wi lya Jehova Lili Abuumi

Twaambo Tugwasya Mubbuku lya Ciyubunuzyo—Cibeela II

INO NCINZI cilangilwa kumbele kujatikizya bantu bakomba Jehova alimwi abaabo batamukombi? Ino Saatani amadaimona aakwe bajisi bulangizi nzi? Ino nzilongezyo nzi nzyobayoojana bantu ibayoomvwida Jehova mu Myaka Iili Cuulu ya Bulelo bwa Kristo? Bwiinguzi kumibuzyo eeyi alimwi amibuzyo iimbi iiyandika kapati bulajanika ku Ciyubunuzyo 13:1–22:21. * Zyaandano eezyi zijisi zilengaano zyamamanino zili 9 akati kazilengaano zili 16 eezyo mwaapostolo Johane nzyaakabona kumamanino aamwaanda wamyaka wakusaanguna C.E.

Johane ulemba kuti: “Uli acoolwe uubala, abaabo baswiilila majwi aabusinsimi obuno, akubamba zintu eezyo zilembedwe mulimbubo.” (Ciy. 1:3; 22:7) Kubala alimwi akubelesya nzyotwiiya mubbuku lya Ciyubunuzyo kulakonzya kuucinca moyo wesu, kuyumya lusyomo lwesu muli Leza alimwi a Mwanaakwe, Jesu Kristo, alimwi akutupa bulangizi bwakumbele. *—Heb. 4:12.

MITIBA IILI CILOBA YABUKALI BWA LEZA YATILWA

(Ciy. 13:1–16:21)

Ku Ciyubunuzyo 11:18 tubala kuti: “Bamasi boonse bakalinyemede, pele sunu bwasika bukali bwa [Leza]. Casika ciindi . . . cakubanyonyoona abo banyonyoona nyika.” Ikutondezya kaambo bukali bwa Leza ncobwakaboolela, cilengaano calusele citondezya micito “[ya]cinyama . . . cakalijisi mitwe iili musanu aibili ameja aali ikumi.”—Ciy. 13:1.

Mucilengaano cafwuka, Johane ubona ‘Mwanaambelele wiimvwi acilundu ca Zioni,’ antoomwe “abantu bali zyuulu zili mwaanda amakumi one azine.” Bantu aaba bakanununwa “akati kabantu.” (Ciy. 14:1, 4) Kumane kwakaba zyakwaambilizya kuzwa kubangelo. Mucilengaano citobela, Johane ubona “baangelo bali musanu ababili bajisi zipenzyo zili musanu azibili.” Kulibonya kuti Jehova lwakwe nguulailila bangelo aaba kuti batile “bukali bwa-Leza buli mumitiba” muzibeela ziindene-indene zyanyika ya Saatani. Mitiba ijisi zicenjezyo zyalubeta lwa Leza. (Ciy. 15:1; 16:1) Zilengaano zyobile eezyi zipa zicenjezyo zyalubeta lwa Bwami lwalo iluswaangene apenzi lyatatu alimwi akulizya mweembo waciloba.—Ciy. 11:14, 15.

Kwiingula Mibuzyo Yamu Magwalo:

13:8—Ino “bbuku lyabuumi lya-Mwanambelele” ninzi? Eeli ndibbuku lyacikozyanyo ilijisi buyo mazyina abaabo ibayoolela antoomwe a Jesu Kristo mu Bwami bwakwe bwakujulu. Libikkilizya mazyina aa Banakristo bananike ibacili anyika, balo ibajisi bulangizi bwakutambula buumi kujulu.

13:11-13—Ino mbuti cinyama cijisi meja obile mbocakali kucita mbuli simwaaba alimwi akukwela ansi mulilo kuzwa kujulu? Kaambo kakuti cinyama icijisi meja obile—Bulelo Bweendelezya Nyika Yoonse bwa Britain a Amelika—caambaula mbuli simwaaba, ncitondezyo cakuti cilakonga akudyaaminina bantu kutegwa cibasinikizye kutobela bweendelezi bwancico. Cikwelela ansi mulilo kuzwa kujulu mukuti cilicengeezya kuba musinsimi  wakasimpe kwiinda mukwaamba kuti cazunda nguzu zibyaabi zyankondo zyanyika zyobile zyamumwaanda wamyaka wa 20 alimwi akuti cakazunda mfwulumende zya Kkomyunizimu.

16:17—Ino ‘nduuwo’ nzi mpowakatilwa mutiba waciloba? “Luuwo” lwiiminina miyeeyo mibi, “[i]muuya uubeleka sunu mumyoyo yabana bakasampusampu.” Bantu boonse ibacibeela canyika mbyaabi ya Saatani bayoya luuwo lwacikozyanyo oolu lubyaabi.—Ef. 2:2.

Ziiyo Kulindiswe:

13:1-4, 18. “Cinyama” iciiminina mfwulumende zyabantu cizwa “mulwizi,” naa, mumakamu-makamu aabantu bamunyika. (Is. 17:12, 13; Dan. 7:2-8, 17) Cinyama eeci, icakabambwa a Saatani, cijisi mweelwe wa 666, kukankaizya ikutalondoka kwancico. Kumvwisya ncociiminina cinyama kutugwasya kuti tutacitobeli nokuba kucikomba mbuli mbobacita bantu banji.—Joh. 12:31; 15:19.

13:16, 17. Nokuba kuti tulakonzya kuba abuyumuyumu mumilimo yabuzuba abuzuba, mbuli ‘yakuula akuuzya,’ tatweelede kuzumina kweendelezyegwa acinyama. Kuzumina kuba ‘abulembo bwacinyama mumaanza naa ankumo zyesu’ inga caamba kuti tucizumizya kuti ceendelezye milimo yesu naa mizeezo yesu.

14:6, 7. Mulumbe ngwaakajisi mungelo utuyiisya kuti tweelede kupakamana mukukambauka makani mabotu aa Bwami bwa Leza. Tweelede kugwasya bantu mbotuyiisya Bbaibbele kuti kabamuyoowa Jehova Leza akumupa bulemu.

14:14-20. Ciindi ‘kutebula nyika,’ nkokuti ikubunganya bantu boonse ibayoofwutuka kwaakumana, ciyoosika ciindi mungelo “[naayoo]waala mudindi ipati lyakusinina bukali bwa-Leza” “masaansa aansi.” Masaansa aayo—bweende bwamfwulumende zilibonya zya Saatani “[a]zikama” zyamicelo mibyaabi—ziyoonyonyoonwa. Tweelede kukanza kuti tutayungwi acikama camusaansa wanyika.

16:13-16. ‘Myuuya iisofweede’ yiiminina makani aakubeja aabudaimona alo aakabambilwa kubona kuti bami bamunyika bataboni mbobajatikizyigwa akutilwa kwamitiba iili ciloba yabukali bwa Leza pele muciindi caboobo batalika kukazya Jehova.—Mt. 24:42, 44.

16:21. Mamanino aanyika eeyi mbwaali afwaafwi, kwaambilizyigwa kwalubeta lwa Jehova kubweende bwa Saatani kulakonzya kubikkilizya majwi aacigaminina aamba lubeta lwa Jehova, lwalo ilulangilwa kuti lwiimininwa aacivwulamabwe. Nokuba boobo, bantu banji bayoozumanana kusampaula Leza.

MWAMI SIKUZUNDA ULALELA

(Ciy. 17:1–22:21)

“Babuloni mupati,” ibulelo bwanyika yoonse bwabukombi bwakubeja, ncibeela cisesemya canyika mbyaabi ya Saatani. Cilengaano ca 11 cimwaamba kuba “sikuvuula mupati”—mwanakazi sibwaamu—‘uukkede acinyama cisalala pyu.’ Uyoonyonyoonwa “ameja aali ikumi” aacinyama nciconya eeci icimuyumwide. (Ciy. 17:1, 3, 5, 16) Kacikozyanisya mwanakazi ooyu ‘kumunzi mupati,’ icilengaano citobela caambilizya kuwa kwakwe alimwi akwaambila bantu ba Leza kuti ‘bazwe mulinguwe.’ Bantu banji balalila akaambo kakuwa kwamunzi mupati ooyu. Nokuba boobo, kuli lukkomano kujulu akaambo “[k]abwiinga bwa-Mwanambelele.” (Ciy. 18:4, 9, 10, 15-19; 19:7) Mucilengaano ca 13, sibbiza uutantide “imbizi iituba” waunka kunkondo kuyoolwana abamasi. Wainyonyoona nyika mbyaabi ya Saatani.—Ciy. 19:11-16.

Ino mbuti kujatikizya “inzoka yaciindi iitegwa Diabolosi a-Saatani”? Ino ndilili “[nayoo]sowegwa muziba lyamulilo uuyaka asulufa”? Aaya ngamwi aamakani aajanika mucilengaano ca 14. (Ciy. 20:2, 10) Zilengaano zyobile zyamamanino zitondezya mbobuyooba buumi mu Myaka iili Cuulu. Kumamanino “[aa]ciyubunuzyo,” Johane ubona ‘mulonga wamaanzi aabuumi uukunka mukati kamugwagwa,’ alimwi kuli kwiita muntu uuli woonse “uufwide nyota.”—Ciy. 1:1; 22:1, 2, 17.

Kwiingula Mibuzyo Yamu Magwalo:

17:16; 18:9, 10—Ino nkaambo nzi “bami baansi” ncobauside akaambo kacintu ncobanyonyoona  beni? Baluuside akaambo kabusyaacivwulemwangu. Babuloni mupati aakunyonyoonwa, kulibonya kuti bami baansi bayoozyiba kuti ngowakali kubagwasya kapati. Wakapa kuti micito yabo yakudyaaminina ilibonye mbuli kuti ili kabotu. Babuloni mupati alimwi wakabagwasya kunjizya bakubusi munkondo. Kunze lyaboobo, ujisi mulimo mupati iwakubona masimpe kuti bantu bazumanana kulibombya kubami aaba.

19:12—Ino mbuti mbocikonzya kwaambwa kuti kunze buyo lya Jesu kunyina muntu uuli woonse uulizyi zyina litaambidwe? Izyina eeli liboneka kuti liiminina cuuno alimwi amilimo njajisi Jesu kuciindi ca Mwami, mbuli yeeyo iyaambwa kuli Isaya 9:6. Kunyina muntu naba omwe uulizyi zyina eeli pele walo mukamwini mukuti milimo yakwe ililibedelede alimwi walo alikke nguukonzya kuzyiba ncocaamba kuba acuuno cipati boobu. Nokuba boobo, Jesu ‘ulalilemba zyina eeli ali baciinga canabwiinga wakwe mukuti ulabeleka ambabo imwi yamilimo eeyi.—Ciy. 3:12.

19:14—Ino mbaani bayooba antoomwe a Jesu lyankondo ya Armagedoni? Ibabikkilizyidwe akati ‘kabasinkondo bakujulu’ ibasangana Jesu munkondo ya Leza mbangelo alimwi abananike ibakazunda balo bakatambula kale bulumbu bwabo bwakujulu.—Mt. 25:31, 32; Ciy. 2:26, 27.

20:11-15—Ino mmazyina aabani aalembedwe “[mub]buku lyabuumi”? Eeli ndibbuku lijisi mazyina aabantu boonse ibayoopegwa buumi butamani—Banakristo bananike, ibankamu mpati alimwi ababelesi ba Leza basyomeka ibayoobusyigwa ‘mububuke bwabantu baluleme.’ (Inc. 24:15; Ciy. 2:10; 7:9) Aabo ibayoobusyigwa ‘mububuke bwabantu bataluleme’ bayoolembwa “[mub]buku lyabuumi” lilikke buyo baakulilemeka kweelana “[a]makani aalembedwe mumabuku” aamalailile aayo aayoojalulwa mu Myaka iili Cuulu. Nokuba boobo, mazyina taalembedwe kubelesya cilembyo citakonzyi kumwaigwa. Mazyina aabananike alakkalilila ciindi nobasyomeka kusikila kulufwu. (Ciy. 3:5) Mazyina aabantu boonse ibayoopegwa buumi butamani anyika ayookkalilila ciindi baakuzwidilila mukulwana sunko lyamamanino kumamanino aamyaka iili cuulu.—Ciy. 20:7, 8.

Ziiyo Kulindiswe:

17:3, 5, 7, 16. “Busongo buzwa kujulu” bulatugwasya kumvwisya “makani aamwanakazi” alimwi “amakani aacinyama [cisalala pyu] ncatantide.” (Jak. 3:17) Cinyama eeci cacikozyanyo cakatalika kacili League of Nations mpoonya cakazoocincwa akuba United Nations. Sena kuyubununwa kwamakani aasisidwe ooku takweelede kutupa kuba basungu mumulimo wakukambauka makani mabotu aa Bwami bwa Leza alimwi akwaambilizya buzuba bwalubeta bwa Jehova?

21:1-6. Tulakonzya kuba masimpe kuti zilongezyo mubulelo bwa Bwami zyalo izyakasinsimwa ziyoozuzikizyigwa. Ino nkaambo nzi? Akaambo kakuti kwakaambwa kujatikizya nzizyo kuti: “Amana makani.”

22:1, 17. “Mulonga wamaanzi aabuumi” wiiminina bubambe bwa Jehova bwakunununa bantu boonse bayoomumvwida kuzwa kucibi akulufwu. Maanzi aali mbwaabede nkwaali kale lino. Tutanoozumini buyo kwiitwa kuti “[tu]nywe cabuyo maanzi aabuumi” pele andiswe tweelede kwiita bantu bambi.

Bupanduluzi buyungizidwe

[Cifwanikiso icili apeeji 5]

Elo kaka kuyooba zilongezyo kubantu bamvwida Leza mubulelo bwa Bwami!