Twaambo Tugwasya Mubbuku lya Incito
Ijwi lya Jehova Lili Abuumi
Twaambo Tugwasya Mubbuku lya Incito
IBBUKU lyamu Bbaibbele ilya Incito lilijisi twaambo toonse twaamba mboyakatalika mbungano ya Banakristo alimwi amboyakazyi kukomena. Bbuku eeli lyakalembwa aamusilisi Luka lilaamba makani aamulimo wa Banakristo wakacitika mumyaka iili 28, ikutalikila mu 33 C.E. kusikila mu 61 C.E.
Cibeela cakusaanguna cigemi kwaamba mulimo wakakutauka mwaapostolo Petro, eelyo cibeela cimbi caamba mulimo wa Mwaapostolo Paulo. Kwiinda mukubelesya mabala mbuli aakuti “swebo” antela “aswebo,” Luka utondezya kuti wakaliko zyintu zimwi nozyakali kucitika. Kubikkila maanu kumulumbe uuli mubbuku lya Incito kuyootugwasya kulemeka nguzu zya Jwi lya Leza lilembedwe alimwi amuuya wakwe uusalala. (Heb. 4:12) Alimwi kuyootugwasya kuba amuuya wakulyaaba alimwi akuyumya lusyomo lwesu mubulangizi bwa Bwami.
PETRO WAZIBELESYA “ZIJALUZYO ZYA-BWAMI”
Mbubakatambwida buyo muuya uusalala, baapostolo bakakambauka cabusicamba. Petro wakacibelesya cimwi ‘cazijuzyo zya Bwami bwakujulu’ ikujalula mulyango waluzyibo alimwi akubapa coolwe cakuti banjile mu Bwami bama Juda alimwi abaabo bakasandulwa buya ‘ibakatambula makani aakwe.’ (Mt. 16:19; Inc. 2:5, 41) Kupenzyegwa ikwakaide kuvwundumuka kwakapa kuti basikwiiya bamwaikizyanye, pele eeci cakapa kuti mulimo wakukambauka usakane.
Baapostolo ku Jerusalemu nobakamvwa kuti bana Samariya balizumina Jwi lya Leza, bakatuma Petro alimwi a Johane ku Samariya. Petro wakabelesya cijaluzyo cabili ikupa bana Samariya coolwe cakuyoonjila mu Bwami. (Inc. 8:14-17) Ambweni mwakali mukati kamwaka ngomunya Jesu ngwaakabusyigwa, Saulo waku Tarso wacinca bukkale bwakwe akuba Munakristo. Mu 36 C.E., Petro wabelesya cijaluzyo catatu, aboobo muuya uusalala watilwa kubantu bamasi ibatapaludwe.—Inc. 10:45.
Kwiingula Mibuzyo Yamu Magwalo:
2:44-47; 4:34, 35—Nkaambo nzi ibakasyoma ncobakasambalila lubono lwabo akupa bantu mali ngobakajana? Ibunji bwabantu bakasyoma bakazwide mumasena mulamfwu-lamfwu alimwi tiibakajisi zyintu ziyandika zikkwene ikutegwa bazumanane kukkala mu Jerusalemu. Pele bakali kuyandisya kukkala mu Jerusalemu ikutegwa baiye makani aambi aajatikizya lusyomo lwabo lupya alimwi akukambaukila bantu bamwi. Ikutegwa babagwasye bantu aaba, Banakristo bamwi bakasambala lubono lwabo, eelyo mali bakaapa babulide.
4:13—Sena Petro a Johane tiibakayiide ncobeni? Peepe bakaliyiide. Bakategwa tabayiide akaambo kakuti tiibakaunkide kuzikolo zyabama Juda zyakwiiya makani aabukombi.
5:34-39—Ino Luka wakazyiba buti kuti Gamaliyeli wakaambaula mu Nkuta Mpati nobakali kupangana camaseseke? Kuli twaambo totatwe tulangilwa kuti ntotwakapa kuti azyibe: (1) Paulo iwakali sicikolo wa Gamaliyeli ngowakaambila Luka, (2) Luka wakabuzya kunkumekume imwi iijisi luse iyamu Nkuta Mpati, mbuli Nikodemo; (3) Luka wakaazyiba makani aaya kwiinda mukusololelwa amuuya wa Leza.
7:59—Sena Stefano wakali kupaila kuli Jesu? Peepe. Kukomba kwamuntu alimwi akupaila—kweelede kugamikwa buyo kuli Jehova Leza. (Lk. 4:8; 6:12) Kuboneka kuti Stefano wakali kupaila lyoonse kuli Jehova muzyina lya Jesu. (Joh. 15:16) Pele mukaambo aaka, Stefano wakabona cilengano ca “Mwana a-Muntu uliimvwi kululyo lwa-Leza.” (Inc. 7:56) Mbwaanga wakalizyi kabotu-kabotu kuti Jesu wakapegwa nguzu zyakubusya bafwide, Stefano wakaambaula kulinguwe, pele tanaakagamika mupailo wakwe kuli Jesu, ikumulomba kuti abubambe buumi bwakwe.—Joh. 5:27-29.
Ziiyo Kulindiswe:
1:8. Imulimo wakukambauka uucitwa nyika yoonse abakombi ba Jehova tuukonzyi kuzwidilila ikuti kakutako muuya uusalala.
4:36–5:11. Josefa waku Kupro wakapegwa zyina lyabausyi lyakuti Barnaba ilipandulula kuti “Mwana waluumbulizyo.” Ambweni baapostolo bakamupa zyina lyakuti Barnaba akaambo kakuti wakali mutete moyo, siluse alimwi uuyandisya kugwasya beenzyinyina. Tuleelede kuba mbuli nguwe ikutali mbuli Hananiya a Safira balo bakaba basikulicengeezya, basikuupaupa ameso akubelesya lweeno.
9:23-25. Ikubainda kumaanu basinkondoma ikutegwa tuzumanane kukambauka tabuli bukandu pe.
9:28-30. Ikuti kukambaukila mumaanda amwi ngotubambene limwi kukkala antela kubantu bamwi ibakonzya kutuuma, kutunyonganya mukulilemeka naa kumuuya, tweelede kucenjela alimwi akusala nkotweelede kukambaukila alimwi aciindi notweelede kukambauka.
9:31. Nokuli luumuno mucisi, tweelede kusolekesya kuyumya lusyomo lwesu kwiinda mukuliyiisya alimwi akuzinzibala kuyeeya. Eeci ciyootugwasya kuba bantu bayoowa Jehova kwiinda mukubelesya nzyotwiiya alimwi akuba basungu mumulimo.
BUSUNGU BWA PAULO MUMULIMO
Mumwaka wa 44 C.E., Agabo waunka ku Antiokeya kwalo Barnaba a Saulo nkobali kuyiisya “mwaka woonse.” Agabo wasinsima “nzala mpati” yalo yaba ncobeni nokwainda myaka yobilo. (Inc. 11:26-28) Barnaba a Saulo baunka ku Antiokeya ‘nobamana kutumina cakugwasya ku Jerusalemu.’ (Inc. 11:29, 30; 12:25) Mumwaka wa 47 C.E., nkokuti kakwiindide myaka iili 12 kuzwa ciindi Saulo naakasanduka, Barnaba alimwi a Saulo batumwa amuuya uusalala mulweendo lwabumisyinali. (Inc. 13:1-4) Mu 48 C.E. bapilukila ku Antiokeya, kwalo “nkobakapedwe kuluzyalo lwa-Leza kuya kumulimo ngobakamanide.”—Inc. 14:26.
Nokwainda myezi iili fwuka, Paulo (uujisi zyina lya Saulo) wasala Sila kuti kabeenda limwi, eelyo walutalika lweendo lwakwe lwabili. (Inc. 15:40) Timoteo alimwi a Luka baakuswaangana a Paulo munzila akweenda limwi. Luka wasyaala ku Filipi kakuli walo Paulo waampanya kugama ku Atene mane aku Korinto, kwalo nkwaakujana Akula a Priskila akukkala ambabo kwamwaka omwe acisela. (Inc. 18:11) Paulo wasiya Timoteo alimwi a Sila ku Korinto akubweza Akula alimwi a Priskila akuunka antoomwe kugama ku Aramu kumatalikilo kwamwaka wa 52 C.E. (Inc. 18:18) Akula alimwi a Priskila bakeenda antoomwe a Paulo mane kuyoosika ku Efeso kwalo ooko nkobakasyaala.
Naakkala-kkala kwamazuba aali mbwaabede ku Aramu yaku Antiokeya, Paulo wabamba lweendo lwatatu mu 52 C.E. (Inc. 18:23) Mu Efeso, ‘makani aajatikizya Jehova azumanana kukomena akuzunda anguzu.’ (Inc. 19:20) Myaka yotatwe yakulauka Paulo kali nkuko. (Inc. 20:31) Pentekoste yamu 56 C.E., Paulo yamujana mu Jerusalemu. Nobamwaanga buyo, wabakambaukila cakutayoowa beendelezi. Mu Roma, mwaapostolo ooyu wajalilwa muŋanda kaangidwe kwamyaka yobilo (c. 59-61 C.E.), eelyo kajalilidwe wajana nzila mbwakonzya kukambauka makani aa Bwami alimwi akuyiisya “makani aa-Mwami Jesu Kristo.”—Inc. 28:30, 31.
Kwiingula Mibuzyo Yamu Magwalo:
14:8-13—Nkaambo nzi bantu baku Lustro ncobaulika ‘Barnaba kuti Jupitere, eelyo Paulo ategwa Merkuri’? Jupitere ngowakali mweendelezi wabaleza muzyaano zyabana Giliki, eelyo mwanaakwe musankwa uutegwa Merkuri wakajisi mpuwo yakupasaula mukukanana. Akaambo kakuti Paulo ngowakali kusaanguna kukanana, bantu baku Lustro bakamuulika kuti Merkuri eelyo ategwa Barnaba ngu Jupitere.
16:6, 7—Nkaambo nzi muuya uusalala ncowakakasyila Paulo abeenzinyina kuti bakambauke mucooko ca Asiya alimwi a Bituniya? Kwakali buyo babelesi bali mbobabede mubusena oobu. Aboobo, muuya uusalala wakabatuma kuya mumasena bantu mobakali kuzumina kasimpe.
18:12-17—Nkaambo nzi mweendelezi Galiyo ncaatakamuvwuna Sostene nibakamuuma bantu? Ambweni Galiyo wakayeeya kuti iwakali kusololela nkamu yabantu bakali kulwana Paulo nguuli mukuumwa. Pele makani aaya aakacitika kuboneka kuti akagwasya nkaambo akapa kuti Sostene asanduke akuba Munakristo. Paulo wakazyi kwaamba Sostene kuti “mukwesu.”—1 Kor. 1:1.
18:18—Ino ncikonke nzi Paulo ncaakakonka? Basikwiiya Bbaibbele bamwi beezyeezya kuti wakakonka kuba mu Naziri. (My. 6:1-21) Pele Bbaibbele talyaambi cikonke Paulo ncaakakonka. Kunze lyaboobo, magwalo taambi naa cikonke eeci cakacitwa katanasanduka antela kasandukide kale, naa kuti wakali kucitalika buya antela kucileka. Kufwumbwa naa twaambo tuli buti, ikukonkezya ooko tiicakali cinyonyoono pe.
Ziiyo Kulindiswe:
12:5-11. Tulakonzya alimwi tweelede kubapailila bakwesu.
12:21-23;14:14-18. Heroda wakazumina bulemu bweelede kupegwa buyo kuli Leza. Elo kaka ncaakacita cakaindana acakacita Paulo a Barnaba balo bakakaka cakufwambaana alimwi cakusinizya kuti balumbaizyigwe akulemekwa! Tatweelede kuyandisya kulemekwa akaambo kakuzwidilila kuli koonse nkutwaba ankuko mumulimo wa Jehova.
14:5-7. Kusongwaala kulakonzya kutugwasya kuzumanana kuba basungu mumulimo.—Mt. 10:23.
14:22. Banakristo balaalangila mapenzi. Kunyina nobaayuba kwiinda mukuleka kusyoma nzyobasyoma.—2 Tim. 3:12.
16:1, 2. Banakristo bakubusi beelede kwiibeleka canguzu milimo yabo mumbungano alimwi akulomba lugwasyo kuli Jehova ikutegwa babe ampuwo mbotu.
16:3. Tweelede kubeleka canguzu kusikila mpotugolela kakunyina kusotoka njiisyo zyamu Magwalo ikutegwa bantu bakonzye kwaazumina makani mabotu.—1 Kor. 9:19-23.
20:20, 21. Kukambauka kuŋanda aŋanda kulayandika kapati mumulimo wesu.
20:24; 21:13. Kusyomeka lyoonse kuli Leza kulayandika kapati ikwiinda kulifwutula.
21:21-26. Tweelede kuti katulibambilide kuzumina lulayo lugwasya.
25:8-12. Banakristo mazuba aano balakonzya alimwi baleelede kwiibelesya milawo iiliko ‘mukusimpikizya makani mabotu.’—Flp. 1:7.
26:24, 25. Tweelede kwaambilizya “majwi aakasimpe akuziba” nokuba kuti ngabufwuba-fwuba ‘kumuntu wanyama.’—1 Kor. 2:14.
[Cifwanikiso icili apeeji 30]
Ino ndilili Petro naakabelesya “zijaluzyo zya-Bwami”?
[Cifwanikiso icili apeeji 31]
Imulimo uucitwa nyika yoonse iwakukambauka taukonzyi kuzwidilila ikuti kakunyina lugwasyo lwamuuya uusalala