Twaambo Tugwasya Mumagwalo Aakalembwa a Johane Alimwi Alwa Juda
Ijwi lya Jehova Lili Abuumi
Twaambo Tugwasya Mumagwalo Aakalembwa a Johane Alimwi Alwa Juda
MAGWALO otatwe aakalembwa a Johane alo aayeeyelwa kuti akalembwa mumwaka wa 98 C.E. ku Efeso, ali akati kamabbuku aamamanino mu Magwalo aakasololelwa amuuya. Obilo aakusaanguna akulwaizya Banakristo kuzumanana kweenda mumumuni alimwi akukaka basiluleyo. Mulugwalo lwatatu, Johane taambi buyo kweenda mulusinizyo, pele alimwi ukulwaizya lukamantano lwa Bunakristo.
Mulugwalo ndwaakalemba kali ku Palesitaini, andiza wakali mwaka wa 65 C.E., Juda imunyina Jesu ucenjezya Banakristonyina kujatikizya basizibi ibakaboola mumbungano, alimwi upa lulayo lwambobeelede kukaka kuyungwa. Kubikkila maano kumulumbe uuli mumagwalo otatwe aa Johane alimwi alwa Juda kulakonzya kutugwasya kutegwa tuzumanane kusyomeka nokuba kuti kuli zisinkilizyo.—Heb. 4:12.
AMUZUMANANE KWEENDA MUMUMUNI, MULUYANDO ALIMWI AMULUSYOMO
Mulugwalo lwakusaanguna ndwaalembela Banakristo boonse, Johane upa lulayo lubotu lwalo iluyoobagwasya kutegwa bacikonzye kukaka basiluleyo akuzumanana kukakatila kukasimpe alimwi akubululami. Ulakankaizya mbokuyandika kuzumanana kweenda mumumuni, muluyando alimwi amulusyomo.
Johane ulemba kuti: “Na tuleenda mumumuni, mbubonya alakwe [Leza] mbwali mumumuni, tulijisi luswanaano umwi aumwi.” Alimwi akaambo kakuti Leza Nkakasensa kaluyando, mwaapostolo waamba kuti: “Atuyandane.” Ciindi luyando lwa Leza nolutukulwaizya kuti ‘tubambe milazyo yakwe,’ tulaizunda nyika kwiinda “[mul]usyomo lwesu” muli Jehova Leza, Jwi lyakwe alimwi a Mwanaakwe.—1 Joh. 1:7; 4:7; 5:3, 4.
Kwiingula Mibuzyo Yamu Magwalo:
2:2; 4:10—Ino mbuti Jesu mbwali “mulungo”? Kulunga caamba kubbadela mulandu. Jesu wakalunga buumi bwakwe mukuti, wakabbadelela zibi zyesu kuzuzikizya ceelelo cabululami bulondokede. Kwiinda mucipaizyo eeco, Leza wakali kukonzya kutondezya luzyalo, alimwi akulekelela zibi zyabaabo ibatondezya lusyomo muli Jesu.—Joh. 3:16; Rom. 6:23.
2:7, 8—Ino mmulazyo nzi Johane ngwaamba kuti “mukulukulu” alimwi akuti “mupya?” Johane waamba mulazyo uujatikizya luyando lwakulyaaba ilwabunyina. (Joh. 13:34) Waamba kuti “mukulukulu” akaambo kakuti Jesu wakabapa mulazyo ooyu myaka iinda ku 60 Johane katanalemba lugwalo lwakusaanguna oolu ilwakasololelwa amuuya. Aboobo, basyomi bakaluujisi “kuzwa kumatalikilo” kwabuumi bwabo kabali Banakristo. Alimwi mmulazyo “mupya” mukuti ulabikkilizya zinji kunze buyo ‘lyakuyanda mweenzinyina mbuli mbwaliyanda’ muntu, ulabikkilizya aluyando lwakulyaaba.—Lev. 19:18; Joh. 15:12, 13.
3:2—Ino ncinzi “[citana]yubununwa” ku Banakristo bananike, alimwi ino nguni ngobayoobona “mbuli mbwabede”? Cintu citanayubununwa kuli mbabo cijatikizya mbobayoolibonya baakubusyilwa kubuumi bwakujulu kabajisi mibili yamuuya. (Flp. 3:20, 21) Nokuba boobo, ncobazyi ncakuti Leza “nazoolibonya [ba]zooba mbuli nguwe, nkaambo [ba]zoomubona mbuli mbwabede,” nkokuti “Muuya.”—2 Kor. 3:17, 18.
5:5-8—Ino mbuti maanzi, bulowa alimwi amuuya mbozilungulula kuti “Jesu ngu-Mwana wa-Leza”? Maanzi akalungulula nkaambo Jesu naakabbapatizyigwa mumaanzi, Jehova lwakwe wakamuzumina kuti Mmwanaakwe. (Mt. 3:17) Bulowa bwa Jesu, naa buumi mbwaakapa “kuti anunune bantu boonse,” abwalo bwakatondezya kuti Jesu Mmwana wa Leza. (1 Tim. 2:5, 6) Alimwi muuya uusalala wakatondezya kuti Jesu Mmwana wa Leza ciindi nowakaboola alinguwe naakali kubbapatizyigwa, eelyo wakamugwasya kuti aunke koonse-koonse munyika “kucita zibotu, akuponya boonse abalyatidwe Saatani.”—Joh. 1:29-34; Inc. 10:38.
Ziiyo Kulindiswe:
2:9-11; 3:15. Ikuti naa Munakristo wazumizya cintu cimwi naa muntu umwi kuti anyonganye luyando lwabunyina, nkokuti muntu ooyu weenda mumudima wakumuuya, katazyi ankwaya.
AMUZUMANANE ‘KWEENDA MULUSINIZYO’
Johane utalika lugwalo lwabili kwiinda mukwaamba kuti: “Mupati ulajuzya namalelo uusalidwe abana bakwe.” Ulatondezya lukkomano akaambo kakujana kuti “bana bak[we namalelo] bamwi baleenda mulusinizyo.”—2 Joh. 1, 4.
Naamana kubakulwaizya kuba aluyando, Johane ulemba kuti: “Olu ndoluyando, kuti tweende akutobela milazyo yakwe.” Johane alimwi ucenjezya kujatikizya “silweeno, [walo uuli] ngo-sikulwanya-Kristo.”—2 Joh. 5-7.
Kwiingula Mibuzyo Yamu Magwalo:
1, 13—Ino nguni “namalelo uusalidwe”? Johane ulakonzya kuti waamba mukaintu wiitwa kuti Kyria, ibbala lyamu Chigiliki lyaamba kuti “namalelo.” Ambweni ubelesya maambilambali kwaamba mbungano imwi kutegwa basikupenzya batazyibi. Ikuti waamba mbungano, nkokuti bana bakwe beelede kuti mbantu bamumbungano eeyo mpoonya “bana bamucizi wak[we]” inga baba bantu bambungano iimbi.
7—Ino Johane aawa waamba ‘kusika’ kwa Jesu ikuli, alimwi ino mbuti basilweeno “[mbo]batazumini”? Kusika ooku takuli kuboola kwa Jesu kutalibonyi ikuyoocitika kumbele pe. Muciindi caboobo, nkuboola kwakwe kali muntu alimwi akunanikwa amuuya kuti abe Kristo. (1 Joh. 4:2) Basilweeno tabasyomi kuti wakaliboolede kali muntu wanyama. Ambweni balakaka kuti Jesu wakapona anyika naa kuti wakananikwa amuuya uusalala.
Ziiyo Kulindiswe:
2, 4. Ikuzyiba kasimpe, nkokuti njiisyo zyoonse zya Bunakristo izili mu Bbaibbele, alimwi akuzitobela, ncintu ciyandika kapati kutegwa tukafwutuke.—3 Joh. 3, 4.
8-11. Ikuti tutasweekelwi “lweetelelo, aluumuno, kuzwa kuli-Leza Taateesu akuli-Jesu Kristo,” alimwi akuyanzana kwaluyando abasyomima, tweelede ‘kulilanga’ kutegwa tusinizye kuti tulazumanana kukkala mulwiiyo lwa Kristo akukaka babo batakkali “mulwiiyo lwa-Kristo.”—2 Joh. 3.
AMUBE “BASIKUBELEKANYINA MUMILIMO YALUSINIZYO”
(3 Joh 1-14)
Lugwalo lwatatu Johane ulembela Gayo imweenzinyina. Walemba kuti: “Taakwe kubotelwa kumbi nkunjisi kupati kwiinda oku kwakumvwa kuti bana bangu baleenda mulusinizyo.”—3 Joh. 4.
Johane ulumbaizya Gayo akaambo “[kak]ucita mulimo uusyomeka” wakugwasyilizya bakwesu ibaswaya. Mwaapostolo waamba kuti: “Swebo tuleelede kusamausya bantu mbuli baaba, kuti tube basikubelekanyina mumilimo yalusinizyo.”—3 Joh. 5-8.
Kwiingula Mibuzyo Yamu Magwalo:
11—Ino nkaambo nzi bantu bamwi bacita zibi? Kutalumba zyintu zyakumuuya kwapa kuti bantu bamwi baalilwe kubona Leza ameso aabo aacikozyanyo. Akaambo kakuti tabamuboni ameso aabo eeni, bacita zyintu mbuli kuti walo takonzyi kubabona.—Ezk. 9:9.
14—Ino mbaani baambwa kuti “beenzuma”? Bbala lyakuti “beenzuma” lyaambwa waawa talyaambi buyo balongwe pe. Johane ulibelesya kwaamba basyominyina boonse.
Ziiyo Kulindiswe:
4. Bakwesu alimwi abacizyi basimide kumuuya ibali mumbungano balakkomana kapati ciindi nobabona kuti ibakubusi mumbungano balazumanana “[kw]eenda mulusinizyo.” Alimwi cilakkomanisya kapati kaka kubazyali nobazwidilila mukugwasya bana babo kuba babelesi ba Jehova!
5-8. Akati kabaabo ibabelekela bakwesu canguzu akaambo kaluyando ndobajisi kuli mbabo alimwi akuli Jehova mbalangizi beendeenda, bamisyinali, ibabelekela kumaanda aa Bbeteli alimwi abaabo ibabeleka mulimo wabupainiya. Tweelede kutobela lusyomo lwabo alimwi bayandika kugwasyilizya.
9-12. Tweelede kutobela cikozyanyo ca Demetrio uusyomeka kutali Diotrefe sikwaamba makani mabi, walo wakali sikutamikizya bantu.
AMULIYOBOLE “MULUYANDO LWA-LEZA”
Juda upandulula bantu bayunga mumbungano kuti “mbasyolausi, mbatongausi, abeenzegwa azisusi zyabo zibi. . . [Ba]laamba majwi aakulitunkula, nkabela balalangilila ziwa zyabantu kuti balivubye.”—Jud. 4, 16.
Ino mbuti Banakristo mbobakonzya kukaka kuyungwa? Juda ulemba kuti: “Nomuyandwa, amuyeeye majwi aakaambwa kalekale kumilomo yabaapostolo ba-Mwami Jesu Kristo.” Uyungizya kuti: ‘Amuliyobole muluyando lwa-Leza.’—Jud. 17-21.
Kwiingula Mibuzyo Yamu Magwalo:
3, 4—Ino nkaambo nzi Juda ncaakakulwaizya Banakristo ‘kulwanina lusyomo’? Nkaambo kakuti ‘basikasampusampu bakaboola mumbungano.’ Bantu aaba ‘bakali kusandula luzyalo lwa-Leza kuba zisusi zibi.’
20, 21—Ino mbuti mbotukonzya “kuliyobola muluyando lwa-Leza”? Tulakonzya kucita oobu munzila zyotatwe eezyi: (1) kuliyaka “mulusyomo [lwesu] lusalala cakwiinda,” kwiinda mukuba aciiyo cesu tobeni ca Jwi lya Leza alimwi akutola lubazu cabusungu mumulimo wakukambauka; (2) kwiinda “[mu]kukomba mu-Muuya Uusalala,” ikweendelezyegwa anguwo; alimwi a (3) kwiinda mukuba alusyomo mucintu cipa kuti tube abuumi butamani—cipaizyo cacinunuzyo ca Jesu Kristo.—Joh. 3:16, 36.
Ziiyo Kulindiswe:
5-7. Sena bantu babi balakonzya kufwutuka kulubeta lwa Jehova? Kweelana azikozyanyo zyakucenjezya zyotatwe nzyaamba Juda, eeco tacikonzyi kucitika pe.
8-10. Tweelede kutobela cikozyanyo ca Mikayelo angelo simutwe akulemeka baabo Jehova mbapede nguzu zyabweendelezi.
12. Basiluleyo baupaupa ameso ibaboneka mbuli kuti bajisi luyando, mbabi kulusyomo lwesu mbuli mabwe aatalibonyi mumaanzi mbwaali mabi kumato naa kubantu basikuyaamba. Bamaiyi babeji balakonzya kulibonya kuba bantu babotu, pele bali mbuli makumbi buyo aatakwe maanzi aapepuluka amuuwo mukuti kunyina ncobajisi caboola kumakani aakumuuya. Bantu bali boobu tabazyali micelo, bali mbuli masamu aafwide aakunkumukide. Balangilwa kuyoonyonyooka, mbuli masamu aakazyulwa miyanda. Inga twacita kabotu ikuti twabatantamuka basiluleyo.
22, 23. Banakristo bakasimpe balabusula bubi. Mukusola kufwutula bantu bamwi ibadooneka kumulilo walunyonyooko ilutamani, Banakristo basimide mumbungano—kwaambisya balangizi babikkidwe—balabagwasya kuti babukulusye lusyomo lwabo.
[Zifwanikiso izili apeeji 28]
Maanzi, muuya alimwi abulowa zyakapa bumboni bwakuti “Jesu ngu-Mwana wa-Leza”