Sena Muyoozumanana Kuba Balulami?
Sena Muyoozumanana Kuba Balulami?
“Mane kusikila ndikafwe, nsikooleka kululama!”—JOB. 27:5, NW.
1, 2. Ino mulimo wakuyaka nzi ngotweelede kunjila, alimwi ino mmibuzyo nzi njotutilange-lange?
AMWEEZYEEZYE kuti mulanga-langa malailile aatondezya mboyeelede kuyakwa ŋanda. Mwagambwa akaambo kakubona kuti bubambe oobo bulagwasya. Camukkomanisya kuyeeyela nzila ziindene-indene ŋanda eeyi mboiyoomugwasya nywebo alimwi amukwasyi wanu. Aboobo sena tamukonzyi kuzumina kuti malailile aaya alimwi amizeezo njomujisi tazikonzyi kumugwasya ccita kuti ŋanda yamana kuyakwa, mwatalika kukkala mumo, alimwi akwiilanganya kabotu?
2 Mbubwenya buyo, tulakonzya kubona kuti kululama mbube buyandika kapati ibukonzya kutugwasya kapati swebo alimwi abayandwa besu. Pele ikubuyeeyela buyo kuti bube oobu bulayandika tacitugwasyi kapati ccita kuti twatalika kucita zyintu zikonzya kutugwasya kuzuzikizya mbaakani yakuti tube abululami bwa Bunakristo alimwi akuzumanana kuba balulami. Munyika yamazuba aano, ikuyaka kanji-kanji kuladula kapati. (Lk. 14:28, 29) Mbubwenya buyo, kutegwa tube balulami tuyandika kujana ciindi alimwi tweelede kusolekesya, pele kucita boobu kulagwasya kapati. Aboobo atulange-lange mibuzyo yotatwe eeyi: Ino mbuti mbotukonzya kuba bantu baluleme? Ino mbuti mbotukonzya kuzumanana kuba abululami bwa Bunakristo? Ino ncinzi cikonzya kucitwa ikuti naa muntu wakalilekede kuba mululami kwaciindi cili mbocibede?
Ino Mbuti Mbotukonzya Kuba Bantu Baluleme?
3, 4. (a) Ino mmuunzila nzi Jehova mwatugwasya kuti tube balulami? (b) Ino mbuti mbotukonzya kuba abululami ibuli mbuli mbwaakatondezya Jesu?
3 Mucibalo cainda twakabona kuti Jehova ulatulemeka kwiinda mukutuzumizya kulisalila kuti tube bantu baluleme naa pe. Pele cilakkomanisya kubona kuti kunyina natulekelezya mumakani aaya. Ulatuyiisya mbotukonzya kuba abube bubotu oobu, alimwi ulatupa muuya wakwe uusalala walo uutugwasya kubelesya njiisyo zyakwe mubuumi bwesu. (Lk. 11:13) Mukuyungizya waawo, ulabakwabilila kumuuya aabo ibasoleka kweenda mubululami.—Tus. 2:7.
4 Ino mbuti Jehova mbwaatuyiisya kuti tube balulami? Ikapati, nkwiinda mukutuma Mwanaakwe, Jesu, kuti aboole anyika. Jesu wakamvwida Jehova cakulondoka mubuumi bwakwe boonse. “Wakalibombya akuzumina [naa kumvwida] nikuba kufwa.” (Flp. 2:8) Muzyintu zyoonse nzyaakacita, Jesu wakabamvwida Bausyi bakujulu, nociba ciindi nocakali kukatazya kapati kucita boobu. Wakaambila Jehova kuti: “Akucitwe kuyanda kwako, kutabi kwangu.” (Lk. 22:42) Aumwi wesu weelede kulibuzya kuti, ‘Sena ndijisi muuya wakumvwida uuli boobu?’ Kwiinda mukuba bantu ibamvwida akaambo kakuba amakanze mabotu, tuyooba balulami. Amulange-lange mbazu zimwi zyamubuumi mwalo motuyandika kapati kumvwida.
5, 6. (a) Ino mbuti Davida mbwaakakankaizya mbokuyandika kuba balulami nociba ciindi ncobatatubwene bantu bamwi? (b) Ino mbuyumuyumu nzi bujatikizya kululama mbobajana Banakristo ciindi nobali balikke mazuba aano?
5 Tweelede kumumvwida Jehova nociba ciindi notuli tolikke. Sintembauzyo Davida wakabona mbocakali kuyandika kapati kuba mululami ciindi naakali alikke. (Amubale Intembauzyo 101:2.) Mbwaakali mwami, Davida wakali kujanika akati kabantu lyoonse. Tacidoonekwi buya kuti ziindi zinji wakali kujanika akati kamyaanda, naa zyuulu zyabantu ibakali kumulangilila. (Amweezyanisye Intembauzyo 26:12.) Kuzumanana kuba mululami kwakali kuyandika kapati muziindi eezyi nkaambo mwami wakeelede kupa citondezyo cibotu kubantu bakwe. (Dt. 17:18, 19) Nokuba boobo, Davida wakalizyi kuti nociba ciindi naakali alikke muŋanda yakwe, wakacili kuyandika kweenda mubululami. Ino mbuti kujatikizya ndiswe?
6 Ku Intembauzyo 101:3 tujana majwi ngaakamba Davida aakuti: “Cintu cabuyo nsikooyoocibika kumeso aangu.” Mazuba aano kuli ziindi zinji notukonzya kubikka zyintu zyabuyo kumbele aameso eesu, ikapati ciindi notuli tolikke. Kujatikizya makani aaya, kucikonzya kubelesya Intaneti kwaleta buyumuyumu kubantu banji. Ncuuba-uba kusunkwa kuti tutalike kulangilila zyintu zitaluzi, noziba zyintu ziletela muzeezo wakoonana. Pele sena kucita boobu nkumvwida Leza iwakapa Davida kuti alembe majwi aaya? Zyintu ziletela muzeezo wakoonana zilakonzya kutuletela mapenzi mapati, akaambo kakuti zibusya zisusi zibyaabi alimwi azyabulyato, zinyonyoona manjezeezya, zipa kuti nkwatano zimane, alimwi zisampaula bantu boonse bajatikizyidwe.—Tus. 4:23; 2 Kor. 7:1; 1 Tes. 4:3-5.
7. Ino ninjiisyo nzi zikonzya kutugwasya kuzumana kuba balulami ciindi notuli tolikke?
7 Masimpe, kunyina mubelesi wa Jehova uukonzya kuba aalikke luzutu. Taatesu ulatulangilila caluyando. (Amubale Intembauzyo 11:4.) Elo kaka cilamukkomanisya Jehova ciindi ncamubona kamuzunda masunko! Kwiinda mukucita boobu, mutobela kucenjezya kuli antangalala nkwaakapa Jesu mumajwi aajanika kuli Matayo 5:28. Kufwumbwa mbocikonzyeka amukanze kutalangilila zyintu zikonzya kumusunka kuti mucite cibi. Elo kaka mwakulwaizyigwa kuti mutasowi bululami bwanu akaambo kakulangilila naa kubala zyintu ziletela muzeezo wakoonana!
8, 9. (a) Ino mbuyumuyumu nzi Daniele alimwi abeenzinyina mbobakajana ibujatikizya bululami bwabo? (b) Ino mbuti bakubusi Banakristo mazuba aano mbobakkomanisya Jehova alimwi a Banakristonyina?
8 Alimwi tulakonzya kuba balulami kwiinda mukumvwida Jehova ciindi notuli abantu batakombi. Amuyeeye Daniele abeenzinyina botatwe. Kabali bakubusi bakatolwa mubuzike ku Babuloni. Kabali kookuya, bakazingulukidwe abantu ibatakali kusyoma alimwi bakajisi buyo luzyibo luniini naa batakajisi luzyibo luli loonse kujatikizya Jehova, ibana Hebrayo bone bakasinikizyigwa kulya zilyo zinono zyalo mulawo wa Leza nzyowakali kukasya. Aaba balombwana bakali kukonzya kujana twaambo tunji twakulitamizya kutegwa batatobeli mulawo wa Leza. Kayi bamazyali babo, bapati bamwi iba Juda alimwi abapaizi tiibakali kukonzya kubona ncibakali kucita. Ino nguni wakali kukonzya kuzyiba? Jehova lwakwe wakali kukonzya kuzyiba. Aboobo tiibakazungaana mukumvwida Jehova nokuba kuti bakasinikizyigwa alimwi bakali muntenda.—Dan. 1:3-9.
9 Nyika yoonse mboizulwa, Bakamboni ba Jehova bakubusi balacita mbubwenya oobu, bazumanana kutobela zyeelelo zya Leza nzyabikkila Banakristo alimwi balakaka kuyungwa abalongwe babyaabi. Iciindi nywebo nobakubusi nomukaka kutola lubazu mukubelesya misamu iikola, inkondo, kutukila, kutalilemeka, alimwi amicito imwi mibyaabi, mumvwida Jehova. Kwiinda mukukaka kucita zyintu eezyi, mucita bululami. Mulaligwasya nobeni, alimwi mukkomanisya Jehova, a Banakristonyoko!—Int. 110:3.
10. (a) Ino nkuyeeya kuli buti kujatikizya bwaamu ikwapa kuti bakubusi bamwi baleke kuba balulami? (b) Ino bululami butupa kuti katulilemeka buti mumakani aajatikizya bubi bwakucita bwaamu?
10 Mukuyungizya tweelede kumvwida ciindi notuli abantu batali basankwama naa basimbima. Tulizyi kuti Ijwi lya Leza lilakasya bwaamu. Nokuba boobo, tulakonzya kulekelela kuti muuya wakumvwida ucince akuba uulya wakutalika kulizumizya kucita zyintu nzyotuteelede. Mucikozyanyo ibakubusi bamwi balabikka zinswe zyabamwi mukanwa naa kumatako, naa kusobanya kubusankwa naa kubusimbi kwaumwi aumwi, akuyeeya kuti micito eeyi ili buyo kabotu nkaambo bayeeya kuti takuli koonana buya. Ibakubusi aaba balaluba naa basala kulilubya-lubya kuti bbala lyamu Bbaibbele ilyabwaamu lijatikizya micito yoonse yakutalilemeka yalo iikonzya kupa kuti muntu agwisyigwe mumbungano. * Iciinda kubija ncakuti balaluba kuti bululami bulayandika kapati. Mbwaanga tusola kuba balulami tatweelede kuyandaula twaambo twakulitamizya kutegwa tutalilemeki. Tatusoli kucita cibi katuyeeya kuti tacili cipati cakuti inga twasubulwa. Tatubikkili buyo maano kululayo mbungano njoikonzya kutupa akaambo kakucita cibi. Pele tubikkila maano kukucita zyintu ziyakumukkomanisya Jehova akuzyeeleba eezyo zitakonzyi kumukkomanisya. Muciindi cakusola kucita zyintu zikonzya kutusololela kucibi, tusola kuzitantamuka alimwi “[akuc]cija bwaamu.” (1 Kor. 6:18) Aboobu, tutondezya kuti tuli bantu baluleme ncobeni.
Ino Inga Twazumanana Buti Kuba Balulami?
11. Ino nkaambo nzi ncokuyandika kuzumanana kumvwida? Amupe cikozyanyo.
11 Ikumvwida kutupa kuba balulami, aboobo tulakonzya kuzumanana kuba balulami kuti katupona buumi bwakumvwida. Ikumvwida ciindi comwe buyo kulakonzya kuboneka mbuli kuti takuyandiki—mbuli kuti nkantu kasyoonto. Pele mukuya kwaciindi micito yakumvwida ilakonzya kutuletela mpuwo yabululami. Mucikozyanyo, citina comwe cilakonzya kuboneka mbuli kuti tacijisi mulimo, pesi kuti zitina zinji twazibikka kabotu-kabotu aantoomwe, tulakonzya kuyaka ŋanda mbotu. Aboobo, kwiinda mukuzumanana kumvwida, tulakonzya kuzumanana kuba balulami.—Lk. 16:10.
12. Ino mbuti Davida mbwaakapa cikozyanyo cakuzumanana kuba mululami nociba ciindi cakupenzegwa alimwi akucitilwa calunya?
12 Ibululami bwesu bulalibonya kapati notuliyumya ciindi camakatazyo, notupenzyegwa naa notucitilwa calunya. Amulange-lange cikozyanyo ca Davida icijanika mu Bbaibbele. Kali mulombwana, wakapenzyegwa amwami iwakeelede kwiiminina bweendelezi bwa Jehova. Jehova wakamukaka Mwani Saulo akuyanda Davida, alimwi eeci cakapa Saulo kuti amvwide Davida munyono. Nokuba boobo, Saulo wakazumanana kulela kwaciindi cili mbocibede alimwi wakabelesya basikalumamba bana Israyeli kutegwa bamutandaanye alimwi akumupenzya Davida. Jehova wakakulekelela kutalulama ooku kuti kuzumanane kwamyaka iili mbwiibede. Sena Davida wakanyemena Leza? Sena wakayeeya kuti tacigwasyi kuliyumya? Peepe. Wakazumanana kulemeka cuuno ncaakajisi Saulo cakuba munanike wa Leza, wakakaka kujolela Saulo cibi nociba ciindi naakali kukonzya kucita oobo.—1 Sam. 24:2-7.
13. Ino mbuti mbotukonzya kuzumanana kuba balulami ikuti muntu watucisizya moyo naa kutunyemya?
13 Elo kaka cikozyanyo ca Davida cilatukulwaizya mazuba aano! Tuli cibeela cambunga yanyika yoonse yabantu ibatalondokede, aboobo muntu umwi ulakonzya kutucitila lunya, naa kuleka kusyomeka. Masimpe tulilelekedwe kupona aciindi cino bantu ba Jehova nobatakonzyi kusofwaala boonse. (Is. 54:17) Nokuba boobo, ino tuyoocita buti kuti muntu umwi watutyompya naa kutunyemya? Ikuti twazumizya kunyema kuti kutupe kubikkilila mukombima, tuyoonjizya bululami bwesu kuli Jehova muntenda. Kutalilemeka kwabantu bamwi takweelede kutupa kaambo kakuti tumunyemene Leza akuleka kweenda munzila yakusyomeka. (Int. 119:165) Kuliyumya nomuba muciindi camasukusyo kuyakutugwasya kuzumanana kuba balulami.
14. Ino mbuti mbobacita bantu baluleme ciindi nokuboola kucinca mumbunga alimwi amunjiisyo zyabukombi?
14 Alimwi tulakonzya kuzumanana kuba balulami kuti naa twaceeleba ciyanza cakuyandaula tumpenda alimwi akubeteka bamwi. Eeci caamba kusyomeka kuli Jehova. Ulabaleleka kapati bantu bakwe lino kwiinda lyoonse. Bukombi bwakasimpe kunyina nobwakasumpulidwe anyika mbuli mbocili lino. (Is. 2:2-4) Ciindi nokuba kucinca mubupanduluzi bwazibalo zyamu Bbaibbele, naa nzila yakucita zyintu, tweelede kukuzumina. Tulakkomana kubona bumboni bwakuti mumuni uciyaabuvwula. (Tus. 4:18) Ikuti twabona kuti twaalilwa kukumvwisya kucinca kwaboola, tulamulomba Jehova kuti atugwasye kukamvwisya kaambo. Muciindi eeco, tulaliyumya katuli bantu bamvwida, alimwi katululeme.
Ino Kuti Muntu Umwi Taciti Bululami?
15. Ino nguni alikke uukonzya kumulesya kuba balulami?
15 Teekayi mubuzyo ooyu utupa kuyeeya? Mbuli mbotwakaiya mucibalo cainda, bululami bulayandika kapati. Ikuti kabutako, tatukonzyi kuba acilongwe a Jehova alimwi abulangizi bwini-bwini. Kamuyeeya lyoonse kuti: Kuli buyo muntu omwe uukonzya kumulesya kuba balulami. Ooyu muntu ndinywe nobeni. Jobu wakakamvwisya kabotu kasimpe aaka. Wakaamba kuti: “Mane kusikila ndikafwe, nsikooleka kululama.” (Job. 27:5, NW) Ikuti andinywe mwakanza kucita oobu, alimwi akuswenena kuli Jehova, ciyakumugwasya kuzumanana kuba balulami.—Jak. 4:8.
16, 17. (a) Ikuti muntu wacita cibi cipati, ino ncinzi ncatayelede kucita? (b) Ino ncinzi ncayelede kucita?
16 Nokuba boobo, bamwi balaalilwa kuzumanana kuba balulami. Mbubwenya mbucakacitika baapostolo kabaciliko, bamwi balaaciyanza cakucita zibi zipati. Ikuti naa cakamucitikila andinywe, sena nkokuti caamba kuti tamukonzyi kugwasyigwa? Peepe. Ino ncinzi cikonzya kucitwa? Atusaangune kulanga-langa ncomuteelede kucita. Ncilengwa buya cabantu kuti kabasisa zibi kubazyali, Banakristonyina naa kubaalu. Pesi Bbaibbele lituyeezya kuti: “Uusisa milandu yakwe takooyooba acoolwe pe, pele oyo uulyaambawida akuleka ulafwidwa luzyalo.” (Tus. 28:13) Aabo ibasola kusisa cibi balalubizya kapati nkaambo kunyina cintu cisisidwe kuli Leza. (Amubale Ba-Hebrayo 4:13.) Bamwi balasola kupona buumi bwakuupa-upa ameso, ikulicengeezya kuti babelekela Jehova anu kumwi bacita cibi. Ikuti naa muntu ucita boobu nkokuti tali mululami nkaambo buumi buli boobu buliimpene abwabululami. Jehova taikkomanini milimo yabukombi iicitwa abantu ibasisa zibi zipati. Mukwiimpana, kuupa-upa ooku kulamunyemya.—Tus. 21:27; Is. 1:11-16.
17 Bbaibbele lijisi lulayo lumvwika lwalo ilutondezya ncayelede kucita Munakristo ikuti naa wacita cibi cipati. Weelede kulomba lugwasyo kuzwa kubaalu Banakristo. Jehova wakasala baalu kuti babe mbabo ibakonzya kugwasya baabo ibaciswa kumuuya. (Amubale Jakobo 5:14.) Mutalekeli bukandu bwalulayo naa kululamikwa kuti bumulesye kuliyandauda buzumi bwakumuuya. Sena muntu musongo inga walekelela bukandu bwakuyaswa nyeleti naa bwakwaandulwa kuti atasilisyi bulwazi bupati ibukonzya kumujaya?—Heb. 12:11.
18, 19. (a) Ino mbuti cikozyanyo ca Davida mbocitondezya kuti imuntu wakalekede kuba mululami inga wajokela kuba mululami alimwi? (b) Ino ncinzi ncomukanzide kucita kujatikizya bululami bwanu?
18 Sena kuli bulangizi bwakuti ulakonzya kuponenena? Sena muntu wakaleka kuba mululami ulakonzya kujokela kuba mululami alimwi? Amulange-lange cikozyanyo ca Davida alimwi. Wakacita cibi cipati. Wakanyomenena mukamuntu, wakacita bumambi, amane wakalailila kuti mulumi wamukaintu ooyu ajaigwe. Teekayi cilakatazya kuyeeya kuti Davida aciindi eeci wakali mululami, sena tabusyi? Pele sena kwakanyina mbwaakali kunga wagwasyigwa? Davida wakali kuyandika lulayo aboobo wakalutambula. Akaambo kakuti wakeempwa ncobeni, Jehova wakamumvwida luse. Wakaiya ciiyo kuzwa kalulayo ndwaakatambula, wakajokela kuba mululami alimwi, mpoonya wakazumanana kumvwida Leza ciindi coonse. Buumi bwa Davida bwakaba cikozyanyo cipandulula majwi ngotubala ku Tusimpi 24:16 aakuti: “Nkaambo uululeme, nekuba kuti ulawa ziindi zili musanu azibili, ulabuka.” Ino ncinzi cakatobela? Amubone mbwaakaamba Jehova kuli Solomoni kujatikizya Davida kafwide kale. (Amubale 1 Bami 9:4.) Leza wakabona Davida kuti wakali muntu uululeme. Masimpe Jehova ulakonzya kusanzya basizibi ibeempwa nokuba kuzibala zyatombe lyazibi zyabo zipati.—Is. 1:18.
19 Masimpe, muyakuba balulami kwiinda mukumvwida Leza akaambo kaluyando. Amuzumanane kuliyumya cakusyomeka alimwi ikuti mwabisya, amutondezye kuti masimpe mweempwa. Elo kaka bululami bwesu ncintu ciyandika kapati! Umwi aumwi wesu wakulwaizyigwa kuti akanze mbuli bwakacita Davida naakati: “Pele mebo ndeenda cakululama.”—Int. 26:11.
Bupanduluzi buyungizidwe
Ino Inga Mwaingula Buti?
• Ino inga mwacikonzya buti kuba balulami?
• Ino muubukkale nzi momukonzya kuzumanana kuba balulami?
• Ino mbuti mbocikonzyeka kuba mululami alimwi?
[Mibuzyo yaciiyo]
Kabbokesi kali apeeji 8]
‘CAKALI CINTU CIBOTU KAPATI’
Mukaintu umwi wakajisi da lyamyezi yosanwe wakaamba majwi aaya kujatikizya buuya alimwi akusyomeka kwamusimbi umwi. Wakaunkide mucintoolo mobasambala zyakulya, eelyo nokwakainda mawoola masyoonto kuzwa ciindi eeci wakazyiba kuti wasiya cikwama cakwe camali mucintoolo eeci. Cikwama eeci cakajisi mali aasika ku $2,000 (K6,450,000), mali manji kapati ikwiinda ngaakali kunyamuna lyoonse. Wakaambila sikubweza twaambo wamuteende yakubusena ooko kujatikizya mbwaakalimvwa naakaamba kuti: “Ndakanyongana kapati.” Nokuba boobo, musimbi umwi wakacibona cikwama eeci akutalika kuyandaula mukamwini mpoonya-mpoonya. Naakakakilwa kumujana, wakacitola kuli bamapulisa, eelyo bamapulisa bakamujana mukaintu uulaada ooyu. Katondezya kulumba, mukamwini cikwama ooyu wakaamba kuti: “Cakali cintu cibotu kapati ncobeni kucicita.” Ino nkaambo nzi musimbi ooyu ncaakasolekela boobuya kutegwa apilusye mali aalya? Cibalo cakali mumuteende cakaamba kuti mbokunga ngumwi wa Bakamboni ba Jehova, “wakatondezya kusyomeka ooku akaambo kacikombelo mwaakakomenena.”
[Cifwanikiso icili apeeji 9]
Ibakubusi balakonzya kuba balulami nociba ciindi nobasunkwa
[Cifwanikiso icili apeeji 10]
Davida wakaalilwa kuzumanana kuba mululami kwaciindi cili mbocibede, pele wakacikonzya kuba mululami alimwi