Sena Mulayeeya?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwasoleka kwiingula mibuzyo eeyi iitobela:

• Ino mbuti mbotukonzya kuukanana kabotu “mwaambo uusalala,” kasimpe kajatikizya Leza alimwi amakanze aakwe? (Zef. 3:9)

Mbubwenya mbotucita kumwaambo uukananwa buya, kutegwa tuukanane kabotu “mwaambo uusalala,” tuyandika kuswiililisya, kwiiya bantu ibaukanana cakupasaula, kwaabikka mumutwe mabbuku aamu Bbaibbele alimwi atupango tumwi twamu Bbaibbele, kwiinduluka-induluka nzyotwakaiya, kubala cakupozya, kulanga-langa mbwaakkala, naa mbwaabikkwa mabala aakasimpe kutegwa aambe kaambo akuzyiba ncaakkalila boobo, amusolekesye kutegwa muzumanane kuyaambele, amubikke ziindi zigaminide zyakuliyiisya, alimwi kamusoleka lyoonse “kuukanana” mwaambo uusalala.—8/15, mapeeji 21-25.

• Ino mbuti muzeezo wakuti “kakole kaindulwidwe” mboukonzya kubeleka mulukwatano?

Mabala aakuti “kakole kaindulwidwe” mmaambilambali. (Muk. 4:12) Ikuti maambilambali aaya aambwa kujatikizya lukwatano, cipandulula mulumi amukaintu wakwe, nkokuti tutambo tobilo twakakole, ituzambene antambo iili akati, nkokuti Leza. Ikukamantana a Leza kupa kuti banabukwetene bajane nguzu zyakulwana mapenzi, alimwi nkakasensa kaleta lukkomano mulukwatano.—9/15, peeji 16.

• Ino “kubikwa maanza” kupandululwa kulugwalo lwa Ba-Hebrayo 6:2 kwaamba nzi?

Kwaamba kubikka maanza mukupa zipego zyamaleele zyamuuya uusalala kutali kusalwa kwabaalu Banakristo. (Inc. 8:14-17; 19:6)—9/15, peeji 32.

• Ino mbuti balangizi mumbungano mbobakonzya kulemeka bantu?

Nzila imwi mwaalu mbwakonzya kucita boobo nkwiinda mukutaambila bantu kuti bacite zyintu walo nzyatalisungwide kucita. Alimwi, ulabalemeka bantu kwiinda mukubaambila twaambo tujatikizya nzyalomba kuti bacite naanka malailile ngabapa.—10/15, peeji 22.

• Ino ncinzi mwaalu Munakristo ncakonzya kwiiya kuzwa kumweembezi muna Israyeli mbwaakali kubelesya musako uujisi ngobyo?

Mweembezi wakali kubelesya musako uujisi ngobyo kutegwa asololele butanga bwakwe. Mbelele nozyakali kunjila naa kuzwa mucaanda, zyakali ‘kwiinda kunsi aamusako wamweembezi,’ aboobo mweembezi wakali kukonzya kuzibala. (Lev. 27:32) Awalo mweembezi Munakristo weelede kubuzyiba kabotu butanga bwa Leza mbwalanganya alimwi akuzyiba aimwi mboipona.—11/15, peeji 9.