavwuntauzye. Mwamana, amukalange-lange kaambo kwiinda mukubelesya Watch Tower Publications Index naa Watchtower Library iili a CD-ROM. Ikuti mwalibambila kabotu, ‘muyoozyiba mbomweelede kwiingula.’—Kol. 4:6.
12. Nkaambo nzi ncomuteelede kulekela kuti kupenzyegwa kumutyompye?
12 Mulakonzya kubuzyigwa mibuzyo minji kapati iijatikizya kusala kwanu kwakuti mubelekele Leza alimwi anzyomusyoma. Kayi sinkondonyina a Leza uuli ngu Saatani Diabolosi, nguuyendelezya nyika. (Amubale 1 Johane 5:19.) Tacikonzyi kugwasya kuyeeya kuti muntu oonse ulatulumbaizya naa kutukkomanina, alimwi nzyomusyoma zilakonzya kukazyigwa. Bantu bamwi inga ‘bamuvwiya,’ alimwi balakonzya kuzumanana kucita boobo. (1 Pet. 4:4) Pele kamuyeeya kuti tamuli nyolikke pe. Jesu Kristo awalo wakapenzyegwa. Mwaapostolo Petro awalo wakapenzyegwa, eelyo wakalemba kuti: “Nomuyandwa mutagamb[w]i aamasukusyo aayaka mbuli mulilo aamusikila kuti musukusigwe ngao. Mutayeeyi kuti mwasikilwa cintu ceenzu, pe, nkaambo mwaba bapenzinyina Kristo.”—1 Pet. 4:12, 13.
13. Ino nkaambo nzi Banakristo ncobakonzya kukkomana ciindi nobapenzyegwa?
13 Kuliyumya nomupenzyegwa naa kukazyigwa akaambo kakuti muli Banakristo ncintu ncomweelede kukkomanina. Ino nkaambo nzi? Nkaambo kakuti, ikuti muntu oonse uuli munyika kabukkomanina bukkale mbomupona, eeci inga catondezya kuti mupona kweelana azyeelelo zya Saatani—kutali zya Leza. Jesu wakacenjezya kuti: “Maawe kulindinywe bantu boonse noba mwaamba kabotu, nkaambo bamawisaabo bakacita mbubonya obo kubasinsimi babeji.” (Lk. 6:26) Kupenzyegwa kutondezya kuti Saatani alimwi abantu bakwe bali munyika balinyemede kujatikizya ndinywe akaambo kakuti mubelekela Jehova. (Amubale Matayo 5:11, 12.) Alimwi ‘kusampaulwa nkaambo kazyina lya Kristo’ ncintu ncotweelede kukkomanina.—1 Pet. 4:14.
14. Ino nzyintu nzi zibotu izikonzya kuboola ciindi muntu nazumanana kusyomeka kuli Jehova nokuba kuti ulapenzyegwa?
14 Ikuti mwazumanana kusyomeka kuli Jehova nokuba kuti mulapenzyegwa, kuli mpindu zibalilwa kuli zyone zijanwa. Mupa bukamboni kujatikizya Leza alimwi a Mwana wakwe. Kuliyumya kwanu cakusyomeka kulabakulwaizya bakwesu alimwi abacizi Banakristo. Bantu bamulangilila ibatamuzyi Jehova inga bakulwaizyigwa kuyanda kumuzyiba. (Amubale Ba-Filipi 1:12-14.) Alimwi mwabona Jehova mbwapa nguzu zyakuliyumya mumasunko, luyando ndomujisi kulinguwe lulayuma.
Mwajalwidwa “Mulyango Mupati”
15. Ino “[m]mulyango mupati” uuli iwakajalwidwe kumwaapostolo Paulo?
15 Kujatikizya mulimo wakwe mu Efeso, mwaapostolo Paulo wakalemba kuti: “Ndajalwidwa mulyango mupati wakucita milimo mibotu.” (1 Kor. 16:8, 9) Wakali mulyango uusololela mumulimo mupati wakukambauka makani mabotu alimwi amukugwasya bantu kuba basikwiiya mumunzi ooyo. Kwiinda mukuuzumina mulimo ooyo, Paulo wakagwasya bantu banji kwiiya kujatikizya Jehova alimwi akumukomba.
16. Ino mbubuti bananike basyeede mbobakaunjila “mulyango uujulidwe” mu 1919?
16 Mu 1919 Jesu Kristo wakasumpulwa wakabikka “mulyango uujulidwe” kubananike basyeede. (Ciy. 3:8) Bakanjila mumulyango ooyo alimwi bakatalika kukambauka makani mabotu, kuyiisya kasimpe kamu Bbaibbele cabusungu kapati kwiinda mbocakabede kaindi. Ino ncinzi cakazwa mpawo akaambo kamulimo wabo wakukambauka? Makani mabotu akambaukwa mumasena oonse aanyika, alimwi bantu babalilwa kutuulunzuma tuli ciloba bajisi bulangizi bwakuyooba abuumi butamani munyika mpya ya Leza.
17. Ino mbuti mbomukonzya kuunjila “mulyango mupati wakucita milimo mibotu”?
17 “Mulyango mupati wakucita milimo mibotu” ucijalwidwe kubabelesi ba Jehova boonse. Aabo banjila mumo balaba alukkomano alimwi akukkutila ciindi nobatola lubazu kapati mukukambauka makani mabotu. Nywebo nobabelesi ba Jehova bakubusi, ino muubona buti mulimo ooyu wakugwasya bantu kuti ‘bazumine makani mabotu’ walo uutakonzyi kweelanisigwa amulimo uumbi? (Mk. 1:14, 15) Sena kuli nomwakayeeyede kubeleka kamuli painiya waciindi coonse naa painiya wakugwasilizya? Kuyaka Maanda aa Bwami, mulimo waku Bbeteli alimwi amulimo wabu Misyinali nzyoolwe zimwi nzyomunga mwaba azyalo bunji bwenu. Mbokunga ciindi cisyeede canyika mbyaabi ya Saatani caceya, kutola lubazu mumilimo ya Bwami eeyi kuyaabuyandika kapati abuzuba. Sena muyoowunjila “mulyango mupati” ciindi nocitanamana?
“Amulabile, Mubone Kuti Jehova Mubotu”
18, 19. (a) Ncinzi cakamugwasya Davida kuba aluyandisisyo lwakubelekela Jehova? (b) Ino ncinzi citondezya kuti Davida kunyina naakatyompwa akaambo kakubelekela Leza?
18 Sintembauzyo wakasololelwa amuuya Davida, wakabatamba bantu kuti ‘balabile, babone kuti Jehova mubotu.’ (Int. 34:8) Ciindi Davida naakali mweembezi, Jehova wakamufwutula kuzwa kukulwanwa abanyama bamusyokwe. Leza wakamugwasyilizya munkondo njaakali kulwana a Goliati alimwi wakamuvwuna kuzwa kumapenzi aamwi manji. (1 Sam. 17:32-51; Int. 18, katwe kamakani) Akaambo kaluzyalo lupati ndwajisi Leza, Davida cakamupa kulemba kuti: “Nzinji loko nzowakacita, O Jehova Leza wangu, nkokuti malele aako amakanze aako kulindiswe; taakwe uukonzya kukozyanizigwa ayebo.”—Int. 40:5.
19 Luyando ndwaakajisi Davida kuli Jehova lwakakomena kapati alimwi wakayanda kumutembaula amoyo wakwe woonse alimwi amizeezo yakwe yoonse. (Amubale Intembauzyo 40:8-10.) Myaka mboyakali kuyaabukulauka, Davida kunyina naakatyompwa akaambo kakukomba Leza wakasimpe mubuumi bwakwe boonse. Kupona kweelana akulyaaba kwakwe kuli Leza cakali ncecintu ciyandika kulinguwe—cakali kumuletela lukkomano lutakonzyi kweelanisyigwa. Naakacembaala, Davida wakaamba kuti: “Nkaambo nduwe ngundangila, O Mwami; nduwe ngunsyoma, O Jehova, kuzwa kubwanike bwangu. Utandisii, O Leza, nekuba kuti ndacembaala akuba amvwi.” (Int. 71:5, 18) Lusyomo ndwaakajisi Davida muli Jehova alimwi acilongwe ncaakajisi kulinguwe zyakayuma, nokuba kuti nguzu zyakwe zyamumubili zyakaceya.
20. Ino nkaambo nzi kubelekela Leza ncoili nenzila mbotu kapati yakupona?
20 Buumi mbwaakali kupona Joshua, Davida alimwi a Timoteo bupa kusinizya kuti kubelekela Jehova nenzila mbotu kapati yakupona. Lubono lwaciindi cisyoonto ndomukonzya kujana mukubeleka mulimo wakumubili munyika eeyi talukonzyi kusika azilongezyo zyaciindi cilamfwu nzyomukonzya kujana kwiinda ‘mukubelekela Jehova amoyo wanu woonse amiyeeyo yanu yoonse.’ (Jos. 22:5) Ikuti naa tamunalyaaba kuli Jehova mumupailo, amulibuzye kuti, ‘Ino ncinzi cindikasya kuba umwi wa Bakamboni ba Jehova?’ Ikuti naa muli bakombi ba Jehova bakabbapatizigwa kale, sena inga mwayanda kuba alukkomano lunji mubuumi bwanu? Nkokuti kamubelesya ciindi cinji mukubelekela Leza alimwi amuzumanane kuyaambele kumuuya. Cibalo citobela ciyoomutondezya mbomukonzya kuyaambele kumuuya kwiinda mukutobela cikozyanyo camwaapostolo Paulo.
[Caption on page 20]
Ino Inga Mwaingula Buti?
• Amwaambe twaambo tobile tutondezya ncotweelede kumubelekela Leza.
• Ino ncinzi cakamugwasya Timoteo kuti asale kubelekela Leza?
• Ino nkaambo nzi ncomweelede kuzumanana kuliyumya ciindi nomupenzyegwa?
• Ino mmulimo nzi ngomukonzya kuba acoolwe cakuubeleka?
[Mibuzyo yaciiyo]
[Cifwanikiso icili apeeji 18]
Kubelekela Jehova nenzila mbotu kapati yakubelesya buumi
[Cifwanikiso icili apeeji 19]
Sena mulakonzya kwiingula mibuzyo iijatikizya zyintu nzyomusyoma?
imo nzi ngomukonzya kuba acoolwe cakuubeleka?