Amulujatisye “Luyando Lwa[nu] Lwakusaanguna”
Amulujatisye “Luyando Lwa[nu] Lwakusaanguna”
“Jatisya eco ncojisi.”—CIY. 3:11.
1, 2. Ino mwakalimvwa buti ciindi nomwakasinizya kuti zyintu nzyomwakali kwiiya kujatikizya Jehova kakali kasimpe?
SENA mulayeeya ciindi cakusaanguna nomwakamvwa kujatikizya bulangizi butaliboteli Jehova mbwapede bantu bamumvwida? Ikuti mwakali kuzulilwa mucikombelo cimbi, ino mwakalimvwa buti ciindi nomwakapandulwidwa makanze aa Leza kwiinda mukubelesya Magwalo naa ciindi njiisyo zyakali kumukatazya kumvwa nozyakasalazyigwa kulindinywe? Ambweni mwakazyiba kuti tiimwakayiisyigwa kasimpe kujatikizya Leza. Pele lino mulikkomene kaka kuti mwakakazyiba kasimpe! Ikuti naa mwakakomezyegwa abazyali Banakristo, sena mulayeeya mbomwakalimvwa ciindi nomwakasinizya kuti nzyomwakali kwiiya kujatikizya Jehova kakali kasimpe mpoonya mwakasala kupona kweelana anzyomwakali kwiiya?—Rom. 12:2.
2 Ibakwesu banji mumbungano inga bamwaambila kuti bakalimvwa kukkomana kapati, kuba aacilongwe a Jehova alimwi akulumba kuti wakabakwelela kulinguwe. (Joh. 6:44) Lukkomano lwabo lwakabapa kuti batole lubazu mumilimo ya Bunakristo. Bakalikkomene kapati cakuti bakayanda kwaambila bantu boonse mbobakali kulimvwa. Sena andinywe mbomwakalimvwa oobo?
3. Ino imbungano yaku Efeso yakali muciimo cili buti ciindi Jesu naakabatumina mulumbe?
3 Jesu naakali kwaambila mbungano ya Banakristo bamumwaanda wamyaka wakusaanguna yaku Efeso, wakaamba kujatikizya “luyando lwa[nu] lwakusaanguna.” Bana Efeso bakajisi bube bubotu bunji, pele luyando ndobakajisi kusaanguna kuli Jehova lwakalimanide. Aboobo, Jesu wakabaambila kuti: “Ndizi milimo yako mbwiibede, amapakasyo aako, akukakatila kwako. Ndizi moyo wako mbuutakonzyi kubotelwa babi, ambuwakabasoleka aba balyaamba kuti mbaapostolo, nekubaboobo tabali baapostolo, aboobo wabajana kuti mbabeji. Ndizi kuti ulijisi lukakatilo, alimwi wakalemenwa nkaambo kazina lyangu, nekubaboobo tokwe nowakalengaana. Pele mulandu umwi ngunjisi kulinduwe ngooyu, wakuti wakaleka luyando lwako lwakusaanguna.”—Ciy. 2:2-4.
4. Ino nkaambo nzi mulumbe wa Jesu kubana Efeso ncouyandika kapati mazuba aano?
4 Lulayo lwa Jesu kubana Efeso alimwi akumbungano zimbi nzyaakalembela mubbuku lya Ciyubunuzyo luleelela kweelana abukkale bwakaliko kwaciindi cili mbocibede akati ka Banakristo bananike kuzwa mu 1914 kuya kumbele. (Ciy. 1:10) Nokuba boobo, cilakonzyeka kuti noliba lino Banakristo bamwi inga baleka kuba “[aa]luyando lwa[bo] lwakusaanguna” ndobakajisi kuli Jehova alimwi akukasimpe ka Bunakristo. Katwaayeeyede makani aaya, atulange-lange mbotukonzya kubamba, kubukulusya alimwi akulukomezya luyando abusungu mbotwakajisi kuli Leza alimwi akukasimpe kwiinda mukwiibaluka alimwi akuzinzibala kuyeeya kujatikizya zyakatucitikila.
Ino Ncinzi Cakamupa Kusinizya Kuti Nkomwakaiya Nkasimpe?
5, 6. (a) Ino ncinzi Munakristo aumwi ncayelede kusinizya? (b) Ino ncinzi cakapa kuti musinizye kuti Bakamboni ba Jehova bayiisya kasimpe? (c) Ino ncinzi cikonzya kugwasya muntu kubukulusya luyando ndwaakajisi kusaanguna?
5 Muntu uuli woonse uulyaaba kuli Jehova weelede kusaanguna ‘kusimpikizya’ “makani ngaayanda Leza, makani mabotu aatambulika aalondokede.” (Rom. 12:1, 2) Cimwi cazyintu zibikkilizidwe mukucita boobo nkwiiya ncoliyiisya Bbaibbele. Cipa muntu umwi kusinizya kuti Bakamboni ba Jehova bayiisya kasimpe cilakonzya kwiindana kumuntu uumbi. Bamwi baibaluka kuti kucinca kwabo kwakacitika ciindi nobakabala zyina lya Leza mu Bbaibbele naa nobakaiya kasimpe kujatikizya ciimo cabafwu. (Int. 83:18; Muk. 9:5, 10) Icakakulwaizya bamwi nduyando lujanika akati kabantu ba Jehova. (Joh. 13:34, 35) Kakuli bamwi bakazyiba ncocaamba kutaba banyika. Bakazyiba kuti Banakristo bakasimpe tabeelede kutola lubazu mumazwanga aatwaambo twacisi naa munkondo zyacisi cili coonse.—Is. 2:4; Joh. 6:15; 17:14-16.
6 Kubantu banji, kuzyiba twaambo ootu alimwi atwaambo tumbi twakasimpe nkokwakapa kuti babe aaluyando lwakusaanguna kuli Leza. Amukkale ansi akuyeeya cakapa kuti nywebo mukasyome kasimpe. Muntu aumwi ulijisi bukkale alimwi abube bwiindene kuli umwi, aboobo twaambo twakamupa kuti mumuyande Jehova alimwi akusyoma muzisyomezyo zyakwe tweelede kuti tuliindene antobajisi bambi. Cakutadooneka, twaambo ntomunya ootu tweelede kuti tucibeleka asunu mbuli mbocakabede nomwakatwiiya. Kasimpe takacincide pe. Aboobo, kulanga-langa mbomwakali kuyeeya alimwi akulimvwa kulakonzya kubukulusya luyando ndomwakajisi kukasimpe.—Amubale Intembauzyo 119:151, 152; 143:5.
Amuluyumye Luyando Lwanu Lwakusaanguna
7. Ino nkaambo nzi ncotuyandika kuyumya luyando ndotwakajisi kusaanguna kukasimpe, alimwi mbuti mbotukonzya kucita oobo?
7 Ambweni nzinji zyacinca mubuumi bwanu kuzwa nomwakalyaaba kuli Jehova. Luyando lwanu lwakusaanguna kukasimpe lwakali kuyandika, pele mukuya kwaciindi, mwakali kuyandika kuluyumya luyando kutegwa mucikonzye kuliyumya mubukkale bupya ibukonzya kusunka lusyomo lwanu. Nokuba boobo, Jehova wakamugwasya. (1 Kor. 10:13) Aboobo, izyakamucitikila mubuumi kwamyaka minji azyalo nzyintu ziyandika kapati kulindinywe. Zyamugwasya kuyumya luyando ndomwakajisi kusaanguna, alimwi nenzila imwi njomukonzya kusinizya bubotu bwaluyando lwa Leza.—Jos. 23:14; Int. 34:8.
8. Ino mbuti Jehova mbwaakalizyibya kuli Musa, alimwi mbuti bana Israyeli mbobakamuzyiba kabotu Leza?
8 Mucikozyanyo, amuyeeye bukkale mobakajanika bana Israyeli ciindi Jehova naakaamba makanze aakwe aakubanununa mubuzike ku Egepita. Leza wakalizyibya kuli Musa naakati: “Ndiyooba kufwumbwa mbweyooba.” (Kul. 3:7, 8, 13, 14, NW) Eeci caamba kuti, Jehova wakali kwaamba kuti uyooba kufwumbwa ciyandika kutegwa aangunune bantu bakwe. Kwiinda muzyintu zyakatobela alimwi kweelana abukkale bwakaliko, bana Israyeli bakabona Jehova katondezya bube bwakwe bwiindene-indene—kali Singuzuzyoonse, Mubetesi, Musololi, Mufwutuli, Silumamba alimwi a Mwaabi.—Kul. 12:12; 13:21; 14:24-31; 16:4; Neh. 9:9-15.
9, 10. Ino mbukkale buli buti bukonzya kugwasya muntu kumuzyiba Leza, alimwi nkaambo nzi ncociyandika kuziyeeya zyintu eezyi zyakamucitikila?
9 Bukkale bwanu buliindene abwabana Israyeli bansiku. Nokuba boobo, kweelede kuti kuli zyintu zyakamucitikila mubuumi zyakamupa kusinizya kuti Leza ulamubikkila maano kumugama, calo cakayumya lusyomo lwanu. Ambweni Jehova munzila imwi wakaba kulindinywe Mwaabi, Sikuumbulizya naa Mwiiyi. (Amubale Isaya 30:20b, 21.) Ambweni kuli zyakamucitikila izyakatondezya kuba bwiinguzi kumupailo wanu. Andiza mwakajisi penzi limwi, mpoonya Munakristonyoko wakamugwasya. Naa kwiinda muciiyo canu nobeni mwakajana magwalo aakabeleka mubukkale bwanu.
10 Ikuti mwaluuda bambi kujatikizya zyakamucitikila eezyi, bamwi inga tabakonzyi akukulwaizyigwa mbuli mbozyakamukulwaizya. Kayi zyintu eezyi taali maleele pe. Pele muzibona kuti zilayandika kapati kulindinywe. Masimpe, Jehova wakaba mbwaakali kuyandika kulindinywe. Amuyeeye myaka njomwakkala mukasimpe. Sena mulakonzya kwiibaluka ziindi zili mbozibede nomwakalimvwa kuti Jehova wakamubikkila maano mubuumi? Ikuti naa mboobo, kuyeeya zyintu zyakamucitikila alimwi ambozyakamupa kulimvwa kulakonzya kubukulusya luyando lwakusaanguna ndomwakajisi kuli Jehova. Zyintu eezyo zyakamucitikila amuzibone kuba zyintu ziyandika kapati. Amuzinzibale kuyeeya aali nzinzyo. Nzitondezyo zyakuti Jehova ulamubikkila maano nywebo kumugama, alimwi taakwe uukonzya kumulesya kuba aalusinizyo luli boobo.
Amulilingule
11, 12. Ino ncinzi cinga capa kuti luyando lwa Munakristo kujatikizya kasimpe lumane, alimwi ino Jesu wakapa lulayo luli buti?
11 Ikuti tamujisi luyando kuli Leza alimwi akukasimpe kweelana andomwakajisi kusaanguna, mutayeeyi kuti kuli cicincide kujatikizya Leza. Jehova tacinci pe. (Malk. 3:6; Jak. 1:17) Ulamuyanda mbuli mbwaakali kumuyanda musyule. Aboobo, ikuti naa kuli cakacinca mucilongwe canu a Jehova, ino ncinzi? Sena cimukatazyide nkulibilika kujatikizya zyintu ziyandika mubuumi? Ambweni musyule mwakali kupaila lyoonse, kuba aaciiyo lyoonse alimwi akuzinzibala kuyeeya ciindi coonse. Sena mwakali basungu mumulimo alimwi akujanika kumiswaangano ciindi coonse kwiinda mbomucita lino?—2 Kor. 13:5.
12 Mwamana kulilingula inga tamukonzyi kubona kucinca kuli koonse, pele ikuti kuli kucinca, ino ncinzi cakapa kuti zibe boobo? Sena kulibilika kujatikizya kulanganya ziyandika zyamukwasyi, buzumi bwanu, naa zimwi zili boobu nkokwapa kuti mucileke kupakamana kujatikizya kuswena kwabuzuba bwa Jehova? Jesu wakaambila baapostolo bakwe kuti: “Amukalilangisye, kuti ambweni myoyo yanu ilalengaala nkaambo kabulyatu, abukolwi, amakataazyo aabuumi buno, abuzuba obuya nobuyoomutilimuna mbuli kooze. Nkaambo buyoobasikila boonse abakala ansi. Pele amulinde lyoonse, mukombe, kuti mukakonzye kuyokoka kuzintu zyoonse ezi iziyoocitika.”—Lk. 21:34-36.
13. Ino Jakobo wakakozyanisya Jwi lya Leza kunzi?
13 Sikulemba Bbaibbele wakasololelwa amuuya Jakobo, wakaambila basyominyina kuti balilingule cakusinizya kubelesya Jwi lya Leza. Jakobo wakalemba kuti: “Amube basikucita makani, mutabi basikuswiilila buyo balyeena. Ikuti na muntu ngusikuswiilila buyo, pele tali sikucita makani, ulikozyene amuntu uulilanga mucimboni kubusyu mbwaakalengwa abo, nkaambo amana kulilanga, ulainka, elyo ulafwambaana kuluba mbwabede. Anukuti uusondela mumulao mulondosi wabulubusi, akukakatila kulinguwo, mbwaatali sikuswiilila amatwi buyo uuluba pele sikumana mulimo, ngonguwe uuti longezegwe mukucita kwakwe.”—Jak. 1:22-25.
14, 15. (a) Ino mbuti Bbaibbele mbolikonzya kumugwasya kuyaambele kumuuya? (b) Ino mmibuzyo iili njomweelede kuyeeyesya?
14 Muntu ulakonzya kubelesya cimboni-mboni kutegwa asinizye kuti ulibonya kabotu. Mucikozyanyo, ikuti mwaalumi wabona kuti tayi wakwe takkede kabotu, ulakonzya kuululamika. Ikuti mukaintu wabona kuti masusu aakwe taabambidwe kabotu, ulakonzya kwaakamuna. Mbubwenya buyo, Magwalo alatugwasya kulilingula. Ciindi twalikozyanisya tobeni kweelana ancolyaamba Bbaibbele kujatikizya mbotweelede kuba, nkokuti tulalibelesya mbuli cimboni-mboni. Pele ino kulakonzya kuba mpindu nzi yakulilanga mucimboni-mboni ikuti naa tiitwabambulula cintu cilubide ncotwabona? Inga caba camaano ikuti twacita kweelana ancotubona “mumulawo mulondosi,” ikuba ‘basikuucita.’ Aboobo, muntu uuli woonse wabona kuti luyando ndwaakajisi kusaanguna kuli Jehova akukasimpe lwaceya, weelede kuzinzibala kuyeeya mibuzyo eeyi: ‘Ino mapenzi nzi ngondijisi mubuumi, alimwi ino ncinzi ncondicita kutegwa ndiliyumye? Ino musyule ndakacita buti? Sena kuli cimwi cacinca? Ikuti kulilingula ooku kwatondezya kuti kuli kulezya kumwi, mutakulangi buyo. Ikuti kuli muyandika kubambulula, amucite oobo cakufwambaana.—Heb. 12:12, 13.
15 Alimwi kuzinzibala kuyeeya kuli boobu kulakonzya kumugwasya kuba ambaakani iikonzyeka kutegwa muyaambele kumuuya. Mwaapostolo Paulo wakapa lulayo lwakasololelwa amuuya kuli similimonyina Timoteo kujatikizya mbwakonzya kuzwidilila mumulimo wakwe. Paulo wakakulwaizya mukubusi ooyu kuti: “Sungwaala kuzintu ezi, ulitakate kulinzizyo amoyo wako woonse, kuti bantu boonse babone mboya bukomena mumilimo yako.” Kwiinda mukubelesya Jwi lya Leza, andiswe tweelede kusungwaala kuyeeya ikuyaambele nkotukonzya kucita.—1 Tim. 4:15.
16. Ino nintenda iili buti njomweelede kuyeeya ciindi nomulilingula kubelesya Magwalo?
16 Ikulilingula kuli koonse kusinizyide kulakonzya kutondezya kulezya kumwi. Eeci inga camutyompya, pele mutacilekeli kuti cimucitikile. Kayi makanze aakulilingula ngakuyanda kubona motweelede kucinca. Mubwini, Saatani uyanda kuti Munakristo alimvwe kuti tayandiki akaambo kakutalondoka. Masimpe ngakuti wakamutamikizya Leza kuti takukkomanini kusola kuli koonse kwababelesi bakwe. (Job. 15:15, 16; 22:3) Ooku nkubeja nkwaakakazya Jesu; Leza ubona aumwi wesu kuti ulayandika kapati. (Amubale Matayo 10:29-31.) Ikuzyiba kutalondoka kwesu kweelede kutupa kukanza kucita kabotu, kwiinda mukugwasyigwa a Jehova. (2 Kor. 12:7-10) Ikuti kuciswa naa kucembaala kumupa kutacita kweelana ambomuyanda, amube ambaakani iikonzyeka. Pele tamweelede kucileka naa kulekela luyando lwanu kuti lumane.
Kuli Twaambo Tunji Tutupa [Kulumba]
17, 18. Ino nimpindu nzi zijanika akaambo kakuzumanana aluyando ndomwakajisi kusaanguna?
17 Kuli mpindu zinji ikuti twazumanana kuba aluyando ndotwakajisi kusaanguna. Mulakonzya kumuzyiba kapati Leza alimwi akulumba akaambo kabusolozi bwakwe. (Amubale Tusimpi 2:1-9; 3:5, 6.) Sintembauzyo wakaamba kuti: “Kuzibamba [imbeta zya Jehova] nkokuleta bulumbu bupati.” Alimwi wakati: “Bukamboni bwa-Jehova bulasyomeka, bulasongwaazya batezi.” Aboobo, “bali acoolwe baluleme munzila, beenda mumulao wa-Jehova.”—Int. 19:7, 11; 119:1.
18 Masimpe mulakonzya kuzumina kuti mulijisi twaambo tunji tweelede kumupa kulumba. Mulizyi twaambo nyika ncoili boobu mazuba aano. Mulagwasyigwa kuzyintu zyakumuuya zyoonse Leza nzyapa kubantu bakwe mazuba aano. Cakutadooneka, mulalumba alimwi kuti Jehova wamukwelela kumbungano yakwe yaanyika yoonse akumupa coolwe cakuba umwi wa Bakamboni bakwe. Amuyeeye buyo zilongezyo nzyomujisi! Ikuti mwazilemba apepa, lilakonzya kuzula lyoonse. Kucita oobo ciindi coonse kulakonzya kumugwasya kutobela lulayo oolu lwakuti: “Jatisya eco ncojisi.”—Ciy. 3:11.
19. Kunze lyakuzinzibala kuyeeya mbocibede cilongwe canu a Leza, ino nzyintu nzi zimwi ziyandika zikonzya kumugwasya kucibamba cilongwe eeco?
19 Kuzinzibala kuyeeya mbolwakomena lusyomo mumyaka yainda nintaamu yomwe ikonzya kumugwasya kujatisya ceeco ncomujisi. Imagazini eeyi cakwiinduluka-induluka yatwaambila zyintu zimwi ziyandika kapati zikonzya kutugwasya kuzumanana kubamba cilongwe cesu a Jehova. Akati kazyeezi, kuli mupailo, kujanika akutola lubazu kumiswaangano ya Bunakristo alimwi akutola lubazu cabusungu mumulimo wakukambauka. Eezyi zyintu zilakonzya kumugwasya kuzumanana kubukulusya luyando alimwi akulujatisya mbuli mbolwakabede kusaanguna.—Ef. 5:10; 1 Pet. 3:15; Jud. 20, 21.
Ino Inga Mwaingula Buti?
• Ino mbuti twaambo twakamupa kuti mumuyande Jehova mbotukonzya kumukulwaizya lino?
• Ino kuyeeya zyintu zyakamucitikila mubuumi kwamyaka yainda kulakonzya kumupa kuti musinizye nzi?
• Ino nkaambo nzi ncomweelede kulingula luyando lwanu ndomujisi kuli Leza?
[Mibuzyo yaciiyo]
[Cifwanikiso icili apeeji 23]
Ino ncinzi cakamukulwaizya akumupa kusinizya kuti aaka nkakasimpe?
[Cifwanikiso icili apeeji 25]
Sena kuli zyintu zimwi nzyomuyandika kubambulula?