Amube Alukkomano Mumulimo Wakugwasya Bantu Kuba Basikwiiya
Amube Alukkomano Mumulimo Wakugwasya Bantu Kuba Basikwiiya
“Nkaambo kaako kamuya mukabaiisye bantu.”—MT. 28:19.
1-3. (a) Ino mbuti bantu bamwi mbobalimvwa kujatikizya coolwe cakweendelezya ziiyo zya Bbaibbele? (b) Ino mibuzyo nzi njotutiilange-lange?
M UCIZYI umwi uubelekela mukakamu kaambaula mwaambo wa Chihindi ku United States wakalemba kuti: “Ndali kwiiya amukwasyi iwaku Pakistan kwansondo zili 11.” Wakayungizya ulaamba: “Tacigambyi kuti ndakaba aacilongwe ambabo. Misozi ilaibaiba mumeso ndayeeya kuti mukwasyi ooyu upilukila ku Pakistan. Kuusa akaambo kakuzyiba kuti tuyakwaandaana alimwi akaambo kalukkomano ndondakajana ciindi nondakali kubayiisya kujatikizya Jehova nkokwapa kuti misozi iibaibe.”
2 Sena andinywe mwakaba kale alukkomano luli mbuli lwamucizyi ooyu iluboola akaambo kakwiiya Bbaibbele amuntu? Jesu abasikwiiya bakwe bamumwaanda wamyaka wakusaanguna bakakkomana kapati mumulimo wakugwasya bantu kuba basikwiiya. Ciindi basikwiiya ibali 70 mbaakayiisya kukambauka Jesu nobakapiluka amulumbe mubotu, Jesu lwakwe “wakasekelela mu-Muuya Uusalala.” (Lk. 10:17-21) Mbubwenya buyo, mazuba aano bantu banji balakkomana kapati mumulimo wakugwasya bantu kuba basikwiiya. Kaambo aaka kalalibonya mulipooti yamwaka wamu 2007 mwalo basikumwaya ibabeleka canguzu alimwi bakkomene, bakeendelezya ziiyo zya Bbaibbele mweelwe waakati-kati uusika ku 6,500,000 amwezi.
3 Nokuba boobo, basikumwaya bamwi taakwe nobakeendelezya ziiyo zya Bbaibbele. Bamwi taakwe nobakeendelezya ciiyo nociba comwe mumyaka yainda iili mbwiibede. Ino mbuyumuyumu nzi mbotunga twajana notusola kweendelezya ciiyo ca Bbaibbele? Ino mbuti mbotukonzya kubuzunda? Alimwi ino mbulumbu nzi mbotujana notutobela lulayo lwa Jesu lwakuti: “Nkaambo kaako kamuya mukabaiisye bantu”?—Mt. 28:19.
Zyintu Zikonzya Kutupa Kutakkomana
4, 5. (a) Ino bantu banji bacita buti kujatikizya makani mabotu mumasena aamwi aamunyika? (b) Ino mbuyumuyumu nzi mbobajana basikumwaya bamwi mumasena aamwi?
4 Mumasena amwi aamunyika, bantu balaayandisisya mabbuku eesu alimwi akwiiya Bbaibbele andiswe. Banabukwetene bamwi baku Australia ibakali kubelekela mucisi cino ca Zambia kwaciindi cisyoonto bakalemba kuti: “Mmasimpe, Zambia ncilawo cibotu cakukambaukila. Bukambausi bwamumugwagwa bulakkomanisya kapati! Bantu balatutobela, zimwi ziindi balalomba amamagazini ngobayanda.” Mumwaka umwi wainda, bakwesu abacizyi bamu Zambia bakeendelezya ziiyo zya Bbaibbele ziinda ku 200,000—eeci caamba kuti sikumwaya aumwi wakeendelezya ziiyo zya Bbaibbele ziinda kuli comwe.
5 Nokuba boobo, mumasena mumwi basikumwaya bamwi bajana buyumuyumu kwaabila mabbuku alimwi akweendelezya ziiyo zya Bbaibbele lyoonse. Ino nkaambo nzi? Kanji-kanji, bantu tabajaniki aŋanda ciindi sikumwaya naaswaya, kakuli aabo ibajanika aŋanda balakonzya kuti kabataayandi makani aajatikizya bukombi. Ambweni bakakomenena mumukwasyi wabantu batakombi, antela tabayandi akaambo kakuupaupa ameso ikujanika muzikombelo zyakubeja. Bantu banji balapenzyegwa akulekelezyegwa abeembezi bakubeja. (Mt. 9:36) Cilalimvwisya kuti bantu bali boobu inga kabatayandi kubandika makani aali oonse aajatikizya Bbaibbele.
6. Ino mbuyumuyumu nzi basikumwaya bamwi mbobajisi?
6 Basikumwaya bamwi ibasyomeka balajana buyumuyumu bumbi bwalo ibukonzya kubapa kutakkomana. Nokuba kuti aciindi cimwi bakali basungu mumulimo wakugwasya bantu kuba basikwiiya, lino balaalilwa akaambo kakuciswa-ciswa naa kucembaala. Alimwi amulange-lange buyumuyumu bumwi mbotukonzya kuliletela tobeni. Mucikozyanyo, sena mulimvwa kuti tamweeleli kweendelezya ciiyo ca Bbaibbele? Mulakonzya kulimvwa mbuli Musa mbwaakalimvwa ciindi Jehova naakamutuma kuti akanane a Farao. Musa wakati: “Akaka Mwami! Mebo nsili muntu uuzi kwaamba kabotu pe. Kuciindi cakamana, akuciindi ecino.” (Kul. 4:10) Kunze lyakutalisyoma tulakonzya kuyoowa kuti ambweni inga twakakilwa. Tulakonzya kulibilika kuti tatukonzyi kugwasya muntu kuba sikwiiya akaambo kakuti tatuli mwiiyi uucizyi kuyiisya kabotu. Kutegwa tutatyompwi akaambo kakukakilwa, inga twayeeya kuti cili buyo kabotu kutasolelalyo kweendelezya ciiyo. Ino mbuti mbotukonzya kubuzunda buyumuyumu buli boobu?
Amulibambile Mumoyo
7. Ino ncinzi cakamukulwaizya Jesu mumulimo wakwe?
7 Intaamu yakusaanguna njakulibambila mumoyo. Jesu wakati: “Mulomo wakwe uamba oko ukuzywide kumoyo.” (Lk. 6:45) Jesu wakakulwaizyigwa mumulimo akaambo kakubikkila maano kubantu. Mucikozyanyo, naakabona kuti ba Judanyina bakalipengede kumuuya, “wakabafwida luzyalo.” Wakaambila basikwiiya bakwe kuti: “Kutebula kwavula . . . Amukumbile mwami uuli amuunda kuti atume batebuzi kukutebula kwakwe.”—Mt. 9:36-38.
8. (a) Ino ncinzi ncotweelede kuyeeya? (b) Ino ncinzi ncotukonzya kwiiya kuzwa kumajwi ngaakaamba sikwiiya Bbaibbele umwi?
8 Ciindi notubeleka mulimo wakugwasya bantu kuba basikwiiya, inga cabota kweezyeezya mbotwagwasyigwa akaambo kakuti muntu umwi wakatuyiisya Bbaibbele. Alimwi amuyeeye bantu mbotuyooyaanya mumulimo wakukambauka mbobayoogwasyigwa baakumvwa mulumbe ngotujisi. Mukaintu umwi wakalembela bakuofesi yamutabi yamucisi mwakkala kuti: “Ndiyanda kumwaambila kuti ndilabalumba kapati Bakamboni ibaboola kundiyiisya kuŋanda yangu. Ndilizyi kuti zimwi ziindi ndilabanyemya akaambo kakuti ndilababuzya mibuzyo minji kapati alimwi ziindi zinji balakkala ciindi cilamfwu kwiinda ncotwakapangana. Pele balandikkazyikila moyo alimwi balayandisya kundiyiisya zyintu nzyobakaiya. Ndilumba Jehova alimwi a Jesu akaambo kakuti bantu aaba ibandiyiisya balandigwasya.”
9. Ino Jesu wakabikkila maano kunzi, alimwi ino mbuti mbotunga twamwiiya?
9 Masimpe tabali bantu boonse ibakazumina kuba basikutobela ba Jesu. (Mt. 23:37) Bamwi bakamutobela buyo aasyoonto mpoonya bakazookaka zyintu zimwi nzyaakayiisya alimwi ‘tiibakazumanana kweenda awalo.’ (Joh. 6:66) Nokuba boobo, bantu ibatakazumina mulumbe wa Jesu kunyina nobakamupa kulimvwa kuti mulumbe wakwe tiiwakajisi mpindu. Nokuba kuti mbuto zinji nzyaakasyanga tiizyakazyala micelo, Jesu wakabikkila maano kapati kububotu mbwaakali kucita. Wakabona kuti myuunda yakaliyumide kuti itebulwe alimwi wakakkomana kutola lubazu mubutebuzi. (Amubale Johane 4:35, 36.) Muciindi cakubona buyo buyumuyumu mbotukonzya kujana, sena tacili kabotu kubikkila maano kububotu ibukonzya kujanika mucilawo cesu? Atulange-lange mbotukonzya kuzilanga munzila iili kabotu zyintu.
Kukambauka Kamujisi Mbaakani Yakutalisya Ciiyo ca Bbaibbele
10, 11. Ino ncinzi ncomukonzya kucita kutegwa muzumanane kuba alukkomano?
10 Mulimi usyanga mbuto kajisi mbaakani yakutebula. Mbubwenya buyo, tweelede kukambauka katujisi mbaakani yakutalisya ziiyo zya Bbaibbele. Pele, ino mbuti ikuti naa mulaunka mumulimo lyoonse pele tamujani bantu banji mumaanda naa tamubajani munyendo zyakupilukila? Eeci cilakonzya kutyompya. Sena mweelede kuuleka mulimo wakuŋanda aŋanda? Peepe! Bantu banji balajanika kwiinda mukubelesya nzila njiyona eeyi yalo yabelesyegwa kwaciindi cilamfwu.
11 Aboobo, kutegwa muzumanane alukkomano, sena tamukonzyi kuyungizya nzila nzyomubelesya mumulimo wanu, ambweni kubikkilizya nzila zimbi zikonzya kumugwasya kusikila bantu banji? Mucikozyanyo, sena mwakasola kale kukambaukila bantu mumigwagwa naa kumilimo? Sena inga mwabandika abantu aluwaile naa kubweza manamba aaluwaile aabantu mbomwakakambaukila kale kutegwa mukabandike abalo aluwaile? Kwiinda mukukakatila alimwi akucinca-cinca nzila nzyomubelesya mubukambausi, muyooba alukkomano lwakujana bantu ibayootambula mulumbe wa Bwami.
Kuzumanana Nokuba Kuti Bantu Tabayandi
12. Ino inga twacita buti ikuti bantu bali mucilawo cesu baboneka kutaayanda makani aajatikizya bukombi?
12 Ino mbuti ikuti bantu bali mucilawo canu tabaayandi makani aajatikizya bukombi? Sena inga mwatalisya mubandi wanu kwiinda mukwaamba kaambo kamwi ikabakkomanisya? Mwaapostolo Paulo wakalembela basyominyina baku Korinto kuti: “Kuba-Juda ndibede mbuli mu-Juda . . . Kulibaabo bali anze ku-Mulao ndibede mbubabede (nintali anze ku-Mulao wa-Leza).” Ino Paulo wakajisi makanze nzi? Wakaamba kuti: “Kubantu boonse bali buti ndibede mbubabede balo, kuti nkasinizye kufutula bamwi.” (1 Kor. 9:20-22) Sena inga twajana twaambo tukonzya kukkomanisya bantu ibali mucilawo cesu? Bantu banji batakombi bayanda kubotya bukkale bwamikwasyi yabo. Alimwi inga kabayandaula mpindu yabuumi. Sena inga twabaambila mulumbe wa Bwami bantu bali boobu munzila iikonzya kubakkomanisya?
13, 14. Ino mbuti mbotukonzya kukkomana mumulimo wakugwasya bantu kuba basikwiiya?
13 Basikumwaya banji bakkomana kapati mumulimo wakugwasya bantu kuba basikwiiya, nomuba mumasena bantu banji mobataayandi makani aajatikizya bukombi. Munzila nzi? Kwiinda mukwiiya mwaambo uumbi. Banabukwetene bamwi bajisi myaka yakuzyalwa iinda ku 60 bakabona kuti zyuulu zyabasicikolo bazwa kucisi ca China alimwi amikwasyi yabo bakali kukkala mucilawo cambungano yabo. Mulumi waamba kuti: “Akaambo kaceeci, twakakulwaizyigwa kwiiya mwaambo wa Chiccainizi.” Wazumanana ulaamba: “Nokuba kuti eeci cakali kwaamba kutola ciindi cilamfwu abuzuba ikwiiya mwaambo, twakaba alukkomano lwakutalisya ziiyo zya Bbaibbele abantu baambaula mwaambo wa Chiccainizi kubusena nkotukkala.”
14 Nokuba kuti tamukonzyi kwiiya mwaambo uumbi, mulakonzya kubelesya kabbuku kakuti Good News for People of All Nations ciindi nomuyaanya bantu baambaula mwaambo uumbi. Alimwi mulakonzya kubweza mabbuku aamyaambo njobakanana bantu mbomuyaanya. Mubwini, kuyandika ciindi alimwi akusoleka kutegwa mubandike abantu baambaula myaambo iimbi alimwi bazilengwa ziindene azyesu. Pele amuyeeye njiisyo iijanika mu Jwi lya Leza yakuti: “Oyo uubyala cakuvuzya ulatebula cakuvuzya.”—2 Kor. 9:6.
Imbungano Yoonse Ilajatikizyigwa
15, 16. (a) Ino nkaambo nzi mulimo wakugwasya bantu kuba basikwiiya ncouli wambungano yoonse? (b) Ino bacembeede babeleka mulimo uuli buti?
15 Nokuba boobo, kugwasya bantu kuba basikwiiya tauli mulimo buyo wamuntu omwe pe. Muciindi caboobo, mbungano yoonse ilagwasya kutegwa muntu aumwi abe sikwiiya. Nkaambo nzi? Jesu wakati: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Joh. 13:35) Alimwi, masimpe ciindi basikwiiya Bbaibbele nobajanika kumiswaangano, kanji-kanji balakulwaizyigwa kubona luyando luli akati kesu. Sikwiiya Bbaibbele umwi wakalemba kuti: “Ndilakkomana kapati kujanika kumiswaangano. Bantu banditambula kabotu.” Jesu wakati boonse ibaba basikumutobela balakonzya kukazyigwa abamikwasyi yabo iini-ini. (Amubale Matayo 10:35-37.) Nokuba boobo, wakasyomezya kuti mumbungano, bayoojana “banabakwabo abacizi abamanyina abana” bakumuuya.—Mk. 10:30.
16 Ikapati bakwesu abacizyi bacembeede balabeleka mukugwasya basikwiiya Bbaibbele kuyaambele kumuuya. Munzila nzi? Nokuba kuti bacembeede bamwi tabakonzyi kweendelezya ziiyo zya Bbaibbele beni, bwiinguzi mbobapa munzila iiyaka lyamiswaangano yambungano buyumya lusyomo lwabantu boonse ibaswiilila. Cikozyanyo cabo cibotu cakweenda “munzila yabululami” ciyungizya bubotu bwabo kumbungano alimwi cipa bantu babombe myoyo kuboola kumbunga ya Jehova.—Tus. 16:31.
Kuzunda Bukandu
17. Ino ncinzi ncotukonzya kucita kutegwa tukuzunde kutalisyoma?
17 Ino inga mwacita buti ikuti kamulimvwa kuti tamukonzyi kweendelezya ciiyo ca Bbaibbele? Amuyeeye kuti Jehova wakamugwasya Musa kwiinda mukumupa muuya uusalala alimwi amweenzinyina, imunyina Aroni. (Kul. 4:10-17) Jesu wakasyomezya kuti muuya uusalala uyoogwasya mumulimo wesu wakukambauka. (Inc. 1:8) Kuyungizya waawo, Jesu wakatuma babelesi bobilo-bobilo mumulimo wakukambauka. (Lk. 10:1) Aboobo, ikuti mwajana buyumuyumu kweendelezya ciiyo ca Bbaibbele, amupaile kulomba muuya uusalala kutegwa umupe busongo alimwi amujane mweenzinyoko wakubeleka limwi uukonzya kumuyumya-yumya alimwi iluzyibo ndwajisi lulakonzya kumugwasya. Ciyumya lusyomo ikuzyiba kuti Jehova wakasala kubelesya bantu buyo—“zintu zikompeme zyanyika”—kutegwa bacite mulimo wakwe mupati.—1 Kor. 1:26-29.
18. Ino mbuti mbotukonzya kuzunda bukandu bwakuti tatukonzyi kweendelezya ciiyo ca Bbaibbele?
18 Ino mbuti mbotukonzya kubuzunda bukandu bwakuti tatukonzyi kweendelezya ciiyo ca Bbaibbele? Inga cagwasya kuzyiba kuti, kugwasya muntu kuba sikwiiya takuli mbuli kujika cakulya kwalo ikuzwidilila naa kutazwidilila kuyeeme amuntu omwe—sikujika. Muciindi caboobo, mulimo ooyu tauyeeme buyo anguzu zyesu. Jehova nguujisi mulimo mupati, ikukwela muntu kulinguwe. (Joh. 6:44) Swebo abamwi mumbungano tulabelesya luzyibo lwakuyiisya kutegwa tumugwasye sikwiiya kuyaambele kumuuya. (Amubale 2 Timoteo 2:15.) Alimwi sikwiiya weelede kuzibelesya nzyaiya. (Mt. 7:24-27) Ikuti naa muntu wacileka kwiiya Bbaibbele, eeci cilakonzya kututyompya. Tusyoma kuti basikwiiya Bbaibbele bayoosala camaano, pele aumwi ‘uyoolyaambilila makani kubusyu bwa Leza.’—Rom. 14:12.
Ino Kuli Mpindu nzi?
19-21. (a) Ino nimpindu nzi nzyotujana kwiinda mukweendelezya ziiyo zya Bbaibbele? (b) Ino mbuti Jehova mbwababona boonse aabo ibatola lubazu mumulimo wakukambauka?
19 Kweendelezya ziiyo zya Bbaibbele kulatugwasya kubikka Bwami mubusena bwakusaanguna. Alimwi kulatugwasya kuti kasimpe ka Jwi lya Leza kakkalilile mumizeezo amumyoyo yesu. Ino nkaambo nzi? Mupainiya wazyina lyakuti Barak upandulula kuti: “Kweendelezya ziiyo zya Bbaibbele kupa muntu kuti abe sikwiiya mubotu wa Jwi lya Leza. Ndeelede kuzisyoma kapati zyintu nzyondiiya kanditana kuziyiisya muntu uumbi.”
20 Ikuti tamunatalika kweendelezya ciiyo ca Bbaibbele, sena caamba kuti mulimo wanu taujisi mpindu kuli Leza? Peepe! Jehova ulalumba kapati kusoleka nkotucita kutegwa tumutembaule. Boonse bantu ibatola lubazu mumulimo wakukambauka ‘mbabelesinyina Leza.’ Nokuba boobo, kweendelezya ciiyo ca Bbaibbele kutupa kukkomana kapati ciindi notubona Leza mbwamenya mbuto nzyotwasyanga. (1 Kor. 3:6, 9) Mupainiya wazyina lyakuti Amy waamba kuti: “Cilakkomanisya kapati kubona sikwiiya Bbaibbele kayaambele alimwi inga walimvwa kulumba kapati kuli Jehova akaambo kakukubelesya ikupa cipego cipati—icoolwe cakumuzyiba Jehova akuyooba abuumi butamani.”
21 Kusolekesya canguzu kutalisya alimwi akweendelezya ziiyo zya Bbaibbele kuyootugwasya kubikkila maano kukubelekela Leza lino alimwi kuyooyumya bulangizi bwesu bwakufwutuka akunjila munyika mpya. Alimwi, kwiinda mukugwasyigwa a Jehova tulakonzya kugwasya baabo batuswiilila kuti bakafwutuke. (Amubale 1 Timoteo 4:16.) Elo kaka eeci cilakonzya kutupa lukkomano!
Sena Muciyeeyede?
• Ino mbuyumuyumu nzi bukonzya kupa bamwi kuti kabateendelezyi ziiyo zya Bbaibbele?
• Ino ncinzi ncotukonzya kucita ikuti bantu banji mucilawo cesu kabataayandi makani aajatikizya bukombi?
• Ino mbulumbu nzi mbotujana kwiinda mukweendelezya ciiyo ca Bbaibbele?
[Mibuzyo yaciiyo]
[Zifwanikiso izili apeeji 9]
Sena mulayungizya nzila nzyomubelesya mumulimo wanu kwiinda mukubelesya nzila zimbi zyabukambausi kutegwa musikile bantu babombe myoyo?