Mibuzyo Yabasikubala

Mulugwalo ndwaakalembela bana Hebrayo, mwaapostolo Paulo wakaamba kujatikizya “kubikwa maanza.” Sena wakali kwaamba kusalwa kwabaalu naa ncintu cimbi buyo?—Heb. 6:2.

Tatukonzyi kwaamba mubwini, pele, kuboneka kuti Paulo wakali kwaamba kubikka maanza ikwaabila zipego zyamuuya.

Ibbaibbele lyaamba kubikka maanza nolyaamba kujatikizya kusalwa kucitwa mumbunga yeendelezyegwa a Leza. Musa “wakabika maanza” ali Joshua ciindi naakamusala kuti abe simulyazyina. (Dt. 34:9) Mumbungano ya Bunakristo, baalumi beelela bakali kusalwa kwiinda mukubikka maanza ali mbabo. (Inc. 6:6; 1 Tim. 4:14) Paulo wakakasya kufwambaana kubikka muntu maanza.—1 Tim. 5:22.

Nokuba boobo, Paulo wakakulwaizya Banakristo ibana Hebrayo “[kuya] kumbele kumakani aabupati” akaambo kakuti bakaleka “kwaamba makani aakusaanguna.” Mpoonya wakazoowamba “makani aakweempa kumilimo iyakafwa kale, amakani aakusyoma Leza, naaba aakwiisya aakubapatizigwa aakubikwa maanza.” (Heb. 6:1, 2) Sena kusalwa kwabaalu ncecakali cintu cakusaanguna Banakristo ncobakeelede kuya kumbele? Peepe. Kuba mwaalu mumbungano nimbaakani njobeelede kuzuzikizya bakwesu basimide kumuuya, aboobo takweelede kubonwa kuba cintu cantalisyo pe.—1 Tim. 3:1.

Pele kubikkwa maanza kwakali kubelesyegwa munzila aimbi. Mumwaanda wamyaka wakusaanguna, Jehova wakaukaka musyobo wabana Israyeli bakumubili kuzumanana kuba bantu bakwe akusala ba Israyeli bakumuuya, naa mbungano ya Banakristo bananike. (Mt. 21:43; Inc. 15:14; Gal. 6:16) Zipego zyamaleele, mbuli kwambaula mumilaka iimbi cakali citondezyo cakucinca ooku. (1 Kor. 12:4-11) Ciindi Korneliyo amukwasyi wakwe nobakaba basyomi, bakatambula muuya uusalala nkaambo bakatalika ‘kwaambaula mumilaka’ iimbi.—Inc. 10:44-46.

Zimwi ziindi, zipego zyamaleele zyakapegwa kubantu kwiinda mukubikka maanza ali mbabo. Filipo naakakambauka makani mabotu ku Samariya, bantu banji bakabbapatizyigwa. Kabunga keendelezya kakatuma Petro alimwi a Johane kuti baunke nkuko. Nkaambo nzi? Tubala kuti: ‘Nkabela baapostolo aaba bakababikka maanza ali baaba bakabbapatizyidwe, mpoonya bakapegwa Muuya Uusalala.’ Eeci caamba kuti bakatambula zipego zyamuuya, inguzu zyakali kukonzya kubonwa abantu bambi. Tulizyi kaambo aaka nkaambo kakuti Simoni, iwakali kusonda mumunzi ooyo, wakabona mbowakali kubeleka muuya, mpoonya cabulyatu wakayanda kuula nguzu eezyi kutegwa awalo kabikka maanza bantu kubapa muuya uusalala kuti abalo kabacita maleele. (Inc. 8:5-20) Mukuya kwaciindi, bantu baku Efeso ibali 12 bakabbapatizyigwa. Tubala kuti: “Paulo naakabika maanza alimbabo, Muuya Uusalala wakabaselukila bakaamba emilaka, basinsima.”—Inc. 19:1-7; amweezyanisye 2 Timoteo 1:6.

Aboobo, kulugwalo lwa Ba-Hebrayo 6:2, kuboneka kuti Paulo wakali kwaamba kubikka maanza ikwaabila zipego zyamuuya.