Nzila Yabusongo Yakumana Penzi

BAKUBUSI botatwe bakkala mu Afulika mpoili akati-kati bakali kuyanda kuti bakajanike kumuswaangano wacooko wakubusena ooko. Ino mbuti mbobakali kukonzya kuyoosika? Kubusena kwakali kuyoocitilwa muswaangano kwakali kulampa makkilomita aabalilwa ku 90, mugwagwa awalo tiiwakali kabotu pe, alimwi bakanyina cakweendela. Bakasala kuti balombe macinga otatwe, pele tiibakajana macinga akali kukonzya kubasisya nkobakali kuunka.

Mwaalu wamumbungano yabo wakalibona penzi ndyobakajisi, eelyo wakabapa ncinga yakwe—yakali yakaindi, pele yakabeleka. Wakapandulula mbuli walo abamwi ncobakacitide musyule oomu kutegwa bakajanike kumuswaangano wacooko. Mwaalu ooyu wakapa muzeezo wakuti boonse botatwe babelesye ncinga yomwe. Yakali nzila ngubauba, pele yakali kuyandika kweendelana. Ino mbuti bantu botatwe mbobakali kukonzya kubelesya ncinga yomwe mulweendo?

Ikutegwa litabaumpi zuba, bakwesu bakubusi aaba bakaswaangana kakucisiya kujwe akubikka zibbudu zyabo ancinga. Umwi wakatanta ncinga akubasiya beenzinyina kabatobela cakweendesya amaulu. Naakaccovwa kwamamita aabalilwa ku 500, wakaseluka akwiiyaamika ncinga acisamu. Pele wakabona masimpe kuti beenzinyina bali mubwene nayaamika ncinga kutegwa “itabbigwi.” Kumane boobo walo wakatalika kweenda amaulu.

Aabaya bobilo ibakali kutobela musyule nobakasika aakali ncinga, umwi wakaitanta, eelyo ooyu umbi wakazumanana kweenda amaulu kwamamita aabalilwa ku 500 naa kwiinda waawo kutegwa iwali kuccovwa waisiya awalo atante. Aboobo, kwiinda mukulibambila kabotu, bakwesu aabo botatwe bakaufwiimpya musinzo uulampa makkilomita aabalilwa ku 90 kweenda amaulu kuti weendwe makkilomita aabalilwa ku 60 amaulu. Bakapengela kaliko. Bakaswaangana abakwesu abacizi Banakristo kumuswaangano wacooko alimwi bakakkomana kuti bakajanika kumuswaangano wacooko. (Dt. 31:12) Sena mwaka uuno muyoosoleka canguzu kutegwa mukajanike kumuswaangano wacooko uuyoocitikila kubusena buli afwaafwi ankomukkala?