Sena Muli ‘Babanzi Baluzyalo Lwa Leza’?
Sena Muli ‘Babanzi Baluzyalo Lwa Leza’?
“Amuyandane aluyandisyo lwabunyina. Amusungwaale kukulemekana.”—ROM. 12:10.
1. Ino Jwi lya Leza litusyomezya nzi?
IJWI lya Leza lilatusyomezya cakwiinduluka-induluka kuti Jehova uyootugwasya ciindi twaakutyompwa naa kuusa. Mucikozyanyo, amubone majwi aakulwaizya aaya: “Jehova ulatabilila boonse bawa, ulabusya boonse bawizuka.” “Ulaponya batyokedemyoyo, ulaanga zilonda zyabo.” (Int. 145:14; 147:3) Kunze lyaboobo, Taatesu wakujulu lwakwe kumugama waamba kuti: “Mebo nde-Jehova njookujata kujanza lyalulyo, njookwaambila kuti, Utayoowi, ndime sikugwasya wako.”—Is. 41:13.
2. Ino mbuti Jehova mbwagwasya babelesi bakwe?
2 Pele ino mbuti Jehova, uukkala kujulu kutalibonyi ‘mbwatujata kujanza’? Ino mbuti ‘mbwatubusya ikuti naa twawizuka’ akaambo kakutyompwa? Jehova ulapa lugwasyo oolu munzila ziindene-indene. Mucikozyanyo, upa bantu bakwe “nguzu zigambya” kwiinda mukubelesya muuya wakwe uusalala. (2 Kor. 4:7; Joh. 14:16, 17) Babelesi ba Jehova balayumizyigwa a Jwi lya Leza lyakasololelwa amuuya, Ibbaibbele, ilijisi nguzu. (Heb. 4:12) Sena kuli nzila aimbi njabelesya Jehova kutuyumya-yumya? Ibwiinguzi bulajanwa mubbuku lya Petro Lyakusaanguna.
‘Luzyalo lwa Leza Lulatondezyegwa Munzila Ziindene-indene’
3. (a) Ino nkaambo nzi mwaapostolo Petro nkaamba ikajatikizya masukusyo? (b) Ino ncinzi cibandikwa kucibeela camamanino calugwalo lwakusaanguna lwa Petro?
3 Kalembela basyomi ibananike, mwaapostolo Petro ulemba kuti baleelede kukkomana akaambo kabulumbu mbobakali kuyootambula. Mpoonya ulazumanana akati: “Nekuba kuti kuciindi ecino kweelede kuti mube abuusu kukaindi kaniini nkaambo kamasukusyo aamisyobo misyobo.” (1 Pet. 1:1-6) Amubone mabala aakuti “aamisyobo misyobo.” Aaya mabala atondezya kuti masukusyo anooyindene-indene. Nokuba boobo, Petro taimini buyo waawa, ikulekela banyina kuti balibilike akaambo kakutazyiba kuti naa inga bacikonzya kuliyumya mumasunko aayindene-indene. Muciindi caboobo, ulatondezya kuti Banakristo balakonzya kuba masimpe kuti Jehova uyoobagwasya kutegwa bakacikonzye kuliyumya kufwumbwa naa bayoosikilwa masukusyo aali buti. Cisyomezyo eeci cilaambwa kucibeela camamanino calugwalo lwa Petro, kwalo mwaapostolo nkwabandika twaambo tujatikizya “mamanino aazintu zyoonse.”—1 Pet. 4:7.
4. Ino nkaambo nzi majwi aajanwa kulugwalo lwa 1 Petro 4:10 ncaatuumbulizya?
4 Petro waamba kuti: “Kufumbwa zipego zya-Muuya nzimutambwide, amugwasyanye anzizyo, nkaambo mbubonya obu mbubeelede abo baabilwa luzyalo lwa-Leza lubeleka muziyanza ziyanza.” (1 Pet. 4:10) Petro alimwi ubelesya mabala aakuti “muziyanza ziyanza.” Mukwaamba boobu upandulula kuti, ‘Imasukusyo alaboola munzila zinji ziindene-indene, pele luzyalo lwa Leza alwalo lulaboola munzila ziindene-indene.’ Ino nkaambo nzi ncokaumbulizya kaambo aaka? Eeci caamba kuti kufwumbwa naa ndyamusyobo uuli buti sukusyo, iluzyalo lwa Leza luyoozumanana kutugwasya kuliyumya. Sena mwabona mumajwi aa Petro kujatikizya mbuli Jehova mbwatondezya luzyalo ndwajisi kulindiswe? Nkwiinda mu Banakristoma.
‘Kugwasyanya’
5. (a) Ino ncinzi Munakristo aumwi ncayelede kucita? (b) Ino cipa kubuzya mibuzyo nzi?
5 Kakanana abantu boonse ibamumbungano ya Bunakristo, Petro waamba kuti: “Kwiinda zyoonse amusungwaale kuyandana.” Mpoonya ulayungizya akuti: “Kufumbwa zipego zya-Muuya nzimutambwide, amugwasyanye anzizyo.” (1 Pet. 4:8, 10) Aboobo, aumwi mumbungano weelede kutola lubazu mukukulwaizya Banakristonyina. Tupedwe mukuli wakulanganya cintu cimwi ciyandisi ica Jehova alimwi akucaabila kubantu. Aboobo, ino ncintu nzi eeco ncotupedwe? Petro waamba kuti “ncipego.” Ino ncipego nzi? Ino mbuti mbotucibelesya ‘mukugwasyanya’?
6. Ino nzipego nzi zimwi nzyobapedwe Banakristo?
6 Ijwi lya Leza lyaamba kuti: “Zipego zibotu zyoonse azyoolwe zyoonse zilondokede zilazwa kujulu.” (Jak. 1:17) Inzya, zipego zyoonse Jehova nzyapa bantu bakwe zitondezya luzyalo lwakwe. Cipego cimwi cilibedelede ncatupa Jehova, mmuuya uusalala. Cipego eeci citugwasya kuba abube mbwakkomanina Leza mbuli luyando, bubotu alimwi alubombo. Bube buli boobu butupa kubayanda bakombima kuzwa kunsi aamoyo alimwi akulisungula kubagwasya. Ibusongo bwini-bwini alimwi aluzyibo zili akati kazipego zibotu nzyotujana kwiinda mukugwasyigwa amuuya uusalala. (1 Kor. 2:10-16; Gal. 5:22, 23) Masimpe ngakuti, nguzu zyesu, luzyibo alimwi azileleko zilakonzya kubonwa kuti nzipego zyeelede kubelesyegwa mukutembaula alimwi akulemeka Taatesu wakujulu. Tupedwe mukuli kuzwa kuli Leza wakubelesya luzyibo alimwi abube bwesu mukutondezya luzyalo lwakwe kubasyomima.
‘Amucibelesye Mukugwasyanya’—Munzila nzi?
7. (a) Ino ibbala lyakuti “kufwumbwa” litondezya nzi? (b) Ino mibuzyo nzi njotweelede kulibuzya, alimwi ino nkaambo nzi?
7 Kujatikizya zipego nzyotwatambula, Petro alimwi waamba kuti: “Kufumbwa zipego zya-Muuya nzimutambwide, amugwasyanye anzizyo.” Ibbala lyakuti “kufwumbwa” litondezya kuti bube alimwi aluzyibo zilakonzya kwiindana-indana. Kufwumbwa cipego cili coonse, aumwi ukulwaizyigwa ‘kucibelesya [nkokuti kufwumbwa cipego cili coonse ncapedwe] mukugwasyanya.’ Mukuyungizya, majwi aakuti “amugwasyanye anzizyo . . . mbubonya obu mbubeelede abo baabilwa” atondezya kuti tulaililwa buya. Aboobo, tweelede kulibuzya kuti: ‘Sena masimpe zipego nzyondakapegwa ndizibelesya kukulwaizya basyomima?’ (Amweezyanisye 1 Timoteo 5:9, 10.) ‘Sena ndibelesya luzyibo ndondakapegwa a Jehova kuti ndiligwasye ndemwini—ambweni kuti ndijane lubono naa kuba aampuwo?’ (1 Kor. 4:7) Ikuti twabelesya zipego zyesu “mukugwasyanya,” tuyoomukkomanisya Jehova.—Tus. 19:17; amubale Ba-Hebrayo 13:16.
8, 9. (a) Ino ninzila nzi ziindene-indene zyalo Banakristo munyika yoonse nzyobabelesya kugwasya basyominyina? (b) Ino mbuti bakwesu alimwi abacizyi mumbungano yanu mbobagwasyanya?
8 Ijwi lya Leza lyaamba nzila ziindene-indene nzyobakabelesya Banakristo bamumwaanda wamyaka wakusaanguna mukugwasyanya. (Amubale Ba-Roma 15:25, 26; 2 Timoteo 1:16-18.) Mbubwenya buyo amazuba aano, Banakristo bakasimpe balaatobela camoyo woonse malailile aakuti kababelesya zipego zyabo mukugwasya bakombinyina. Amulange-lange nzila zimwi zibelesyegwa mukucita boobu.
9 Ibakwesu banji balabelesya mawoola manji mukulibambila zibeela zyamiswaangano. Ciindi nobaambila bamwi makani aayandika kapati kumiswaangano, alo ngobakajana ciindi nobakali kucita ciiyo cabo ca Bbaibbele, majwi aabo akulwaizya boonse bamumbungano kuti bakakatile. (1 Tim. 5:17) Bakwesu abacizyi banji balizyibidwe akaambo kakubikkila maano alimwi akubafwida luzyalo basyominyina. (Rom. 12:15) Bamwi balabaswaya lyoonse aabo ibatyompedwe alimwi akupaila ambabo. (1 Tes. 5:14) Ibamwi balajana ciindi cakulemba majwi aakulwaizya kubasyominyina baliyumya kusukusyo ndyobajisi. Alimwi bamwi balagwasya bantu bakompeme kutegwa kabajanika kumiswaangano yambungano. Zyuulu zya Bakamboni balatola lubazu mumulimo wakugwasya bantu ibacitikilwa ntenda, balabagwasya basyominyina kuti babambulule maanda aakanyonyooka ciindi cantenda. Luyando alimwi alugwasyo iluzwa kubakwesu alimwi akubacizyi nzitondezyo ‘zyaluzyalo lwa Leza lwalo lutondezyegwa munzila ziindene-indene.’—Amubale 1 Petro 4:11.
Ino Nguuli Uuyandika Kapati?
10. (a) Ino Paulo wakali kulibilika kujatikizya mbazu nzi zyobilo zyamulimo wakwe kuli Leza? (b) Ino mbuti mbotumwiiya Paulo mazuba aano?
10 Babelesi ba Leza tabapedwe buyo cipego cakubelesya mukugwasya basyominyina, pele balipedwe amulumbe wakukambaukila bantunyina. Mwaapostolo Paulo wakalizizyi mbazu zyobilo eezyi zyamulimo wakwe kuli Jehova. Wakalembela mbungano yaku Efeso kujatikizya “bubanzi bwaluzyalo lwa-Leza” mbwaakapegwa bwakuti abagwasye. (Ef. 3:2) Nokuba boobo, alimwi wakaamba kuti: “Twakasunkwa kuli-Leza akusyomenwa milimo ya-Makani Mabotu.” (1 Tes. 2:4) Mbubwenya mbuli Paulo, andiswe tulizyi kuti tulipedwe mulimo wakukambauka kujatikizya Bwami bwa Leza. Kwiinda mukutola lubazu cabusungu mumulimo wakukambauka, tusola kutobela cikozyanyo ncaakapa Paulo cakuzumanana kukambauka makani mabotu. (Inc. 20:20, 21; 1 Kor. 11:1) Tulizyi kuti kukambauka mulumbe wa Bwami kulakonzya kufwutula bantu. Pele alimwi, tusola kwiiya Paulo kwiinda mukuyandaula nzila zyakuti “[t]waabile cimwi cipo camuuya” kubakombima.—Amubale Ba-Roma 1:11, 12; 10:13-15.
11. Ino mbuti mbotweelede kwiilanga milimo yakukambauka alimwi akugwasya bakwesu?
11 Ino nguuli wayeeyi milimo yobilo ya Bunakristo uuyandika kapati? Ikubuzya mubuzyo ooyu cili mbuli kubuzya kujatikizya muyuni kuti, Akati kamababa obilo ngajisi, ino ndili bbaba liyandika kapati? Bwiinguzi tabukatazyi. Imuyuni uyandika kubelesya mababa oonse obilo kutegwa auluke kabotu. Mbubwenya buyo andiswe tuyandika kutola lubazu mumilimo yoonse yobilo kuli Leza kutegwa tucikonzye kucita zyoonse Jehova zyalangila kulindiswe mbotuli Banakristo. Aboobo, muciindi cakubona mbuli kuti milimo yesu yakukambauka makani mabotu alimwi akugwasya bakombima tiiswaangene, twiibona mbuli baapostolo Petro alimwi a Paulo mbobakali kwiibona—kuti mmikuli yeendelana. Ino muunzila nzi?
12. Ino mbuti mbotuba mbuli cibelesyo cili mujanza lya Jehova?
12 Mbotuli bakambausi, tulabelesya kufwumbwa luzyibo ndotujisi mukuyiisya notusoleka kucita kuti mulumbe wa Bwami bwa Leza unjile mumyoyo yabantuma. Munzila eeyi tulangila kubagwasya kuti babe basikwiiya ba Kristo. Nokuba boobo tulabelesya kufwumbwa luzyibo alimwi azipego zimwi nzyotujisi mukusola kukulwaizya basyomima kwiinda mukubelesya majwi aakulwaizya alimwi akucita zyintu zigwasya—izitondezyo zyaluzyalo lwa Leza. (Tus. 3:27; 12:25) Munzila eeyi, tulangila kubagwasya kuti bazumanane kuba basikwiiya ba Kristo. Mumilimo yobilo—kukambauka kubanamaleya alimwi ‘akugwasyanya’—kutupa coolwe cakuba mbuli cibelesyo icili mujanza lya Jehova.—Gal. 6:10.
“Amuyandane”
13. Ino ncinzi cikonzya kucitika ikuti naa twaleka ‘kugwasyanya’?
13 Paulo wakakulwaizya bakombinyina kuti: “Amuyandane aluyandisyo lwabunyina. Amusungwaale kukulemekana.” (Rom. 12:10) Inzya, kuba aluyando kubakwesu kutukulwaizya kubeleka camoyo woonse mbuli babanzi baluzyalo lwa Leza. Tulizyi kuti naa Saatani wazwidilila kutulesya ‘kugwasyanya’ inga wanyonganya lukamantano ndotujisi. (Kol. 3:14) Aboobo, ikuti naa twabula lukamantano tulakonzya kucileka kusungwaala mumulimo wakukambauka. Saatani ulizyi kabotu-kabotu kuti uyandika buyo kunyonganya cibeela comwe camulimo wesu kutegwa twaalilwe kuzuzikizya mikuli yesu kuli Jehova, mbubwenya mbuli kutyola bbaba lyomwe lyamuyuni mbokukonzya kumulesya kuuluka.
14. Ino mbaani bagwasyigwa ciindi ‘notugwasyanya’? Amupe cikozyanyo.
14 ‘Kugwasyanya’ kulabagwasya boonse, kutali buyo baabo ibatambula luzyalo lwa Leza pele abalo ibagwasya bamwi balagwasyigwa. (Tus. 11:25) Amubone cikozyanyo caba Ryan abakaintu babo ba Roni ibakkala kudolopo lya Illinois, ku U.S.A. Ciindi nobakamvwa kuti guwo pati liitwa kuti Hurricane Katrina lyakanyonyoona myaanda-myaanda yamaanda aa Bakamboninyina, luyando lwabunyina lwakabakulwaizya kuti bacileke kubeleka milimo yabo yakumubili, bakasambala ŋanda yabo akuula ŋanda yamavwili, bakaibambulula kutegwa kabakkala mumo, alimwi bakeenda kwamakkilomita aasika ku 1,400 kuunka kudolopo lya Louisiana. Bakakkala kubusena oobu kwamwaka omwe amyezi iili mbwiibede, bakapa ciindi, nguzu, alimwi alubono lwabo mukugwasya banyina. Ba Ryan balaamyaka yakuzyalwa iili 29 bakaamba kuti: “Ikutola lubazu mumulimo wakugwasya bantu bacitikilwa ntenda cakayumya cilongwe cangu a Jehova. Ndakabona Jehova mbwalanganya bantu bakwe.” Ba Ryan bakayungizya kuti: “Akaambo kakubelekela antoomwe abakwesu bapati ndakaiya kubalanganya kabotu bakwesu. Alimwi ndakaiya kuti kuli milimo minji njotukonzya kucita tobakubusi mumbunga ya Jehova.” Ba Roni balo ibajisi myaka yakuzyalwa iili 25, bakati: “Ndilalumba akaambo kakuti ndakakonzya kutola lubazu mukugwasya bantu. Kunyina nondakakkomene kapati boobu mubuumi bwangu. Ndilizyi kuti amumyaka iiboola ndiyoozumanana kugwasyigwa akaambo kamulimo mubotu ooyu.”
15. Ino twaambo nzi tubotu ntotujisi twakazumanana kubeleka katuli babanzi baluzyalo lwa Leza?
15 Masimpe, ikutobela milawo ya Jehova yakukambauka makani mabotu alimwi akugwasya basyomima kuleta zilongezyo kubantu boonse. Bantu mbotugwasya balayumizyigwa kumuuya, andiswe notugwasya tulaba alukkomano luboola akaambo kakupa. (Inc. 20:35) Luyando lulakomena mumbungano yoonse ciindi aumwi wamumo nabikkila maano kubakombinyina. Kuyungizya waawo, iluyando ndotutondezya kuli aumwi ncitondezyo caantangala kuti tuli Banakristo bakasimpe. Jesu wakaamba kuti: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Joh. 13:35) Kwiinda zyoonse, cileta bulemu kuli Taatesu siluzyalo Jehova, ciindi kuyanda kwakwe kwakuti agwasye baabo ibayandika lugwasyo nokulibonya mubabelesi bakwe baanyika. Elo kaka tatuliboteli twaambo ntotujisi twakubelesya cipego cesu ‘mukugwasyana mbubonya oobu mbubeelede babanzi baluzyalo lwa Leza’! Sena muyoozumanana kucita boobu?—Amubale Ba-Hebrayo 6:10.
Sena Muciyeeyede?
• Ino muunzila nzi Jehova mwabayumya-yumya babelesi bakwe?
• Ino mmikuli nzi njotupedwe?
• Ino muunzila nzi zimwi motukonzya kugwasya basyomima?
• Ino ncinzi ciyootukulwaizya kuti tuzumanane kubelesya cipego cesu ‘mukugwasyanya’?
[Mibuzyo yaciiyo]
[Zifwanikiso izili apeeji 13]
Sena mulacibelesya “cipego” canu mukugwasya bamwi naa mukulikkomanisya?
[Zifwanikiso izili apeeji 15]
Tulakambauka makani mabotu kubantu alimwi akugwasya basyomima
[Cifwanikiso icili apeeji 16]
Basikugwasya bantu bacitikilwa ntenda beelede kulumbaizyigwa akaambo kamuuya wabo wakulyaaba