Kumanizya Cikolo Ca Gileadi Canamba 124

Bamisyinali Bakozyanyisyigwa Kucikwikwi

LYOONSE kwainda myezi iili cisambomwe, cikolo ca Watchtower Bible School of Gilead cilaba apulogilamu yakumanizya cikolo kwalo mukwasyi woonse wa Bbeteli yaku United States nkoutambwa. Mu March 8, 2008, beenzu bazwa muzisi ziinda ku 30 bakajanika antoomwe amukwasyi wa Bbeteli kukumanizya Cikolo ca Gileadi canamba 124. Bantu bali 6,411 ibakajanika, bakakkomana antoomwe abasicikolo mubuzuba oobu bwaalubazu.

Sicuuno wapulogilamu Mukwesu Stephen Lett iwamu Kabunga Keendelezya, wakajalula pulogilamu amakani aajisi mutwe wakuti: “Amweendele Antoomwe Acikwikwi ca Jehova Cacikozyanyo.” Lugwalo lwa Ciyubunuzyo 9:1-4 lukozyanyisya kakamu kasyoonto ka Banakristo bananike bakabuka kumuuya mu 1919 kunkamu mpati yacikwikwi calo cakatalika kubeleka. Basicikolo bakayeezyegwa kuti, mbobali bacibeela “[ca]mbelele zimwi,” baisangana nkamu mpati eeyi yacikwikwi cacikozyanyo.—Joh. 10:16.

Mukwesu Lon Schilling, iwamu Kkomiti ya Mutabi yaku United States wakatobela amakani aakuti: “Amugwasyanye.” Akayeeme acikozyanyo camu Bbaibbele ca Akula a Priskila (naa Priska), banabukwetene Banakristo bamumwaanda wamyaka wakusaanguna. (Rom. 16:3, 4) Mucikolo ca Gileadi eeci kwakali banabukwetene bali 28 (boonse 56). Bakayeezyegwa kuti ikutegwa bazwidilile mubumisyinali, bayandika kuzumanana kuyumya lukwatano lwabo. Bbaibbele ciindi coonse nolyaamba Akula, awalo Priskila imukaintu wakwe lilamwaamba. Aboobo, mwaapostolo Paulo alimwi ambungano bakababona kuti mbaanabukwetene babelekela antoomwe. Mbubwenya buyo, bamisyinali banabukwetene mazuba aano beelede kubelekela antoomwe, kukomba antoomwe, alimwi akubulwanina antoomwe buyumu-yumu mbobajana mumulimo wabo, nkokuti kugwasyanya umwi amweenzinyina.—Matl. 2:18.

Makani aakatobela aajisi mutwe wakuti: “Amutobele Bubotu bwa Jehova Kwiinda Mukucita Zyintu Zibotu,” akakananwa amukwesu Guy Pierce iwamu Kabunga Keendelezya. Mukwesu Pierce wakapandulula kuti kuba muntu uuli kabotu tacaambi buyo kulikasya kucita cibi pe. Muntu uuli kabotu ulacita zyintu zibotu kutegwa agwasye bamwi. Jehova Leza mmubotu kapati cakuti takonzyi kweelanyizyigwa amuntu uumbi pe. Bubotu bwa Leza alimwi aluyando ndwajisi zilakonzya kutukulwaizya kucitila bantu zyintu zibotu. Kalumbaizya basicikolo, Mukwesu Pierce wakamaninzya makani kwiinda mukwaamba kuti: “Mucita kabotu. Tusyoma kuti muyoozumanana kutobela bubotu bwa Jehova kwiinda mukucita zyintu zibotu mumilimo iili yoonse Jehova Leza njayoomupa.”

Mpoonya Mukwesu Michael Burnett iwakali misyinali, pele ino-ino wakapegwa mulimo wakuyiisya mucikolo ca Gileadi, wakakanana makani aajisi mutwe wakuti: “Amwaasame abe Mbuli Ciibalusyo Akati Kameso Aanu.” Kacili mbuli kuti basamide “ciibalusyo” akati kameso aabo, bana Israyeli bakeelede kwiibaluka mbwaakabanununa Jehova munzila yamaleele kuzwa mu Egepita. (Kul. 13:16) Basicikolo bakakulwaizyigwa kwiibaluka malailile manji  ngobakapegwa ku Cikolo ca Gileadi mbuli kuti bakalaasamide kaali mbuli ciibalusyo akati kameso aabo. Mukwesu Burnett wakakankaizya mbociyandika kuba muntu uulibombya alimwi akubelesya njiisyo zyamu Bbaibbele ciindi nobalanganya kaambo kajatikizya kutamvwana kukonzya kuba akati kabamisyinalinyina alimwi abamwi.—Mt. 5:23, 24.

Mukwesu Mark Noumair, imwiiyi mucikolo ca Gileadi iwabeleka kwaciindi cilamfwu, wakakanana makani aakuti: “Ino Ndwiimbo nzi Iluyooyimbwa Kujatikizya Ndinywe?” Mumazuba aansiku, cakali cilengwa buya kwiimba nyimbo kusekelela kuzunda munkondo. Imwi yanyimbo eezyi iyubununa cibi ncobakacita bamusyobo wa Rubeni, Dani, alimwi awa Aseri balo bakali kuwayawaya kulyaaba kuti bagwasye bantu, kakuli musyobo wa Zebuloni ulatembaulwa akaambo kamuuya wabo wakulyaaba. (Bab. 5:16-18) Mbubwenya mbuli majwi aali mulwiimbo, milimo ya Munakristo aumwi mukuya kwaciindi ilazyibwa kubantu. Busungu mbwajisi muntu kumulimo wa Leza alimwi akusyomeka  cakumaninina kumalailile ngoipa mbunga ya Jehova kuya kumukkomanisya Jehova alimwi kupa cikozyanyo cibotu kubakwesu. Ciindi bamwi nobaswiilila nyimbo yacikozyanyo iilembwa kwiinda mumilimo yesu, cibapa kukulwaizyigwa kwiiya cikozyanyo cibotu eeco.

Kabali kucikolo ca Gileadi, basicikolo canamba 124 bakabeleka mawoola aabalilwa ku 3,000 boonse antoomwe mumulimo wakukambauka. Kwiinda mukubelesya mutwe wakuti: “Kutobela Busolozi Bwamuuya Uusalala,” basicikolo bakaluula zyintu zinji zyakabacitikila mumulimo wamumuunda kumukwesu Sam Roberson iwa Cibeela ca Zikolo Zyeendelezyegwa a Leza. Zyakuluula zimwi zyakatondezyegwa mbozyakacitika. Nokwakamana zyakuluula eezyi zikulwaizya, Mukwesu Patrick LaFranca iwamu Kkomiti ya Mutabi yaku United States wakakanana makani aakubuzya-buzya bakamanizya cikolo ca Gileadi lino babelekela mumasi aaindene-indene. Basicikolo bakalumba kumalailile aagwasya ngobakapegwa abakwesu aaba.

Mukwesu Anthony Morris iwamu Kabunga Keendelezya wakakanana makani aamamanino aakuti: “Kamuyeeya Kuti, Zyintu Zibonwa Nzyakaindi Kasyoonto Buyo.” Magwalo atukulwaizya kubikkila maano kuzilongezyo nzyatubikkilide Jehova kumbele muciindi cakubikkila maano kumapenzi aakaindi kasyoonto alo ngotucitikilwa cino ciindi. (2 Kor. 4:16-18) Bucete, ikutalulama, kupenzyegwa, kuciswa, alimwi alufwu nzyintu zicitika ncobeni zyalo nzyotubona mazuba aano. Bamisyinali balakonzya kucitikilwa mapenzi amwi ayaaya. Pele kuyeeya kuti zyintu eezyi nzyakaindi kasyoonto buyo kuyootugwasya kuzumanana kuyuma kumuuya alimwi akuba abulangizi.

Pulogilamu yakamanizyigwa basicikolo kabakkede kucibumbili kuswiilila Mukwesu Lett naakali kwaamba majwi aamamanino. Wakabakulwaizya kutaleka alimwi wakaamba kuti: “Kufwumbwa masukusyo ngotukonzya kucitikilwa, tulakonzya kuliyumya alimwi akuzumanana kusyomeka ikuti naa Jehova ngomugwasyi wesu.” Wakakulwaizya bamisyinali bapya kuti babe mbuli cikwikwi, kuzumanana kuyuma mumulimo wa Jehova alimwi akuba basungu lyoonse, basyomeka, alimwi baswiilila mane kukabe kutamani.

Kabbokesi kali apeeji 30]

MYEELWE IIJATIKIZYA BASICIKOLO

Mweelwe wazisi nkobakazwa: 7

Mweelwe wazisi nkobakatumwa: 16

Mweelwe wabasicikolo boonse: 56

Mweelwe waakati-kati wamyaka yakuzyalwa: 33.8

Mweelwe waakati-kati kabali mukasimpe: 18.2

Mweelwe waakati-kati kabali mumulimo waciindi coonse: 13.8

[Cifwanikiso icili apeeji 31]

Basikumanizya Cikolo ca Watchtower Bible School of Gilead Canamba 124

Mumulongo uuli ansi aawa, mindando ilembedwe manamba kuzwa kumbele kuya musyule, alimwi mazyina alembedwe kuzwa kulumwensyi kuya kululyo mumundando aumwi.

(1) Nicholson, T.; Main, H.; Senge, Y; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B; Williamson, D.; Durrant, J. (9) Cruz, P.; Degandt, B; Williams, D.; Wells, S.; Alexander, D.; May, M.

[Cifwanikiso icili apeeji 32]

Cikolo ca Gileadi cili ku Watchtower Educational Center