Amubagwasye Kutegwa Bapiluke Cakufwambaana

“Tuye kuli? Nduwe oojisi majwi aabuumi ubutamani.”—JOH. 6:68.

1. Ino ncinzi ncaakaamba Petro basikwiiya banji nobakaleka kutobela Jesu?

CIINDI cimwi basikwiiya ba Jesu Kristo banji ibakakaka makani amwi ngaakayiisya bakaleka kumutobela. Wakababuzya baapostolo bakwe kuti: “Sena anywebo mulainka?” Petro wakavwiila kuti: “Omwami, tuye kuli? Nduwe oojisi majwi aabuumi ubutamani.” (Joh. 6:51-69) Kwakanyina kumbi kwakuunka. Cikombelo caba Juda eeciya ciindi, cakanyina “majwi aabuumi ubutamani,” alimwi amazuba aano, majwi aali boobu taakonzyi kujanwa mu Babuloni Mupati, ibulelo bwanyika yoonse bwabukombi bwakubeja. Kuli baabo bakaleya kuzwa mubutanga bwa Leza, pele ibayanda kukkomanisya Jehova, “casika ciindi nci[b]eelede kusinsimuka” akupilukila kubutanga.—Rom. 13:11.

2. Ino ncinzi ceelede kuyeeyegwa lyoonse kujatikizya twaambo twamaseseke naanka tuyandika lubeta?

² Jehova wakatondezya kuti ulazibikkila maano mbelele zya Israyeli izyakasweekede. (Amubale Ezekiele 34:15, 16.) Mbubwenya buyo, baalu Banakristo balayandisya alimwi balaamulimo wakugwasya muntu uuli mbuli mbelele iwakaleya kuzwa mubutanga. Ikuti naa baalu bapa sikumwaya kuti ayendelezye ciiyo ca Bbaibbele kumuntu uutacisungweede uuyandika lugwasyo, ino ncinzi ceelede kucitwa ikuti naa sikweendelezya ciiyo wazyiba kuti muntu ooyu wakacita cibi cipati? Muciindi cakuti ape lulayo kujatikizya kaambo kayandika lubeta naanka kamaseseke, sikumwaya weelede kumukulwaizya kuti aambile baalu. Ikuti waalilwa kucita oobo, sikumwaya ooyu lwakwe weelede kubazyibya baalu.—Lev. 5:1; Gal. 6:1.

3. Ino wakacita buti mwaalumi wakajisi mbelele zili 100 noyakajanika iyakasweekede?

 ³ Mucibalo cainda kwakaambwa kujatikizya cikonzyanyo ca Jesu camwaalumi wakajisi mbelele zili 100. Mbelele yomwe noyakasweeka, wakazisiya eezyi zimwi zili 99 akwiiyandaula. Elo kaka mwaalumi ooyu wakakkomana naakaijana! (Lk. 15:4-7) Mbubwenya buyo, tulakkomana ikuti muntu watakasungweede wapilukila kubutanga. Antela baalu alimwi abamwi mumbungano bakamuswaya akaambo kakukulwaizyigwa aluyando ndobajisi kulinguwe. Abalo bayanda kuti muntu ooyu apilukile kubutanga alimwi akugwasyigwa, kukwabililwa alimwi akulongezyegwa a Leza. (Dt. 33:27; Int. 91:14; Tus. 10:22) Ikuti kabajisi coolwe cakugwasya muntu kuti apilukile kumbungano, ino ncinzi ncobakonzya kucita?

4. Ino ncinzi ncotukonzya kuzyiba twabala Ba-Galatiya 6:2, 5?

⁴ Ambweni balakonzya kumukulwaizya kuti apilukile kumbungano kwiinda mukumutondezya kuti Jehova ulaziyanda mbelele zyakwe alimwi uyanda kuti katucita buyo zyintu nzyotukonzya kucita. Iziyandika zibikkilizya kuliyiisya Bbaibbele, kujanika kumiswaangano ya Bunakristo alimwi akukambauka makani mabotu aa Bwami. Cilakonzya kweelela kubala Ba-Galatiya 6:2, 5 alimwi akwaamba kuti Banakristo balakonzya kugwasya kunyamuna mikuli yamuntu umwi aumwi, pele “aumwi uleelede kunyampula mukuli wakwe mwini” kuli Jehova. Kunyina weelede kutusyomekela kuli Leza.

Sena “Makataazyo Aabuumi” Abapa Kuti Baleke Kusungwaala?

5, 6. (a) Ino nkaambo nzi ncociyandika kuswiililisya majwi aabasyomima ibatacisungweede? (b) Ino mbuti mbomukonzya kugwasya bantu ibatacisungweede kutegwa bazyibe kuti kutajanika kumiswaangano cabaletela mapenzi?

⁵ Ikutegwa bazyibe mbobakonzya kubagwasya bakombima batacisungweede, baalu alimwi abasikumwaya bamwi basimide beelede kuswiililisya ciindi bantu aaba nobapandulula mbobalimvwa. Amweezyeezye kuti muli baalu baswaya banabukwetene ibatajaniki kumbungano akaambo kakuti “makataazyo aabuumi” abapa kuti baleke kusungwaala. (Lk. 21:34) Ambweni mapenzi aakujana mali naanka kuvwula kwamikuli yamukwasyi nzyezyapa kuti asyoonto-syoonto kabaya buleka kucita milimo yabo ya Bunakristo. Balakonzya kulimvwa kuti bayandika kulyookezya kumikuli yabo, pele mulakonzya kubaambila kuti kulizandula kunyina nokukonzya kubagwasya pe. (Amubale Tusimpi 18:1.) Cabupampu mulakonzya kubabuzya kuti: “Sena lukkomano lwanu lwavwula kuzwa ciindi nomwakaleka kuswaangana? Sena buumi bwanu bwamumukwasyi bwaba kabotu? Sena lukondo lwa Jehova lucimupa nguzu?”—Neh. 8:10.

⁶ Ikuyeeyesya mibuzyo iili boobu cilakonzya kugwasya baabo batacisungweede kubona kuti, akaambo kakuleka kujanika kumiswaangano, baya aansi kumuuya alimwi lukkomano  ndobakajisi lwamana. (Mt. 5:3; Heb. 10:24, 25) Tulakonzya kubagwasya kuzyiba kuti tabajisi lukkomano lujanwa mumulimo wakukambauka. (Mt. 28:19, 20) Aboobo ino ncinzi ncobeelede kucita bantu batacisungweede?

7. Ino inga twabakulwaizya kucita nzi aabo bakalizandula kubutanga?

⁷ Jesu wakati: “Amukalilangisye, kuti ambweni myoyo yanu ilalengaala nkaambo kabulyatu, abukolwi, amakataazyo aabuumi buno . . . Amulinde lyoonse, mukombe, kuti mukakonzye kuyokoka kuzintu zyoonse ezi iziyoocitika.” (Lk. 21:34-36) Aabo bakazanduka kubutanga, pele ibayanda kuba alukkomano mbuli ndobakajisi kaindi, balakonzya kukulwaizyigwa kulomba muuya uusalala alimwi alugwasyo kuli Leza alimwi akucita zyintu kweendelana amipailo yabo.—Lk. 11:13.

Sena Kuli Cakabaleba?

8, 9. Ino mbuti mwaalu mbwakonzya kubandika amuntu wakatyompwa?

⁸ Akaambo kakutalondoka kwabantu, kulaba kwiimpana, alimwi eeci cilakonzya kutyompya muntu. Bamwi bakatyompwa ciindi muntu uulemekwa mumbungano naakacita cintu citeendelani amalailile aamu Bbaibbele. Ikuti naa muntu uutacisungweede wakatyompwa munzila iili mbuli yeeyi, mwaalu wamuswaya muntu ooyu ulakonzya kumwaambila kuti Jehova kunyina natyompya muntu uuli oonse. Aboobo imuntu teelede kumana cilongwe cakwe a Jehova alimwi abantu bakwe. Muciindi cakucita boobu, imuntu weelede kuyaambele mukubelekela Leza, kasinizyide kuti “oyo uubeteka nyika yoonse” ulizyi cakacitika alimwi uyakutulanganya twaambo munzila iyeelede. (Matl. 18:25; Kol. 3:23-25) Ikuti naa muntu walinontola mpoonya wawa, takonzyi kukkalilila ansi acaali katasoli kunyamuka.

⁹ Nasoleka kubagwasya kuti bapiluke, mwaalu ulakonzya kwaamba kuti, mukwiinda kwaciindi bamwi bajana kuti cintu cakabatyompya taciciyandiki kapati. Ambweni cakabatyompya inga kacitaciko. Ikuti naa muntu ooyu wakatyompwa akaambo kakupegwa lulayo, mupailo alimwi akuzinzibala kuyeeya zilakonzya kumugwasya kuzyiba kuti wakalubizya aboobo lulayo lwakali kuyandika alimwi tiilwakeelede kumutyompya.—Int. 119:165; Heb. 12:5-13.

Sena Nciyiisyo Camu Magwalo Cakapa Kuti Aleke Kusungwaala?

10, 11. Ino mmubandi uuli buti uukonzya kubandikwa mukugwasya muntu watakazumina makani amwi aamu Bbaibbele?

¹⁰ Bamwi bakazwa mubutanga bwa Leza akaambo kakutazumina makani amwi aayiisyigwa mu Magwalo. Ibana Israyeli nobakaangululwa mubuzike ku Egepita “[baka]luba milimo [Leza]” njaakabacitila alimwi “teebakalindila makanze aakwe.” (Int. 106:13) Cilakonzya kugwasya kuyeezya muntu uutacisungweede kuti, “muzike musyomesi uucenjede” ulaabila cakulya cakumuuya cibotu kapati. (Mt. 24:45) Mbombubo oobu mbwaakayiya kasimpe kumatalikilo. Aboobo, inga cabota kuti wasoleka kweenda munzila yakasimpe alimwi.—2 Joh. 4.

¹¹ Ciindi nasola kugwasya bantu baleya kuzwa kubutanga bwa Leza, imwaalu ulakonzya kwaamba kujatikizya basikwiiya ba Jesu ibakamusiya akaambo kamakani amwi ngaakayiisya. (Joh. 6:53, 66) Akaambo kakuleka kuyanzana a Kristo alimwi abasikumutobela basyomeka, bakaleka kubikkila maano kuzyintu zyakumuuya eelyo lukkomano lwabo lwakamana. Sena aabo bakaleka kuyanzana ambungano ya Bunakristo bajana busena bumwi ikuli cakulya cakumuuya cijisi busani bubotu? Peepe, nkaambo tabuko.

Sena Kuli Cibi Ncaakacita?

12, 13. Ikuti naa muntu wakaleya kuzwa kubutanga wazumina kuti wakacita cibi cipati, ino mbuti mbwakonzya kugwasyigwa?

¹² Bamwi bantu balaleka kukambauka alimwi akuswaangana akaambo kakucita cibi cipati. Balakonzya kuyeeya kuti, ikuti naa balyaambilila kubaalu, bayoogwisyigwa mumbungano. Pele kunyina nobayoogwisyigwa mumbungano ikuti naa baileka micito iitazumizyidwe mu Magwalo alimwi akweempwa ncobeni. (2 Kor. 7:10, 11) Pele, bayootambulwa alimwi baalu bayoobapa lugwasyo lwakumuuya ndobayandika.

¹³ Ikuti naa muli basikumwaya batumwa kuti mugwasye muntu uutacisungweede, ino ncinzi ncomweelede kucita naa wamwaambila kuti wakacita cibi cipati? Mbubwenya bwaambwa kale, muciindi cakumugwasya nobeni, amumukulwaizye kuti aambile baalu. Ikuti naa wakaka  kucita oobo, muyootondezya kuti mulabikkila maano kuzyina lya Jehova alimwi abukkale bwakumuuya bwambungano kwiinda mukucita kweelana amalailile aa Leza kujatikizya twaambo tuli mbuli tootu. (Amubale Levitiko 5:1.) Baalu bayoozyiba mbobakonzya kumugwasya muntu uuyanda kupiluka alimwi akulilemeka munzila njayanda Leza. Kumulaya caluyando inga kwayandika. (Heb. 12:7-11) Ikuti naa muntu wazumina kuti walubizyila Leza, amane wacileka cibi alimwi kuti weempwa masimpe, ibaalu bayoomugwasya, alimwi ulakonzya kulekelelwa a Leza.—Is. 1:18; 55:7; Jak. 5:13-16.

Kupiluka Kwamwana Musankwa Kwaleta Lukkomano

14. Mumajwi aanu amuluule cikonzyanyo camwana mutaka ncaakaamba Jesu.

¹⁴ Imuntu uutumidwe kuti akagwasye mbelele yakaleya ulakonzya kubelesya cikonzyanyo ca Jesu cilembedwe kuli Luka 15:11-24. Mucikonzyanyo eeci, mulombwana wakanyonyoona lubono lwakwe kwiinda mubukkale butaluzi. Mpoonya wakabusula buumi bwabutaka mbwaakali kupona. Yakamukola nzala, wakayeeya kwabo, mpoonya wakasala kuti apilukile kuŋanda. Kacili kulamfwu pee, bakamubona bausyi. Bakamulundukila, eelyo nibakaswaangana bakamukumbata akumumyonta alimwi bakakkomana kapati. Ikuyeeyesya cikonzyanyo eeci cilakonzya kugwasya muntu wakaleya kuti apilukile kubutanga. Mbwaanga bweende bwazyintu oobu buyakunyonyoonwa lino-lino, weelede ‘kupilukila kuŋanda’ cakufwambaana.

15. Ino ncinzi cipa bamwi kuti bazanduke kumbungano?

¹⁵ Bunji bwabaabo bakazanduka kumbungano tabakozyenye kapati amwana mutaka. Kuli bamwi kuzanduka kulacitika asyoonto-syoonto, mbubwenya mbuli bwato nobusweeka kuzwa kunkomwe. Bamwi balakatazyigwa akulibilika kusikila limwi baleka kubikkila maano kucilongwe cabo a Jehova. Abamwi balalityompya akaambo kamuntu umwi wamumbungano, naanka kutazumina makani amwi aamu Magwalo. Bantu bali mbobabede balacita micito iiteendelani amagwalo. Nokuba boobo, malailile aapegwa kujatikizya bukkale abumwi, alakonzya kumugwasya kutegwa mubagwasye aabo bakaleya kuzwa mubutanga akaambo katwaambo ootu naa tumbi kuti bapiluke nociciliko ciindi.

“Watambulwa Kuŋanda O Mwanaangu Musankwa!”

16-18. (a) Ino mbuti mwaalu umwi mbwaakagwasya mukwesu umwi watakasungweede kwamyaka iili mbwiibede? (b) Ino ncinzi cakapa kuti mukwesu ooyu aleke kusungwaala, ino wakagwasyigwa buti, alimwi ino mbungano yakamutambula buti?

¹⁶ Mwaalu omwe Munakristo waamba kuti: “Ikabunga kabaalu mumbungano yesu kalayandisya kuswaya baabo batacisungweede. Ndiyeeya mukwesu umwi ngundakagwasya kuzyiba kasimpe. Wakakkala katasungweede kwamyaka iitandila ku 25, alimwi wakali mubukkale bukatazya kapati, aboobo ndakapandulula mbuli  kubelesya njiisyo zyakumuuya zyamu Bbaibbele mbokukonzya kumugwasya. Nokwakainda ciindi, wakatalika kuboola ku Ŋanda ya Bwami alimwi wakazumina kuba aciiyo ca Bbaibbele kutegwa agwasyigwe kuba anguzu zyakupilukila kubutanga.”

¹⁷ Ino ncinzi cakapa kuti mukwesu aleke kusungwaala? Waamba kuti: “Ndakatalika kubikkila maano kapati kuzyintu zyanyika kwiinda zyakumuuya. Mpoonya ndakaleka kubala, kuya kukukambauka, alimwi akujanika kumiswaangano. Icakatobela, kakunyina kuyeeyela ndakaleka kuyanzana ambungano ya Bunakristo. Pele ndakagwasyigwa kupiluka akaambo kakubikkila maano kwamwaalu.” Mapenzi aamukwesu ooyu akatalika kuceya kuzwa naakazumina kuba aciiyo ca Bbaibbele. Waamba kuti: “Ndakazyiba kuti ndakali kuyandika luyando alimwi abweendelezi bwa Jehova alimwi ambungano yakwe.”

¹⁸ Ino wakatambulwa buti mukwesu ooyu mumbungano? Waamba kuti: “Ndilimvwa mbuli mwana mutaka ngwaakali kwaamba Jesu Kristo. Masimpe, umwi wabacizyi bapati wakaliko myaka iili 30 yainda alimwi uucibelekela Jehova cakusyomeka wakati kulindime, ‘Watambulwa kuŋanda mwanaangu!’ Majwi aaya ncobeni akandinjila mumoyo. Masimpe ndakazyiba kuti ndakali muŋanda. Alimwi ndilalumba akaambo kaluyando, busicamba alimwi akubikkila maano kwamwaalu uulya alimwi ambungano yoonse. Luyando ndobajisi kuli Jehova alimwi akubeenzinyina masimpe lwakandigwasya kuti ndipilukile kubutanga.”

Amubakulwaizye Kuti Babweze Ntaamu Cakufwambaana!

19, 20. Ino inga mwabakulwaizya buti bantu batacisungweede kuti bapilukile kubutanga cakufwambaana, alimwi ino mbuti mbomukonzya kubatondezya kuti Jehova talangili zyintu nzyotutakonzyi kucita?

¹⁹ Tupona mumazuba aamamanino, alimwi mamanino aabweende bwazyintu oobu alaafwaafwi. Aboobo, amubakulwaizye ibatacisungweede kuti kabajanika kumiswaangano. Amubakulwaizye kuti batalike kujanika lino. Amubayeezye kuti Saatani usola kunyonyoona cilongwe cabo a Leza alimwi akubapa kuyeeya kuti lwaanguluko kumapenzi aamubuumi lulakonzya kujanwa kwiinda mukuzwa mubukombi bwakasimpe. Mulakonzya kubasyomezya kuti kuba batobeli basyomeka iba Jesu nkokukonzya kubakatalusya.—Amubale Matayo 11:28-30.

²⁰ Amubayeezye kuti Jehova ulangila kuti katucita buyo nzyotukonzya. Iciindi Mariya mucizyi wa Lazaro naakasinswa akaambo kakutila Jesu mafwuta aanunkilila alimwi aadula kakuceede buyo mazuba masyoonto kuti ajayigwe, Jesu wakati: “Amumuleke. . . . Wacita cintu ncakonzya.” (Mk. 14:6-8) Jesu wakalumbaizya mukamufwu mucete wakasanga mali masyoonto mutempele. Awalo wakacita ncaakali kukonzya. (Lk. 21:1-4) Bunji bwesu tulakonzya kujanika kumiswaangano alimwi akuunka mumulimo wakukambauka makani mabotu. Kwiinda mukugwasyigwa aa Jehova, bunji bwabaabo batacisungweede lino bayookonzya kuzicita zyintu nzyemunya eezyi.

21, 22. Ino aabo bapilukila kuli Jehova inga mwabasyomezya nzi?

²¹ Ikuti muntu uuli mbuli mbelele iwakaleya kuzwa mubutanga ulayoowa kuyooswaana abanyina alimwi, mulakonzya kumuyeezya lukkomano lwakaba ciindi imwana mutaka naakapiluka kuŋanda. Aabo bapilukila kumbungano balakonzya kuleta lukkomano luli boobu. Amubakulwaizye kuti babweze ntaamu lino kutegwa bamukazye Diabolosi alimwi akuswenenena kuli Leza.—Jak. 4:7, 8.

²² Aabo bapilukila kuli Jehova bayakutambulwa amaanza obile. (Malo. 3:40) Izyakabacitikila mubuumi bwabo nobakali kubelekela Jehova zilakonzya kubakkomanisya kapati. Aabo bapilukila kubutanga cakufwambaana balajana zilongezyo zinji.

Ino Inga Mwaingula Buti?

• Ino inga mwamugwasya buti muntu wakatyompwa amane waleka kuba musungu?

• Ino mmubandi uuli buti uukonzya kugwasya muntu wakaleya kuzwa mubutanga bwa Leza akaambo kanzila mbwaalanga makani amwi?

• Ino inga twamugwasya buti muntu uuwayawaya kupilukila kumbungano?

[Mibuzyo yaciiyo]

[Cifwanikiso icili apeeji 13]

Amuswililisye mukombima uutacisungweede napandulula

[Cifwanikiso icili apeeji 15]

Ikuyeeyesya cikonzyanyo ca Jesu camwana mutaka kulakonzya kupa bamwi kuti bapilukile kubutanga