Amuumvwisye Akuulemeka Mulimo Wa Jesu Uulibedelede Mumakanze Aa Leza

“Ndime nzila, ndime bwini, ndime buumi. Takukwe uuza kuli-Taata, pele mulindime.”—JOH. 14:6.

1, 2. Ino nkaambo nzi ncotweelede kubikkila maano notulanga-langa mulimo wa Jesu uulibedelede mumakanze aa Leza?

KUZWA kaindi, bantu banji basoleka kuba bantu baindene abeenzinyina, pele ibunji bwabo bakakilwa. Alimwi mbasyoonto buyo ibakonzya kwaamba kuti baliindene ncobeni kubantu bambi munzila iilibedelede. Pele, Jesu Kristo, Mwana wa Leza ulilibedelede munzila zinji.

² Ino nkaambo nzi ncotweelede kuubikkila maano mulimo wa Jesu uulibedelede? Akaambo kakuti cilongwe cesu cini a Taateesu wakujulu Jehova, cilijatikizidwe. Jesu wakati: “Ndime nzila, ndime bwini, ndime buumi. Takukwe uuza kuli-Taata, pele mulindime.” (Joh. 14:6; 17:3) Atulange-lange nzila zimwi Jesu mbwali muntu uulibedelede. Kucita boobu kuyootupa kulumba akaambo kamulimo ngwajisi mumakanze aa Leza.

‘Mwana Simuzyalwa Alikke’

3, 4. (a) Ino nkaambo nzi ncotukonzya kwaamba kuti Jesu ulilibedelede mumulimo wakwe mbwali Mwana simuzyalwa alikke? (b) Ino mbuti mulimo wa Jesu mukulenga mboulibedelede?

³ Jesu tali buyo “mwana a-Leza.” Oobo mbwaakaamba Saatani kujatikizya Jesu ciindi naakali kumusunka. (Mt. 4:3, 6) Cakweelela Jesu wiitwa kuti “Mwana a-Leza, simuzyalwa alike.” (Joh. 3:16, 18) Ibbala lya Chigiliki ilyakasandululwa kuti “simuzyalwa alike” lyaamba “wamusyobo ooyo alikke, uuli alikke buyo,” naa “uulibedelede.” Jehova ujisi bana bakumuuya bali myaanda-myaanda yatuulunzuma. Aboobo, ino mbuti Jesu mbwali muntu “uulibedelede?”

⁴ Jesu ulilibedelede mukuti ngonguwe alikke wakalengwa cakaanzambwene a Bausyi. Ngomwana mutaanzi kuzyalwa. Atwaambe kuti ngo “mutaanzi kuzyalwa kuzilenge zyoonse.” (Kol. 1:15) “[Ngo]matalikilo aabulenge bwa-Leza.” (Ciy. 3:14) Awalo mulimo wa Mwana simuzyalwa alikke ulilibedelede. Tali Mulengi, naa Sikutalisya zilenge pe. Pele Jehova wakamubelesya mukulenga zyintu zyoonse. (Amubale Johane 1:3.) Mwaapostolo Paulo wakalemba kuti: “Kulindiswe kuli Leza omwe buyo, Taateesu, nguzyazwida zintu zyoonse, ngutuponena aswebo. Alimwi kuli Mwami omwe Jesu Kristo, nguzyakalengesegwa zintu zyoonse, aswebo twakalengesegwa mulinguwe.”—1 Kor. 8:6.

5. Ino mbuti Magwalo mbwaatondezya kuti Jesu mmuntu uulibedelede?

⁵ Nokuba boobo, Jesu ulilibedelede munzila nzinji. Imagwalo amwaamba kuba amazyina aabulemu manji alo aatondezya mulimo uulibedelede ngwajisi mumakanze aa Leza. Lino atulange-lange mazyina amwi aali osanwe aabelesyegwa kwaamba Jesu mu Magwalo aa Chigiliki aa Banakristo.

“Ijwi”

6. Ino nkaambo nzi Jesu uleelela kwiitwa kuti “Ijwi”?

⁶ Amubale Johane 1:14. Ino nkaambo nzi Jesu ncategwa “Ijwi,” naa Logos? Eeli zyina litondezya mulimo ngwacita kuzwa ciindi zilenge zimbi zyoonse nozyakalengwa. Jehova wakabelesya Mwanaakwe kutola milumbe alimwi amalailile kubana bambi bamuuya, mbubwenya mbuli mbwaakamubelesya Mwana ooyu kutola milumbe yakwe kubantu baanyika. Ikaambo kakuti Jesu ndi Jwi, naa mwaambilizyi wa Leza, kakasalazyigwa mumajwi Kristo ngaakaambila ba Juda ibakali kumuswiilila aakuti: “Kwiisya kwangu takuli kwangu ndemwini, nkukwakwe uwakandituma.  Kwanooli muntu uuyanda kucita luyando lwakwe, ulaziba kwiisya kuti na kuzwa kuli-Leza na ndilalyaambila buyo ndemwini.” (Joh. 7:16, 17) Jesu ulazumanana kuba azyina lyabulemu lyakuti “Ijwi lya-Leza” noliba leelyo kapilukide kale kubulemu bwakujulu.—Ciy. 19:11, 13, 16.

7. Ino mbuti mbotukonzya kumwiiya Jesu mbwalibombya mumulimo wakwe mbwali “Ijwi”?

⁷ Amuyeeye buyo zyina eeli ncolyaamba. Nokuba kuti Jesu ulijisi busongo kwiinda zilenge zyoonse, tasyomi busongo bwakwe mwini pe. Ulaamba kweelana ambobamulailila Bausyi. Lyoonse uyanda kuti bulemu kabupegwa kuli Jehova kutali kulinguwe. (Joh. 12:50) Elo kaka eeci ncikozyanyo cibotu ncotweelede kutobela! Andiswe twapegwa mulimo uulibedelede ‘wakukambauka makani mabotu’ aazyintu zibotu. (Rom. 10:15) Ikutobela cikozyanyo cibotu ca Jesu cakulibombya kweelede kutukulwaizya kutaamba zyintu kweelana ambotuyeeya. Notwaambila bantu mulumbe uupa buumi iwamu Magwalo, tatweelede kwaamba makani aambi kunze lya “ayo makani aalembedwe.”—1 Kor. 4:6.

“Ameni”

8, 9. (a) Ino bbala lyakuti “ameni” lyaamba nzi, alimwi ino nkaambo nzi Jesu ncategwa “Ameni”? (b) Ino mbuti Jesu mbwaakazuzikizya mulimo wakwe wa “Ameni”?

⁸ Amubale Ciyubunuzyo 3:14. Ino nkaambo nzi Jesu ncategwa “Ameni”? Ibbala lyakuti “ameni” ndibbala lya Chihebrayo ilyaamba kuti “akube boobo,” naa kuti “masimpe.” Lizwa kubbala lya Chihebrayo ilyaamba “kusyomeka.” Ibbala ndilyonya eeli lilabelesyegwa kupandulula kusyomeka kwa Jehova. (Dt. 7:9; Is. 49:7) Aboobo, ino muunzila nzi Jesu mbwalibedelede naambwa kuba “Ameni”? Amubone mbolwiingula lugwalo lwa 2 Ba-Korinto 1:19, 20: “Mwana a-Leza, Jesu Kristo, oyo ngutwakakambauka kulindinywe . . . , walo kateensi Ee, Pe. Mulinguwe muli ijwi lya-Ee luzutu. Nkaambo zisyomezyo zya-Leza zyoonse zili buti, ijwi lya-Ee lyakuzizuzya mulili mulinguwe. Aboobo, mulinguwe mulili alyalo eli ijwi lya-Ameni nditulemekezya Leza.”

⁹ Jesu ngu “Ameni” kuzisyomezyo zyoonse zya Leza. Buumi bwakwe bwaanyika bunyina kampenda, kubikkilizya alufwu lwakwe lwacipaizyo, zyakatondezya alimwi akupa kuti zisyomezyo zyoonse zya Jehova Leza zizuzikizyigwe. Alimwi kwiinda mukuzumanana kusyomeka, Jesu wakatondezya kuti nzyaakaamba Saatani nzyakubeja, eezyo zilembedwe kubbuku lya Jobu kuti, ikuti naa babelesi ba Leza babula zyintu ziyandika mubuumi, bapenga naa basunkwa, balakonzya kumukaka Jehova. (Job. 1:6-12; 2:2-7) Akati kazilenge zya Leza zyoonse, Mwana simuzyalwa alikke nguukonzya kupa bwiinguzi buzulide kukaambo aaka. Kunze lyaboobo, Jesu wakapa citondezyo cibotu cakuba kulubazu lwa Bausyi mukaambo kapati kakweelela kwabulelo bwa Jehova bwakoonse-koonse.

10. Ino mbuti mbotukonzya kumwiiya Jesu mumulimo wakwe uulibedelede wa “Ameni”?

¹⁰ Ino mbuti mbotukonzya kumwiiya Jesu mumulimo wakwe uulibedelede wa “Ameni”? Nkwiinda mukuzumanana kusyomeka kuli Jehova alimwi akuba kulubazu lwakwe mukaambo kabulelo bwakoonse-koonse. Kwiinda mukucita oobu, tuyoopa bwiinguzi bubotu kumajwi aakwe aakulomba aalembedwe kulugwalo lwa Tusimpi 27:11 aakuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.”

“Sikwiimaakati wa-Mulongo mupya”

11, 12. Ino mbuti mulimo wa Jesu wakuba Sikwiimaakati mbouli mulimo uulibedelede?

¹¹ Amubale 1 Timoteo 2:5, 6. Jesu “[ngu]sikuyanzanya omwe uuli akati ka-Leza abantu.” “Sikwiimaakati wamulongo mupya.” (Heb. 9:15; 12:24) Nokuba boobo, Musa awalo waambwa kuti ngusikwiimaakati—sikwiimaakati wa Mulawo wacizuminano. (Gal. 3:19) Aboobo, ino mbuti mulimo wa Jesu wakuba Sikwiimaakati mbouli mulimo uulibedelede?

¹² Ibbala lyakabelesyegwa mumwaambo wakusaanguna ilyakasandululwa kuti “sikwiimaakati” ndibbala libelesyegwa mumakani aamilawo. Ibbala eeli lyaamba mulimo ngwapedwe Jesu wakuba Sikwiimaakati wacizuminano cipya icakapa kuti cikonzyeke ikuzyalwa kwa cisi cipya, “ba-Israyeli ba-Leza.” (Gal. 6:16) Cisi eeci cibambidwe a Banakristo bananikidwe amuuya, balo bali “[m]bapaizi bami” ibakujulu. (1 Pet. 2:9; Kul. 19:6) Cizuminano ca Mulawo calo Musa mwaakali sikwiimaakati, taakwe nocakali kukonzya kupa kuti kube cisi cili mbuli ceeci.

13. Ino mulimo wa Jesu wakuba Sikwiimaakati ubikkilizya nzi?

 ¹³ Ino mulimo wa Jesu wakuba Sikwiimaakati ubikkilizya nzi? Jehova ubelesya muulo wabulowa bwa Jesu kuli baabo ibanjila mucizuminano cipya. Munzila eeyi, Jehova ubaamba kuti baliluleme. (Rom. 3:24; Heb. 9:15) Mpoonya Leza ulakonzya kubabona kuti baleelela kunjila mucizuminano cipya kabajisi bulangizi bwakuyooba bapaizi alimwi abami bakujulu. Mbwali Sikwiimaakati, Jesu ulabagwasya kuba acilongwe cibotu a Leza.—Heb. 2:16.

14. Ino nkaambo nzi Banakristo boonse, kufwumbwa naa bajisi bulangizi nzi, ncobeelede kulumba mulimo wa Jesu wakuba Sikwiimaakati?

¹⁴ Ino mbuti kujatikizya baabo batali mucizuminano cipya, aabo ibajisi bulangizi bwakuyoopona anyika? Nokuba kuti tabali basikutola lubazu mucizuminano cipya, balagwasyigwa ancico. Mbobali balongwe ba Leza balalekelelwa zibi zyabo alimwi baambwa kuti baliluleme. (Jak. 2:23; 1 Joh. 2:1, 2) Kufwumbwa naa tujisi bulangizi bwakujulu naa bwaanyika, aumwi wesu weelede kulumba mulimo wa Jesu wakuba Sikwiimaakati wacizuminano cipya.

“Mupaizi Mupati”

15. Ino mbuti mulimo wa Jesu wakuba Mupaizi Mupati mbowiindene awabantu boonse ibakali bapaizi bapati?

¹⁵ Baalumi banji bakali bapaizi bapati, pele mulimo wa Jesu wakuba Mupaizi Mupati ulilibedelede. Munzila nzi? Paulo upandulula kuti: “Teelede kupaila zipaizyo mazuba oonse mbubonya mbuli abo bapaizi bapati, nkaambo balo bakali kusaanguna kupailila zibi zyabo beni, ulwabili kupailila zibi zyabantu, pele eci Jesu wakacicita lweendo lomwe naakalituula mwini. Nkaambo Mulao nguusala bantu mubulengausi bwabo kuti, babe bapaizi bapati, pele lyalo ijwi lyakukonka ilyakacitwa munsi lya-Mulao ndelisala Mwana kuba Mupaizi uulomene amuyamyaaka.”—Heb. 7:27, 28. *

16. Ino nkaambo nzi cipaizyo ca Jesu ncocili cintu cilibedelede ncobeni?

¹⁶ Jesu wakali muntu uulondokede, iwakeelene kapati ambwaakabede Adamu katanabisya. (1 Kor. 15:45) Akaambo kaboobo, Jesu alikke nguwakali kukonzya kupa cipaizyo cilondokede munzila iimaninide—icipaizyo citeelede kwiindulukwa. Mumulawo wa Musa, zipaizyo zyakali kutuulwa abuzuba. Nokuba boobo, zipaizyo zili boobu zyoonse alimwi amilimo yabapaizi zyakali buyo zifwanikiso zyazyintu nzyaakali kuyoocita Jesu. (Heb. 8:5; 10:1) Aboobo, akaambo kakuti Jesu ulakonzya kucita zyintu zinji kwiinda bapaizi boonse bapati alimwi akuti uyookkalilila mumulimo ooyu, imulimo wakwe wakuba Mupaizi Mupati ulilibedelede.

17. Ino nkaambo nzi ncotweelede kumulumba Jesu akaambo kakuba Mupaizi Mupati, alimwi ino mbuti mbotukonzya kucita oobu?

¹⁷ Kutegwa tugwasyigwe kuba acilongwe a Leza, tuyandika milimo ya Jesu mbwali Mupaizi Mupati. Elo kaka tujisi Mupaizi Mupati mubotu! Paulo wakalemba kuti: “Oyo wesu tali Mupaizi Mupati uutakonzya kutweetelela mukulengauka kwesu, pele ngonguwe oyo uwakasunkwa mbubonya mbuli ndiswe, nekuboobo taakwe naakacita cibi.” (Heb. 4:15) Masimpe, ikulumba akaambo kakuti Jesu Mupaizi Mupati mubotu, kweelede kutukulwaizya ‘kutaliponena tobeni, pele kuponena ooyo iwakatufwida.’—2 Kor. 5:14, 15; Lk. 9:23.

“Lunyungu” Lwakasinsimwa

18. Ino mbusinsimi nzi bwakaambwa ciindi Adamu naakabisya, alimwi ino ncinzi cakazoozubululwa kujatikizya businsimi oobu?

¹⁸ Mumuunda wa Edeni, nocakalibonya kuti bantu basweekelwa zyintu zyoonse—cilongwe cibotu a Leza, buumi butamani, lukkomano alimwi a Paradaiso—Jehova Leza wakasinsima kuti kuyooba Mufwutuli. Ooyu wakaambwa kuti “lunyungu.” (Matl. 3:15) Ilunyungu oolu lwatakazyibidwe  lwakazooba mutwe wamakani wabusinsimi bunji bwamu Bbaibbele kwamyaka minji. Wakali kuzooba waluzubo lwa Abrahamu, Izaka alimwi a Jakobo. Alimwi, wakali kuyoozwa muzyalani lya Davida.—Matl. 21:12; 22:16-18; 28:14; 2 Sam. 7:12-16.

19, 20. (a) Ino nguni uuli Ndolunyungu lwakasyomezyegwa? (b) Ino nkaambo nzi ncokukonzya kwaambwa kuti lunyungu lwakasinsimwa lulabikkilizya abantu bambi kunze lya Jesu?

¹⁹ Ino nguni wakali Lunyungu oolu lwakasyomezyegwa? Bwiinguzi kumubuzyo ooyu bulakonzya kujanika kulugwalo lwa Ba-Galatiya 3:16. (Amubale.) Nokuba boobo, kumbele mucaandano ncicona eeci, mwaapostolo Paulo ulazumanana kwaambila Banakristo bananike kuti: “Nkabela mbuli mbumuli bakwe Kristo, muli inyungu zya-Abrahamu, aboobo muli baswaana mbubonya mbucaamba cisyomezyo.” (Gal. 3:29) Ino nkaambo nzi ncocaambwa kuti Kristo Ndolunyungu lwakasyomezyegwa kakuli kuli bantu bambi babikkilizyidwe?

²⁰ Tuulunzuma twabantu balyaamba kuti mbaluzubo lwa Abrahamu, bamwi akati kabo mane balipa mulimo wabusinsimi. Zikombelo zimwi zibikkila kapati maano kukulyaamba kuti basinsimi banzizyo mbaluzubo lwa Abrahamu. Pele sena boonse aaba Ndolunyungu lwakasyomezyegwa? Peepe. Kweelana ambwaakaamba mwaapostolo Paulo kwiinda mukusololelwa amuuya, tabali boonse baluzubo lwa Abrahamu ibakonzya kulyaamba kuti Ndunyungu lwakasyomezyegwa. Ibana babana ba Abrahamu bamwi taakwe nobakabelesyegwa kulongezya bantu pe. Lunyungu lwazilongezyo lwakali kuyoozwa muli Izaka alikke. (Heb. 11:18) Kumamanino, muntu omwe buyo, Jesu Kristo, walo zyalani lyakwe kuzwa kuli Abrahamu lilaambwa mu Bbaibbele, ngonguwe cibeela cakusaanguna calunyungu lwakasinsimwa. * Boonse bantu ibakazooba cibeela cabili calunyungu lwa Abrahamu bali boobu nkaambo  kakuti “[mbi]bakwe Kristo.” Masimpe, mulimo wa Jesu mukuzuzikizya businsimi oobu ulilibedelede ncobeni.

21. Ino ncinzi cimukkomanisya kujatikizya Jesu mbwazuzikizya mulimo wakwe uulibedelede mumakanze aa Jehova?

²¹ Ino ncinzi ncotwaiya mukulanga-langa mubufwaafwi mulimo wa Jesu uulibedelede mumakanze aa Jehova? Kuzwa ciindi ncaakalengwa, Mwana wa Leza simuzyalwa alikke ulilibedelede. Pele, ooyu Mwana wa Leza iwakazooba Jesu wazumanana kubeleka cakulibombya kweelana akuyanda kwa Bausyi, kunyina naakayanda bulemu bwakwe mwini. (Joh. 5:41; 8:50) Elo eeci ncikozyanyo cibotu kaka ncotweelede kutobela mazuba aano! Mbubwenya mbwaakacita Jesu, aibe mbaakani yesu ikucita “zyoonse cakuti kube bulemu kwa-Leza.”—1 Kor. 10:31.

Bupanduluzi buyungizidwe

Sena Muciyeeyede?

• Ino ncinzi ncomwaiya kujatikizya mulimo uulibedelede wa Jesu kuzwa kumazyina aakwe aabulemu? (Amubone kabbokesi.)

• Ino mbuti mbomukonzya kwiiya cikozyanyo ca Mwana uulibedelede iwa Jehova?

[Mibuzyo yaciiyo]

Kabbokesi/[Cifwanikiso icili apeeji 15]

Mazyina Aabulemu Amwi Aatondezya Mulimo Uulibedelede Ngwajisi Jesu Mumakanze aa Leza

▪ Mwana Simuzyalwa Alikke. (Joh. 1:3) Jesu alikke nguwakalengwa cakaanzambwene a Bausyi.

▪ Ijwi. (Joh. 1:14) Jehova ubelesya Mwanaakwe kuba Mwiiminizi mukwaamba makani alimwi amalailile kuzilenge zimwi.

▪ Ameni. (Ciy. 3:14) Buumi mbwaakapona Jesu bwakubula kampenda naakali anyika, kubikkilizya alufwu ndwaakafwa cakulyaaba, zyakatondezya alimwi akupa kuti zisyomezyo zya Jehova Leza zizuzikizyigwe.

▪ Sikuyanzanya wa Cizuminano Cipya. (1 Tim. 2:5, 6) Mbwali Sikuyanzanya wamulawo, Jesu wapa kuti kuzyalwe cisi cipya, “ba-Israyeli ba-Leza,” calo cibambidwe aa Banakristo ibayooba “bapaizi bami” kujulu.—Gal. 6:16; 1 Pet. 2:9.

▪ Mupaizi Mupati. (Heb. 7:27, 28) Jesu nguwakali muntu alikke wakali kukonzya kupa cituuzyo cilondokede, eeco catakali kuyandika kutuulwa alimwi. Ulakonzya kutusalazya kucibi alimwi akutunununa kuzwa kunguzu zyalufwu ziboola akaambo kacibi.

▪ Lunyungu Lwakasyomezyegwa. (Matl. 3:15) Jesu Kristo alikke ncecibeela cakusaanguna calunyungu oolu lwakasinsimwa. Boonse aabo ibakazooba cibeela cabili calunyungu lwa Abrahamu “[mbi]bakwe Kristo.”—Gal. 3:29.