Mibuzyo Yabasikubala

Mwaapostolo Paulo wakaamba kuti “bazoofutuka ba-Israyeli boonse.” (Rom. 11:26) Sena wakali kupandulula kuti ba Juda boonse bayoosanduka akuba Banakristo?

Peepe, tacili ncencico ncaakali kupandulula Paulo. Izyalani lya Abrahamu lyakamukaka Jesu kuti ngo Mesiya. Nokwakainda myaka iili mbwiibede kuzwa lyakafwa Jesu, cakalibonya antangalala kuti ba Juda banji tiibakali kulangilwa kusanduka akuba Banakristo. Pele kaambo kakaamba Paulo kakuti “bazoofutuka ba-Israyeli boonse” kakali kamasimpe. Munzila nzi?

Mboobu Jesu mbwaakabaambila basololi babukombi iba Juda mumazuba aayo: “Bwami bwa-Leza buzoonyanzigwa kulindinywe, buzoopegwa musyobo umbi uuzyala micelo yabo.” (Mt. 21:43) Akaambo kakuti musyobo wa Israyeli woonse wakamukaka Jesu, Jehova wakasala musyobo mupya, uujisi bananikidwe amuuya wa Leza. Musyobo ooyu Paulo wakawiita kuti “ba-Israyeli ba-Leza.”—Gal. 6:16.

Zibalo azimbi mu Magwalo aa Banakristo aa Cigiliki zisinizya kuti nkamu ya “ba-Israyeli ba-Leza” ibambidwe aa Banakristo bananikidwe amuuya ibali 144,000. (Rom. 8:15-17; Ciy. 7:4) Ikutondezya kuti nkamu eeyi iyoobikkilizya abantu batali ba Juda kulitondezyedwe mubbuku lya Ciyubunuzyo 5:9, 10, kwalo nkolitondezya kuti Banakristo bananike bazwa “[ku]misyobo yoonse amilaka yoonse amikowa yoonse, azisi zyoonse.” Ba Israyeli bakumuuya bakasalilwa kuti bakabe “bami abapaizi . . . , nkabela [ba]yooendelezya ansi.” Nokuba kuti Jehova musyobo wa Israyeli tanaakacili kuubona kuba musyobo uusalidwe, mu Juda umwi aumwi wakali kukonzya kuyandwa a Jehova. Mbucakabede oobo kubaapostolo aku Banakristo bamwi banji bansiku. Pele iba Juda aaba, mbubwenya mbuli bantu boonse, bakeelede kuulwa abulowa bwa Jesu Kristo.—1 Tim. 2:5, 6; Heb. 2:9; 1 Pet. 1:17-19.

Nokuba kuti bunji bwaba Juda bakumubili bamumwaanda wamyaka wakusaanguna tiibakapegwa coolwe cakuyoolela a Jesu, tacipandululi kuti makanze aa Jehova taakazuzikizigwi pe. Eeci tacilangilwi, nkaambo Jehova wakaamba boobu kwiinda mumusinsimi wakwe: “Mbubonya obo mbuliyooba ijwi lyangu lizwa kumulomo wangu. Talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.”—Is. 55:11.

Ncimwi buyo aalo makanze aa Leza aakubikka bantu bali 144,000 kuti bakalele a Mwanaakwe kujulu akazuzikizyigwa. Ibbaibbele lilacisalazya kuti Leza uyoonanika bantu bali 144,000. Kunyina uuyoobula pe.—Ciy. 14:1-5.

Aboobo, Paulo naakalemba kuti “bazoofutuka ba-Israyeli boonse” tanaakali kusinsima kuti ba Juda banji bayoosanduka akuba Banakristo pe. Ncaakali kupandulula ncakuti makanze aa Leza ayoozuzikizyigwa aakuti ba Israyeli bakumuuya ibali 144,000 bakalele a Jesu Kristo Mwanaakwe kujulu. Muciindi ncabikkide Leza, imweelwe uukkwene—“ba-Israyeli boonse”—bayoofwutulwa, eelyo bayoolelela kabali bami abapaizi mu Bwami bwa Mesiya.—Ef. 2:8.

[Cifwanikiso icili apeeji 28]

Bananike bazwa “[ku]misyobo yoonse amilaka yoonse amikowa yoonse, azisi zyoonse”