Jehova—“Muvuni” Mumazuba Aakali Kulembwa Bbaibbele
Jehova—“Muvuni” Mumazuba Aakali Kulembwa Bbaibbele
“Fwambaana kundigwasya, O Leza. Nduwe mugwasyi wangu, muvuni wangu.” —INT. 70:5.
1, 2. (a) Ino ndilili babelesi ba Leza nobakonzya kulangila kuti abagwasye? (b) Ino mubuzyo nzi uuboola, alimwi nkukuli nkotukonzya kujana bwiinguzi?
KABALI kuyoolyookezya, ibazyali bamukaintu umwi uukwetwe uujisi myaka yakuzyalwa iili 23, batambula mulumbe wakuti mwanaabo wasweeka munzila iigambya. Beezyeezya kuti ambweni wajaigwa. Mpoonya-mpoonya balongela zyintu zyabo akupilukila kuŋanda, kumwi kabapaila kuli Jehova kulomba kuti abagwasye. Kamboni uujisi myaka yakuzyalwa iili 20 waambilwa kuti ujisi bulwazi buyoomulebula mubili woonse. Cakutasowa ciindi wapaila kuli Jehova. Mukaintu uutakwetwe iwakatazyigwa kujana mulimo tajisi mali aakonzya kuula cakulya ncakonzya kulya antoomwe amwanaakwe musimbi uujisi myaka yakuzyalwa iili 12. Wapaila camoyo oonse kuli Jehova. Inzya, bakombi ba Leza balalomba lugwasyo kulinguwe ciindi nobasikilwa masunko mapati naanka mapenzi. Sena kuli nomwakapailide kuli Jehova kulomba kuti amugwasye ciindi nomwakapatide?
2 Imubuzyo mupati uubuka ngwakuti: Sena masimpe tulakonzya kulangila Jehova kuti ayingule mipailo yesu yakulomba kugwasyigwa anguwe? Ibwiinguzi buyumya lusyomo bulajanika ku Intembauzyo 70. Eeyi intembauzyo iikulwaizya yakalembwa a Davida mubelesi wa Jehova uusyomeka iwakasikilwa masunko manji alimwi amapenzi mubuumi bwakwe. Ooyu sintembauzyo iwakasololelwa amuuya wa Leza wakakulwaizyigwa kwaamba boobu kujatikizya Jehova: “O Leza. Nduwe mugwasyi wangu, muvuni wangu.” (Int. 70:5) Kulanga-langa bbuku lya Intembauzyo 70 kulakonzya kutugwasya kubona kaambo andiswe ncotukonzya kulanga kuli Jehova muziindi zyamapenzi akusyoma cakumaninina kuti uyooba “muvuni” wesu.
“Nduwe . . . Muvuni”
3. (a) Ino Intembauzyo 70 ijisi majwi nzi aakulomba lugwasyo? (b) Ino ndusyomo nzi Davida ndwatondezya mu Intembauzyo 70?
3 Bbuku lya Intembauzyo 70 lilatalika alimwi akumana amajwi aakulomba kuti Leza amugwasye cakufwambaana. (Amubale Intembauzyo 70:1-5.) Davida wakalomba Jehova kuti ‘afwambaane’ kumugwasya. Mutupango tuli akati, Davida ulomba zyintu zyosanwe kuli Jehova. Zyintu zyotatwe zyakusaanguna ulomba lugwasyo kujatikizya bantu bakanza kumujaya. Davida ulomba Jehova kuti abazunde basinkondonyina aaba alimwi akubajazya nsoni akaambo kabubi bwabo. Mukapango kane ulomba zyintu zyobile kujatikizya bantu ba Leza. Davida upaila kuti abaya bamuyandaula Jehova babe alukkomano alimwi akuti bamusumpule. Mukumanizya intembauzyo yakwe, Davida waambila Jehova kuti: “Nduwe mugwasyi wangu, muvuni wangu.” Amubone kuti Davida taambi kuti: “Ube,” mbuli kuti ulomba cintu cimwi. Pele waamba kuti: “Nduwe,” ikutondezya lusyomo lwakwe. Davida ulasyoma kuti uyoogwasyigwa a Leza.
4, 5. Ino ncinzi ncotukonzya kwiiya kujatikizya Davida mubbuku lya Intembauzyo 70, alimwi ino ndusyomo nzi ndotukonzya kubaandulo?
4 Ino Intembauzyo 70 itondezya nzi kujatikizya Davida? Naakasikilwa basinkondonyina ibakakanzide kumujaya, Davida tanaakasala kubalwana alikke pe. Pele walo wakasyoma kuti Jehova uyoobalwana muciindi alimwi amunzila yakwe. (1 Sam. 26:10) Davida wakazumanana kusinizya kuti Jehova ulagwasya akunununa baabo bamuyandaula. (Heb. 11:6) Davida wakali kusyoma kuti bakombi beni-beni balijisi kaambo ncobakkomanina alimwi akulemeka Jehova kwiinda mukwaambila bamwi kujatikizya bupati bwakwe.—Int. 5:11; 35:27.
5 Mbubwenya mbuli Davida, tulakonzya kuba alusyomo lumaninide lwakuti Jehova ngomugwasyi alimwi “muvuni” wesu. Aboobo, naa twasikilwa masukusyo aakatazyide nanka kuyandisya lugwasyo, cilayandika kulomba Jehova kuti atugwasye cakufwambaana. (Int. 71:12) Ino ncinzi Jehova ncakonzya kucita ikwiingula mipailo yesu yakulomba kugwasyigwa? Katutana bandika mbuli Jehova mbwakonzya kutugwasya, atulange-lange nzila zyotatwe mbwaakagwasya Davida naakali kuyandika kugwasyigwa cakufwambaana.
Kuvwunwa Kuli Basikukazya
6. Ino ncinzi cakagwasya Davida kuti azyibe ikuti Jehova ulabavuna balulami?
6 Kwiinda muzibeela zyamabbuku aamu Bbaibbele aakaliko, Davida wakalizyi kuti baluleme balakonzya kulangila kuti Jehova abagwasye. Jehova naakaleta Zambangulwe munyika mbyaabi, wakamufwutula Nowa antoomwe amukwasyi wakwe uuyoowa Leza. (Matl. 7:23) Jehova naakalosya mulilo asulufa kubantu bamu Sodoma a Gomora, wakamugwasya Loti mululami abana bakwe basimbi bobile kuti baloboke. (Matl. 19:12-26) Jehova naakanyonyoona Farao sikulisumpula abasikalumamba bakwe Mulwizi Lusalala, wakabakwabilila bantu bakwe kutegwa batanyonyooki. (Kul. 14:19-28) Aboobo sena cilagambya kuti Davida muntembauzyo imwi wakatembaula Jehova kuti “[ngu] Leza wabuvuni”?—Int. 68:20.
7-9. (a) Ino nkaambo nzi kakapa Davida kusyoma kuti Leza ulakonzya kumuvwuna? (b) Ino nguni Davida ngwaakaamba kuti nguwakamuvwuna?
7 Alimwi Davida wakalijisi kaambo ikakamupa kusyoma Jehova cakumaninina ikuti inga wamukwabilila ncobeni. Davida wakalibonena ameso kuti “maboko aa [Jehova] aatamani” inga abagwasya ncobeni bamubelekela. (Dt. 33:27) Kwaziindi zinji Jehova wakamufwutula kumaanza ‘aabasinkondonyina banyemede.’ (Int. 18:17-19, 48) Amubone cikozyanyo eeci.
8 Bamakaintu bamu Israyeli nobakatalika kutembaula Davida akaambo kaluzyibo mukulwana nkondo, Mwami Saulo wakaba amunyono kuli Davida cakuti ziindi zyobile wakali kumwiinzya buya sumo. (1 Sam. 18:6-9) Muziindi eezyi zyobile, wakacikonzya kulileya sumo. Sena Davida wakakonzya kuccija akaambo kakuti wakali silumamba uucibwene alimwi uucizyi kuleya? Peepe. Ibbaibbele lipandulula kuti “Jehova wakali awe.” (Amubale 1 Samuele 18:11-14.) Nokwakainda ciindi cili mbocibede, imakanze aa Saulo aakuti ajaye Davida kwiinda mukubelesya ba Filisti naatakazwidilila, “Saulo wakabona akuziba kuti Jehova uli a-Davida.”—1 Sam. 18:17-28.
9 Ino Davida wakaamba kuti nguni wakamuvwuna? Katwe kamakani ka Intembauzyo 18 kaamba kuti Davida “wakaambila Jehova majwi aalwiimbo olo mubuzuba obo Jehova naakamuvuna . . . kumaanza aa-Saulo.” Davida wakatondezya mbwaakalimvwide naakati: “Jehova ngumwaala wangu, ngumampangala aangu, ngusikundivuna. Ngu-Leza wangu, indomba yangu, ngunsyoma.” (Int. 18:2) Lusyomo lwesu lulakonzya kuyuma ikuti twazyiba kuti Jehova ulakonzya kubavwuna bantu bakwe.—Int. 35:10.
Kugwasyigwa Ciindi Cakuciswa
10, 11. Ino ncinzi citugwasya kuzyiba iciindi Davida nalangilwa kuti ndendilyo naakacisidwe, ikuciswa kulembedwe ku Intembauzyo 41?
10 Ibbuku lya Intembauzyo 41 lilaamba ciindi cimwi Mwami Davida naakaciswa kapati. Davida mbwaatakali kukonzya kubuka abulo kwaciindi cili mbucibede akaambo kakuciswa, basinkondonyina bakayeeya kuti “takooyoobuka limbi.” (Tupango 7, 8) Ino ndilili Davida naakacisidwe boobu? Ibukkale bwaambwa muntembauzyo eeyi bulakonzya kwaamba ciindi naakatyompedwe mubuumi bwakwe, iciindi Abisalomu mwana wakwe naakali kuyanda kumwaatula acuuno cabwami.—2 Sam. 15:6, 13, 14.
11 Mucikozyanyo, Davida waamba mweenzinyina uusyomeka, walo ngwaakali kusuna limwi kuti ngowakamwaaba. (Kapango 9) Eeci cilakonzya kutuyeezya cakacitikila Davida ciindi cimwi mubuumi bwakwe. Abisalomu naakazanga, Ahitofeli imuntu uusyomeka wakali kumulaya Davida ngowakamwaaba, eelyo wakasangana a Abisalomu mukuzangila mwami. (2 Sam. 15:31; 16:15) Amuyeeye buyo mbwaakalimvwide mwami uugonkeledwe kalede abulo, katajisi nguzu zyakukonzya kwiimikila, kumwi kazyi buya kuti uzungulukidwe abantu bamuvwiya ibalombozya kuti kubota wafwa kutegwa mizeezo yabo mibi izwidilile.—Kapango 5.
12, 13. (a) Ino Davida wakatondezya kuti wakajisi cisinizyo nzi? (b) Ino kuboneka kuti Leza wakamugwasya buti Davida?
12 Davida kunyina naakaleka kusyoma “muvuni” pe. Kujatikizya mukombi wa Jehova uusyomeka uucisidwe, Davida wakati: “Jehova ulamuvuna mubuzuba bwamapenzi. Jehova ulamutabilila naaciswa abulo; mukuciswa kwakwe ulaponya malwazi aakwe oonse.” (Int. 41:1, 3) Awaawa amubone lusyomo ndwaakajisi Davida, kweelana amajwi aaya aakuti “Jehova ulamutabilila.” Davida wakalisinizyide kuti Jehova uyoomuvwuna. Munzila nzi?
13 Davida tanaakali kulangila kuti Jehova ulamuponya kwiinda mumaleele pe. Muciindi caboobo, Davida wakalisyomede kuti Jehova “ulamutabilila”—nkokuti kumugwasya alimwi akumupa nguzu zyakuti abuke abulo mpaakalede kacisidwe. Masimpe Davida ndolugwasyo ndwaakali kuyanda oolu. Kunze lyakuciswa kwakamugonkezya, kwakali basinkondonyina ibakali kumusinganya. (Tupango 5, 6) Jehova weelede kuti wakamuyumya ncobeni Davida kwiinda mukumuyeezya makani aawumbulizya. Kayi Davida wakati: “Mebo ulindijisi, nkaambo kaboololoki bwangu.” (Kapango 12) Ambweni Davida acimbi cakamuyumya nkuyeeya kuti, nokuba kuti wakaligonkedwe alimwi basinkondonyina bakali kumusinganya, Jehova wakali kumubona kuti mmuntu uusyomeka. Davida wakazyi kupona. Sena tacikulwaizyi ikuzyiba kuti Jehova ulakonzya kubagwasya aabo bacisidwe?—2 Kor. 1:3.
Kusaninwa
14, 15. Ino ndilili Davida alimwi abaalumi bakwe nobakabulilwa cakulya, alimwi ino bakagwasyigwa buti?
14 Davida naakaba mwami wa Israyeli, wakali kulya zilyo zinono alimwi akunywa, mane buya wakali kutamba bantu banji kuti balye limwi. (2 Sam. 9:10) Nokuba boobo, Davida alimwi wakalizyi mbocimvwika kubulilwa zyakulya azyakunywa. Abisalomu mwana wakwe naakayunga bantu kuti bazange, mukusola kuti alibikke acuuno cabwami, Davida alimwi abantu bakwe basyomeka bakaccija mu Jerusalemu. Bakalobokela kunyika ya Gileadi, kujwe kwa Mulonga wa Jordano. (2 Sam. 17:22, 24) Nobakali kwiingaila, Davida alimwi abaalumi bakwe bakayanda cakulya alimwi azyakunywa kubikkilizya akulyookezya. Pele ino mbuli mbubakali munkanda inga bacijana kuli cakulya?
15 Kumane boobo, Davida alimwi abaalumi bakwe bakasika kumunzi wa Mahanaimu. Mumunzi ooyu bakajana baalumi botatwe basicamba, nkokuti Sobi, Makiri alimwi Barizilai. Bakalibikka muntenda kutegwa bagwasye mwami wakabikkwa a Leza, nkaambo Abisalomu naakacibweza cuuno, kakunyina kudooneka naakabasubula ceetezya boonse bakagwasya Davida. Nobakabona penzi lyakajisi Davida alimwi abaalumi bakwe, baalumi aaba botatwe basyomeka bakaleta zyintu zyakali kuyandika mbuli malo, bulotwe, bbaale, misozya, nyangu, nyemu, buci, maumba alimwi ambelele. (Amubale 2 Samuele 17:27-29.) Kusyomeka alimwi abwaabi bwini-bwini bwabaalumi aaba botatwe bwakamunjila Davida. Davida kunyina naakali kukonzya kuciluba ncobakamucitila?
16. Ino nguni wini wakapa Davida alimwi abaalumi bakwe zyakulya?
16 Pele ino nguni mwini iwakajisi mukuli wakupa Davida abaalumi bakwe zyakulya? Davida wakalisinizyide kuti Jehova ulabalanganya bantu bakwe. Masimpe Jehova ulakonzya kukulwaizya babelesi bakwe bamwi kuti bagwasye bakombinyina babulide. Naakayeeya cakacitika kunyika ya Gileadi, masimpe Davida wakayeeya kuti luzyalo lwabaalumi aaba botatwe lwakatondezya Jehova mbwalanganya caluyando. Kumamanino aabuumi bwakwe, Davida wakalemba kuti: “Ndakali mulombe, sunu ndakomena, pele nsina bona uululeme uusiidwe, nanka lunyungu lwakwe lukumbila insima.” (Int. 37:25) Sena tacuumbulizyi ikuzyiba kuti Jehova unoobapa nzyobayandika babelesi bakwe?—Tus. 10:3.
“Jehova Ulizi Kuvuna” Bantu
17. Ino ncinzi Jehova ncaatondezya cakwiinduluka-induluka?
17 Davida ngumwi wabakombi banji ibakavwunwa a Jehova mumazuba Ibbaibbele nolyakali kulembwa. Kuzwa mumazuba aakali kupona Davida, cakwiinduluka-induluka, Leza watondezya mbwaali aamasimpe majwi aakalemba mwaapostolo Petro aakuti: “Jehova ulizi kuvuna bamukomba kumasukusyo.” (2 Pet. 2:9) Amubone zikozyanyo eezyi azimbi zyobile.
18. Ino mbuti Jehova mbwaakavwuna bantu bakwe mumazuba aakali kupona Hezekiya?
18 Nkamu mpati yabasikalumamba bana Asuri nobakalwana Juda alimwi akukonga kuti bakali kuyanda kulwana Jerusalemu mumwaanda wamyaka walusele B.C.E., Mwami Hezekiya wakapaila kuti: “O Jehova Leza wesu, utuvune . . . kuti zisi zyoonse zyaansi zizibe kuti nduwe Jehova olike.” (Is. 37:20) Icipati ncaakabikkilide maano Hezekiya lyakali zyina lya Leza ampuwo yandilyo. Jehova wakawiingula mupailo ooyu wakapailwa camoyo woonse. Buzuba bomwe buyo masiku, mungelo omwe wakajaya bana Asuri bali 185,000, calo cakafwutula babelesi ba Jehova basyomeka.—Is. 37:32, 36.
19. Ino nkwiinda mukucenjezya kuli ikwakapa kuti Banakristo bamumwaanda wamyaka wakusaanguna batanyonyoonwi?
19 Kakuceede buyo mazuba masyoonto kuti afwe, Jesu wakacenjezya kwiinda mukusinsima kutegwa agwasye basikwiiya bakwe ibakali mu Judaya. (Amubale Luka 21:20-22.) Kwakainda myaka iili mbwiibede, pele mu 66 C.E. ba Juda ibakazanga bakapa kuti Jerusalemu alwanwe ampi zyabana Roma. Basinkondo banji ibakali kusololelwa a Cestius Gallus bakakonzya kufwumba cibeela cimwi cabwaanda bwatempele; pele bakapiluka kakunyina akaambo. Mbwaanga bakazyiba kuti eeci ncicakali ciindi cakuccija lunyonyooko Jesu ndwaakasinsimide, Banakristo basyomeka bakaccijila kumalundu. Basikondo bana Roma bakapiluka alimwi mu 70 C.E. Lweendo oolu kunyina nobakaleka kulwana, eelyo Jerusalemu wakanyonyoodwa limwi. Banakristo ibakaswiilila majwi aa Jesu tiibakanyonyoonwa pe.—Lk. 19:41-44.
20. Nkaambo nzi ncotukonzya kusyoma Jehova kuti ngo “muvuni” wesu?
20 Ikuyeeya mbuli Jehova mbwaakagwasya bantu bakwe cilayumya lusyomo kapati. Milimo njaakacita musyule ilatupa kaambo kayakoomoonga nkotweelede kumusyomena. Kufwumbwa naa mbuyumuyumu nzi mbotujisi lino antela buya kutusikila kumbele, andiswe tulakonzya kusyoma kuti Jehova ngo “muvuni” wesu. Pele ino mbuti Jehova mbwakonzya kutuvwuna? Ino zyintu zyakabeendela buti bantu ibaambwa kumatalikilo kwacibalo eeci? Atubone mbozyakeenda mucibalo citobela.
Sena Muciyeeyede?
• Ino Intembauzyo 70 itupa kaambo nzi ikakubeda alusyomo?
• Ino mbuti Davida mbwaakagwasyigwa naakali kuciswa?
• Ino nzikozyanyo nzi zitondezya kuti Jehova ulakonzya kubavwuna bantu bakwe kuzwa kuli baabo babakazya?
[Mibuzyo yaciiyo]
[Cifwanikiso icili apeeji 6]
Jehova wakawiingula mupailo wa Hezekiya