Jehova Ubalanganya Kabotu Babelesi Bakwe Bacembeede
Jehova Ubalanganya Kabotu Babelesi Bakwe Bacembeede
“Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe.”—HEB. 6:10.
1, 2. (a) Ino kubona muntu uujisi mvwi kumuyeezya nzi? (b) Ino mbuti Jehova mbwababona Banakristo bacembeede?
CIINDI nomubona bacembeede bali mumbungano ibajisi mvwi, sena mulayeeya kaambo kamwi ikajanika mubbuku lyamu Bbaibbele ilya Daniele? Mucilengaano ncaakamutondezya Daniele, Jehova Leza wakalitondezya kajisi mvwi. Daniele wakalemba kuti: “Lino nendakacili kweebela, ndakabona zyuuno zibikidwe, nkabela kwakakede umwi sinsiku. Zyakusama zyakwe zyakali kutuba buu mbuli nyengenge, amasusu aakumutwe wakwe akali mbuli boya bwambelele bubotu.”—Dan. 7:9.
2 Ikanji-kanji, boya bwambelele bulatuba buu. Aboobo, masusu aajisi mvwi alimwi abbala lyabulemu lyakuti “Sinsiku” zitondezya Leza mbwali mupati abusongo bunji mbwajisi, calo iceelede kutupa kumulemeka. Pele, ino mbuti Sinsiku, Jehova, mbwababona baalumi abanakazi bacembeede ibasyomeka? Ijwi lya Leza lyaamba kuti “mutwe uuli amvwi munsini wabulemu, ulajanwa munzila yabululami.” (Tus. 16:31) Masimpe, ikuti Munakristo uusyomeka waba aamvwi, uleebeka mumeso aa Leza. Sena andinywe ibakwesu abacizyi mubabona mbwababona Jehova?
Ino Nkaambo nzi Ncobayandika Kapati?
3. Ino nkaambo nzi basyomima bacembeede ncobayandika kapati kulindiswe?
3 Akati kababelesi bayandwa ba Jehova aaba bacembeede kuli bamu Kabunga Keendelezya ka Bakamboni ba Jehova, balangizi beendeenda, abaabo bakali balangizi beendeenda musyule, bapainiya basungu alimwi abasikumwaya ba Bwami basimide kumuuya—ibakwesu abacizyi ibabeleka cakusyomeka mumbungano zyesu. Mulakonzya kuzyiba bamwi ibakambauka makani mabotu cabusungu kwamyaka minji balo kwiinda mucikozyanyo cabo cibotu ibakulwaizya bakubusi akucinca buumi bwabo. Ibakwesu bamwi bacembeede bajisi mikuli minji alimwi baliyumya nobapenzyegwa akaambo kamakani mabotu. Jehova alimwi a “muzike musyomesi uucenjede” balailumba kapati milimo ya Bwami yamusyule alimwi anjobacita lino.—Mt. 24:45.
4. Ino nkaambo nzi ncotweelede kulemeka Banakristo bacembeede alimwi akubapailila?
4 Babelesi ba Jehova Leza beelede kubalumba alimwi akubalemeka bacembeede ibasyomeka. Kayi Mulawo wa Leza iwakapegwa kwiinda muli Musa uswaanganya kubikkila maano alimwi akulemeka bacembeede kukuyoowa Jehova. (Lev. 19:32) Tweelede kubapailila lyoonse bantu aaba basyomeka alimwi akulumba Leza akaambo kamilimo yabo yaluyando. Imwaapostolo Paulo wakabapailila babelesinyina ibayandwa, bakubusi alimwi abapati.—Amubale 1 Ba-Tesalonika 1:2, 3.
5. Ino mbuti mbotukonzya kugwasyigwa kwiinda mukuyanzana abakombi ba Jehova bacembeede?
5 Kunze lyaboobo, boonse mumbungano balakonzya kugwasyigwa kwiinda mukuyanzana a Banakristo bacembeede. Kwiinda mukuliyiisya, kulangilila zyintu alimwi aluzyibo ndobajisi, zyapa kuti bakombi ba Jehova basyomeka aaba ibacembeede babe basongo kapati. Baiya kukkazyika moyo alimwi akuba basiluse, mpoonya kuyiisya zyintu eezyi kuzyalani litobela kubapa lukkomano alimwi akukkutila. (Int. 71:18) Nobakubusi, amusongwaale kubweza luzyibo kubantu aaba mbubwenya mbuli mbomunga mwateka meenda mumugoti mulamfwu.—Tus. 20:5.
6. Ino mbuti mbomukonzya kubatondezya bacembeede kuti mubayanda ncobeni?
6 Sena mulabaambila bantu bacembeede kuti mulabayanda mbuli mbwabayanda Jehova? Nzila yomwe mbomukonzya kucita boobu nkwiinda mukubaambila kuti mulabayanda akaambo kakusyomeka kwabo alimwi akuti mulazikkomanina nzyobaamba. Kunze lyaboobo, kwiinda mukuzicita nzyobamwaambila, mutondezya kuti mubalemeka ncobeni. Ibanakristo bacembeede banji balayeeya lulayo lwabusongo ndobakatambula kuzwa kubantu bacembeede ibasyomeka alimwi ambobagwasyigwa mubuumi bwabo kwiinda mukulubelesya lulayo oolo. *
Amutondezye Kuti Mulababikkila Maano Kwiinda Mukubagwasya
7. Ino mbaani Jehova mbapede mukuli wakulanganya bacembeede?
7 Mukuli wakulanganya bantu bacembeede, Leza wakaupa mikwasyi yabo. (Amubale 1 Timoteo 5:4, 8.) Jehova ulakkomana ciindi mikwasyi eeyi noizuzikizya mukuli wayo kubasazinyina bacembeede alimwi eeci citondezya kuti balababikkila maano mbuli mbwacita walo. Leza ulaigwasya akwiilongezya mikwasyi eeyi akaambo kakubalanganya bacembeede cakulyaaba. *
8. Ino nkaambo nzi ibali mumbungano ncobeelede kubabikkila maano Banakristo bacembeede?
8 Mbubwenya buyo, Jehova ulakkomana ciindi mbungano nozigwasya bakombi bakwe bacembeede basyomeka ibayandika lugwasyo balo ibatajisi banamukwasyi Banakristo naa ibatajisi basikubagwasya. (1 Tim. 5:3, 5, 9, 10) Kwiinda mukucita boobu, imbungano zitondezya kuti ‘zilabeetelela, zilijisi luyando lwabunyina alimwi aluzyalo’ kubacembeede. (1 Pet. 3:8) Ikubikkila maano nkobacita kubantu bacembeede bali mumbungano kulitondezyedwe kabotu a Paulo naakaamba kuti, ikuti cizo comwe camubili wamuntu caciswa, “zilaciswa zizonyina zyoonse azyalo.” (1 Kor. 12:26) Kubacitila zyintu munzila iigwasya cakweetelela ibacembeede kutondezya njiisyo iili mululayo lwamwaapostolo Paulo lwakuti: “Amunyampuzyanye mikuli, aboobo mulalondola mulao wa-Kristo.”—Gal. 6:2.
9. Ino mbuyumu-yumu buli buti ibukonzya kuletwa abucembele kumuntu?
9 Ino mbuyumu-yumu nzi mbobajana bacembeede? Ibanji balafwambaana kukatala. Balakonzya balimvwa kuti inga tabacikonzyi kucita zyintu zicitwa lyoonse—kubonana amusilisi, kubbadala mitelo naa kulemba-lemba, kusalazya muŋanda, kujika cakulya alimwi azimwi buyo. Mbwaanga kuyanda kulya alimwi akunywa kulaceya muntu nacembaala, balakonzya kuyeeya kuti tabayandiki kulya naa kunywa mbuli mbobeelede. Mbubwenya buyo, oobu mbocikonzya kuba kujatikizya kwiiya Bbaibbele alimwi akujanika kumiswaangano. Imuntu nayaabucembaala, kubala akuswiilila kumiswaangano ya Bunakristo kulatalika kukatazya, alimwi kulibambila kuti aunke kumiswaangano cilakonzya kukatazya. Aboobo, ino ncinzi bamwi ncobakonzya kubacitila bacembeede bali boobu?
Mbomukonzya Kubagwasya
10. Ino ncinzi baalu ncobakonzya kucita kutegwa bacembeede bagwasyigwe?
10 Mumbungano zinji, ibacembeede balalanganyizigwa munzila mbotu. Ibakwesu abacizyi basiluyando balabagwasya kuula zyintu, kujika alimwi akusalazya aŋanda. Balabagwasya bacembeede kuba aciiyo, kulibambila kuunka kumiswaangano, alimwi akuzumanana kuba basungu mumulimo wamumuunda. Bakamboni bacili bana-bana balabasangana alimwi akubanyamuna amyootokala naa ncinga. Ikuti naa bacembeede tabakonzyi kuzwa mumaanda aabo, ibubambe bwakuswiilizya mapulogilamu aamuswaangano kwiinda muluwaile naa mumateepu bulacitwa. Ikuti kacikonzyeka, baalu balapanga bubambe bugwasya kutegwa bazuzikizye ziyandika zyabacembeede ibali mumbungano. *
11. Amupandulule mukwasyi umwi mbowakagwasya mukwesu uucembeede.
11 Munakristo aumwi kumugama awalo ulakonzya kugwasya kwiinda mukubasamausya alimwi amukubapa zyintu ziyandika. Bakaintu bamukwesu umwi uucembeede nobakafwa, mukwesu ooyu kunyina naakali kukonzya kubbadalila ŋanda nkaambo tanaakacili kuvwola mali aabakaintu bakwe. Mukwesu ooyu abakaintu bakwe bakaliyiisyide Bbaibbele mukwasyi umwi—mulumi, mukaintu alimwi abana bakubusi ibasimbi bobilo—ibakajisi ŋanda mpati. Bakamupa mukwesu ooyu maanda obilo mukati kuti kakkala mumo. Imukwesu wakaba cibeela camukwasyi ooyu, aboobo kwamyaka iili 15 njobakakkala anguwe, bakali kuba aziindi zikkomanisya antoomwe. Ibana bakagwasyigwa kapati alusyomo lwamukwesu ooyu alimwi aluzyibo, awalo mukwesu wakagwasyigwa kukuyanzana kukkomanisya ooku. Imukwesu uucembeede ooyu wakakkala ambabo kusikila naakafwa kajisi myaka yakuzyalwa iili 89. Imukwasyi ooyu ulumba Leza akaambo kazilongezyo zinji nzyobakajana kwiinda mukuyanzana amukwesu ooyu. ‘Tiibakasweekelwa bulumbu bwabo’ nkaambo bakagwasya sikwiiya wa Jesu Kristo.—Mt. 10:42. *
12. Ino mbuti mbomukonzya kubabikkila maano ibakwesu abacizyi bacembeede?
12 Inga kamutakonzyi kugwasya mukwesu naa mucizyi uucembeede mbuli mukwasyi ooyu mbowakacita, pele mulakonzya kubagwasya kujanika kumiswaangano alimwi akuunka mumulimo wamumuunda. Alimwi mulakonzya kubatamba kuŋanda alimwi akuunka ambabo mukulikondelezya amukwasyi wanu. Mulakonzya kubaswaya, kwaambisya ciindi nobacisidwe. Kunze lyaboobo, mulakonzya alimwi mweelede kubabona lyoonse kuti mbantu bapati basimide. Kufwumbwa kuti kabacikonzya kuyeeya kabotu, Banakristo bacembeede beelede kubikkilizyigwa ciindi nomuyanda kucita zyintu zimwi zibajatikizya. Nobaba baabo batacikonzyi kuyeeya kabotu balakonzya kuzyiba naa mulabapa bulemu.
Jehova Takailubi Milimo Yanu pe
13. Ino nkaambo nzi ncokuyandika kapati kubikkila maano mbobalimvwa Banakristo bacembeede?
13 Ikubikkila maano mbobalimvwa bantu bacembeede kulayandika kapati. Kanji-kanji bacembeede balatyompwa akaambo kakutacikonzya kucita zyintu nzyobakali kucita ciindi nobakacili bana-bana alimwi aciindi nobakali bazumi. Mucikozyanyo, mucizyi umwi iwakabelekela Jehova cabusungu kwamyaka iili 50 alimwi iwakali kucita bupainiya bwaciindi coonse wakaciswa bulwazi ibwakamuyokezya mubili, aboobo eeci cakapa kuti ajane buyumu-yumu bwakujanika kumiswaangano lyoonse. Naakeelanya mulimo ngwaakali kucita musyule ambwabede lino, wakatalika kulila. Wakalanga ansi kumwi kalila akwaamba kuti: “Kunyina ncondicita mazuba aano.”
14. Ino babelesi ba Jehova inga bakulwaizyigwa buti antembauzyo?
14 Ikuti kamucembeede, sena kuli nomwakalimvwa bubi munzila eeyi? Naa sena kuli ziindi zimwi nomulimvwa kuti Jehova wamulekelezya? Ambweni sintembauzyo awalo mbwaakalimvwa oobo naakacembaala, nkaambo wakapaila kuli Jehova kuti: “Utandisowi kuciindi cakucembaala; utandilekelezyi na inguzu zyangu zyamana. Utandisii, O Leza, nekuba kuti ndacembaala akuba amvwi.” (Int. 71:9, 18) Bwini mbwakuti Jehova kunyina naakali kukonzya kumulekelezya muntu ooyu iwakalemba intembauzyo eeyo, andinywe takamulekelezyi pe. Muntembauzyo aimbi, Davida wakatondezya kuti wakali kusyoma Jehova kuti uyoomugwasya. (Amubale Intembauzyo 68:19.) Mulakonzya kuba masimpe kuti, ikuti kamuli Munakristo uucembeede uusyomeka, Jehova uli aandinywe alimwi uyoozumanana kumulanganya abuzuba.
15. Ino ncinzi icikonzya kugwasya bantu bacembeede kuzilanga munzila yeelede zyintu?
15 Zyoonse nzyomwakacita alimwi anzyomucita lino kutegwa mumulemeke Leza nywebo Nobakamboni ba Jehova ibacembeede ulaziyeeya. Ibbaibbele lyaamba kuti: “Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe.” (Heb. 6:10) Aboobo, mutabi amizeezo iilubide, ikuyeeya kuti akaambo kakucembaala munyina mpindu kuli Jehova. Kamusoleka kugwisya mizeezo iityompya akutalika kuyeeya zyintu zikulwaizya. Amuzikkomanine zilongezyo nzyomujisi alimwi abulangizi bwanu bwakumbele. Tulijisi ‘bulangizi kumamanino’—ibubotu kapati—oobo bwakasyomezyegwa a Mulengi wesu. (Jer. 29:11, 12; Inc. 17:31; 1 Tim. 6:19) Amuyeeye bulangizi mbomujisi, muzumanane kuzilanga zyintu munzila yeelede mbuli kuti mucili bana-bana alimwi tamweelede kuubya-ubya mbomuyandika kumbungano! *
16. Ino nkaambo nzi imukwesu umwi uucembeede ncaakayeeyela kuti acileke kuba mwaalu, pele ino mbuti kabunga kabaalu mbokakamukulwaizya?
16 Atulange makani aaba Johan, balo ibajisi myaka yakuzyalwa iili 80 balanganya ibakaintu babo basyomeka, lino ibacembeede kapati alimwi batabukili bulo, ba Sannie. * Ibacizyi balagwasyanya kucaala aba Sannie kutegwa ba Johan bacikonzye kuunka kumiswaangano alimwi amumulimo wamumuunda. Ino-ino, ba Johan bakalimvwa kuti nguzu zyamana, aboobo bakayeeya kuti tabeeleli kuzumanana kubeleka kabali baalu mumbungano. Bakatalika kutongooka kumwi misozi kayiiba-iba mumeso, bakalibuzya kuti: “Ino nkaambo nzi ncondicili mwaalu. Tandicibeleki mulimo uuli woonse uugwasya mumbungano.” Ibaalunyina bakabasyomezya kuti luzyibo lwabo alimwi ambobakosola twaambo zilayandika kapati. Bakabakulwaizya kuti bazumanane kuba baalu nokuba kuti nzyobacita nzisyoonto. Akaambo kakukulwaizyigwa ooku, ba Johan balazumanana kubeleka kabali baalu, cakuti imbungano yagwasyigwa kapati.
Jehova Ulababikkila Maano
17. Ino Bbaibbele libasyomezya nzi Banakristo bacembeede?
17 Imagwalo alacisalazya kwaamba kuti ibacembeede balakonzya kuzumanana kuzyala micelo mumulimo wa Jehova nokuba kuti kuli mapenzi aaboola akaambo kakucembaala. Sintembauzyo wakaamba kuti: “Balisimpidwe muŋanda ya-Jehova . . . banoocizyala micelo amubucembele bwabo, banooneneya akufwefwema.” (Int. 92:13, 14) Imwaapostolo Paulo, walo uulangilwa kuti wakalijisi penzi mumubili, taakwe ‘naakatyompokelwa, nokuba kuti buntu bwakwe bwaanze bwakali kuloba.’—Amubale 2 Ba-Korinto 4:16-18.
18. Ino nkaambo nzi basyomima bacembeede alimwi abasikubalanganya ncobayandika kugwasyigwa?
18 Izikozyanyo zyamazuba aano zitondezya kuti bacembeede balakonzya kuzumanana ‘kuzyala micelo.’ Pele buyumu-yumu bwakuciswa-ciswa alimwi akucembaala bulakonzya kutyompya, nokuba kuli baabo ibajisi banamukwasyi babalanganya kabotu. Abalo basikulanganya inga bakatala. Imbungano ilijisi coolwe alimwi amukuli wakutondezya luyando kubantu bacembeede alimwi abaabo babalanganya. (Gal. 6:10) Ilugwasyo luli boobu lutondezya kuti mubwini tatwaambili buyo bantu aaba kuti “mujane zyakulivumba azilyo zyakumukutya” pele katutabapi zyintu eezyi ziyandika.—Jak. 2:15-17.
19. Ino nkaambo nzi Banakristo bacembeede ibasyomeka ncobeelede kulanga kumbele kabajisi lusyomo?
19 Kucembaala inga kwacinca milimo ya Munakristo, pele eeci tacikonzyi kumana luyando ndwajisi Jehova kubantu bakwe bacembeede aaba basyomeka. Muciindi caboobo, boonse aaba Banakristo basyomeka balayandika kapati kulinguwe, alimwi kunyina nayoobalekelezya pe. (Int. 37:28; Isa. 46:4) Jehova uyoobagwasya akubasololela lyoonse mubucembele bwabo.—Int. 48:14.
Bupanduluzi buyungizidwe
^ munc. 6 Amubone cibalo cakuti: “Bantu Bacembeede—Ncileleko Kubana-bana,” mu Ngazi Yamulindizi ya June 1, 2007.
^ munc. 7 Amubone cibalo 15 icakuti: “Kulemeka Bazyali Besu Bacembeede”, mubbuku lyakuti Inzila Yakujana Lukkomano Mumukwasyi.
^ munc. 10 Mumasi mumwi, eeci cibikkilizya kugwasya bacembeede kutambula lugwasyo kumfwulumende. Amubone cibalo cakuti: “Leza Ulabalanganya Bacembeede,” mu Ngazi Yamulindizi ya June 1, 2006.
^ munc. 11 Amubone cibalo cijisi mutwe wakuti: “Jehova Ulatulanganya Lyoonse,” mu Ngazi Yamulindizi yamu Chingisi ya September 1, 2003.
^ munc. 15 Amubone cibalo cakuti: “Ibulemu Bwamvwi,” mu Ngazi Yamulindizi yamu Chingisi ya March 15, 1993.
^ munc. 16 Mazyina acincwa.
Ino Inga Mwaingula Buti?
• Ino nkaambo nzi Banakristo bacembeede ibasyomeka ncomubabona kuti balayandika kapati?
• Ino mbuti mbotukonzya kutondezya luyando kubakombima ibacembeede?
• Ino ncinzi cikonzya kugwasya babelesi ba Jehova bacembeede kuzilanga munzila mbotu zyintu?
[Mibuzyo yaciiyo]
[Zifwanikiso izili apeeji 18]
Ibali mumbungano balabalemeka kapati bantu bacembeede