Ngooyu Mulanda Wa Jehova Uusalidwe!
Ngooyu Mulanda Wa Jehova Uusalidwe!
“Ngooyu mulanda wangu, . . . moyo wangu nguukondelwa.”—IS. 42:1.
1. Ino babelesi ba Jehova bakulwaizyigwa kucita nzi kwaambisya nocilondelela ciibalusyo, alimwi ino nkaambo nzi?
MBOCIYAABULONDELELA ciindi cakwiibaluka lufwu lwa Kristo, bantu ba Leza bakulwaizyigwa kutobela lulayo lwa Paulo ilwakuti “tudun[amine] kuli-Jesu musolozi uulomya lusyomo lwesu.” Paulo wakayungizya kuti: “Kamwiilizya nguwe uwakazyandamana mukukazyanya kuli bobuya kwabantu abamubisizya, kuti mutabombibombi nokuba kulengaala mumyoyo yanu.” (Heb. 12:2, 3) Kubikkila maano kapati kubuumi bwa Jesu bwakusyomeka kusikila kulufwu kuyoobagwasya boonse, ibananike alimwi abeenzinyina ibambelele zimwi kuzumanana kubelekela Jehova cakusyomeka alimwi ‘akutatyompwa.’—Amweezyanisye Ba-Galatiya 6:9.
2. Ino ncinzi ncotukonzya kwiiya kubusinsimi bwa Isaya ibwaamba Mwana wa Leza?
2 Kwiinda mumusinsimi Isaya, Jehova wakapa kuti kulembwe businsimi buli mbobubede bwalo bwakaamba kujatikizya Mwanaakwe. Oobu businsimi buyootugwasya “[kudunamina] kuli-Jesu [Kristo] musolozi uulomya lusyomo lwesu.” * Bulapa makani manji kujatikizya bube bwakwe, kupenga akusumpulwa kuba Mwami alimwi a Munununi wesu. Buyootugwasya kucimvwisya ncocaamba Ciibalusyo, calo iciyoocitwa mwaka uuno muli Bwane, mu April 9, lyaakubbila zuba.
Mulanda Wazyibwa
3, 4. (a) Kubbuku lya Isaya, ino bbala lyakuti “mulanda” lyaamba nzi? (b) Ino mbuti Bbaibbele lini mbolimwaamba Mulanda iwaambidwe kuli Isaya zyaandano 42, 49, 50, 52, alimwi a 53?
3 Ibbala lyakuti “mulanda” lilajanika ziindi zinji mubbuku lya Isaya. Ziindi zimwi lyaamba musinsimi ooyu kumugama. (Is. 20:3; 44:26) Zimwi ziindi lyaamba cisi coonse ca Israyeli, naa Jakobo. (Is. 41:8, 9; 44:1, 2, 21) Pele ino mbuti kujatikizya businsimi bulibedelede ibwaamba Mulanda oobo bulembedwe kuli Isaya zyaandano 42, 49, 50, 52, alimwi a 53? Magwalo aa Bunakristo aa Chigiliki alamwaamba cakusalazya Mulanda wa Jehova iwaambwa muzyaandano eezyi. Icikkomanisya ncakuti muzibe waku Etiopiya iwaambwa mubbuku lya Incito wakali kubala bumwi akati kabusinsimi oobu ciindi mukambausi Filipo naakasololelwa amuuya kuti aunke kulinguwe. Muzibe ooyu naakamana kubala cibalo camu Bbaibbele calo ncotujana kuli Isaya 53:7, 8, wakabuzya Filipo kuti: “Ino nguni ngwaamba musinsimi kumakani aya? Sa ulyaamba lwakwe mwini, na uamba umbi?” Cakutasowa ciindi, Filipo wakapandulula kuti Isaya wakali kwaamba Mesiya, Jesu.—Inc. 8:26-35.
4 Ciindi Jesu naakali muvwanda, mwaalumi uululeme wazyina lyakuti Simeoni wakaamba kwiinda munguzu zyamuuya uusalala kuti “mwana Jesu” wakali kuzooba “mumuni wakumunikila bamasi,” kweelana ambokwakasinsimwa kuli Isaya 42:6 alimwi a 49:6. (Lk. 2:25-32) Kuyungizya waawo, kupenzyegwa kwa Jesu imasiku ngaakali kubetekwa kwakaambwa mubusinsimi bulembedwe kuli Isaya 50:6-9. (Mt. 26:67; Lk. 22:63) Musyule lya Pentekoste yamu 33 C.E., mwaapostolo Petro wakamwaamba cakusalazya Jesu kuti “Mwanaakwe” Jehova naa “Mulanda wakwe” [NW]. (Is. 52:13; 53:11; amubale Incito 3:13, 26.) Ino ncinzi ncotukonzya kwiiya kubusinsimi oobu bujatikizya Mesiya?
Jehova Ulamuyiisya Mulanda Wakwe
5. Ino ndwiiyo nzi ndwaakatambula Mulanda?
5 Bomwe akati kabusinsimi bwa Isaya ibujatikizya Mulanda wa Leza butugwasya kuzyiba cilongwe cakaliko akati ka Jehova a Mwaanaakwe mutaanzi kuzyalwa ciindi Mwana ooyu naakacili kujulu. (Amubale Isaya 50:4-9.) Mulanda ooyu ulaamba mwini kuti Jehova wakazumanana kumuyiisya naamba kuti: “Ulabusya matwi aangu kuti nswiilile mbubaswiilila basikwiiya.” (Is. 50:4) Ciindi coonse eeci, Mulanda wa Jehova wakaswiilila Bausyi akwiiya kuli mbabo, eelyo wakaba sikwiiya uumvwida. Elo kaka eeci ncoolwe cilibedelede ikuyiisyigwa a Mulengi wabubumbo boonse!
6. Ino mbuti Mulanda mbwaakatondezya kumvwida Bausyi cakulondoka?
6 Mubusinsimi oobu, Mulanda waamba Bausyi kuti “Mwami Jehova.” Eeci citondezya kuti Mulanda wakalizyi kuti Jehova ngo Mwami wabubumbo boonse. Kutondezya kumvwida Bausyi cakulondoka, wakaamba kuti: “Mwami Jehova wandijulila matwi, nkabela mebo teendakakaka nikuba kupiluka musule.” (Is. 50:5) ‘Wakali ambali lya Jehova mbuli mufwuzi’ ciindi cakulenga bubumbo abantu. Imufwuzi ooyu wakali “kusekelela lyoonse kubusyu bwa [Jehova, wakali] kukondwa munyika njaakalenga [Leza], akuyandisya bana ba-Adamu.”—Tus. 8:22-31.
7. Ino ncinzi citondezya kuti Mulanda wakajisi lusyomo lwakuti Bausyi bayoomugwasya mumasukusyo aakwe?
7 Lwiiyo oolu ndwaakatambula Mulanda alimwi aluyando ndwajisi kubantu zyakamugwasya kulibambila kukazyigwa kapati ciindi naakaboola aanyika. Wakazumanana kukkomana ikucita luyando lwa Bausyi nociba ciindi naakali kupenzyegwa. (Int. 40:8; Mt. 26:42; Joh. 6:38) Mumasukusyo aakwe oonse aanyika, Jesu wakajisi lusyomo lwakuti Bausyi balamukkomanina alimwi akumugwasya. Kweelana ambokwakaambwa mubusinsimi bwa Isaya, Jesu wakali kukonzya kwaamba kuti: “Uli kufwaafwi uundilulamika. Nguni uukonzya kundikazyanya? . . . Mwami Jehova nguundigwasya.” (Is. 50:8, 9) Masimpe, Jehova wakamugwasya Mulanda wakwe uusyomeka mumulimo wakwe woonse waanyika, kweelana ambobutondezya businsimi bumbi bwa Isaya.
Mulimo Waanyika wa Mulanda
8. Ino ncinzi citondezya kuti Jesu ngowakali “musale,” kweelana ambokwakasinsimwa kuli Isaya 42:1?
8 Makani aamu Bbaibbele atwaambila icakacitika ciindi Jesu naakabbapatizyigwa mumwaka wa 29 C.E., kuti: “Muuya Uusalala wakamuselukila, . . . wakala atala alinguwe, kwakasika ijwi ilizwa kujulu lyati, Nduwe Mwanaangu ooyandwa, ndakondwa anduwe.” (Lk. 3:21, 22) Aboobo Jehova wakamwaamba cakusalazya ooyu “musale” iwaambwa mubusinsimi bwa Isaya. (Amubale Isaya 42:1-7.) Mumulimo wakwe waanyika, Jesu wakazuzikizya businsimi oobu munzila iigambya. Mumakani mabotu ngaakalemba, Matayo wakazubulula majwi aajanika kuli Isaya 42:1-4, akwaamba kuti akali kwaamba Jesu.—Mt. 12:15-21.
9, 10. (a) Ino mbuti Jesu mbwaakazuzikizya lugwalo lwa Isaya 42:3 ciindi naakali kubeleka mulimo wakwe? (b) Ino mbuti Kristo mbwaakaleta “lubeta” naakali aanyika, alimwi ndilili naakabikka “lubeta mukati kanyika”?
9 Basololi babukombi iba Juda bakali kusampaula bantu buyo bakuciindi cabo. (Joh. 7:47-49) Bantu tiibakali kweendelezyegwa kabotu aboobo bakakozyanyisyigwa ‘atete lifwuyukide’ naa ‘kalilo kasuka’ kalo kali afwaafwi kuzima. Pele Jesu wakabatondezya luzyalo bantu bacete alimwi abakali mumapenzi. (Mt. 9:35, 36) Wakabatamba bantu bali boobu kuti: “Amuboole kulindime nyoonse nomukatede nomulemenwa, ndime enti kamulemunune.” (Mt. 11:28) Kunze lyaboobo, Jesu ‘wakaleta lubeta’ kwiinda mukuyiisya zyeelelo zya Jehova kujatikizya cintu ciluzi acitaluzi. (Is. 42:3) Wakazootondezya kuti Mulawo wa Leza wakeelede kutobelwa munzila yabutontozi ayaluzyalo. (Mt. 23:23) Alimwi Jesu wakatondezya bululami kwiinda mukukambauka cakutasalulula bavwubi alimwi abacete.—Mt. 11:5; Lk. 18:18-23.
10 Businsimi bwa Isaya alimwi bwaamba kuti “musale” wa Jehova uyoobikka “lubeta mukati kanyika.” (Is. 42:4) Eeci uyoocicita ino-ino ciindi aakunyonyoona mami aamunyika akubikka bulelo bwakwe bululeme kali Mwami wabu Mesiya. Uyootalisya nyika mpya, mwalo “mu[yook]kala bululami.”—2 Pet. 3:13; Dan. 2:44.
“Mumuni” Alimwi a “Cizuminano”
11. Ino mmunzila nzi Jesu mbwaakali “mumuni wenyika” mumwaanda wamyaka wakusaanguna, alimwi ino mbuti mbwali mumuni wanyika kusikila mane amumazuba aano?
11 Mukuzuzikizya Isaya 42:6, Jesu wakaba “mumuni wabamasi.” Mumulimo wakwe waanyika, wakaleta mumuni wakumuuya kwaambisya kuba Juda. (Mt. 15:24; Inc. 3:26) Pele Jesu wakati: “Ndime mumuni wenyika.” (Joh. 8:12) Wakaba mumuni kuba Juda alimwi abamasi kwiinda mukubamunikila kumuuya alimwi akwaaba buumi bwakwe bwabuntunsi bulondokede kacili cinunuzyo kubantu boonse. (Mt. 20:28) Mazuba masyoonto kuzwa ciindi naakabusyigwa, wakalailila basikwiiya bwakwe kuti babe bakamboni bakwe “kusikila kumamanino aanyika.” (Inc. 1:8) Mumulimo wabo, Paulo alimwi a Barnaba bakazubulula majwi aakuti “mumuni kulibamasi” akutondezya kuti waamba mulimo wakukambauka ngobakali kucita kubantu batali ba Juda. (Inc. 13:46-48; amweezyanisye Isaya 49:6.) Mulimo ooyu ulazumanana kucitwa ciindi ibanyina Jesu bananike ibali anyika alimwi abeenzinyina nobakambauka makani mabotu akugwasya bantu kusyoma muli Jesu, “mumuni wenyika.”
12. Ino mbuti Jehova mbwaabikka Mulanda wakwe kuti abe “cizuminano cabantu”?
12 Mubusinsimi mbubwenya oobu, Jehova wakaambila Mulanda wakwe uusalidwe kuti: “Njookubamba, njookubika kuti ube cizuminano cabantu amumuni wabamasi.” (Is. 42:6) Saatani wakazumanana kusoleka kumujaya Jesu alimwi akumukasya kuzuzikizya mulimo wakwe anyika, pele Jehova wakamukwabilila kusikila ciindi cibikkidwe cakuti afwe. (Mt. 2:13; Joh. 7:30) Mpoonya Jehova wakamubusya Jesu akumubikka kuti abe “cizuminano” kubantu baanyika. Cizuminano eeco cakasyomezya Mulanda wa Leza kuti uyoozumanana kuba “mumuni wabamasi,” ikupa lwaanguluko kubantu boonse ibali mumudima wakumuuya.—Amubale Isaya 49:8, 9. *
13. Ino mmunzila nzi Jesu mwaakagwisya “baabo bakede mumudima” kuciindi ncaakali anyika, alimwi ino mbuti mbwaazumanana kucita boobu?
13 Kweelana acizuminano eeci, Mulanda wa Jehova uusalidwe wakali kuyoojalula “meso aaboofu,” kuvwuna “baange muntolongo,” akugwisya baabo “bakede mumudima.” (Is. 42:7) Mumulimo wakwe waanyika, Jesu wakacita oobu kwiinda mukuyubununa ziyanza zyabukombi bwakubeja alimwi amukukambauka makani mabotu aa Bwami. (Mt. 15:3; Lk. 8:1) Aboobo wakaangununa ba Juda aabo ibakazooba basikwiiya bakwe kuzwa kubukombi bwakubeja. (Joh. 8:31, 32) Munzila njimunya eeyi, Jesu wagwasya bantu banji ibatali ba Juda kuti baiye kasimpe. Walailila basikumutobela kuti: “Kamuya mukabaiisye bantu bamisyobo yoonse,” akubasyomezya kuti uyooba ambabo “kusikila kumamanino aaciindi.” (Mt. 28:19, 20) Kali kujulu, Kristo Jesu ulaulanganya mulimo wakukambauka uucitwa nyika yoonse.
Jehova Wakamusumpula “Mulanda”
14, 15. Ino nkaambo nzi Jehova ncaakamusumpula Mulanda wakwe alimwi munzila nzi?
14 Mubusinsimi bumbi ibujatikizya Mulanda wakwe wa Mesiya, Jehova wakati: “Amubone! Mulanda wangu uyoojana coolwe. Uyoosumpulwa, uyoolemekwa, uyooba mulemu loko.” (Is. 52:13) Akaambo kakulibombya kubweendelezi bwa Jehova alimwi akusyomeka nomuba mumasukusyo, Jehova wakamusumpula Mwanaakwe.
15 Mwaapostolo Petro wakalemba kujatikizya Jesu kuti: “Uukala kululyo lwa-Leza, nkaambo wakainka kujulu, abaangelo abasibwami abasinguzu boonse balibikidwe kunsi lyakwe.” (1 Pet. 3:22) Mbubwenya buyo, awalo mwaapostolo Paulo wakalemba kuti: “Wakalibombya akuzumina nikuba kufwa, nkukuti kufwa kwakubambulwa aci[samu cakupenzyezya]. Nciceeco Leza ncaakamusumpula akumupa izina ibotu kwiinda mazina oonse, kuti boonse bafugame mazwi cakulemeka izina lya-Jesu, nibaba baansi nibaba bakujulu nibaba bali kunsi anyika, alimwi kuti indimi zyoonse zizumine kuti Jesu Kristo ngu-Mwami cakulemeka Leza Taateesu.”—Flp. 2:8-11.
16. Ino mbuti Jesu mbwaakaba “mulemu loko” mu 1914, alimwi ino ncinzi ncaacita kuzwa ciindi eeco?
16 Mu 1914, Jehova wakamusumpula kapati Jesu. Wakaba “mulemu loko” ciindi Jehova naakamubikka kuba Mwami wa Bwami bwabu Mesiya. (Int. 2:6; Dan. 7:13, 14) Kuzwa ciindi eeco, Kristo wakaba “mweendelezi akati kabasinkondony[ina].” (Int. 110:2) Wakasaanguna kuzunda Saatani amadaimona aakwe, kwiinda mukubawaalila aansi kunyika. (Ciy. 12:7-12) Mpoonya, kali Koresi Mupati, Kristo wakaangununa bananike basyeede anyika kuzwa mubuzike ku “Babuloni mupati.” (Ciy. 18:2; Is. 44:28) Usololela mulimo wakukambauka uucitwa munyika yoonse walo iwapa kuti kube kubunganya ‘basyeede’ ibanyina bakumuuya mpoonya atuulunzuma “[twa]mbelele zimwi,” ibeenzinyina basyomeka iba “katanga kaniini.”—Ciy. 12:17; Joh. 10:16; Lk. 12:32.
17. Ino ncinzi ncotwaiya kwiinda mukulanga-langa businsimi bwa Isaya ibujatikizya “mulanda”?
17 Masimpe, kwiiya businsimi oobu buli mubbuku lya Isaya kwatupa kulumba kapati ku Mwami alimwi Imunununi wesu, Kristo Jesu. Kulibombya kwakwe mbuli mwana ciindi naakali mumulimo wakwe waanyika kwakatondezya mbwaakayiisyigwa a Bausyi katanaboola anyika. Walibonya kuba “mumuni wabamasi” kwiinda mumulimo wakwe alimwi amulimo wakukambauka ngwaalanganya kusikila sunu. Mbuli mbotutibone mucibalo citobela, businsimi bumbi bujatikizya Mulanda wabu Mesiya butondezya kuti uyoopenga akwaaba buumi bwakwe kutegwa tugwasyigwe, itwaambo ntotuyandika kubikkila maano kapati mbociyaabulondelela Ciibalusyo calufwu lwakwe.—Heb. 12:2, 3.
Bupanduluzi buyungizidwe
^ munc. 2 Mulakonzya kubujana businsimi oobu kuli Isaya 42:1-7; 49:1-12; 50:4-9; alimwi a 52:13–53:12.
^ munc. 12 Kutegwa mujane twaambo tubandika businsimi bwa Isaya 49:1-12, amubone bbuku lyakuti Ibusinsimi bwa Isaya—Mumuni ku Bantu Boonse, Bbuku 2, lyamu Chingisi, mapeeji 136-145.
Kwiinduluka
• Ino nguni “mulanda” iwaambwa mubusinsimi bwa Isaya, alimwi ino tuzyiba buti?
• Ino ndwiiyo nzi Mulanda ndwaakaiya kuli Jehova?
• Ino mbuti Jesu mbwali “mumuni wabamasi”?
• Ino mbuti Mulanda mbwaakasumpulwa?
[Mibuzyo yaciiyo]
[Cifwanikiso icili apeeji 21]
Filipo wakamwaamba cakusalazya “mulanda” iwakaambwa a Isaya kuti ngu Jesu, Mesiya
[Cifwanikiso icili apeeji 23]
Mbwali Mulanda wa Jehova uusalidwe, Jesu wakatondezya luzyalo kubantu bacete abapengede
[Cifwanikiso icili apeeji 24]
Jesu wakasumpulwa a Bausyi akubikkwa kuba Mwami wa Bwami bwabu Mesiya