Sena Muciyeeyede?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwasoleka kwiingula mibuzyo eeyi iitobela:

• Ino nkaambo nzi ncotuyandika kuzumanana kuba abululami bwa Bunakristo?

Kuzumanana kuba abululami kutugwasya kuti tube kulubazu lwabweendelezi bwa Jehova alimwi akuti tutondezye kuti Saatani mmubeji. Leza uyootubeteka kweelana abululami bwesu, aboobo, bulayandika kubulangizi bwesu bwakumbele.—12/15, mapeeji 4-6.

• Ino mazyina nzi aabulemu amwi aatondezya mulimo ngwajisi Jesu mumakanze aa Leza?

Mwana simuzyalwa alikke. Ijwi. Ameni. Sikuyanzanya wacizuminano cipya. Mupaizi Mupati. Lunyungu lwakasyomezyegwa.—12/15, peeji 15.

• Ino mbuti mbotukonzya kuba alukkomano mumulimo wesu wakukambauka?

Tulakonzya kulibambila mumoyo wesu, kubikkila maanu mbotukonzya kubagwasya bantu. Tulakonzya kukambauka katujisi makanze aakutalisya ziiyo zya Bbaibbele. Ikuti naa twakazyigwa, tulakonzya kuucinca mubandi wesu akutalika kubandika zyintu nzyobabikkilide maanu bantu bamucilawo cesu.—1/15, mapeeji 8-10.

• Ino mbuti njiisyo zyamu Bbaibbele mbozyeelede kujatikizya Munakristo mbwalibona dilwe alimwi atunsiyansiya tujatikizya dilwe?

Nokuba kuti Munakristo ulakonzya kubalila bayandwa bakwe bafwa, ulizyi kuti bafwide taakwe ncobazyi. Nokuba kuti bantu batasyomi bamufwubaazya, ulatutantamuka tunsiyansiya tujatikizya kusyoma kuti bafwide balakonzya kubagwasya aabo bacipona. Kutegwa kutakabi mapenzi, Banakristo bamwi balaalemba apepa malailile aabo aajatikizya bubambe bwadilwe lyabo.—2/15, mapeeji 29-31.

• Sena “bbuku lya-Jasari” alimwi “[a]bbuku lyankondo zya-Jehova” mmabbuku aamu Bbaibbele alo aakasweeka? (Jos. 10:13; My. 21:14)

Peepe. Kuboneka kuti akali mabbuku aatakasololelwa amuuya uusalala alo aakaliko ciindi Bbaibbele nolyakali kulembwa alimwi akali kubelesyegwa mukuvwuntauzya abasikulemba Bbaibbele.—3/15, peeji 32.