Amuzumanane Kusyomeka Amoyo Omwe
Amuzumanane Kusyomeka Amoyo Omwe
“Njeende mulusinizyo lwako; mbe simoyo omwe kukulemeka izina lyako.”—INT. 86:11.
1, 2. (a) Kweelana abbuku lya Intembauzyo 86:2, 11, ino ncinzi cikonzya kutugwasya kusyomeka lyoonse kuli Jehova nokuba kuti kuli masunko? (b) Ino ndilili nokuyandika kuba muntu uusyomeka amoyo woonse?
NKAAMBO nzi Banakristo bamwi ibazumanana kusyomeka kwamyaka minji nokuba kuti balaangwa antela kupenzyegwa ncobaalilwa kuzwidilila nobasunkwa kumakani aakuyandisya lubono? Ikaambo kayeeme amoyo wamuntu ooyo—zyintu zili mumoyo. Bbuku lya Intembauzyo 86 lilaswaanganya lusyomo lwamuntu akuba amoyo omwe; nkokuti ikutaba amyoyo yobilo.’ Sintembauzyo Davida wakapaila kuti: “Bamba buumi bwangu, nkaambo ndiluleme; futula mulanda wako uukusyoma, O Leza.” Alimwi Davida wakapaila kuti: “Njiiyisya inzila yako, O Jehova, kuti njeende mulusinizyo lwako; mbe simoyo omwe kukulemeka izina lyako.”—Int. 86:2, 11.
2 Tuleelede kusyoma Jehova amoyo woonse, buyo-buyo twaambo tumwi alimwi azilongwe zilakonzya kunyonganya lusyomo lwesu kuli Leza wakasimpe. Kulombozya zyintu kuli mbuli tudandamiti tuvwumbilidwe munzila njotweendela. Nokuba kuti twali kusyomeka kuli Jehova muziindi zikatazya, tulakonzya kucegwa mutukole twa Saatani. Elo kaka cilayandika kuba muntu uusyomeka kuli Jehova amoyo woonse, masunko kaatanatalika! Ibbaibbele lyaamba kuti: “Bamba moyo wako cakucenjela loko.” (Tus. 4:23) Tulakonzya kwiiya ziiyo zinji kumakani aaya kwiinda mucintu cakacitikila musinsimi wakali kuzwa ku Juda iwakatumwa a Jehova ku Mwami waku Israyeli Jeroboamu.
“Njookupa Bulumbu”
3. Ino Jeroboamu wakacita buti naakamvwa mulumbe walubeta wakaletwa amusinsimi wa Leza?
3 Amubuyeeyele buyo bukkale buli boobu. Muntu wa Leza wazwa kwaambilizya mulumbe mupati ku Mwami Jeroboamu, iwatalisya kukomba moombe mubwami bwa Israyeli bwakunyika ibwamisyobo iili kkumi. Mwami wanyema kapati. Waambila basimilimo bakwe kuti bamujate mutumwa ooyu. Pele Jehova uli mukwabilide mubelesi wakwe. Mpoonya aawo ijanza ndyaamutondeka andilyo lyayuminina, alimwi acipaililo cabukombi bwakubeja caanduka akati. Ndilyonya Jeroboamu wacinca kuyeeya. Walomba muntu wa Leza kuti: “Kotontonzya bukali bwa-Jehova Leza wako. Kondikombela, kuti nkaboozezegwe ijanza lyangu.” Musinsimi wapaila, eelyo janza lyamwami lyapona.—1 Bam. 13:1-6.
4. (a) Nkaambo nzi zyintu mwami nzyaakasyomezya musinsimi ncizyakali kumusunka mbwasyomeka? (b) Ino musinsimi wakaingula buti?
4 Kumane boobo Jeroboamu waambila muntu wa Leza kuti: “Boola kulindime, ukalye, ujane inguzu, alimwi njookupa bulumbu.” (1 Bam. 13:7) Ino musinsimi ulacita buti lino? Sena ulazizumina zyintu nzyaasyomezyegwa amwami ngwaasinganya? (Int. 119:113) Antela sena ulazikaka zyintu nzyaamusyomezya mwami nokuba kuti mwami uboneka kuti wajokolola moyo? Jeroboamu muntu uulisika kusyule, aboobo ulakonzya kubapa beenzyinyina lubono lunji. Ikuti naa musinsimi wa Leza ujisi moyo wakulombozya lubono, cisyomezyo camwami ndisunko pati. Pele Jehova walailila musinsimi kuti: “Utalyi insima nikuba kunywa maanzi, nikuba kuboola munzila eyo njiyonya njowakatola.” Aboobo musinsimi waingula kwiinda mukubelesya majwi ngaakalaililwa ategwa: “Nekuba kuti wandipa cisela cambono zyamuŋanda yako, nsikooinka ayebo pe. Nsikoolya insima nikuba kunywa maanzi okuno pe.” Kumane boobo, musinsimi wazwa ku Beteli kwiinda mukubelesya nzila iimbi. (1 Bam. 13:8-10) Ino ncaacita musinsimi cituyiisya nzi kumakani aakusyomeka amoyo woonse?—Rom. 15:4.
“Mutabi Basyaacivulemwangu”
5. Ino mbuti kuyandisya lubono mbokukonzya kunyonganya lusyomo?
5 Kuyandisya lubono kulakonzya kulibonya kuti takukonzyi kunyonganya lusyomo lwamuntu, pele kulacita oobo. Sena tulacisyoma cisyomezyo ca Jehova cakuti unakutupa nzyotuyanda? (Mt. 6:33; Heb. 13:5) Muciindi cakusolekesya kujana zyintu zimwi “zibotu” nzyotutakonzyi kujana ciindi cino, sena tatukonzyi kukkala buyo katutazijisi? (Amubale Ba-Filipi 4:11-13.) Sena tulalangilwa kwiiyumbila ambali milimo imwi mumbungano ikutegwa tujane nzyotuyanda? Sena kubeleka mulimo wa Jehova cakusyomeka kuli mubusena bwakusaanguna mubuumi bwesu? Tulakonzya kujana bwiinguzi ikuti twalilanga-langa akubona naa Leza tumubelekela camoyo woonse naa pe. Mwaapostolo Paulo wakalemba kuti: “Kukomba kulajanya lubono lunji, na moyo uli alulamo, nkaambo takukwe ncotwakaleta ansi ano nociba ncotukonzya kutolelela nkuko, aboobo kufumbwa twanoojisi cakulya acakulivumba, nciconya eco mbubo ncinji.”—1 Tim. 6:6-8.
6. Ino ‘nzipego’ nzi nzyotukonzya kusyomezyegwa, alimwi ino ncinzi cikonzya kutugwasya kusala cakucita?
6 Mucikozyanyo, ibakatunjizya mulimo balakonzya kutusumpula amulimo akutupa bulumbu abumbi. Antela tulakonzya kutalika kuyeeya kuti tulakonzya kujana mali manji ikuti twalongela kucisi cimbi naa busena kutegwa tukabelekele nkuko. Kusaanguna, zyintu eezyi inga zyalibonya mbuli kuti ncileleko kuzwa kuli Jehova. Pele katutanabweza ntaamu, sena tatweelede kulizinza? Imubuzyo mupati ngotweelede kulibuzya ngwakuti: “Ino cintu eeci ncindiyanda kucita cilacinyonganya buti cilongwe cesu a Jehova?”
7. Ino nkaambo nzi ncociyandika kuugusyila limwi muzeezo wakulombozya lubono?
7 Bweende bwa Saatani lyoonse bukulwaizya kuyandisya lubono. (Amubale 1 Johane 2:15, 16.) Makanze Diabolosi ngajisi ngakunyonganya moyo wesu. Aboobo, tuleelede kucenjela kutegwa tukonzye kuzyiba naa moyo wesu uyandisya lubono, kutegwa tuugusyile limwi muzeezo ooyu. (Ciy. 3:15-17) Jesu tiicakamukatazya kukaka Saatani naakamusyomezya kumupa bwami boonse bwanyika. (Mt. 4:8-10) Jesu wakacenjezya kuti: “Amucenjele, amulilesye kukulikumbuzya koonse, nkaambo buumi bwamuntu tabuzwi kukuvuba kwazintu nzyajisi.” (Lk. 12:15) Kusyomeka kuya kutugwasya kulanga kuli Jehova muciindi cakulisyoma.
Musinsimi Wansiku “Wakabeja”
8. Ino mbuti musinsimi wa Leza mbwaakasunkwa kusyomeka kwakwe?
8 Zyintu nozyakamweendela kabotu musinsimi wa Leza naakagama buyo nzila iiya kwakwe. Kwakainda buyo ciindi cisyoonto, wakanjila mumusunko aumbi. Ibbaibbele lyaamba kuti: “Kakuli umwi musinsimi mucembele iwakakede ku-Beteli, nkabela bana bakwe bakeza kulinguwe akumulwiida” zyoonse zyakacitika ciindi cacifwumofwumo. Naamvwa makani aaya, mudaala ooyu waambila bana kuti bamubikkile cikkalilo ambongolo ikutegwa atobele musinsimi wa Leza. Tiilyatanta pe, wamujana musinsimi ulalyookezya munsi aacisamu, eelyo wamwaambila kuti: “Atwiinke ayebo kuŋanda yangu, ukalye insima.” Muntu wa Leza naakaka, mudaala ooyu wati: “Ambebo ndi musinsimi mbubonya mbuli uwe. Lino angelo wakandaambila majwi aa-Jehova, wakati, Koya ukamuboozye kuŋanda yako, kuti azoolye insima akunywa maanzi.” Pele Magwalo aamba kuti: “Anukuti wakabeja.”—1 Bam. 13:11-18.
9. Ino Magwalo aamba nzi kujatikizya basilweeno, alimwi ino mbaani mbobanyonganya?
9 Tatuzyi cakapa kuti musinsimi mudaala acite boobu, pele wakabeja. Ambweni ciindi cimwi mudaala ooyu wakali musinsimi wa Jehova uusyomeka. Pele ciindi eeci nzyaakacita zyakali zyalweeno. Magwalo alasinizya ikwaamba kuti kucita zyintu zili boobu taciyandiki pe. (Amubale Tusimpi 3:32.) Ibantu basilweeno tabanyonganyi buyo cilongwe cabo a Jehova pe, pele acabeenzyinyina.
“Wakapiluka” Amudaala
10. Ino musinsimi wa Leza wakacita buti naakatambwa kuŋanda yamudaala, alimwi ino ncinzi cakatobela?
10 Musinsimi iwakazwa ku Juda naakakonzya kubona bucenjezu bwamusinsimi mudaala mbwabelesya kweena bantu. Naakalibuzya kuti: ‘Nkaambo nzi Jehova ncanga watuma mungelo kumuntu uumbi kuti andipe malailile mapya?’ Musinsimi ooyu naakamulomba Jehova kuti amusalazyile nceelede kucita, pele Magwalo kunyina mpaatondezya kuti wakacita oobo. Pele walo “wakapiluka [amudaala] kuyoolya insima akunywa maanzi.” Eeci tiicakamubotela Jehova pe. Musinsimi iwakeenwa naakatalika kweenda kuya ku Juda, wakaswaangana syuumbwa walo wakamuluma. Elo kaka mulimo wabusinsimi wakamana cibende!—1 Bam. 13:19-25. *
11. Ino ncikozyanyo nzi cibotu Ahija ncaakapa?
11 Kubbazu limwi, musinsimi Ahija iwakatumwa kuti akananike Jeroboamu kuti abe mwami, wakasyomeka mubucembele bwakwe. Ahija naakacembaala alimwi akoofwaala, Jeroboamu wakatuma mukaintu wakwe kuti akabuzye naa mwana wabo musankwa iwakali kuciswa ulapona. Ahija cabusicamba wakaamba kuti mwana ulafwa. (1 Bam. 14:1-18) Akati kazilongezyo zinji Ahija nzyaakajana cakali coolwe cakuti majwi aakwe akalembwa mu Jwi lya Leza. Munzila nzi? Makani aakwe aalembedwe akabelesyegwa amupaizi Ezara mutwaambo twakwe.—2 Mak. 9:29.
12-14. (a) Ino nciiyo nzi ncotukonzya kwiiya kucintu cakacitikila musinsimi musyoonto? (b) Amupe zikozyanyo kutondezya mbociyandika kubikkila maano alimwi akulupailila lulayo luzwa mu Bbaibbele ilupegwa abaalu.
12 Ibbaibbele talyaambi kaambo musinsimi musyoonto ncaatakabuzyila kuli Jehova katanapiluka kuti akalye alimwi akunywa kuŋanda yamudaala. Sena nkaambo kakuti mudaala wakamwaambila makani ngaakali kuyeeya? Ino nciiyo nzi ncotukonzya kwiiya? Tuleelede kubona masimpe kuti zyintu nzyayanda Jehova zyacitwa mbwaziyanda. Alimwi tuleelede kuzitobela mbozibede.
13 Ibamwi nobalaigwa bazumina buyo lulayo ndobayanda. Mucikozyanyo, sikumwaya ulakonzya kujana mulimo uukonzya kuyandika kubelekwa muciindi nceelede kuba amukwasyi wakwe alimwi ancacita milimo ya Leza. Ulakonzya kubuzya mwaalu kuti amubuule maano. Imwaalu mumajwi aakwe aakumatalikilo ulakonzya kwaambila limwi kuti takonzyi kwaambila mukwesu ooyu mbuli mbwakonzya kupa ziyandika kumukwasyi wakwe. Eelyo mwaalu ulakonzya kubandika amukwesu ooyu ntenda yakumuuya iikonzya kuba ikuti wauzumina mulimo ooyu. Sena mukwesu ulabikkila buyo maano kumajwi aamwaalu aakumatalikilo naa kutwaambo tujatikizya ntenda iiliko? Aawa cilisalede kuti mukwesu weelede kubona cikonzya kumugwasya kumuuya.
14 Amulange-lange bukkale abumbi. Mucizyi ulakonzya kubuzya mwaalu kuti amwaambile naa uleelede kwaandaana amulumi wakwe uutali Kamboni. Kakunyina kudooneka, imwaalu ulakonzya kupandulula kuti walo mucizyi nguukonzya kusala kwaandaana anguwe naa pe. Amana boobo mukwesu ulakonzya kulanga-langa lulayo luli mu Bbaibbele kukaambo aaka. (1 Kor. 7:10-16) Sena mucizyi ooyu uyakubikkila maano kumajwi aamba mwaalu? Antela walo mumoyo wasala kale kwaandaana amulumi wakwe? Nasala cakucita, cilakonzya kugwasya kuti waapailila makani aaya kutegwa abikkile maano kululayo iluli mu Bbaibbele.
Amulibombye
15. Ino ncinzi ncotwiiya kukulubizya kwamusinsimi wa Leza?
15 Ino ncinzi acimbi ncotukonzya kwiiya kukulubizya kwakacitwa amusinsimi wakazwida ku Juda? Bbuku lya Tusimpi 3:5 lyaamba kuti: “Syoma Jehova amoyo wako woonse; utalifunkizyi kumaanu aako omwini.” Muciindi cakuzumanana kusyoma Jehova mbuli mbwaakali kucita musyule, buzuba oobu musinsimi waku Juda wakalisyoma mwini. Kulubizya ooku nkwaakacita kwakamujazya alimwi zyina lyakwe a Jehova lyakabija. Icakamucitikila cikankaizya mbociyandika kulibombya alimwi akusyomeka kuli Jehova!
16, 17. Ino ncinzi ciya kutugwasya kuzumanana kusyomeka kuli Jehova?
16 Nzyotulombozya mumoyo zilakonzya kutusowa. “Moyo wamuntu uleena kwiinda zintu zyoonse, ulijisi bulwazi bukaka kupona.” (Jer. 17:9) Ikutegwa tuzumanane kusyomeka kuli Jehova, tuleelede kubeleka canguzu lyoonse ikugusya bukkale bwesu bwakaindi atumpenda twakulisumpula alimwi akulisyoma. Alimwi tuleelede kuba bantu bajisi bukkale bupya, “bulengulwidwe mucinkozya ca-Leza cabululami acabusalali bwinibwini.”—Amubale Ba-Efeso 4:22-24.
17 Bbuku lya Tusimpi 11:2 lyaamba kuti: “Babombumyoyo mbebajisi busongo.” Ikusyoma Jehova cakulibombya kulakonzya kutugwasya kutegwa tutaciti cintu cikonzya kutunjizya mumapenzi. Mucikozyanyo, kutyompwa kulakonzya kutupa kutasala kabotu. (Tus. 24:10) Tulakonzya kulema kubeleka milimo imwi iisetekene akutalika kulimvwa kuti swebo twakabelekela limwi, eelyo abamwi beelede kuzumanana mumilimo eeyo. Antela tulakonzya kulombozya buumi bantu mbotukkede limwi mbobabona kuti “mbwiikkalwa nyika.” Nokuba boobo, ‘kusolekesya kwesu’ alimwi ‘akupangika myoyo yesu lyoonse kumilimo ya Mwami’ kuya kukwabilila moyo wesu.—Lk. 13:24; 1 Kor. 15:58.
18. Ino ncinzi ncotukonzya kucita ikuti katutazyi ncotweelede kucita?
18 Ziindi zimwi kusala cakucita kulakonzya kukatazya kapati cakunga nzila yakutola inga yazimina. Sena caba boobu tuleelede kucita kufwumbwa ncotuyeeya kuti cilakonzya kutugwasya? Kufwumbwa ciindi notwaba mubukkale buli boobu, inga catugwasya kapati kulomba Jehova kuti atugwasye. Lugwalo lwa Jakobo 1:5 lwaamba kuti: “Na nkwali akati kanu uubula busongo, akumbile kuli-Leza, uubaabila boonse cabuuya.” Taateesu wakujulu uyootupa muuya uusalala walo uukonzya kutugwasya kusala ncotweelede kucita.—Amubale Luka 11:9, 13.
Amukanze Kuzumanana Kusyomeka
19, 20. Ino ncinzi ncotweelede kukanza kucita?
19 Myaka yamapenzi yakatobela kuzwa ciindi Solomoni naakaleya kubukombi bwakasimpe yakaleta masunko aataambiki kubabelesi ba Leza kumakani aakusyomeka kwabo. Masimpe ngakuti ibanji bakaleka kusyomeka munzila zimwi. Pele bamwi bakazumanana kusyomeka kuli Jehova.
20 Abuzuba kuli zyintu zinji nzyotweelede kusala kuti tucite zyalo zipa kuti tusunkwe mbotusyomeka. Andiswe tulakonzya kuba akati kabaabo basyomeka. Atuzumanane kusyomeka kuli Jehova notusoleka kuba amoyo omwe, katusyomede kuti uyoozumanana kulongezya bantu bakwe basyomeka.—2 Sam. 22:26.
Bupanduluzi buyungizidwe
^ munc. 10 Ibbaibbele talyaambi naa Jehova wakabona kuti musinsimi mudaala wajaigwa.
Ino Inga Mwaingula Buti?
• Nkaambo nzi ncotweelede kubeleka canguzu kutegwa tuuleke muzeezo wakulombozya lubono mumoyo wesu?
• Ino ncinzi cikonzya kutugwasya kutegwa katusyomeka kuli Jehova?
• Ino mbuti kulibombya mbokukonzya kutugwasya kuzumanana kusyomeka kuli Leza?
[Mibuzyo yaciiyo]
[Zifwanikiso izili apeeji 9]
Sena cilamukatazya kutantamuka masunko?
[Zifwanikiso izili apeeji 10]
Sena muyoolubikkila maano lulayo iluli mu Bbaibbele?