Amubuzumine Bweendelezi Bwa Jehova
Amubuzumine Bweendelezi Bwa Jehova
“Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.”—1 JOH. 5:3.
1, 2. (a) Nkaambo nzi bantu banji makani aakulibombya kubweendelezi ncobaabona kuti taagwasyi? (b) Sena aabo baamba kuti tabayandi kweendelezyegwa baangulukide ncobeni? Amupandulule.
BANTU banji mazuba aano tabayandi kuti kabaambilwa cakucita amuntu. Bantu aabo batayandi kuzumina ziyanda beendelezi baamba kuti “taakwe muntu weelede kundaambila cakucita pe.” Pele sena bantu aaba baangulukide ncobeni? Peepe! Bunji bwabo batobela nzyobayanda bantu banji ibayandisya “ziyanza zyaciindi ecino.” (Rom. 12:2) Muciindi cakwaanguluka, “mbazike babubi,” kweelana ambwaakaamba mwaapostolo Munakristo Petro. (2 Pet. 2:19) Baleenda “cakutobela ziimbo zyaansi ano azyamweendelezi uujisi bwami bwakumuuwo,” Saatani Diabolosi.—Ef. 2:2.
2 Mulembi umwi cakulisumpula wakaamba kuti: “Tandizumini kweendelezyegwa abazyali bangu, mupaizi naa mupati wacikombelo naba mwiiyi wamakani aabukombi antela Ibbaibbele.” Kaambo aaka kalamvwika nkaambo bamwi bantu cuuno cabweendelezi tabaceenzyi kabotu, aboobo taceeleli kulibombya kuli mbabo pe. Pele sena kukakila limwi kweendelezyegwa ngomusamu? Kwiilanga buyo aniini mitwe yamakani iili mumiteende kupa bwiinguzi butakkomanisyi. Cilausisya kujana kuti muciindi bantu nobayandika kusololelwa, bunji bwabo tabazumini.
Mbotububona Bweendelezi
3. Ino mbuti Banakristo bamumwaanda wamyaka wakusaanguna mbobakatondezya kuti tiibakali kwiide kulibombya kubeendelezi?
3 Mbotuli Banakristo, zyintu tuzibona munzila yiindene kapati abantu bamunyika. Tacaambi kuti twiide kucita buyo kufwumbwa ncotwaambilwa pe. Ziindi zimwi tweelede kukaka kucita nzyobayanda bantu nokuba kuti inga kabali beendelezi. Banakristo bamumwaanda wamyaka wakusaanguna abalo mbobakacita oobo. Mucikozyanyo, baapostolo nobakaambilwa kuleka kukambauka, kunyina nobakazitobela nzyaakaamba mupaizi mupati alimwi abeendelezi ibakali kubelekela mu Nkuta Mpati. Tiibakacileka pe kucita zyintu munzila yeelede ikutegwa kuti batobele ziyanda beendelezi.—Amubale Incito 5:27-29.
4. Ino nzikozyanyo nzi zizwa mu Magwalo aa Chihebrayo zitondezya kuti bunji bwababelesi ba Leza tiibakali kucita kufwumbwa nzyobayanda bantu?
4 Babelesi ba Leza banji bamumazuba aayo Jesu katanaboola anyika mbobakakanza kucita abalo. Mucikozyanyo, Musa wakakaka “kwaambwa kuti mwana wamwana wa-Farao. Wakasala kupenzegwa antoomwe abantu ba-Leza,” nokuba kuti kucita boobu kwakabusya “bukali bwamwami.” (Heb. 11:24, 25, 27) Josefa wakakukaka koongelezya kwamukaintu wa Potifara walo wakazumanana kuti boonane, nokuba kuti wakalizyi kuti mukaintu ooyu wakalijisi nguzu zyakukonzya kumupenzya. (Matl. 39:7-9) Daniele “wakalibeteka mumoyo wakwe kuti atalisofwaazyi azilyo zinono zyamwami,” nokuba kuti ntaamu njaakabweza mumakani aaya tiiyakali kukonzya kupa kuti mupati wankuta yaku Babuloni aazumine makani aayo. (Dan. 1:8-14) Zikozyanyo eezyi zitondezya kuti kuzwa kaindi bantu ba Leza tabazungaani pe caboola kumakani aakucita cintu ciluzi, kufwumbwa naa ncinzi cakali kunga catobela. Tiibakali kwiide kutobela pe kufwumbwa bantu ncobaamba kutegwa kuti babakkomanisye; andiswe tatweelede kwiide kutobela pe.
5. Ino mbotububona bweendelezi swebo kwiindene buti akwabantu bali munyika?
5 Ikwiima kwesu cakutazungaana takuswaangene pe akwabantu bajisi cimpangwe; antela kukukozyanisya akwabantu bazanga kutegwa batondezye kuti tabazizumini zicitwa mutwaambo twacisi. Muciindi caboobo swebo tukanzide kuzumina bweendelezi bwa Jehova kutali bwamuntu uuli woonse pe. Ikuti milawo yamuntu yatalika kukazyanya amilawo ya Leza, swebo twakasala kale ncotweelede kucita. Mbubwenya mbuli mbobakacita baapostolo bamumwaanda wamyaka wakusaanguna, tumvwida Leza kwiinda bantu.
6. Ino nkaambo nzi ncocili cibotu lyoonse ikuswiilila malailile aa Jehova?
6 Ino ncinzi catugwasya kubuzumina bweendelezi bwa Leza? Tutobela caambwa kubbuku lya Tusimpi 3:5, 6 kuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.” Tusyoma kuti kufwumbwa Leza ncayanda kuti tucite ciyoogwasya ndiswe. (Amubale Deuteronomo 10:12, 13.) Ee, Jehova wakalipandulula kubana Israyeli kuti, “ndime uukwiiyisya kuti ugwasigwe. Ndime uukweenzya munzila njoelede kutola.” Amane wakayungizya kuti: “Nicakabota niwakaswiilila milazyo yangu! Lino luumuno lwako nilwakaba mbuli mulonga, abululami bwako nibwakaba mbuli mayuwe aalwizi.” (Is. 48:17, 18) Tulaasyoma majwi aaya. Tulizyi kabotu kuti lyoonse tulagwasyigwa ikuti twatobela malailile aa Leza.
7. Nokuba kuti tiitwakamvwisya kaambo Jwi lya Leza ncolitulailila kucita cintu cimwi, ino nkaambo nzi ncotweelede kucicita?
7 Tulazumina kusololelwa a Jehova alimwi tulamuswiilila nokuba kuti tatukazyi kabotu kaambo ncotweelede kucitila zyintu zimwi zili mu Jwi lyakwe. Ooku takuli kusyoma zyamumudima pe; nkusyoma kwini-kwini. Citondezya kusyoma camoyo woonse kuti Jehova ulizyi cintu cikonzya kutugwasya. Kulibombya kwesu alimwi ncitondezyo caluyando ndotujisi, kayi mwaapostolo Johane wakalemba kuti: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.” (1 Joh. 5:3) Pele kuli cibeela acimbi cakulibombya ncotuteelede kuubya-ubya.
Kuyiisya Miyeeyo Yesu
8. Ino mbuti kuyiisya “miyeeyo” yesu mbokuswaangene akuzumina bweendelezi bwa Jehova?
8 Ibbaibbele litwaambila kuti tweelede kuba “amiyeeyo iyakaiisigwa kusala cibotu ecibi.” (Heb. 5:14) Aboobo, mbaakani yesu taili yakuswiilila Leza cakwiinzya buyo mulawo; muciindi caboobo, tuyanda kuti tucikonzye “kusala cibotu ecibi” kwiinda mukubelesya zyeelelo zya Jehova. Tuyanda kuti tubone busongo ibuli munzila zya Jehova ikutegwa twaambe mbuli mbwaakaamba sintembauzyo kuti: “Mulao wako uli mumoyo wangu.”—Int. 40:8.
9. Ino mbuti mbotukonzya kweendelanya manjezeezya eesu azyeelelo zya Jehova, alimwi nkaambo nzi ncociyandika kuti tucite boobo?
9 Ikutegwa tubone mboiyandika milawo ya Leza mbuli bwakacita sintembauzyo, tweelede kuzinzibala kuyeeya nzyotubala mu Bbaibbele. Mucikozyanyo, twazyiba zyintu zimwi nzyayanda Jehova, ambweni inga twalibuzya kuti: ‘Nkaambo nzi malailile naa njiisyo eeyi ncoili yabusongo? Nkaambo nzi kwiitobela ncokukonzya kundigwasya? Ino mbubi nzi bwakacitikila baabo bakawiika lulayo lwa Leza mukaambo aaka?’ Ikuti manjezeezya eesu ayendelana anzila zya Jehova, ikusala kwesu kulalangilwa kweendelana akuyanda kwakwe. Tulakonzya “kumvwisya mbulubede luyando lwa-[Jehova],” eelyo akuyandisya kuba bantu baswiilila. (Ef. 5:17) Eeci tacili cintu cuuba-uba lyoonse pe.
Saatani Uyandisya Kunyonganya Bweendelezi bwa Leza
10. Ino ndubazu nzi Saatani ndwabelesya nasola kunyonganya bweendelezi bwa Leza?
10 Kuzwa kaindi Saatani wali kuyandaula nzila mbwakonzya kunyonganya bweendelezi bwa Leza. Imuuya wakuyandisya lwaanguluko ngwajisi ulalibonya munzila zinji. Mucikozyanyo, amuyeeye buyo makani aajatikizya kutalemeka lukwatano ilwakatalisyigwa a Leza. Bantu bamwi basala buyo kukkala antoomwe kakunyina kukwatana mumulawo, kakuli bamwi basoleka kuyandaula nzila yakulekanina. Bantu bali mubukkale buli boobu inga bazizumina zyakaamba mukaintu umwi sizisobano iwakaamba kuti: “Kukwatana buyo amuntu omwe tacikonzyeki pe.” Wakayungizya kuti: “Tandizyi naa kuli muntu uusyomeka kumweenzinyina wamulukwatano antela uuyanda kusyomeka.” Naakayeeya kutazwidilila kwakwe mulukwatano, umwi mulombwana sizisobano uujisi mpuwo wakaamba kuti: “Tandizyi kabotu naa mmasimpe kuti twakalengwa katulangila kukwatana buyo amuntu omwe mubuumi bwesu boonse.” Inga catugwasya kulibuzya kuti, ‘Sena ndilazumina kweendelezyegwa a Jehova caboola kumakani aalukwatano, antela ndiliyungidwe akuyeeya kwabantu bali munyika ibaamba kuti lukwatano talweelede kukkalilila?’
11, 12. (a) Nkaambo nzi ncocikonzya kubayumina bakubusi ikuzumina bweendelezi bwa Jehova? (b) Amuluule cakacitika icitondezya bufwubafwuba bwakuyalampya milawo alimwi anjiisyo zya Jehova.
11 Sena nywebo muli bakubusi ibali mumbunga ya Jehova? Ikuti naa mboobo, Saatani uyanda kuti muyeeye kuti bweendelezi bwa Jehova tabuluzi pe. “Zisusi zyabwanike” kubikkilizya akuyungwa abeenzinyoko zilakonzya kumupa kuti mutalike kuyeeya kuti milawo ya Leza ilakatazya kutobela. (2 Tim. 2:22) Tamweelede kutalika kuyeeya boobu pe. Amusole kubona mbozigwasya zyeelelo zya Leza. Mucikozyanyo, Ibbaibbele limwaambila kuti “amucije bwaamu.” (1 Kor. 6:18) Awaawa amulibuzye mibuzyo eeyi: ‘Nkaambo nzi malailile aaya ncaagwasya? Ino kutobela malailile aaya inga kwandigwasya buti?’ Ambweni kuli mbomuzyi buya bakayalampya lulayo lwa Leza, pele ibakacitikilwa zyintu zibyaabi. Sena masimpe balikkomene lino? Sena bapona buumi bubotu lino kwiinda mbobakali kupona nobakali mumbunga ya Jehova? Sena bakajana nzila iiletela lukkomano yalo babelesi ba Leza boonse njobatanajana?—Amubale Isaya 65:14.
12 Amubone majwi akaambwa a Munakristo uutegwa Sharon kaindi: “Akaambo kakutatobela mulawo wa Jehova, bulwazi bujaya ibwasikalileke bwakandinjila. Kanji-kanji ndilayeeya myaka minji njindakali kukkomana kubelekela Jehova.” Wakazyiba kuti wakafwubaala kusotoka milawo ya Jehova yalo njaakeelede kutobela. Milawo ya Jehova ibambilidwe kukwabilila ndiswe. Sharon wakafwa nokwakainda buyo nsondo zili ciloba kuzwa ciindi naakamana kulemba majwi aaya. Kweelana ambocitondezya cakamucitikila cuusisya, Saatani kunyina cibotu ncayanda kuti bajane aabo ibaba kulubazu lwabweende oobu bubyaabi. Mbwaanga “ngowisi wababeja,” ulasyomezya zyintu zinji, pele tazizwidilili pe, mbubonya mbuli mbwaakacita kuli Eva. (Joh. 8:44) Masimpe, lyoonse cilagwasya kubuzumina bweendelezi bwa Jehova.
Amukucenjelele Kuyandisya Lwaanguluko
13. Ino mmuucibeela nzi motweelede kuucenjelela muuya wakuyandisya lwaanguluko?
13 Notubuzumina bweendelezi bwa Jehova, tuyandika kuucenjelela muuya wakuyandisya lwaanguluko. Kulisumpula kulakonzya kutupa kulimvwa kuti taakwe weelede kutusololela pe. Mucikozyanyo, tulakonzya kukaka kulaigwa abaabo beendelezya akati kabantu ba Leza. Leza wakabikka bubambe bwalo muzike musyomesi uucenjede mbwapeda cakulya cakumuuya muciindi ceelede. (Mt. 24:45-47) Tweelede kuzyiba kuti eeyi njenzila Jehova mbwalanganya bantu bakwe mazuba aano. Amube mbuli baapostolo basyomeka. Basikwiiya bamwi nobakatyompwa, Jesu wakabuzya baapostolo kuti: “Sena anywebo mulainka?” Petro wakaingula kuti: “Omwami, tuye kuli? Nduwe oojisi majwi aabuumi ubutamani.”—Joh. 6:66-68.
14, 15. Nkaambo nzi ncotweelede kuluzumina amoyo woonse lulayo luzwa mu Bbaibbele?
14 Kuzumina kweendelezyegwa a Jehova kulabikkilizya akuzumina lulayo luzwa mu Jwi lyakwe. Mucikozyanyo, muzike musyomesi uucenjede ulatucenjezya kuti ‘katulinda akuba bapakamani.’ (1 Tes. 5:6) Lulayo oolu lulayandika kapati mumazuba aano aakumamanino ibantu nobali “basikuliyanda, basimuyanda mali.” (2 Tim. 3:1, 2) Sena tulakonzya kunyonganyizyigwa abukkale oobu budumide? Inzya. Mbaakani zyakumubili zilakonzya kutupa koona kumuuya antela kutalika kuyandisya lubono lwakumubili. (Lk. 12:16-21) Aboobo, cilagwasya kapati kuzumina lulayo luzwa mu Bbaibbele akutantamuka bukkale bwakuliyanda bwalo buvwulide kapati munyika ya Saatani.—1 Joh. 2:16.
15 Cakulya cakumuuya cizwa kumuzike musyomesi uucenjede cilapegwa mumbungano kwiinda mubaalu babikkidwe. Ibbaibbele litulailila kuti: “Kamubaswiililisya baalu banu, mulitesye kulimbabo, nkaambo mbabalangilila myuuya yanu, alimwi babaanga basikuyoolyaambilila lwabo beni. Amusungwaale kuti kabacita boobo cakubotelwa citali cakuusa, nkaambo eco tacimuleteli kululama pe.” (Heb. 13:17) Pele sena eeci cipandulula kuti baalu bamumbungano tabakonzyi kulubizya? Peepe! Leza ulakubona kulubizya nkobacita ikwiinda muntu uuli woonse. Pele uyanda kuti katulibombya kulimbabo. Kweendelana abaalu, nokuba kuti tabalondokede, ncitondezyo cakuti tulabuzumina bweendelezi bwa Jehova.
Ncokuyandika Kulibombya
16. Ino mbuti mbotukonzya kutondezya bulemu kuli Jesu mbwali ngo Mutwe wambungano ya Banakristo?
16 Lyoonse tweelede kuyeeya kuti Jesu ngo Mutwe wini-wini wambungano. (Kol. 1:18) Aaka nkakaambo kamwi ikeelede kutupa kutobela malailile aapegwa abaalu babikkidwe, ‘ikubalemeka loko.’ (1 Tes. 5:12, 13) Kwaamba masimpe, abalo baalu bamumbungano balakonzya kutondezya kuti balalibombya kwiinda mukubikkila maano kutegwa bape mulumbe wa Leza kumbungano kutali mizeezo yabo. Tabaindilizyi ali “ayo makani aalembedwe” kutegwa basumpule mizeezo yabo.—1 Kor. 4:6.
17. Nkaambo nzi muuya wakuyandisya kweendelezya ncoutali kabotu?
17 Bantu boonse ibali mumbungano beelede kucenjela kutegwa batanjili muntenda iboola akaambo kakulisumpula. (Tus. 25:27) Kuboneka kuti nkakakali kakole kakacega sikwiiya umwi imwaapostolo Johane ngwaakaswaanganya. Wakalemba kuti: “Diotrefe oyo uuyanda kuba mupati akati kabo, tatutambuli. Elyo, na ndasika, nzooyeeya milimo yakwe njacita, naamba majwi mabi kulindiswe.” (3 Joh. 9, 10) Kuli ciiyo ncotukonzya kwiiya andiswe mazuba aano. Kaambo aaka kalakonzya kutugwasya kutegwa tuleke kuyeeya mizeezo yakuyandisya kweendelezya ikuti naa kuli njotujisi. Ibbaibbele litwaambila kuti: “Kulisumpula kulazulwida lunyonyooko, akamikami kali kunembo lyakuwa.” Aabo bazumina kweendelezyegwa a Leza beelede kukutantamuka kulisumpula, nkaambo kutacita boobo kuletela kuusa.—Tus. 11:2; 16:18.
18. Ino ncinzi ciyootugwasya kubuzumina bweendelezi bwa Jehova?
18 Masimpe, amukanze kukaka muuya wamunyika wakuyandisya lwaanguluko, pele amuzumine kweendelezyegwa a Jehova. Lyoonse kamuzinzibala kuyeeya coolwe cipati ncomujisi icakubelekela Jehova. Ikuba akati kabantu ba Leza ncitondezyo cakuti wakamukwela kwiinda mumuuya uusalala. (Joh. 6:44) Tamweelede kucuubya-ubya cilongwe ncomujisi a Leza. Amusoleke canguzu mubuumi bwanu ikukaka muuya wakuyandisya lwaanguluko, pele amuzumine kweendelezyegwa a Jehova.
Sena Muciyeeyede?
• Ino kuzumina bweendelezi bwa Jehova kubikkilizya nzi?
• Ino mbuti kuyiisya miyeeyo yesu mbokuswaangene akuzumina bweendelezi bwa Jehova?
• Ino muumbazu nzi Saatani mwasola kunyonganya bweendelezi bwa Leza?
• Nkaambo nzi kulibombya ncokuyandika kumuntu uuzumina kweendelezyegwa a Jehova?
[Mibuzyo yaciiyo]
[Cifwanikiso icili apeeji 18]
“Tuleelede kumvwa Leza kwiinda bantu”
[Cifwanikiso icili apeeji 20]
Cilagwasya lyoonse kutobela zyeelelo zya Leza