Kuba Anguzu Nokuba Kuti Mulikompeme

KUKOMPAMA kwanu kulakonzya kumuzunda. Kulaluminina mbuli nsengele. Mulakonzya kubona mbuli kuti kunyina nomukonzya kukuzunda, cakunga mwalikozyanisya abantu bamwi mulibona kuti muliceede kule-kule. Kubbazu limwi, ambweni kuli bulwazi bukatazyide mbomuciswa bwalo bumupa kutyompwa mubuumi bwanu. Kufwumbwa naa kalakonzya kuba kaambo nzi, kalakonzya kumupa kulibona mbuli kuti mwapatila. Mulakonzya kulimvwa bwakalimvwa Jobu walo wakaamba kuti: “Necakali cibotu kuti wandisisa munyika yabafwide, kondibamba kumbali mane kunyema kwako kumane, elyo akundiyeeya casika ciindi.”—Job. 14:13.

Ino mbuti mbomukonzya kubuzunda bukkale oobu butyompya? Muleelede kucileka kuyeeya mapenzi aanu kwakaindi kaniini, nokuba kuti cilakatazya kucita boobo. Mucikozyanyo, mulakonzya kuyeeya mibuzyo yakasololelwa amuuya Jehova njaakabuzya mubelesi wakwe uusyomeka Jobu kuti: “Nendakaimika nyika wakali kuli yebo? Undivuwe kuti kozi. Ngwani wakeeleka migaano yayo, ulizi sa? Ngwani wakoololola lukole kulinjiyo?” (Job. 38:4, 5) Notuyeeya ncoipandulula mibuzyo eeyo, citupa kuzuminizya kuti Jehova ulijisi busongo buteeli alimwi anguzu izinji kapati. Ulijisi kaambo kabotu kamupa kuti bukkale oobu abuzumizye kuzumanana.

“Bumvwa Buyasa Mumubili”

Mubelesi uusyomeka aumbi wakalomba Jehova kuti amugusyile “bumvwa buyasa mumubili,” nkokuti penzi ilyakali kumuzumanana. Mwaapostolo Paulo wakakombelezya Leza ziindi zyotatwe kuti acigusye cakali kumukatazya. Kufwumbwa naa cakamukatazyide cakali nzi, mbubwenya mbuli bumvwa bupenzya, ambweni cakali kupa kuti Paulo katakkomani mumulimo wa Jehova. Penzi eeli Paulo wakalikozyanisya kucintu cipenzya lyoonse. Jehova wakamwiingula  kuti: “Luse lwangu lulikkwene, nkaambo nguzu zyangu zilalondoka mubuteteete.” Jehova tanaakabugusya pe bumvwa buyasa mumubili. Paulo wakazumanana kulwana apenzi eeli, pele wakayungizya kuti: “Ciindi nendili muteteete, ndendilyo nendaanguzu.” (2 Bakolinti 12:7-10, BT) Ino ncinzi ncaakali kupandulula?

Ipenzi lya Paulo kunyina nolyakamana camaleele pe. Pele tiilyakakonzya kumulesya kubeleka milimo mipati mumulimo wa Jehova. Paulo cakumaniina wakasyoma Jehova kuti ulamupa nzyayanda alimwi lyoonse wakali kumulomba kuti amugwasye. (Flp. 4:6, 7) Kumamanino kwamyaka yabuumi bwakwe anyika, Paulo wakati: “Ndakalwana inkondo imbotu, ndakalumana lweendo, alimwi ndakalubamba lusyomo.”—2 Tim. 4:7.

Jehova ubelesya baalumi batalondokede kutegwa nzyayanda zicitwe nokuba kuti balalezya alimwi balijisi mapenzi, eelyo bulemu bugama kulinguwe kwalo nkobweelede. Ulakonzya kubasololela alimwi akubapa busongo kutegwa baliyumye mumapenzi ngobajisi alimwi akujana lukkomano mumulimo wakwe. Masimpe, ulakonzya kubelesya bantu batalondokede kucita milimo mipati nokuba kuti balikompeme.

Paulo wakaamba kaambo kakapa kuti Leza atabugusyi bumvwa mumubili, ategwa: “Kuti ntakaind[i] kulisumpula.” (2 Kor. 12:7) “Bumvwa” bwakali muli Paulo bwakamupa kuzyiba kuti kuli mwalezya akumugwasya kuti azumanane kulicesya. Eeci cilikozyene ancaakayiisya Jesu cakuti: “Umwi aumwi uulisumpula uzoobombezegwa, pele umwi aumwi uulibombya uzoosumpulwa.” (Mt. 23:12) Masukusyo alakonzya kuyiisya babelesi ba Leza kulibombya alimwi akubagwasya kuzumina kuti, ikutegwa baliyumye ncobeni beelede kusyoma Jehova. Aboobo, mbubwenya mbuli mwaapostolo, balakonzya ‘kulikankaizya muli Jehova.’—1 Kor. 1:31.

Kukompama Kuyubide

Bantu bamwi inga kabatazyi mbobakompeme, mane buya balakazya kuti balikompeme. Mucikozyanyo, muntu ulakonzya kulinaamuna kwiinda mukulisyoma mwini. (1 Kor. 10:12) Kukompama akumwi kudumide akati kabantu batalondokede nkuyandisya kulemekwa.

Joabu iwakaba mupati wabasilumamba ba Mwami Davida wakali sicamba, uucizi kusala alimwi wakali cibwene kubamba twaambo. Pele Joabu wakacita zyintu zibi izyakatondezya kuti wakali kulisumpula akulisyoma lwakwe. Wakabajaya calunya bapati babasikalumba bobilo. Kusaanguna wakajolela kwiinda mukujaya Abineri. Amane boobo, kwiinda mukulicengeezya kwaanzya Amasa munyina, Joabu wakajata cilezu ca Amasa ajanza lyakwe lyalulyo mbuli kuti uyanda kumumyonta, eelyo wakamuyasa acceba lyakali kujanza lyalumwensyi. (2 Sam. 17:25; 20:8-10) Amasa ngowakalya busena bwa Joabu bwakuba mupati wabasilumamba, aboobo eeci nceciindi Joabu ncaakajana kutegwa ajaye wakamubwezela cuuno, kalipeekezya kuti ambweni ulapilusyigwa alimwi acuuno cakwe. Mulakonzya kubona kuti Joabu kunyina naakalijata pe, nokuba kuleka makanze aakuliyanda ngaakajisi. Wakacita zyintu calunya kakunyina kweempwa pe. Kakuceede buyo ciindi cisyoonto kuti Mwami Davida afwe, wakalailila mwana wakwe musankwa Solomoni kuti abone kuti Joabu wajaigwa akaambo kabukkale bwakwe bubyaabi.—1 Bam. 2:5, 6, 29-35.

Tatweelede kuzundwa amizeezo mibyaabi; tulakonzya kukuzunda kukompama kwesu. Cakusaanguna tweelede kuzyiba mpotukompeme akuzumina kuti tukompeme ncobeni. Kwamana boobo notweelede kubweza ntaamu yakululamika zyintu. Tulakonzya kupaila kuli Jehova lyoonse ikulomba kuti atugwasye kuzunda kukompama kwesu, alimwi akwiiya Jwi lyakwe cakusitikila akuyandaula nzila mbotukonzya kugusya mizeezo iitaluzi. (Heb. 4:12) Tweelede kuzumanana kubambulula motulezyede alimwi tatweelede kutyompwa pe. Nkondo eeyi ilakonzya kuzumanana mbokunga tatulondokede. Paulo lwakwe wakaazumina makani aaya, wakalemba kuti: “Eco ncinjanda kucita teensi ncico ncincita pe, eco ncinsula ncencita.” Nokuba boobo, kweelana ambomuzyi kale, Paulo tanaakakutobelela kukompama kwakwe, mbuli kuti kunyina naakali kukonzya kukuzunda. Wakazumanana kulwana kukompama kwakwe, kasyomede kuti Leza ulamugwasya kwiinda muli Jesu Kristo. (Rom. 7:15-25) Mucibalo cimwi, Paulo wakati: “Ndaumisya loko mubili wangu, ube muzike wangu, kutabi  kuti, ndamana kukambaukila bamwi, ime ndemwini ndaba musowe.”—1 Kor. 9:27.

Bantu balayandisya kutamizya twaambo tumwi nobaalilwa zyintu. Tulakonzya kuzilulamika zyintu ikuti katuzibona mbuli mbwazibona Jehova, ikucita mbuli Paulo mbwaakacenjezya Banakristo kuti: “Amusesemwe kububi, mukakatile kububotu.” (Rom. 12:9) Notulwana kukompama kwesu, tuyooyandika kusyomeka, ikukakatila alimwi akukkalikila. Davida wakalomba Jehova ategwa: “Undisunke kumiyeeyo akumoyo.” (Int. 26:2) Wakalizyi kuti Leza wakali kukonzya kwiilanga-langa mizeezo yakwe akumugwasya naakali kuyandika kugwasyigwa. Ikuti naa twaatobela malailile Jehova ngapa kwiinda mu Jwi lyakwe alimwi amumuuya uusalala, tulakonzya kuba muciimo cikonzya kutupa kukuzunda kukompama kwesu.

Ibamwi balakopwa amapenzi ngobabona kuti tabakonzyi kwaamana balikke. Baalu bamumbungano balakonzya kugwasya caluyando alimwi akukulwaizya. (Is. 32:1, 2) Pele cilagwasya kuziyeeya kabotu zyintu nzyomulangila. Mapenzi amwi taajisi nzila mbomukonzya kwaamanina limwi mubweende oobu bwazyintu. Pele banji bacikonzya kuliyumya, eelyo bacikonzya kupona buumi bukkomanisya.

Cisyomezyo Cakuti Jehova Uyootugwasya

Kufwumbwa naa tujisi penzi nzi mumazuba aano aakatazya, atube masimpe kuti Jehova uyootusololela alimwi akutugwasya. Ibbaibbele litukulwaizya kuti: “Amulibombye kujanza lya-Leza lyanguzu, kuti akamusumpule kuciindi ceelede. Makataazyo aanu oonse amwaasowele kumaanza aakwe, nkaambo nguumucebuka lyoonse.”—1 Pet. 5:6, 7.

Kathy iwali kubelekela ku Bbeteli kwamyaka minji naakazyiba kuti mulumi wakwe wakali kuciswa bulwazi bwakuluba, wakalimvwa kuti tanaakali kukonzya pe kuzunda mapenzi aaboola abulwazi oobu. Ikupaila kuli Jehova lyoonse kulomba busongo alimwi akuti atalengaani wakaba ngomulimo abuzuba. Bulwazi bwamulumi wakwe oobu nobwakakomena, bakwesu ibakatondezya luyando lwa Bunakristo bakasola kuyandaula nzila kutegwa bazyibe mbobakonzya kulanganya muntu uujisi bulwazi oobu. Bacizyi abalo ibakali kulanganya Kathy amulumi wakwe bakagwasya kwiinda mukubayumya-yumya. Banakristo aaba njenzila Jehova njaakapa  yakumuyumya, aboobo Kathy wakacikonzya kumulanganya mulumi wakwe kusikila kumamanino kwamyaka iitandila ku 11 lyalo naakazyi kufwa. Waamba kuti: “Ndakamulumba Jehova cakulila buya akaambo kalugwasyo lwakwe loonse; lwakandipa nguzu kapati. Elo kaka tiindakazyi kuti ndakali kukonzya kuzumanana kucita nzyondeelede kucita kwaciindi cilamfwu kumwi kandikatede kapati!”

Lugwasyo Lukonzya Kutugwasya Kuzunda Kukompama kuyubide

Bantu balitenga balakonzya kuyeeya kuti Jehova takonzyi kuswiilila nobalomba kuti abagwasye nobali mumapenzi. Aboobo cilagwasya kuyeeya ncaakaamba Davida naakauside akaambo kacibi cipati ncaakacita a Bateseba, walo iwakati: “Moyo uupengede akweempwa tokuusampauli, O Leza.” (Int. 51:17) Davida wakeempwa ncobeni, aboobo wakalizyi kuti ulakonzya kupaila kuli Leza akufwidwa luse. Jesu ulatondezya mbwalimvwa Jehova. Mulembi wa Makani Mabotu Matayo wakatondezya kuti majwi aali kubbuku lya Isaya akali kwaamba Jesu naakati: “Itete lifuyukide takalityoli, kamuni kasuka takakazimyi.” (Mt. 12:20; Is. 42:3) Jesu naakali anyika, wakabafwida luzyalo bacete abaabo bakadyaaminidwe. Mumaambila mbali, kunyina naakakazimina limwi kalilo kabuumi bwamuntu ibwakali mbuli katambo kalampi libelesya mafwuta ikakali kuyanda kuzima. Muciindi caboobo wakabasenseezya bantu bakapengede kutegwa bazumanane kuba abulangizi bwabuumi. Oobu mbombubo mbwaakali kucita naakali anyika. Sena tamusyomi kuti Jesu mbwacibede asunu alimwi akuti ulakonzya kumufwida luzyalo akaambo kakukompama? Amubone lugwalo lwa Ba-Hebrayo 4:15 lwalo lutondezya kuti ngonguwe uukonzya “kutweetelela mukulengauka kwesu.”

Naakali kulemba kwaamba “bumvwa buyasa mumubili,” Paulo wakabona kuti nguzu zya Kristo zyakali mbuli tente alinguwe. (2 Bakolinti 12:7-9, BT) Wakalimvwa kuti ulikwabilidwe a Leza kwiinda muli Kristo, mbubwenya mbuli muntu uuli mutente mbwalimvwa kuti ulikwabilidwe kumvwula, kukutontola alimwi akuzuba. Mbubwenya mbuli mbwaakacita Paulo, tatweelede kuzundwa akukompama alimwi amapenzi eesu. Ikutegwa lyoonse katuli bayumu kumuuya, tulakonzya kubelesya zibelesyo zyoonse Jehova nzyaapa kwiinda mumbunga yakwe yaanyika. Tulakonzya kucita kusikila waawo muntususu mpagolela akulangila kuli Jehova katusyomede kuti uyootusololela. Ikubona nguzu zya Leza mbozitugwasya mukukompama kwesu, tuyookonzya kwaamba mbuli bwakaamba Paulo kuti: “Ciindi ncinkompeme nciconya ncindi singuzu.”—2 Kor. 12:10.

[Cifwanikiso icili apeeji 3]

Lyoonse Paulo wakali kulomba kuli Jehova kutegwa amusololele naakali kubeleka mulimo wakwe

[Cifwanikiso icili apeeji 5]

Mwami Davida wakapa Joabu mukuli wakweendelezya basikalumamba

[Cifwanikiso icili apeeji 5]

Joabu wakabweza ntaamo yakujaya Amasa sinkondonyina

[Cifwanikiso icili apeeji 6]

Baalu balapa malailile aamu Magwalo aakonzya kutugwasya kuzunda mapenzi eesu