Ikumvwisya Jesu Kali Musa Mupati

“Jehova Leza uyoomubusizya musinsimi kubanabakwanu uuli mbuli ndime, muyoomuswiilila.”—INC. 3:22.

1. Ino mbuti Jesu mbwaakacinca zyintu zyoonse kujatikizya bantu?

KUZYALWA kwamwana musankwa umwi, myaka iili 2,000 yainda kwakapa kuti beembezi bamvwe bangelo banji kujulu kabatembaula Leza. (Lk. 2:8-14) Nokwakainda myaka iili 30, mwana ooyu kakomenede kale, wakatalika mulimo iwakatola myaka yotatwe acisela pele wakacinca zyintu zyoonse kujatikizya bantu. Imwaalumi wiitwa kuti Philip Schaff iwakali kupona mumwaanda wamyaka wa 19 wakazyibidwe kapati mukucizyiba kulemba makani aansiku wakalemba kujatikizya Jesu kuti: “Akati kabantu bansiku ibakacita milimo mipati kunyina wakakonzya kucita nzyaakacita mulombwana ooyu, nokuba kuti kunyina naakalemba noliba bbala lyomwe, nzyaakacita alimwi anzyaakaamba zyakapa kuti bantu banji batalike kulemba mabbuku, inyimbo, makani, alimwi akuzekaula zifwanikiso zibotu kapati.”

2. Ino ncinzi mwaapostolo Johane ncaakaamba kujatikizya Jesu amulimo wakwe?

² Kumamanino aamajwi ngaakalemba kujatikizya mulimo wa Jesu, mwaapostolo Johane wakati: “Mpozili azintu zimwi zinjizinji nzyaakacita Jesu. Kuti na zyalembwa zyoonse, ndasyoma kuti inyika neyatakonzya kwaamana mabuku aayoolembwa.” (Joh. 21:25) Johane wakalizyi kuti wakali kukonzya buyo kulemba kabeela kasyoonto kazyintu zyoonse nzyaakaamba akucita Jesu mumyaka yotatwe acisela njaakabeleka. Nokuba kuti Johane wakalemba buyo kabeela kasyoonto kazyintu ziyandika kapati nzyaakacita Jesu, eezyi nzyaakalemba zilagwasya kapati.

3. Ino mbuti mbotukonzya kulumvwisya lubazu ndwajisi Jesu mumakanze aa Leza?

³ Kunze lyazyintu zyakaluulwa mu Makani Mabotu, zibeela zimwi zyamu Bbaibbele zipandulula twaambo tumwi tugaminide kujatikizya buumi bwa Jesu twalo tuyumya lusyomo lwesu. Mucikozyanyo, makani aamu Bbaibbele aajatikizya baalumi bamwi basyomeka ibakapona anyika katanaboola Jesu atugwasya kumvwisya lubazu ndwajisi Jesu mumakanze aa Leza. Atulange-lenge zimwi zyazyeezi.

Baalumi Basyomeka Ibakali Kwiiminina Kristo

4, 5. Ino mbaani ibakali kwiiminina Jesu, alimwi muunzila nzi mobakacita boobu?

⁴ Johane alimwi abalembi bamwi bamakani mabotu botatwe bakatondezya kuti Musa, Davida alimwi a Solomoni bakali kwiiminina Jesu Munanike wa Leza alimwi Mwami uusalidwe. Muunzila nzi abaaba babelesi ba Leza bansiku mbobakatondezya zyakumbele kujatikizya Jesu, alimwi ino ncinzi ncotukonzya kwiiya kuzwa mutwaambo ootu?

⁵ Mubufwaafwi, Bbaibbele litwaambila kuti Musa wakali musinsimi, simwiimaakati alimwi amufwutuli. Jesu awalo mmusinsimi, simwiimaakati alimwi mufwutuli. Davida wakali mweembezi alimwi amwami iwakazunda basinkondonyina babana Israyeli. Jesu awalo mmweembezi alimwi mmwami uuzunda. (Ezk. 37:24, 25) Naakacili kusyomeka, Solomoni wakali muleli musongo kapati alimwi mubulelo bwakwe, bana Israyeli bakajisi luumuno. (1 Bam. 4:25, 29) Jesu awalo mmusongo kapati alimwi wiitwa kuti “Mwami Waluumuno.” (Is. 9:6) Inzya, nokuba kuti lubazu ndwajisi Jesu mumakanze aa Leza lulikonzyenye alwabaalumi bansiku, cibaka cakwe ncaatala ikwiinda cabo. Cakusaanguna, atulange-lange kukozyanya kuliko akati ka Jesu alimwi a Musa, mpoonya tubone zikozyanyo eezyi mbozikonzya kutugwasya kumvwisya lubazu ndwajisi Jesu mumakanze aa Leza.

 Musa—Iwakali Kwiiminina Jesu

6. Ino mbuti mwaapostolo Petro mbwaakapandulula mbocakali kuyandika kuswiilila nzyaakaamba Jesu?

⁶ Kakwiindide buyo ciindi cisyoonto noyakamana Pentekoste yamu 33 C.E., mwaapostolo Petro wakazubulula businsimi bwa Musa bwalo ibwakazuzikizyigwa muli Jesu Kristo. Petro wakaimvwi kumbelele lyankamu yabakombi mutempele. Bantu aaba “bakaankamanisya” ciindi Petro a Johane nobakaponya muntu wakalemene kuzwa kukuzyalwa kwakwe walo iwakali kulombelela, alimwi boonse bakalunduka kuti bakabone cacitika. Petro wakapandulula kuti eeci cintu cigambya cakacitika kwiinda mukubelesya muuya uusalala wa Jehova walo Jesu Kristo ngwaakabapa. Mpoonya kazubulula Magwalo aa Chihebrayo, wakati: “Ncobeni Musa wakateeti, Jehova Leza uyoomubusizya musinsimi kubanabakwanu uuli mbuli ndime, muyoomuswiilila walo kumakani oonse kufumbwa ngati kaambe kulindinywe.”—Inc. 3:11, 22, 23; amubale Deuteronomo 18:15, 18, 19.

7. Ino nkaambo nzi bantu ibakali kuswiilila makani aa Petro ncobakali kukonzya kutumvwisya twaambo tujatikizya musinsimi mupati ikwiinda Musa?

⁷ Kuboneka kuti bantu ibakali kuswiilila makani ngaakali kwaamba Petro bakalaazyi majwi aaya aa Musa. Mbobakali ba Juda, bakali kumulemeka kapati Musa. (Dt. 34:10) Bakali kulangila kuboola kwamusinsimi mupati ikwiinda Musa. Musinsimi ooyu tanaakali kuyooba mesiya buyo-buyo pe, imunanike wa Leza mbuli bwakali Musa, pele wakali kuyooba ngo Mesiya, “Kristo wa-Leza, musale wakwe.”—Lk. 23:35; Heb. 11:26.

Kukozyanya Kuliko Akati ka Jesu a Musa

8. Ino nkukozyanya kuli buti kuliko akati kabuumi bwa Musa alimwi abwa Jesu?

⁸ Munzila zimwi, buumi bwa Jesu bwaanyika bulikozyenye abuumi bwa Musa. Mucikozyanyo, kabacili bamvwanda, boonse bobile kakali kuyanda kujaigwa abaleli babyaabi. (Kul. 1:22–2:10; Mt. 2:7-14) Kuyungizya waawo, boonse bobile ‘bakaitwa kuzwa mu Egepita.’ Musinsimi Hosiya wakaamba kuti: “Israyeli naakacili mwana, ndakamuyandisya, ndakaita mwanaangu kuzwa ku-Egepita.” (Hos. 11:1) Majwi ngaakaamba Hosiya akali kutondeka kuciindi bana Israyeli kabasololelwa a Musa mweendelezi iwakasalwa a Leza kuzwa mu Egepita. (Kul. 4:22, 23; 12:29-37) Nokuba boobo, majwi ngaakaamba Hosiya tanaakali kwaamba buyo cintu cakacitikide kaindi, pele alimwi wakali kwaamba cintu cakali kuyoocitika kumbele. Majwi aaya akali businsimi ibwakazuzikizyigwa Josefa a Mariya nobakazwa mu Egepita ciindi Mwami Heroda naakafwa.—Mt. 2:15, 19-23.

9. (a) Ino maleele nzi ngaakacita Musa alimwi a Jesu? (b) Amwaambe kukozyanya kuliko akati ka Jesu alimwi a Musa. (Amubone kabbokesi kakuti  “Nzila Azimbi Jesu Mbwaakali Mbuli Musa,” apeeji 26.)

⁹ Musa alimwi a Jesu bakacita maleele, kutondezya kuti Jehova nguwakali kubagwasyilizya. Kweelana ambokulembedwe mu Bbaibbele, Musa ngomuntu wakusaanguna kucita maleele. (Kul. 4:1-9) Mucikozyanyo, wakacita maleele aajatikizya meenda ciindi naakaambila meenda aamumulonga wa Nile alimwi aamutuzyiba-zyiba kuti abe bulowa, aamu Lwizi Lusalala kuti aandaane, alimwi meenda akapoomoka kuzwa mubbwe munkanda. (Kul. 7:19-21; 14:21; 17:5-7) Jesu awalo wakacita maleele aajatikizya meenda. Maleele aakwe aakusaanguna ngaakacita akali aakusandula meenda kuba waini kupobwe lyabwiinga. (Joh. 2:1-11) Nokwakainda ciindi wakaambila meenda aamu Lwizi lwa Galilaya kuti abatame. Alimwi ciindi cimwi wakeenda atala aameenda. (Mt. 8:23-27; 14:23-25) Nzila zimwi zitondezya kukozyanya kuliko akati ka Musa alimwi a Musa Mupati, Jesu, zilibikkidwe  mukabbokesi kali apeeji 26.

Kumvwisya Kristo Kali Musinsimi

10. Ino ncinzi cibikkilizidwe mumulimo wamusinsimi wakasimpe, alimwi ino nkaambo nzi Musa ncaakali musinsimi wakasimpe?

¹⁰ Bantu banji babona musinsimi kuba muntu waamba zyintu ziyoocitika kumbele, pele mulimo ooyu ncibeela buyo camukuli wamusinsimi. Musinsimi wakasimpe mmwaambilizi wa Jehova, iwaambilizya “milimo mipati ya-Leza.” (Inc. 2:11, 16, 17) Akati kazyintu zimwi nzyacita, businsimi bwakwe bulakonzya kubikkilizya kwaambilizya zyintu iziyoocitika kumbele, kuyubununa makani aajatikizya makanze aa Jehova, naa kwaambilizya mbeta zya Leza. Musa wakali mbuli musinsimi ooyu. Wakaambilizya mapenzi aali  kumi aakacitikila Egepita, penzi alimwi kalitana kucitika. Wakaamba Mulawo wacizuminano kali acilundu ca Sinai. Wakalaila cisi ca Israyeli kucita kuyanda kwa Leza. Pele musinsimi mupati kwiinda Musa wakali kuyooboola aakale.

11. Ino mbuti Jesu mbwaakazuzikizya lubazu lwakwe lwakuba musinsimi mupati kwiinda Musa?

¹¹ Nokwakainda ciindi, mumwaanda wamyaka wakusaanguna, Zakariya wakabeleka mbuli musinsimi mukuti wakayubununa makanze aa Leza kujatikizya Johane mwanaakwe. (Lk. 1:76) Mwana ooyu wakaba Johane Mubbapatizi, walo iwakaambilizya kuboola kwamusinsimi ngobakali kulangila imupati kwiinda Musa—Jesu Kristo. (Joh. 1:23-36) Mbwaakali musinsimi, Jesu wakasinsima kujatikizya zyintu zinji zyakali kuyoocitika. Mucikozyanyo, wakaamba kujatikizya lufwu lwakwe mwini, mbwaakali kuyoojaigwa, nkwaakali kuyoofwida, alimwi abaabo ibakali kuyoomujaya. (Mt. 20:17-19) Icintu cakalamya baswiilizi bakwe ncakuti Jesu wakasinsima kunyonyoonwa kwa Jerusalemu alimwi atempele lyawo. (Mk. 13:1, 2) Businsimi bwakwe bulazuzikizyigwa amumazuba eesu.—Mt. 24:3-41.

12. (a) Ino mbuti Jesu mbwaakatalisya mulimo wakukambauka wanyika yoonse? (b) Ino mbuti mbotutobela cikozyanyo ca Jesu mazuba aano?

¹² Jesu tanaakali buyo musinsimi, pele wakali mukambausi alimwi mwiiyi. Wakakambauka makani mabotu aa Bwami bwa Leza, alimwi kunyina muntu uumbi wakakanana kajisi kaanzambwene mbuli mbwaakacita. (Lk. 4:16-21, 43) Kunyina wakaleelene anguwe mukuyiisya. Bamwi ibakali kuswiilila ciindi naakali kuyiisya  bakaamba kuti: “Takunabede muntu uuamba bobuya.” (Joh. 7:46) Jesu wakakambauka makani mabotu cabusungu, alimwi wakakulwaizya basikumutobela kuti abalo kabacita mbubwenya oobu. Aboobo, wakatalisya mulimo wakukambauka munyika yoonse alimwi mulimo ooyu ulazumanana kucitwa nociba ciindi cino. (Mt. 28:18-20; Inc. 5:42) Mwaka wainda, basikutobela Kristo ibasika kutuulunzuma tuli ciloba bakabelesya mawoola aabalilwa ku 1,500,000,000 mumulimo wakukambauka makani mabotu aa Bwami alimwi amukuyiisya baabo ibajisi luyandisisyo mukasimpe kamu Bbaibbele. Sena andinywe mulatola lubazu kusikila mpomugolela mumulimo ooyu?

13. Ino ncinzi ciyootugwasya ‘kulinda’?

¹³ Tacidoonekwi buya kuti Jehova wakabuzuzikizya businsimi bwakuleta musinsimi uuli mbuli Musa. Ino luzyibo oolu lumujatikizya buti? Sena luzyibo oolu lulabuyumya bulangizi mbomujisi bwakuti businsimi bwakasololelwa a Leza bwalo ibujatikizya bulangizi bwesu bwakumbele buyoozuzikizyigwa? Masimpe, kuzinzibala kuyeeya cikozyanyo ca Musa Mupati kulakonzya kutugwasya kuti ‘tulinde akupakamana’ kujatikizya zyintu nzyali aafwaafwi kucita Leza.—1 Tes. 5:2, 6.

Amulemeke Kristo Kali Simwiimaakati

14. Ino mbuti Musa mbwaakali simwiimaakati wabana Israyeli a Leza?

¹⁴ Mbubwenya mbuli Musa, Jesu wakali simwiimaakati. Jehova wakabelesya Musa ciindi naakapanga cizuminano ca Mulawo abana Israyeli. Kuti bana ba Jakobo nobakaitobela milawo ya Leza, nobakazumanana kuba bayandika baJehova, imbungano yakwe. (Kul. 19:3-8) Cizuminano eeci cakazumanana kuba kuzwa mu 1513 B.C.E. kusikila mumwaanda wamyaka wakusaanguna C.E.

15. Ino mbuti Jesu mbwali simwiimaakati mupati?

¹⁵ Mumwaka wa 33 C.E., Jehova wakatalisya cizuminano a Israyeli mupya, “ba-Israyeli ba-Leza.” (Gal. 6:16) Nokuba kuti cizuminano calo Musa ncaakali simwiimaakati cakali kubikkilizya milawo Leza njaakalemba amabwe, cizuminano Jesu ncali simwiimaakati cilisumpukide. Milawo ya Leza ililembedwe amyoyo yabantu. (Amubale 1 Timoteo 2:5; Ba-Hebrayo 8:10.) Aboobo, “ba-Israyeli ba-Leza” mbombabo bayandika ba Leza lino, ‘cisi cizyala micelo’ ya Bwami bwabu Mesiya. (Mt. 21:43) Bantu ibamucisi eeci cakumuuya mbobali mucizuminano cipya. Nokuba boobo, tabali mbobagwasyigwa ancico balikke pe. Inkamu yabantu batabaliki, kubikkilizya abaabo ibafwide, bayoopegwa zilongezyo izitamani akaambo kacizuminano eeci.

Amulemeke Kristo Kali Munununi

16. (a) Ino mmuunzila nzi Jehova mwaakabelesya Musa kunununa bana Israyeli? (b) Kweelana ambokulembedwe kulugwalo lwa Kulonga 14:13, ino nguni uupa kuti kube lufwutuko?

¹⁶ Masiku kabatana kulonga, bana bamwi ibabana Israyeli bakali muntenda mpati. Kwakaceede buyo ciindi cisyoonto cakuti mungelo wa Leza ainde munyika yoonse ya Egepita kuti akajaye bana bataanzi kuzyalwa. Jehova wakaambila Musa kuti bana Israyeli babweze bulowa bwambelele ya Kwiindilila akubuzila kuzijazyo zyamaanda aabo. (Kul. 12:1-13, 21-23) Oobu mbocakacitika. Nokwakainda ciindi, cisi coonse cakaba muntenda. Bakanyina kwakuccijila akaambo kakuti kumbele lyabo kwakali Lwizi Lusalala alimwi musyule bakali kutobelwa ampi zyabana Egepita. Jehova alimwi wakabanununa camaleele kwiinda mukubelesya Musa walo wakaandaanya meenda aamulwizi.—Kul. 14:13, 21.

17, 18. Ino muunzila nzi Jesu mwali munununi mupati ikwiinda Musa?

¹⁷ Nokuba kuti milimo eeyi yalufwutuko mmipati, lufwutuko Jehova ndwaapa kwiinda mukubelesya Jesu ndupati kwiinda. Bantu ibamvwida balakonzya kunununwa kuzwa kucibi kwiinda muli Jesu. (Rom. 5:12, 18) Alimwi oolu “[nd]ununuko lutamani.” (Heb. 9:11, 12) Izyina lya Jesu lyaamba kuti “Jehova Ndufwutuko.” Jesu mbwali munununi naa mufwutuli wesu, tatunununi buyo kuzwa kuzibi zyesu zyakaindi, pele alimwi utupa coolwe cakuti tukabe abuumi bubotu kumbele. Kwiinda mukubanununa kuzwa kubuzike bwacibi, Jesu unununa basikumutobela kuzwa kubukali bwa Leza alimwi ubagwasya kuba acilongwe cibotu a Jehova.—Mt. 1:21.

¹⁸ Akaambo kacinunuzyo ca Jesu Kristo, bantu bayooangululwa kukuciswa akulufwu. Kutegwa tucikonzye kweezyeezya ziyoocitika, atulange-lange cakacitika ciindi Jesu naakaunka kuŋanda yamwaalumi wakali kwiitwa kuti Jairo, iwakajisi mwana musimbi wakajisi myaka yakuzyalwa iili 12 iwakafwide. Jesu wakasyomezya Jairo kuti: “Utayoowi, kosyoma buyo, musimbi uyoopona.” (Lk. 8:41, 42, 49, 50) Masimpe, kweelana ambwaakaamba, musimbi wakabuka kuzwa kubafwu. Sena inga mwacikonzya kweezyeezya mbobakakkomana bazyali bakwe? Aboobo inga mwacikonzya kweezyeezya lukkomano lutaambiki ndotuyooba alwalo ciindi “boonse abali muzyuumbwe, [no]bayoozwa” baakumvwa jwi lya Jesu mububuke bwabafwu. (Joh. 5:28, 29) Masimpe Jesu Mmufwutuli, Mmunununi wesu.—Amubale Incito 5:31; Tit. 1:4; Ciy. 7:10.

19, 20. (a) Ino mbuti kuzinzibala kuyeeya mulimo ngwajisi Jesu kali Musa Mupati mbokutujatikizya? (b) Ino cibalo citobela ciyoobandika nzi?

¹⁹ Ikuzyiba kuti tulakonzya kugwasya bantu kuti bakajane lufwutuko kwiinda muli nzyaakacita Jesu, kutukulwaizya kuti katutola lubazu mumulimo wakukambauka alimwi akuyiisya. (Is. 61:1-3) Kuyungizya waawo, kuzinzibala kuyeeya mulimo ngwajisi Jesu kali Musa Mupati kutupa kusyoma kapati kuti uyoobafwutula basikumutobela ciindi aakuboola kunyonyoona basizibi.—Mt. 25:31-34, 41, 46; Ciy. 7:9, 14.

²⁰ Masimpe, Jesu ngu Musa Mupati. Wakacita zyintu zinji zibotu zyalo Musa nzyaatakali kuzookonzya kucita. Majwi ngaakaamba Jesu kali musinsimi alimwi amilimo njacita kali simwiimaakati zilabajatikizya bantu boonse. Mbwali Mufwutuli, Jesu tafwutuli kwaciindi cisyoonto buyo, pele lufwutuko ndwapa, luyoobagwasya bantu boonse kukabe kutamani. Nokuba boobo, nzinji nzyotukonzya kwiiya kujatikizya Jesu kuzwa kubaalumi bansiku ibasyomeka. Cibalo citobela ciyoobandika mbwaakali Davida Mupati alimwi a Solomoni Mupati.

Sena Inga Mwapandulula?

Ino mbuti Jesu mbwali mupati ikwiinda Musa ciindi nali

• musinsimi?

• simwiimaakati?

mufwutuli?

 [Mibuzyo yaciiyo]

Kabbokesi/[Cifwanikiso icili apeeji 26]

  Nzila Azimbi Jesu Mbwaakali Mbuli Musa

□ Boonse bobile bakasiya zyuuno zyabo zyaatala kutegwa babelekele Jehova alimwi abantu bakwe.—2 Kor. 8:9; Flp. 2:5-8; Heb. 11:24-26.

□ Boonse bobile bakabeleka kabali bananike, naa kuti bakasalwa aa Jehova.—Mk. 14:61, 62; Joh. 4:25, 26; Heb. 11:26.

□ Boonse bobile bakaliiminina zyina lya Jehova, nkokuti bakali baiminizi bakwe.—Kul. 3:13-16; Joh. 5:43; 17:4, 6, 26.

□ Boonse bobile bakali babombe moyo.—My. 12:3; Mt. 11:28-30.

□ Boonse bobile bakabelesyegwa mukusanina makamu-makamu aabantu.—Kul. 16:12; Joh. 6:48-51.

□ Boonse bobile bakabeleka kabali babetesi abasimulawo.—Kul. 18:13; Malk. 4:4; Joh. 5:22, 23; 15:10.

□ Boonse bobile bakapedwe mulimo wakuba silutwe waŋanda ya Leza.—My. 12:7; Heb. 3:2-6.

□ Boonse bobile baambwa kuti mbaakamboni ba Jehova basyomeka.—Heb. 11:24-29; 12:1; Ciy. 1:5.

□ Musa alimwi a Jesu nobakafwa, Leza wakabona masimpe kuti mibili yabo taakwe muntu wakali kukonzya kwiijana.—Dt. 34:5, 6; Lk. 24:1-3; Inc. 2:31; 1 Kor. 15:50; Jud. 9.