Amukomene Muluzyibo Lwini-lwini Amyoyo “Ilibambide Kabotu”

BABELESI ba Jehova boonse bayanda kuti kabakkomaninwa anguwe. Akaambo kakuti tuyanda kuti zyintu zibe boobo, tulilibambilide kuyumya lusyomo lwesu alimwi akubeleka mulimo uusetekene cabusungu. Nokuba boobo, mwaapostolo Paulo ulatucenjezya kujatikizya ntenda iikonzya kuba, yalo yakacitikila bama Juda bakali kupona ciindi eeco, ategwa: “Bali abusungu kumakani aa-Leza, pele busungu mbubajisi teensi bwaluzibo” lwini-lwini. (Rom. 10:2) Cilasalala ikuti, lusyomo lwesu alimwi abukombi bwesu kuli Jehova tazyeelede kuyaama kunzila mbotulimvwa pe. Tuyandika kuba aluzyibo lwini-lwini lwa Mulengi wesu alimwi akuyanda kwakwe.

Mucibalo cimwi Paulo wakaswaanganya kulilemeka Leza nkwayanda kukusolekesya kujana luzyibo. Wakapaila kuti batobeli ba Kristo ‘bazuzigwe luzyibo’ lwakuzyiba kuyanda kwa Leza kutegwa beende “munzila iielede cakubotezya [Jehova],” mbobayabuzyala “micelo yamilimo mibotu yamisyobo yoonse akuya bukomena lyoonse mumakani aakuziba Leza.” (Kol. 1:9, 10) Nkaambo nzi “luzibo” lwini-lwini ncoluyandika kapati? Alimwi nkaambo nzi ncotweelede kuluyungizya oolu luzyibo lwini-lwini?

Iciyandika Kapati Kutegwa Tube Alusyomo

Ikuzyiba bwini kujatikizya Leza alimwi akuyanda kwakwe ikujanika mu Bbaibbele mpaayeeme lusyomo lwesu. Ikuti luzyibo lwesu kalutayeeme azyintu eezyi, ilusyomo lwesu muli Jehova lulakonzya kuba mbuli kaanda kamapepa ikawa buyo amuwo musyoonto. Paulo utukulwaizya kuti katubelekela Leza mulimo uusetekene, “nzila iini-ini yakukomba Leza” alimwi ‘akuba amyoyo mipya.’ (Baloma 12:1, 2, BT) Kuliyiisya Bbaibbele lyoonse kulakonzya kutugwasya kucita boobu.

Mukaintu uutegwa Ewa, imupainiya waciindi coonse iwaku Poland wakati: “Ikuti ndacileka kuliyiisya Jwi lya Leza, ndilakonzya kuleka kuyungizya luzyibo lwini-lwini lujatikizya Jehova. Ndilalangilwa kuleka kuba Munakristo mwini-mwini, alimwi lusyomo lwangu muli Leza lulakonzya kuya bumana—nkokuti cilongwe cangu a Jehova inga catalika kumana.” Icintu cili boobu taceelede kucitika kulindiswe. Amulange-lange cikozyanyo camwaalumi wakayungizya luzyibo lwini-lwini lujatikizya Jehova, eelyo wakaba mulongwe wa Jehova.

“Nduuyandisya Loko Mulao Wako!”

Inyimbo zyakweema izilembedwe mu Intembauzyo 119 mu Bbaibbele zilatondezya mbuli mbwaakali kulimvwa sintembauzyo kumilawo, milumbe, malailile, alimwi ambeta zya Jehova. Sintembauzyo wakalemba kuti: “Ndakondelwa imbeta zyako . . . Milumbe yako njindibotezya.” Alimwi wakalemba kuti: “Nduuyandisya loko mulao wako! Nduuyeeya buzuba boonse!”—Int. 119:16, 24, 47, 48, 77, 97.

Ibbala lyakuti “ndakondelwa” alyakuti “nduuyeeya” apa muzeezo wakuzinzibala kuyeeya Jwi lya Leza, nkokuti ikukukkomanina kuzinzibala kuyeeya. Mabala aaya akankaizya iluyandisyo ndwaakajisi sintembauzyo kukuliyiisya mulawo wa Leza. Iluyando oolo tiilwakaide kuvwula mumoyo wasintembauzyo pe. Muciindi caboobo wakali kuyandisya kuti ‘kayeeya’ mulawo kutegwa azyibe majwi aa Jehova. Kwiinda munzila mbwaakali kuzibona zyintu, tulakonzya kubona kuti wakali kuyandisya kumuzyiba kabotu Leza alimwi aluyando lwakwe.

Cilasalala kuti iluyando ndwaakajisi sintembauzyo kujwi lya Leza lwakali lwamoyo woonse. Tulakonzya kulibuzya kuti: ‘Sena andime  ndilaliyandisya Jwi lya Leza? Sena ndilakukkomanina kubala akucilanga-langa cakusitikila cibeela acimwi ca Bbaibbele abuzuba? Sena ndilasolekesya kubala Jwi lya Leza alimwi akupaila kuli Jehova kanditanatalika kulibala?’ Ikuti katukonzya kwiingula kuti inzya kumibuzyo eeyi, nkokuti tulalangilwa “kuya bukomena lyoonse mumakani aakuziba Leza.”

Ewa wakati: “Lyoonse ndilasoleka kulondola nzila mbondicita ciiyo cangu. Kuzwa ciindi nindakatambula broshuwa yakuti ‘Atubone Nyika Mbotu,’ ziindi zinji ndilaibelesya nondiliyiisya. Ndilasolekesya kuvwuntauzya makani mubbuku lya Insight on the Scriptures alimwi amumabbuku aambi ikuti kwayandika.”

Alimwi amubone cikozyanyo caba Wojciech alimwi aba Małgorzata balo ibajisi mikuli minji yamumukwasyi. Ino bacikonzya buti kujana ciindi cakuliyiisya Bbaibbele akati kazyintu nzyobacita? “Tulasala ciindi cakuti aumwi kaliyiisya Jwi lya Leza kweelana ambotukonzya. Kumane boobo, ciindi notucita ciiyo camukwasyi alimwi anotubandika, tulaambilana twaambo twakamukonda aumwi naa kumukulwaizya.” Ikuliyiisya cakusitikila kulabaletela lukkomano alimwi kulabagwasya ‘kukomena muluzyibo.’

Kamuliyiisya Mizeezo Niikalikene

Mbwaanga tuli Banakristo, tulasyoma kuti Leza uyanda kuti “bantu boonse bafutulwe akuboola kuluzibo lwakuziba lusinizyo.” (1 Tim. 2:3, 4) Kaambo aaka kasinizya mbociyandika kubala Bbaibbele alimwi akusoleka “kumvwisya.” (Mt. 15:10) Cintu cimwi cikonzya kutugwasya nkuliyiisya kumwi katulibambide kuzumina nzyotubala. Oobu mbobakacita bana Bereya bansiku Paulo naakabakambaukila makani mabotu, nkaambo wakati: “Bakatambula makani emyoyo ilibambide kabotu, balalingaula Magwalo mazuba oonse, kubona kuti na zintu ezi mbozibede.”—Inc. 17:11.

Sena mulatobela cikozyanyo cabana Bereya cakuba amyoyo iilibambide kabotu alimwi akutanyonganyizyigwa acintu cili coonse ciindi nomuliyiisya Bbaibbele? Munakristo ulakonzya kusoleka kwiiya bana Bereya, nokuba kuti musyule kunyina naakali kukukkomanina kuliyiisya. Kunze lyaboobo, Banakristo bakasimpe tabeelede kucita mbuli bucita bantu bamwi ibanga mbobaya bucembala tababali kapati nokuba kuliyiisya. Kufwumbwa naa muntu ujisi myaka yongaye, ulakonzya kukweeleba kunyonganyizyigwa. Alimwi mbomuya bubala, mulakonzya kuyandisya makani ngomukonzya kwaambila bantu bambi. Mucikonzyanyo, sena mulakonzya kuba amakanze aakwaambila ngomukwetene limwi antela mweenzinyoko Munakristo nzyomwabala antela kwiiya iciindi nomuliyiisya? Ikucita boobo kulakonzya kupa kuti muzibikke mumizeezo amumoyo zyintu eezyo kumwi kamuyeeyede kuti zilakonzya kubagwasya bantu.

Kujatikizya ciindi cakuliyiisya, amutobele cikozyanyo ca Ezara, mubelesi wa Leza wansiku walo “wakapangika moyo wakwe kukuyandaula mulao wa-Jehova.” (Ezr. 7:10) Ino mbuti mbomukonzya kucita oobo? Mulakonzya kujana ciindi cibotu cakuliyiisya. Eelyo amukkale akupaila kuli Jehova kuti amusololele alimwi akumupa busongo. (Jak. 1:5) Amulibuzye kuti, ‘Ino ncinzi ncondilangila kwiiya muciindi eeci cakuliyiisya?’ Nomuya bubala, amubikkile maano kutegwa mubone twaambo tuyandika kapati. Mulakonzya kuyanda kubikka mbaakani muli twaambo ootu antela kweenga, ikapati muzibeela  nzyomuyanda kuti kamuyeeya. Amuyeeye mbuli mbomukonzya kwaabelesya makani aayo nomukambauka, nomusala zyakucita, antela nomukulwaizya mukombinyoko. Nomuya kumamanino kwaciindi cakubala ncomubikkide, amutwiinduluke twaambo ntomwaiya. Eeci ciyoomugwasya kutegwa mutalubi nzyomwaiya.

Ewa ulapandulula mbwacita, ategwa: “Nondibala Bbaibbele, ndilabelesya Magwalo aamba makani aakozyene, Watch Tower Publications Index, alimwi a Watchtower Library iili a CD-ROM. Ndilalilembela twaambo kutegwa ndikatubelesye mumulimo.”

Ibamwi bali kuliyiisya kwamyaka minji alimwi akulitakata mukwiiya kujatikizya Leza. (Tus. 2:1-5) Pele, bacijisi mikuli minji alimwi cilabakatazya kujana ciindi cakuliyiisya. Ikuti naa mbocibede oobu akulindinywe, ino inga mwabambulula buti zyintu nzyomucita?

Ino Ciindi Inga Ndacijana Buti?

Ambweni mulakazumina kaambo aaka kakuti ncuuba kujana ciindi cakucita zyintu nzyotukkomanina. Ibanji bajana kuti cintu cikonzya kugwasya kutegwa tubikkile maano kapati mukuliyiisya nkuba ambaakani, mbuli yakubala Bbaibbele mbolizulwa. Masimpe, cilakonzya kukatazya kubala mulongo wanzubo zyabantu, ibupanduluzi bukatazyide ibwatempele yansiku, antela businsimi buzambene bwalo bulibonya mbuli kuti kunyina ambobuswaangene abuumi bwamazuba aano. Amusolekesye kujana nzila zikonzya kumugwasya kuzuzikizya mbaakani yanu. Mucikozyanyo, kamutana langa-langa cibeela mu Bbaibbele icilibonya kukatazya, mulakonzya kubala makani aajatikizya zyakali kucitika nocakalembwa antela kubala mbocigwasya. Makani aaya woonse nkwaali mubbuku lyakuti “All Scripture Is Inspired of God and Beneficial,” ilijanika mumyaambo iitandila ku 50.

Cilakulwaizya ikuti kamusoleka kucita mbuli kuti mulizibwene zyintu kazicitika nomubala Bbaibbele. Eeci ciyoomugwasya kuba azifwanikiso mumizeezo izyabantu baambwa alimwi azili mukucitika. Ikubelesya mizeezo eeyi misyoonto buyo kulakonzya kumugwasya kutegwa ciindi ncomubikkide kuliyiisya cikondelezye alimwi akugwasya. Aboobo, ciyoomukulwaizya kuti kamujana ciindi cakuliyiisya. Ciya kuuba-uba ikuba acilengwa cakubala Bbaibbele abuzuba.

Nokuba kuti mizeezo eeyi ilakonzya kumugwasya muntu kumugama, ino ncinzi mukwasyi  uujisi bubi ncoukonzya kucita? Sena tamukonzyi kubandika cakulikwaya kutegwa mwaambe bubotu bwakwiiya Bbaibbele amukwasyi? Kwiinda mukubandika mulakonzya kujana mizeezo iikonzya kugwasya, mbuli kufwambaana kubuka abuzuba antela mazuba amwi ikutegwa mubale cibeela ca Bbaibbele. Antela kwiinda mukubandika mulakonzya kujana kuti kuyandika kucinca ciindi caciiyo camukwasyi. Mucikozyanyo, mikwasyi imwi yajana kuti cilagwasya kubandika lugwalo lwabuzuba antela kubala cibeela cimwi ca Bbaibbele bamana kulya. Imitiba kaitana yobololwa naa kuti kakutanaba naba omwe uutalika kucita cintu cimbi, mukwasyi ulakonzya kutola maminiti aali 10 antela 15 ikubandika makani aamu Magwalo antela kubala cibeela ca Bbaibbele icili mumulongo. Kumatalikilo, eeci cilakonzya kuboneka kuti cilakatazya, pele mwazyibila cilakonzya kuba cintu citakatazyi alimwi cikondelezya.

Wojciech alimwi a Małgorzata balapandulula cakagwasya mukwasyi wabo, ategwa: “Kaindi, ciindi cakali kumanina muzyintu naa milimo iitako ankoigama. Twakasala kukuyumbila ambali ikutumina milumbe amuncini wakkompyuta. Alimwi twakayozya-yozya kulikondelezya akubikka buzuba alimwi aciindi notwakeelede kusitikila mukuliyiisya.” Mukwasyi ooyu kunyina noweempa akaambo kabubambe mbobakacita, alimwi eeci ncecikonzya kucitika amumukwasyi wanu.

Kukomena Muluzyibo Lwini-Lwini Kulagwasya!

Kusitikila mukuliyiisya Jwi lya Leza kulakonzya kuzyala “micelo yamilimo mibotu yamisyobo yoonse.” (Kol. 1:10) Ikuti eeci cacitika mubuumi bwanu, ikuyaambele kwanu kulakonzya kulibonya kubantu boonse. Muyooba muntu uukamvwisya kabotu kasimpe kali mu Bbaibbele. Zyintu nzyomusala tazinoolemeneni kubbazu limwi, alimwi munoolibambide kugwasya bantu, tamunoociindilizyi muzyintu nzyomucita mbuli bucita baabo batajisi luzyibo lunji. Iciinda kugwasya, muyooba acilongwe ciyumu a Jehova. Muyoobuzyiba kabotu bube bwakwe alimwi eeci ciyoolibonya nomwaambila bantu bamwi kujatikizya nguwe.—1 Tim. 4:15; Jak. 4:8.

Kufwumbwa naa mujisi myaka yakuzyalwa yongaye, amusoleke kujana nzila mbomukonzya kulikkomanina Jwi lya Leza alimwi akuliyiisya cakusitikila mizeezo yanu kaikkalikene. Amusinizye kuti Jehova takakulubi kusoleka nkomucita. (Heb. 6:10) Uyoomulongezya kapati.

Kabbokesi kali apeeji 13]

CIINDI ‘NOTUKOMENA MULUZYIBO LWINI-LWINI’. . .

Tulaluyumya lusyomo lwesu muli Leza alimwi akweenda munzila yeelede cakubotezya Jehova.—Kol. 1:9, 10

Tulaba aluzyibo lunji, kuba bantu bakonzya kubelesya bupampu alimwi akusala kucita zyintu cabusongo.—Int. 119:99

Tulakukkomanina kapati kugwasya bantu kuswenenena kuli Jehova.—Mt. 28:19, 20

[Zifwanikiso izili apeeji 14]

Ikujana busena bubotu bwakuliyiisyila cilakonzya kukatazya, pele cilayandika

[Cifwanikiso icili apeeji 15]

Mikwasyi imwi ilabala cibeela ca Bbaibbele bamana kulya