Sena Majwi Aa Jesu Alayeendelezya Mipailo Yenu?
Sena Majwi Aa Jesu Alayeendelezya Mipailo Yenu?
“Lino Jesu naakamana kwaamba majwi aya oonse, makamu aabantu akakankamana kukwiisya kwakwe.”—MT. 7:28.
1, 2. Ino nkaambo nzi bantu bakanyandwa nobakamvwa mbwaakali kuyiisya Jesu?
TWEELEDE kwaazumina majwi aa Mwana wa Leza simuzyalwa alikke, Jesu Kristo, alimwi akwaabelesya mubuumi bwesu. Masimpe, kunyina muntu uukonzya kubandika mbuli Jesu. Elo kaka bantu bakanyandwa kubona mbwaakayiisya ciindi naakaamba Mulumbe waa Cilundu!—Amubale Matayo 7:28, 29.
2 Mwana wa Jehova tanaakayiisya mbuli balembi, balo ibakali kuvwuzya zyakwaamba mumakani ngubakali kupa kuzwa munjiisyo zyabantu ibatalondokede. Kristo wakayiisya mbuli muntu uujisi nguzu zyakuyiisya akaambo kakuti nzyaakali kwaamba zyakali kuzwa kuli Leza. (Joh. 12:50) Aboobo, atubone majwi aambi ngaakaamba Jesu mu Mulumbe waa Cilundu mbwaakonzya kutusololela ciindi notupaila.
Mutani Kupaili Mbuli Bucita Basikuupaupa Ameso
3. Amupandulule mubufwaafwi majwi aa Jesu aalembedwe kuli Matayo 6:5.
3 Mupailo ncibeela ciyandika kapati mubukombi bwakasimpe, alimwi tweelede kupaila lyoonse kuli Jehova. Pele mipailo yesu yeelede kupegwa kweelana amajwi ngaakaamba Jesu mu Mulumbe waa Cilundu. Wakaamba kuti: “Ciindi ncomukomba mutabi mbuli basikuupaupa ameso, nkaambo balayanda kukomba bwiimvwi muzikombelo amuzyooko zyamigwagwa mipati, kuti babonwe kubantu. Ncobeni ndamwaambila kuti balijene kale bulumbu bwabo.”—Mt. 6:5.
4-6. (a) Ino nkaambo nzi ba Farisi ncobakali kuyandisisya kupaila “[kaba]imvwi muzikombelo amuzyooko zyamigwagwa mipati”? (b) Ino mbuti basikuupaupa ameso aaba “[mbobakali kujana] bulumbu bwabo”?
4 Ciindi nobakali kupaila, basikwiiya ba Jesu tiibakeelede kwiiya “basikuupaupa ameso” mbuli ba Farisi balo ibakali kulibona kululama mumeso aabo, alimwi bakali kulicengeezya kuba balulami. (Mt. 23:13-32) Aaba basikuupaupa ameso bakali kukukkomanina kupaila “[kaba]imvwi muzikombelo amuzyooko zyamigwagwa mipati.” Nkaambo nzi? Kutegwa “babonwe kubantu.” Ba Juda ibamumwaanda wamyaka wakusaanguna bakajisi cilengwa cakupaila antoomwe mbuli mbungano ciindi ncobakali kupa zituuzyo zitentwa kutempele (ciindi kacitandila ku 9 koloko mafwumofwumo alimwi a 15 koloko). Bunji bwabantu bamu Jerusalemu bakali kupaila antoomwe ankamu yabakombi kutempele. Kunze aamunzi, ba Juda balyaabide bakali kupaila “[kaba]imvwi muzikombelo.”—Amweezyanisye Luka 18:11, 13.
5 Mbwaanga bantu banji tiibakali kujanika afwiifwi atempele naa cikombelo lyamipailo yaambwa atala aawa, bakali kukonzya kupaila kufwumbwa nkobabede muziindi eezyi. Bamwi bakali kucikkomanina kuti ziindi eezyi zyakupaila zyasika kabajanika bali “muzyooko zyamigwagwa mipati.” Bakali kuyanda kuti “babonwe abantu” ibakali kwiinda mumigwagwa eeyi. Aaba basikulitama bululami bwakuupaupa ameso “ba[kali ku]likombya-kombya ciindi cilamfu kuupaupa buyo” kutegwa kabayandwa abantu bakali kulangilila. (Lk. 20:47) Pele swebo tatweelede kucita mbuli mbobakali kucita.
6 Jesu wakaamba kujatikizya basikuupaupa ameso kuti “balijene kale bulumbu bwabo.” Bakali kuyanda kapati kubonwa alimwi akutembaulwa abantunyina—alimwi mbobulumbu bwalikke mbobakajisi. Mbobwakali bulumbu bwabo, nkaambo Jehova kunyina naakali kwiingula mipailo yabo yakuupaupa ameso. Kulubazu lumwi, Leza wakali kukonzya kwiingula mipailo yabasikutobela Kristo bakasimpe, mbubwenya mbuli majwi aa Jesu aambi aajatikizya makani aaya mbwaatondezya.
7. Ino lulayo lwakuti katupailila ‘mucimpetu cesu’ lwaamba nzi?
7 “Webo ciindi ncokomba, njila mucimpetu cako, ulijalile kumulyango, ukombe kuli-Uso uuli kumbali, lino Uso uubonena kumbali uzookulumbula.” (Mt. 6:6) Majwi aa Jesu aakuti muntu anjile mucimpetu cakwe akujala kumulyango taambi kuti muntu takonzyi kwiiminina mbungano mumupailo. Pele lulayo oolu lwakapegwa kukasya baabo ibapa mipailo yabuleya ikuti batani kupaili munzila iitondezya kuti bayanda kubonwa alimwi akutembaulwa abantu. Aaka kaambo keelede kuyeeyegwa ikuti naa twapegwa coolwe cakwiiminina bantu ba Leza mumupailo waabuleya. Alimwi atutobele lulayo alumbi lwa Jesu ilujatikizya mupailo.
8. Kweelana acaambwa kuli Matayo 6:7, ino nkupaila kuli buti nkotweelede kweeleba?
8 “Mukukomba kwanu mutaindululi mbuli mbubacita bamasi, nkaambo balayeeya kuti balaswiililwa kukubwanta kwabo.” (Mt. 6:7) Jesu wakaamba nzila imbi iiteelede yalo iijatikizya mupailo—kwiinduluka-induluka. Tanaakali kwaamba kuti tatweelede kwiinduluka mipailo iizwa ansi aamoyo yakulomba alimwi akulumba. Kali mumuunda wa Getesemane masiku katanafwa, Jesu wakainduluka-induluka “majwi ngoonya” mumupailo.—Mk. 14:32-39.
9, 10. Ino mmuunzila nzi motuteelede kwiinduluka-induluka majwi ngotubelesya mumipailo yesu?
9 Inga tiiceelela kuti twaiya mipailo yakwiinduluka-induluka njobapa “bamasi.” ‘Cakwiinduluka-induluka,’ baamba majwi aabikkidwe mumutwe alo aabikkilizya amabala aatayandiki. Basikukomba Baala kunyina nokwakabagwasya kukwiilila zyina lyaleza wakubeja ooyu “kuzwa kucifumo-fumo mane kusikila akalangabwaseme. Bakati, O Baala, utuswiilile.” (1 Bam. 18:26) Mazuba aano, bantu banji kapati bapa mipailo yabo kwiinda mukubabelesya mabala ngomunya cakwiinduluka-induluka, kabayeeya kuti “ba[yoo]swiililwa.” Pele Jesu utugwasya kuzyiba kuti “[i]kubwanta” mumipailo milamfwu alimwi akubelesya majwi ngomunya cakwiinduluka-induluka tacigwasyi kweelana ambwazibona zyintu Jehova. Jesu wakazumanana akwaamba kuti:
10 “Mutakozyani abo, nkaambo Usowanu ulizi zintu nzimubula kamutana kumubuzya.” (Mt. 6:8) Basololi banji ba Juda bakali kubelesya mabala manji mumipailo yabo, aboobo mipailo yabo yakaba mbuli ya Bamasi. Mipailo yaansi amoyo iibikkilizya kutembaula, kulumba alimwi akukomba ilayandika kapati mubukombi bwakasimpe. (Flp. 4:6) Pele, inga taceeleli kwaamba zyintu nzyemunya cakwiinduluka-induluka katuyeeya kuti kwiinduluka-induluka kulayandika kutegwa twaambile Leza zyintu nzyotuyandika. Ciindi notupaila, tweelede kuyeeya kuti twaambaula aa Muntu ‘uuzyi kale nzyotuyandika kufwumbwa katutana akulomba.’
11. Ino ncinzi ncotweelede kuyeeya ikuti naa twapegwa coolwe cakupa mupailo waabuleya?
11 Majwi aa Jesu kujatikizya mipailo iitayandiki ayelede kutuyeezya kuti tatukonzyi kukkomanisya Leza kwiinda mukubelesya majwi alimwi amabala aalimvwisya mbuli kuti alayandika kapati anu mubwini taayandiki. Alimwi tweelede kuyeeya kuti ciindi notupa mupailo waabuleya tatweelede kusola kukkomanisya baswiilizi naa kulampya mupailo wesu cakuti baswiilila baleka kumvwa nzyotwaamba, pele batalika kuyeeya kuti naa tulaamba lili kuti “Ameni.” Ikubelesya mupailo kuti mupe zyakwaambilizya naa lulayo kubaswiilizi acalo inga taceendelani amajwi Jesu ngaakaamba mu Mulumbe waa Cilundu.
Jesu Utuyiisya Mbotweelede Kupaila
12. Ino inga mwapandulula buti kujatikizya mbwaayandika majwi akuti “alilemekwe izina lyako”?
12 Nokuba kuti Jesu wakacenjezya kujatikizya kupaila munzila iiteelede, wakayiisya basikwiiya bakwe mbobeelede kupaila. (Amubale Matayo 6:9-13.) Mupailo wacikozyanyo taweelede kubikkwa mumutwe kutegwa kawiindulukwa-indulukwa. Pele ncikozyanyo citondezya mboyeelede kuba mipailo yesu. Mucikozyanyo, Jesu wakabikka Leza kumatalikilo mumajwi aakutalisya aakuti: “Taateesu ooli kujulu, alilemekwe izina lyako.” (Mt. 6:9) Cileelela kwiita Jehova kuti “Taateesu” nkaambo Mmulengi, walo uukala “kujulu,” kulamfwu anyika. (Dt. 32:6; 2 Mak. 6:21; Inc. 17:24, 28) Ikubelesya bbala lyakuti “[w]esu” kweelede kutuyeezya kuti basyomima abalo bajisi cilongwe cibotu a Leza. Ciindi notupaila kuti: “Alilemekwe izina lyako,” tulomba Jehova kuti abweze ntaamu yakusalazya zyina lwakwe kumasampu aali mukubikkwa alindilyo kuzwa ciindi nobwakatalika buzangi mu Edeni. Mukwiingula mupailo ooyu, Jehova uyoobugwisya bubi boonse buli anyika, aboobo uyoosalazya zyina lyakwe.—Ezk. 36:23.
13. (a) Ino mupailo wakuti “abuze Bwami bwako” uyoozuzikizyigwa buti? (b) Ino kucita kuyanda kwa Leza anyika kuyoobikkilizya nzi?
13 “Abuze Bwami bwako, alucitwe luyando lwako, ansi ano mbubonya mbuli kujulu.” (Mt. 6:10) Kweelana amupailo wacikozyanyo ngwaakapa Jesu, tweelede kuyeeya kuti, “bwami” nimfwulumende yakujulu yabu Mesiya iili mumaanza aa Mwanaakwe alimwi abeenzinyina “basalali.” (Dan. 7:13, 14, 18; Is. 9:6, 7) Ciindi notupaila kuti “abuze,” tulomba kuti Bwami bwa Leza bukaakubanyonyoone basikukazya baanyika boonse, balo ibakazya bweendelezi bwa Leza. Eeci ciyoocitika ino-ino, mukulibambila kuboola kwaparadaiso yanyika yoonse mwalo imuyooba bululami, luumuno alimwi abuvwubi. (Int. 72:1-15; Dan. 2:44; 2 Pet. 3:13) Kuyanda kwa Jehova kulacitwa kujulu, aboobo notupaila kuti kucitike aanyika, tulomba kuti Leza azuzikizye makanze aakwe kujatikizya nyika, kubikkilizya akugwisya basikumukazya bamumazuba aano mbuli mbwaakacita mumazuba aansiku.—Amubale Intembauzyo 83:1, 2, 13-18.
14. Ino nkaambo nzi ncoceelela kulomba ‘zilyo zyasunu’?
14 “Utupe sunu zilyo nzitubula.” (Mt. 6:11; Lk. 11:3) Kwiinda mukupaila boobu, tulomba Leza kuti atupe cakulya ncotuyandika “sunu.” Eeci ncitondezyo cakuti tulasyoma kuti Jehova ulakonzya kuzilanganya nzyotuyandika abuzuba. Tauli mupailo wakuti tupegwe zyintu zinji. Ikulomba kuti tupegwe nzyotuyandika sunu kukonzya kutuyeezya kuti Leza wakalailila bana Israyeli kubweza mana kweelana a “caabilo cabuzuba obo.”—Kul. 16:4.
15. Amupandulule ncaamba majwi aakuti “utulekelele milandu yesu, mbubonya mbuli mbutubalekelede aswe bali amilandu kulindiswe.”
15 Ikulomba kutobela mumupailo wacikozyanyo kujatikizya cintu cimwi ncotweelede kucita. Jesu wakati: “Utulekelele milandu yesu, mbubonya mbuli mbutubalekelede aswe bali amilandu kulindiswe.” (Mt. 6:12) Makani Mabotu ngaakalemba Luka atondezya kuti “milandu” eeyi “nzibi.” (Lk. 11:4, NW) Tukonzya buyo kulangila kuti Jehova atulekelele zibi zyesu ikuti naa ‘twabalekelela’ aabo ibatulubizyila. (Amubale Matayo 6:14, 15.) Tweelede kulekelela bantu.—Ef. 4:32; Kol. 3:13.
16. Ino mbuti mbotweelede kwaamvwa majwi aajatikizya kusunkwa alimwi akuvwunwa kuzwa kumubi?
16 “Utatweenzyi mukutepaulwa, utuvune kumubi.” (Mt. 6:13) Ino tweelede kwaamvwa buti majwi aaya aamumupailo wacikozyanyo ngwaakayiisya Jesu? Kaambo komwe kalisalede: Jehova kunyina natusunka kuti tucite cibi. (Amubale Jakobo 1:13.) Saatani—‘imubi’—mubwini “[ngo]sikusunka.” (Mt. 4:3) Nokuba boobo, Bbaibbele lyaamba kujatikizya zyintu Leza nzyazumizya kucitika mbuli kuti nguuzicita. (Rut. 1:20, 21; Muk. 11:5) Aboobo, notupaila kuti “utatweenzyi mukutepaulwa” tulomba Leza kuti atugwasye kuliyumya kusunko lyakuti tuleke kumumvwida. Mukumanizya, notwaamba majwi aakuti “utuvune kumubi” tulomba Jehova kuti atazumizyi Saatani kutuzunda. Alimwi tulakonzya kusyoma kuti ‘Leza takoozoozumina kuti tutepaulwe kwiinda inguzu zyesu.’—Amubale 1 Ba-Korinto 10:13.
‘Amuzumanane Kukumbila, Kuyandaula, Akukonkomona’
17, 18. Ino caamba nzi ‘kuzumanana kukumbila, kuyandaula alimwi akukonkomona’?
17 Imwaapostolo Paulo wakakulwaizya basyominyina kuti ‘bajatisye kukomba.’ (Rom. 12:12) Jesu awalo wakapa lulayo luli boobu nakaamba kuti: “Amukumbile, mulapegwa. Amuyandaule, mulajana. Amukonkomone, mulajulilwa. Nkaambo umwi aumwi uukumbila ulatambula, alakwe uuyandaula ulajana, alakwe uukonkomona ulajulilwa.” (Mt. 7:7, 8) Cileelela kuzumanana ‘kukumbila’ cintu cili coonse ceendelana akuyanda kwa Leza. Kweelana amajwi aa Jesu, imwaapostolo Johane wakalemba kuti: “Lino kaanzambwene nkitujisi kubusyu bwakwe nkaaka kakuti, na twakumbila kufumbwa cintu cili buti cili mbuli makanze aakwe, ulatumvwa.”—1 Joh. 5:14.
18 Ilulayo lwa Jesu lwakuti tuzumanane ‘kukumbila alimwi akuyandaula,’ lwaamba kuti tweelede kubikkila maano kapati kumupailo alimwi akuzumanana kupaila nociba ciindi notutajani bwiinguzi mpoonya-mpoonya. Alimwi cilayandika kapati kuzumanana ‘kukonkomona’ kutegwa tukonzye kunjila mu Bwami alimwi akuyoojana zilongezyo, mpindu alimwi abulumbu. Pele sena inga twasyoma kuti Leza uyooyiingula mipailo yesu? Inzya, tulakonzya kusyoma oobu ikuti katusyomeka kuli Jehova, nkaambo Kristo wakati: “Umwi aumwi uukumbila ulatambula, alakwe uuyandaula ulajana, alakwe uukonkomona ulajulilwa.” Izyakuluula zinji zicitikila babelesi ba Jehova zilatondezya kuti masimpe Leza “[ngusiku]swiilila zikombyo.”—Int. 65:2.
19, 20. Kweelana amajwi aa Jesu aalembedwe kuli Matayo 7:9-11, ino mbuti Jehova mbwali taata siluyando?
19 Jesu wakakozyanisya Leza kuli usyi bana siluyando uupa zyintu zibotu kubana bakwe. Amweezeezye kuti andinywe mwakajanika ciindi Jesu naakali kwaamba Mulumbe waa Cilundu alimwi akumumvwa kaamba kuti: “Nguli muntu akati kanu uupa mwanaakwe ibbwe—akumbila insima? Alimwi, kuti wakumbila inswi—sa ulamupa inzoka? Lino mbuli mbumuzi kupa bana banu zintu zibotu, inywe nubabi, alakwe Usowanu uuli kujulu sa tazooindi loko kupa zintu zibotu kulibaabo bamukumbila?”—Mt. 7:9-11.
20 Nokuba kuti usyi muntunsi waambwa kuti ‘mmubi’ akaambo kacibi cakakonwa, ujisi luyando lwamukwasyi kubana bakwe. Takonzyi kucenga mwanaakwe pele ulasoleka canguzu kumupa “zintu zibotu.” Katulanganya mbuli mbwacita usyi bana, Taatesu wakujulu siluyando ulatupa “zintu zibotu,” mbuli muuya wakwe uusalala. (Lk. 11:13) Muuya uusalala ulakonzya kutugwasya kuti tubeleke mulimo uukkomanisya Jehova, Mwaabi wa “zipego zibotu zyoonse azyoolwe zyoonse zilondokede.”—Jak. 1:17.
Amuzumanane Kugwasyigwa Amajwi aa Jesu
21, 22. Ino ncinzi cikondelezya kujatikizya Mulumbe waa Cilundu, alimwi ino mulimvwa buti kujatikizya majwi aa Jesu?
21 Imulumbe waa Cilundu mmakani aayinda kubota akati kamakani oonse aakapegwa anyika. Ulilibedelede akaambo kakuti utuyiisya makani aajatikizya Leza alimwi ujisi bupanduluzi butakatazyi ikumvwa. Kweelana atwaambo twajanika muzibalo eezyi zitobelana, tulakonzya kugwasyigwa kapati ikuti twalubelesya lulayo luli mu Mulumbe ooyu. Majwi aa Jesu alakonzya kusumpula buumi bwesu cino ciindi alimwi akutupa bulangizi bwabuumi bubotu kumbele.
22 Muzibalo eezyi, twalanga-langa buyo mbono zyakumuuya zisyoonto zijanika mu Mulumbe waa Cilundu. Nkakaambo kaako tacigambyi kuti aabo ibakaswiilila makani aaya “[b]akakankamana kukwiisya kwakwe.” (Mt. 7:28) Cakutadooneka, andiswe tuyoocita mbubwenya oobu ikuti naa twaabikka mumizeezo alimwi amumoyo makani aaya alimwi amakani aambi mabotu kapati ngaakaamba Mwiyi Mupati, Jesu Kristo.
Ino Inga Mwaingula Buti?
• Ino ncinzi Jesu ncaakaamba kujatikizya mipailo yakuupaupa ameso?
• Ino nkaambo nzi ncotuteelede kwiinduluka-induluka mabala ngomunya ciindi notupaila?
• Ino mupailo wa Jesu wacikozyanyo utondezya zyintu nzi zyalo nzyotukonzya kulomba?
• Ino mbuti mbotukonzya ‘kuzumanana kukumbila, kuyandaula alimwi akukonkomona’?
[Mibuzyo yaciiyo]
[Cifwanikiso icili apeeji 15]
Jesu wakabasinganya basikuupaupa ameso balo ibakali kupaila buyo kutegwa babonwe alimwi akumvwigwa
[Cifwanikiso icili apeeji 17]
Sena mulizyi kaambo ncoceelela kupailila zilyo zyasunu?