Amucite Zyintu Nzyomukonzya Akuzumanana Kukkomana

“NDAALILWA kale alimwi!” Ino nziindi zyongaye nomwakaamba majwi aali mbuli yaaya akaambo kakuti mwakaalilwa kuzuzikizya cintu ncomwakali kuyanda kucita? Mutumbu Munakristo uucili mwana-mwana ulakonzya kwaamba majwi aaya akaambo kakuti ulakonzya kulimvwa kukatala akaambo kakuti mwana wakwe muvwanda uyandika kulanganya lyoonse, calo cikonzya kumupa kuti akopane akwaalilwa kubikkila maano kubukombi akumilimo ya Bunakristo. Munakristo aumwi ulakonzya kulimvwa kuti takonzyi kucita zyintu zimwi akaambo kankomeneno yakwe cakuti ulakonzya kuyeeya kuti nzyacita mumbungano tazisiki mpayanda pe. Munakristo uucembeede ulakonzya kutyompwa akaambo kakuti tatoli lubazu mumilimo ya Bunakristo mbuli mbwaakali kucita naakacijisi nguzu alimwi akweenda mbwayanda. Christiane walo bukkale bwamumukwasyi ibutakonzyi kumuzumizya kucita mbwayanda mukubelekela Jehova wakaamba kuti: “Imakani aapegwa aakukulwaizya basikumwaya kuti batalike bupainiya ziindi zimwi alandipa kulila.”

Ino ncinzi ncotukonzya kucita ikuti katulimvwa boobu? Ino mbuti Banakristo bamwi mbobacikonzya kucita buyo zeezyo nzyobakonzya kweelana abukkale bwabo? Ino cigwasya nzi kuyeeya buyo kucita nzyomukonzya?

Amulibikkile Mbaakani Nzyomukonzya Kuzuzikizya

Imwaapostolo Paulo utwaambila mbotukonzya kuzumanana kukkomana naakaamba kuti: “Amusekelele mu Mwami lyoonse, alimwi ndati, amusekelele! Bantu boonse abazibe kulibombya kwanu.” (Bafilipi 4:4, 5, BT) Kutegwa katusekelela alimwi akukkalwa moyo mumulimo wa Leza, tuleelede kuzuzikizya buyo milimo njotukonzya kweelana anguzu alimwi abukkale bwesu. Ikuti katukakatila kuzuzikizya mbaakani nzyotutakonzyi, katuzyi buya kuti zilaminya, ciya kutupa kutakkomana. Nokuba boobo, tweelede kucenjela kutegwa tutalileki mbuli mulomo wakunsi akutamizya kukompama kwesu kuti nkokutupa kuyaansi kwiinda mboceelede kuba mumulimo wa Bunakristo.

Kufwumbwa naa bukkale bwesu buli buti, Jehova uyanda kuti katumupa ciinda kubota, nkokuti mulimo uucitwa camoyo woonse. (Kol. 3:23, 24) Ikuti Jehova katutamupi ciinda kubota, citondezya kuti tatuzuzikizyi kulyaaba kwesu. (Rom. 12:1) Kunze lyaboobo, tatuna kukkalwi moyo nokuba kukkomana alimwi zilongezyo ziboola akaambo kakubelekela Jehova camoyo woonse ziya kutwiinda kulumwensyi.—Tus. 10:22.

Mabala aakasandululwa kuti “kulibombya mukucita zyintu” mu Bbaibbele ajisi muzeezo wakubikkila maano. Ibupanduluzi bwini bwamabala aaya bwaamba ‘butontozi.’ (Jak. 3:17) Mabala aaya alimwi ajisi muzeezo wakuba muntu uunyonauka. Aboobo, ikuti naa tulalibombya, tuyoocikonzya kubulanga kabotu bukkale bwesu. Sena eeci cilakatazya? Ibamwi cilakonzya kubakatazya, nokuba kuti balakonzya kubalanganya kabotu  bantu bamwi. Mucikozyanyo, ikuti mulongwe wesu kaboneka kukatala akaambo kakuti wali kubeleka milimo minji, sena tatukonzyi kumugwasya kutegwa abone bubotu bwakuyozya-yozya milimo yakwe? Mbubwenya buyo, tuleelede kubona zitondezyo zitondezya kuti tulaindilizya aagolela nguzu zyesu alimwi ampobuzumizya bukkale bwesu.—Tus. 11:17.

Ikwaazyiba kabotu mpotugolela cilakonzya kukatazya ikuti naa twakakomezyegwa abazyali bayanda kuti katubeleka milimo minji. Ibamwi kubwana bakali kulimvwa kuti lyoonse bakeelede kubeleka canguzu kapati kutegwa bayandwe abazyali babo. Ikuti naa mbumwakakomena oobo, nkokuti mizeezo yanu iliindene ambwatubona Jehova. Jehova ulatuyanda akaambo kakumubelekela camoyo woonse. Jwi lya Leza litusyomezya kuti Jehova “ulizi mbububede buntu bwesu, ulaibulukwa kuti tuli bulongo buyo.” (Int. 103:14) Ulizyi mpotukompeme alimwi ulatuyanda ikuti naa tulamubelekela cabusungu nokuba kuti tulikompeme. Ikuyeeya kuti Leza ngusimalelo uunyoneka kuya kutugwasya kuzilanga kabotu zyintu nzyotuyanda kuti tucite, kumwi katuzyi mpotukompeme.—Mik. 6:8.

Nokuba kuti Banakristo inga kabazyi kuti Leza tayandi kuti katuliminya buya, ibamwi cicibakatazya kulilanga-langa kutegwa bazyibe aagolela nguzu zyabo. Ikuti naa cilamukatazya, sena tamukonzyi kulomba lugwasyo ku Munakristo uusimimide uumuzyi kabotu? (Tus. 27:9) Mucikozyanyo, sena muyanda kubeleka mulimo wabupainiya bwaciindi coonse? Mbaakani eeyi nimbotu kaka! Sena cilamukatazya kwiizuzikizya mbaakani eeyi? Ambweni muyandika kugwasyigwa kutegwa muubye-ubye buumi bwanu. Ambweni mulongwe wanu Munakristo ulakonzya kubandika andinywe kutegwa mubone naa mulimo wabupainiya inga mwaucita naa pe akaambo kamikuli minji yamumukwasyi. Ulakonzya kumugwasya kubona naa mikuli njomuyanda kuyungizya mulakonzya kwiinyamuna, antela ulakonzya kumwaambila mpomuyandika kubambulula kutegwa mukonzye kuzwidilila. Mulumi awalo inga wamugwasya kabotu mukaintu wakwe kubona mpakonzya kucita kabotu kweelana anguzu nzyajisi. Mucikozyanyo, ulakonzya kupa muzeezo wakuti kapumuna kumatalikilo kwamwezi mupya uujisi milimo minji. Eeci cilakonzya kupa kuti mukaintu ajane nguzu zyakubelesya akumugwasya kutegwa lukkomano luzumanane mumulimo.

Amuyandaule Zyintu Nzyomukonzya Kucita

Kucembaala naa kuciswa-ciswa kulakonzya kucesya milimo njotuyanda kubelekela Jehova. Kuti naa muli bazyali, mulakonzya kubona mbuli kuti kunyina lugwasyo ndomujana mukuliyiisya naa kumiswaangano ya Bunakristo nkaambo ciindi cinji alimwi anguzu zyanu zimanina mukulanganya bana baniini. Pele sena kubikkila maano kapati kukukompama kwanu ziindi zimwi kumupa kuti mutakonzyi kubona zyintu nzyomukonzya kuzwidilila kucita?

Zyuulu zyamyaka zili mbozibede zyainda, muna Levi umwi wakasala kucita cintu cimwi cakali ciyumu kulinguwe. Wakalijisi coolwe cakubelekela kutempele kwamvwiki zyobile amwaka.  Pele wakatondezya kuti wakali kulombozya kuti akkalile limwi munsi aacipaililo. (Int. 84:1-3) Ino ncinzi cakagwasya mulombwana ooyu uusyomeka kuti akkutile? Wakabona kuti nobuba buzuba bomwe buyo mulubuwa lwatempele bwakalilibedelede. (Int. 84:4, 5, 10) Mbubwenya buyo, muciindi cakubikkila maano kukukompama kwesu, tuleelede kusoleka kubona alimwi akulumba milimo njotukonzya kucita.

Mucikozyanyo, atulange-lange makani aamba Nerlande mucizyi Munakristo uukkala ku Canada. Lyoonse weendela ancinga yabalema, aboobo wakayeeya kuti kunyina ciya komoonga ncaakali kukonzya kucita mumulimo. Pele muzeezo ooyu wakaucinca kwiinda mukuyeeya cintoolo cipati cakali aafwaafwi calo ncaakabona kuti ncecilawo cakwe cakukambaukila. Upandulula kuti: “Ndilakkala ancinga yangu munsi-munsi acibbenci cili mucintoolo. Ndilabakambaukila bantu baboola kukkala acibbenci kutegwa balyookezye.” Nerlande ulakkalwa moyo kwiinda mukutola lubazu mumulimo munzila eeyi.

Amuzibambulule Zyintu Ikuti Kwayandika

Ibwato inga kabulundukide kapati akaambo kakuti muwo ulauma amasaili [imilembo ibikkwa kubwato kuti kaikwaba muwo]. Pele kuti sikweenzya bwato wabona kuti kuli luwo lukali, masaili ulaavwunga. Takonzyi kulwiimika luwo pe, pele ulakonzya kubweenzya kabotu bwato bwakwe kwiinda mukucita zyintu zimwi zyeelede kubwato. Ncimwi buyo andiswe, tatukonzyi kululamika bukkale bumwi butusikila mubuumi bwesu ibuli mbuli luwo lwamulwizi. Pele tulakonzya kubulanganya kabotu buumi bwesu kusikila mpotukonzya kwiinda mukubambulula nzila mbotubelesya nguzu amizeezo yesu alimwi ambotulimvwide. Ikuti twabulanga-langa bukkale bwesu bupya, ciya kutugwasya kuzumanana kukkalwa moyo akuukkomanina mulimo wa Leza.—Tus. 11:2.

Amulange-lange zikozyanyo eezyi. Ikuti nguzu zyesu kazili zisyoonto, cilakonzya kutugwasya kuti twatalijaya buya kubeleka mubuzuba mbotuswaangana ikutegwa tujane nguzu zyakukonzya kuunka kumiswaangano yambungano. Eeci ciya kutupa kuti tugwasyigwe kapati akuyanzana kwesu a Banakristoma. Ikuti naa mutumbu takonzyi kuunka mumulimo wakuŋanda aŋanda akaambo kakuti mwana ulicisidwe, cilakonzya kumugwasya kwiita mucizyi umwi kuti alete muntu ngobaiya limwi Bbaibbele kutegwa bazyi kuyiile kulinguwe ciindi mwana nalede.

Ino mbuti ikuti bukkale kabutakonzyi kumuzumizya kwaalangila-langila limwi makani oonse atiikabandikwe kumiswaangano yambungano? Mulakonzya kubona makani  ngomukonzya kulibambila kabotu. Kwiinda mukubambulula mbaakani nzyotuyanda kucita cakufwambaana, tulakonzya kuba basungu alimwi ibakkomene.

Kubambulula mbaakani zyesu kulakonzya kuyandika kubeleka canguzu. Serge alimwi a Agnès ibanabukwetene bakkala ku France, bakali kuyandika kuzicinca kapati zyintu nzyobakakanzide kucita. Ba Serge baluula kuti: “Notwakazyiba kuti Agnès wamita, makanze aakuba bamisyinali akamana.” Lino mbwaanga bajisi bana basimbi bobile baseka-seka, ba Serge balapandulula mbuli mbobakapanga mbaakani aimbi abakaintu babo. Baamba kuti: “Mbwaanga tatukonzyi kuunka kunze aacisi, twakayeeya kuti katucita buyo mulimo uuli mbuli wabamisyinali mucisi cesu. Twakabasangana bali mukakamu kabelesya mwaambo wakunze aacisi.” Sena mbaakani eeyi mpya yakabagwasya? Ba Serge baamba kuti: “Tubona kuti tulagwasyilizya kapati mumbungano.”

Ba Odile mmucizyi Munakristo waku France uujisi myaka iibalilwa kuma 70, baciswa bulwazi bulya mafwuwa mumagondo alimwi tabacikonzyi kwiimikila. Bakatyompwa akaambo kakuti penzi eeli lyakali kupa kuti kabatatoli lubazu mumulimo wakuŋanda aŋanda. Pele kunyina nobakakkala buyo pe. Bakazibambulula zyintu kwiinda mukutola lubazu mubukambausi bwaaluwaile. Baluula kuti: “Ncuuba-uba alimwi cilakondelezya kwiinda mbundakali kuyeeya!” Nzila eeyi yakukambauka yakapa kuti bakulwaile mumulimo.

Kucita Zyintu Nzyomukonzya Kulaletela Zilongezyo

Ikuzilanga-langa kabotu zyintu nzyotukonzya kucita kulakonzya kutugwasya kutegwa tutakopani. Ikuti twalibikkila mbaakani nzyotukonzya kuzuzikizya, tuyakukkalwa moyo kumulimo wesu nokuba kuti tulikompeme. Aboobo tulakkomana acintu ncotwazuzikizya nokuba kuti inga kacili ciniini.—Gal. 6:4.

Notulanga-langa akubona zyintu nzyotukonzya kuzwidilila kucita, eeci ciya kutupa kuba muntu uubikkila maano ku Banakristoma. Mbwaanga tuya kuzyiba mpobakompeme, lyoonse tuya kulumba kuzyintu nzyobatucitila. Kwiinda mukulumba lugwasyo loonse lupegwa, tupa kuti kube muuya walukamantano alimwi akumvwana. (1 Pet. 3:8) Amuyeeye kuti, Jehova mbwali Taata siluyando, tayandi kuti katumucitila zyintu ziinda aali zeezyo nzyotukonzya kucita pe. Ikuti katucita buyo zyintu nzyotukonzya akulibikkila mbaakani zikonzyeka, milimo yesu yakumuuya iyakutukkazyika moyo akutukkomanisya!

Majwi aakwelelezya sikubala aali apeeji 29]

Kutegwa katusekelela alimwi akukkalwa moyo mumulimo wa Leza, tuleelede kuzuzikizya buyo milimo njotukonzya kweelana anguzu alimwi abukkale bwesu

[Cifwanikiso icili apeeji 30]

Nerlande ulakkomana kwiinda mukucita ncakonzya mumulimo

[Cifwanikiso icili apeeji 31]

Amwiiye “mbwaabikkwa masaili”

[Kulumba]

© Wave Royalty Free/age fotostock

[Cifwanikiso icili apeeji 32]

Ba Serge aba Agnès bakagwasyigwa akaambo kakubikka mbaakani zipya