Kubelekela Leza “Amoyo Omwe Amuuya Omwe”

IBA JUDA alimwi abaabo bakasandulwa buya babavwoomanina basikwiiya ba Jesu Kristo. Nciindi ca Pobwe lya Pentekoste, alimwi beenzu aaba ibaboola ku Jerusalemu bazwa kumbo kwa Roma alimwi akujwe kwa Parthia. Myaambo minjaanji yamvwigwa kayaambaulwa ankamu eeyi. Pele basikwiiya ba Jesu ibaambaula mbana Galileya. Beenzu bamwi ibagambwa babuzya kuti: “Kuli buti ino, twamvwa toonse mwaambo wesu ngotwakazyalilwa?”—Inc. 2:8.

Mwaapostolo Petro waimikila akupandulula maleele aaya ngobeebelela. Nkamu yabantu eeyi yauzumina mulumbe ngobamvwa  mpoonya aawa. Zyuulu zyabantu izili mbozibede zyabbapatizyigwa. (Inc. 2:41) Nokuba kuti mbungano yakomena cakufwambaana, pele yazumanana kukamantana. Mulembi wa Bbaibbele Luka waamba kuti: “Inkamu yoonse yabasyomi kiili amoyo omwe amuuya omwe.”—Inc. 4:32.

Izyuulu zyabantu zili mbozibede izyabbapatizyigwa mubuzuba bwa Pentekoste mu 33 C.E. ziyanda kuti zikkale-kkale mu Jerusalemu kwaciindi cili mbocibede ikutegwa ziiye zyintu zinji nzizyatalika lino kusyoma. Pele nibaboola tiibalibambilide kukkalisya pe. Aboobo kwaba kusanga mali kwaciindi cisyoonto. Basyomi bamwi balisungula kusambala mbono zyabo zimwi akuleta mali kubaapostolo kutegwa bape baaba babulide. (Inc. 2:42-47) Taciliboteli kaka cikozyanyo eeci caluyando alimwi abwaabi!

Banakristo bakasimpe lyoonse balijisi muuya waluyando alimwi awabwaabi. Mazuba aano, mbungano ya Banakristo yazumanana kubelekela Jehova cakukamantana “amoyo omwe amuuya omwe.” Banakristo bamwi akaambo kabwaabi bwabo balapa ciindi, nguzu alimwi amali kutegwa abelesyegwe mukukambauka makani mabotu alimwi akutola ambele zyintu ziyandika mu Bwami bwa Leza.—Amubone kabbokesi kakuti:  “Nzila Bamwi Nzyobabelesya Mukusanga.”

Kabbokesi kali apeeji 6, 7]

 NZILA BAMWI NZYOBABELESYA MUKUSANGA

KUSANGA KUMULIMO WANYIKA YOONSE

Bantu banji balabikka mali ambali kutegwa bakaabikke mutubbokesi tulembedwe kuti: “Mulimo Wanyika Yoonse.”

Aamwezi mbungano zilatumina mali aaya kuofesi yamutabi ya Bakamboni ba Jehova iili mucisi eeco. Kusanga mali akumwi kulacitwa kwiinda mukutumina mali aaya cigaminina ku Watch Tower Bible and Tract Society of Pennsylvania, Box 33459, Lusaka 10101. Macceki aatuminwa kukkeyala eeyi ayelede kulembwa kuti: “Watch Tower.” Mpasya ziindene-indene azyalo zilakonzya kusangwa. Lugwalo lufwaafwi lusindikizya zyintu eezyi lulakonzya kulembwa kupandulula kuti eeci ncipego buyo.

KUYOBOZYA MALI KWIINDA MUKUZUMINANA

Mali alakonzya kubikkwa mumaanza aa Watch Tower Bible and Tract Society of Pennsylvania kutegwa baabelesye mumulimo wanyika yoonse. Pele kuti mukamwini waayanda, ulakonzya kujosyelwa. Ikuti kamuyanda twaambo atumbi, inga mwabuzya babelekela ku Ofesi Iilanganya Nkomwi Yamali kwiinda mukulembela kukkeyala iili atala aawa naa kutumina luwaile kunamba eeyi: (021) 1 272062.

IKULIBAMBILA NZYOMUKONZYA ZYAKUSANGA

Kunze lyakupa buyo zipego zyamali, kuli nzila azimbi nzyomukonzya kubelesya ikupa lubono mukugwasilizya mulimo wa Bwami uucitwa nyika yoonse. Nzila eezyi zibikkilizya:

Bukwabilizi (Insurance): Watch Tower Bible and Tract Society of Pennsylvania ilakonzya kulembwa kuti njiiya kubweza mali aabukwabilizi bwa buumi (Life insurance policy) naa aalya aapegwa kumuntu wakkwanya myaka yakucileka kubeleka (retirement/pension plan).

Nkomo Zyamali Aakubbanga: Nkomo zyamali aakubbanga, mapepa aatondezya mali ngaakabikka, naa nkomo yamali ngapegwa muntu wakkwanya myaka yakucileka kubeleka alakonzya kupegwa ku Watch Tower Bible and Tract Society of Pennsylvania ciindi afwa muntu, kweelana aziyandika kubbanga lyakubusena nkwakkede.

Mali Ngomujisi Mukkampani (Stocks and Bonds): Mali ngomujisi mukkampani alakonzya kusangwa ku Watch Tower Bible and Tract Society of Pennsylvania kacili cipego buyo.

Nyika Amayake (Real Estate): Nyika Amayake izikonzya kusambalwa zilakonzya kusangwa, ikuti naa kabuli busena mpakkede sikusanga, inga wazumanana kukkala mpawo ciindi nacipona. Mweelede kubandika abakuofesi yamutabi iili mucisi canu kamutanalemba pepa neliba lyomwe lijatikizya nyika amayake.

Mali Aapegwa Amwaka (Gift Annuity): Oobu bubambe bulacitwa kwiinda mukupa mali kumbunga iibelesyegwa a Bakamboni ba Jehova. Eelyo muntu ooyu wasanga mali aaya antela muntu uumbi buyo ngwaasala, ulapegwa mali amwi amwaka mubuumi bwakwe boonse. Iwasanga mali ulatelesyegwa mali amwi mumwaka ooyo bubambe oobu nobwatalika.

Bwaapauzi Bwalubono (Wills and Trusts): Mpasya naa mali alakonzya kupegwa ku Watch Tower Bible and Tract Society of Pennsylvania kwiinda mukubelesya pepa lyamalailile aabwaapauzi bwazyintu lizumizyidwe amulawo, naa kuti Watch Tower Bible and Tract Society of Pennsylvania ilakonzya kulembwa kuti njiyeelede kupegwa mali aajanika mubwaapauzi bwalubono. Lubono lwapegwa kugwasya mbunga yabukombi lulakonzya kujana mpindu iili mbwiibede.

Kweelana ambuli mabala aaya aakuti “ikulibambila mbomukonzya kusanga” ncaapandulula, nzila eezyi zyakusangila ziyanda kuti sikusanga ayeeyesye. Ikutegwa bagwasyigwe bantu bayanda kugwasyilizya mumulimo wanyika yoonse wa Bakamboni ba Jehova kwiinda mububambe bwakusangila lubono, kwabambwa broshuwa mu Chingisi alimwi amu Chisipanishi iijisi mutwe wakuti Charitable Planning to Benefit Kingdom Service Worldwide. Broshuwa eeyi yalembwa kutegwa ipandulule nzila zinji izipego mbozikonzya kupegwa lino, antela kubwezegwa mumulawo muntu afwa. Nobakamana kubala broshuwa eeyi alimwi akubandika abasyaazibwene mubweende bwamitelo, ibanji bacikonzya kugwasya mubukombi bwesu alimwi amumilimo yaluzyalo iicitwa nyika yoonse alimwi ayalo mpindu njobajana yasumpuka ciindi nobacita boobo. Ibroshuwa eeyi ilakonzya kujanika kuti mwailomba ku Treasurer’s Office (Ofesi Ilanganya Makani Aakusanga).

Kuti kamuyanda twaambo atumbi, inga mwabonana abaku Ofesi Ilanganya Makani Aakusanga, ambweni kwiinda mukubalembela kukkeyala nokuba kutumina luwaile anamba yaluwaile zitondezyedwe aansi aawa, antela mulakonzya kubuzya bakuofesi yamutabi iibelekela mucisi canu.

Treasurer’s Office

Watch Tower Bible and Tract Society of Pennsylvania

Box 33459

Lusaka 10101

Luwaile: (021) 1 272062